1 Corinthians 7

Lahu Bible Edited © Thailand Bible Society and Bible Society of Myanmar, 2010, 2020.

1Nawˬ hui ngaˬ hta‸ li‸ bvuh‸ laˇ ve awˬ lawn teˇ hpaˍ ngaˬ nawˬ hui hta‸ kʼaw‸ bvuh‸ laˇ shaˍ. Hawˉ hkʼaˆ lehˬ, awˬ miˇ ma maˇ heuˆ kʼo da‸ ve yoˬ.

2Ya‸ hkʼaˇ, haˉ chawˇ haˉ paˆ cawˬ maˇ ve pa taw, hawˉ hkʼaˆ teˇ gʼaˇ le le awˬ miˇ ma heuˆ cawˇ leh, yaˇ miˇ teˇ gʼaˇ le le htawˇ awˬ hpawˇ heuˆ cawˇ ve yoˬ.

3Awˬ hpawˇ lehˬ, awˬ liˇ awˬ hkʼaˇ cawˬ ve hkʼe, awˬ miˇ ma hta‸ hkʼa deh‸ caˉ da‸ cawˇ ve yoˬ. Awˬ miˇ ma htawˇ, oˇ ve hkʼa shuˍ shuˍ yawˇ ve awˬ hpawˇ hta‸ hkʼa deh‸ caˉ da‸ cawˇ ve yoˬ.

4Awˬ miˇ ma lehˬ, a shu yawˇ ve awˬ to hta‸ maˇ uˉ peunˍ. Ya‸ hkʼaˇ, awˬ hpawˇ uˉ peunˍ ve yoˬ. Oˇ ve hkʼa shuˍ shuˍ, awˬ hpawˇ htawˇ a shu yawˇ ve awˬ to hta‸ maˇ uˉ peunˍ. Ya‸ hkʼaˇ, awˬ miˇ ma uˉ peunˍ ve yoˬ.

5Awˬ hpawˇ awˬ miˇ teˇ geh zuh‸ tuˬ, teˇ gʼaˇ leh teˇ gʼaˇ taˇ tawˍ taˍ. Bon hkʼa deh‸ lawˬ hpeh‸ tuˬ, nyiˇ gʼaˇ gʼaˇ nyi ma cawˇ leh teˇ tcuhˉ teˇ yanˇ teˇ geh maˇ zuh‸ ve teˇ ceuˬ maˇ heˆ kʼo, teˇ gʼaˇ leh teˇ gʼaˇ taˇ tawˍ taˍ. Awˬ to hta‸ maˇ gʼaˇ puiˉ ve pa taw, Saˍtanˍ nawˬ hui hta‸ maˇ gʼa beˬ tuˬ, awˬ hkʼaw‸ nawˉ teˇ geh kʼaw‸ chehˇ-oˆ.

6Ngaˬ chi hkʼe kʼoˆ ve lehˬ, tawˇ piˇ ve teˇ ceuˬ maˇ heˆ, a hkaw-anˬ piˇ ve teˇceuˬ yoˬ.

7Chaw hkʼa peu-eˬ hta‸ ngaˬ hkʼa shuˍ shuˍ hpeh‸ piˇ gaˇ ve yoˬ. Ya‸ hkʼaˇ, chaw teˇ gʼaˇ peuˬ teˇ gʼaˇ, Gʼuiˬsha geh a shu yawˇ ve la‸ shawnˍ teˇ gʼaˇ teˇ ceuˬ gʼa taˍ ve yoˬ.

8Awˬ hpawˇ awˬ miˇ maˇ heuˆ sheˍ ve chaw leh mehˇchawˇma teˇ hpaˍ hta‸ ngaˬ chi hkʼe kʼoˆ ve yoˬ. Yawˇ hui ngaˬ hkʼa shuˍ shuˍ te chehˇ ve kʼo da‸ ve yoˬ.

9Ya‸ hkʼaˇ, a shu yawˇ awˬ to hta‸ maˇ gʼaˇ ve kʼo, heuˆ da‸ cawˇ ve yoˬ. Awˬ lawn kʼo, awˬ hpawˇ awˬ miˇ heuˆ gaˇ leh nyi ma haw haw chiˆ chiˆ hpeh‸ ve a‸ kehˉ heuˆ da‸ ve lehˬ da‸ leuˉ ve yoˬ.

10Awˬ miˇ ma teˇ gʼaˇ lehˬ, a shu yawˇ ve awˬ hpawˇ hta‸ maˇ gʼa hpaˆ da‸ teh‸, heuˆ da‸ peuˬ ve chaw hui hta‸ ngaˬ tawˇ piˇ ve yoˬ. Chi lehˬ ngaˬ ve tawˇ hkawˇ maˇ heˆ, Jawˇmawˇ Yeˍsuˆ ve tawˇ hkawˇ hpeh‸ ve yoˬ.

11Ya‸ hkʼaˇ, hpaˆ da‸ peuˬ ve kʼo, yawˇ awˬ hpawˇ maˇ kʼaw‸ ca leh, yawˇ hkʼaˇ yawˇ chehˇ cawˇ ve yoˬ. Maˇ heˆ kʼo, yawˇ awˬ hpawˇ hta‸ kʼaw‸ cawˇ da‸ tuˬ te cawˇ ve yoˬ. Awˬ hpawˇ htawˇ, awˬ miˇ ma hta‸ maˇ gʼa baˬ.

12Awˬ viˉ awˬ nyi teˇ gʼaˇ gʼaˇ, a shu yawˇ ve awˬ miˇ ma Hkri‸ yaˇ maˇ hpeh‸ ve ka‸, yawˇ ve awˬ hpawˇ geh chehˇ gaˇ ve nyi ma cawˬ ve kʼo, yawˇ hta‸ maˇ baˬ cawˇ ve teh‸, awˬ kaˍ awˬ nu chaw teˇ hpaˍ hta‸ ngaˬ kʼoˆ ve yoˬ. Tawˇ chi ve hta‸ Jawˇmawˇ Yeˍsuˆ kʼoˆ ve maˇ heˆ, ngaˬ kʼoˆ ve yoˬ.

13Awˬ miˇ ma htawˇ, a shu yawˇ ve awˬ hpawˇ Hkri‸ yaˇ maˇ hpeh‸ ve ka‸, yawˇ ve awˬ miˇ ma geh chehˇ gaˇ ve nyi ma cawˬ ve kʼo, yawˇ hta‸ maˇ baˬ cawˇ ve yoˬ.

14Awˬ lawn kʼo, Hkri‸ yaˇ maˇ hpeh‸ ve awˬ hpawˇ lehˬ, awˬ miˇ ma hta‸ pa taw da‸ la kehˬ la ve yoˬ. Hkri‸ yaˇ maˇ hpeh‸ ve awˬ miˇ ma htawˇ, awˬ hpawˇ hta‸ pa taw da‸ la kehˬ la ve yoˬ. Chi hkʼe maˇ heˆ kʼo, nawˬ hui ve awˬ yaˇ awˬ duˬ lehˬ, maˇ da‸ maˇ kehˬ ve yoˬ. Ya‸ hkʼaˇ, chi beu‸ lehˬ yawˇ hui da‸ kehˬ peuˬ.

15Ya‸ hkʼaˇ, Hkri‸ yaˇ maˇ hpeh‸ ve chaw teˇ gʼaˇ lehˬ, awˬ hpawˇ awˬ miˇ hpaˆ da‸ gaˇ ve kʼo, hpaˆ da‸ piˇ-oˆ. Chi hkʼe te hpaˆ da‸ gaˇ ve kʼo, awˬ viˉ awˬ nyi teˇ gʼaˇ, hawˉ hkʼaˆ maˇ kʼoˆ, yaˇ miˇ maˇ kʼoˆ, Hkri‸ yaˇ maˇ hpeh‸ ve teˇ gʼaˇ hta‸ hpeh ka taˍ ve maˇ heˆ. Awˬ lawn kʼo, Gʼuiˬsha ngaˬ hui hta‸ kuˬ taˍ ve lehˬ, cawˇ da‸ hui da‸ tuˬ awˬ pon kuˬ taˍ ve yoˬ.

16Awˬ miˇ ma teˇ hpaˍ-oˬ, a shu yawˇ ve awˬ hpawˇ hta‸ htaiˍ hkʼaw‸ piˇ gʼa tuˬ leh naˍ, maˇ gʼa tuˬ leh naˍ, nawˬ hui hkʼaˬ hkʼe te shiˍ hpeh‸ le. Awˬ hpawˇ teˇ hpaˍ-oˬ, a shu yawˇ ve awˬ miˇ ma hta‸ htaiˍ hkʼaw‸ piˇ gʼa tuˬ leh naˍ, maˇ gʼa tuˬ leh naˍ, nawˬ hui hkʼaˬ hkʼe te shiˍ hpeh‸ le.

17Jawˇmawˇ Yeˍsuˆ lehˬ teˇ gʼaˇ peuˬ teˇ gʼaˇ hta‸ hpeh‸ tcuh ve hkʼe leh, Gʼuiˬsha lehˬ teˇ gʼaˇ peuˬ teˇ gʼaˇ hta‸ kuˬ taˍ ve hkʼe ceh, chaw teˇ gʼaˇ le le te kʼai sheˍ. Hkri‸ yaˇ awˬ moˍ teˇ moˍ le le awˬ hkʼaw lo ngaˬ awˬ hkʼaˇ chi hkʼe te teh taˍ ve yoˬ.

18Chaw teˇ gʼaˇ gʼaˇ hta‸ Gʼuiˬsha kuˬ yuˬ htaˇ, yawˇ awˬ guiˬ meuˇ shoˍ ve chaw hpeh‸ ve laˇ. Awˬ guiˬ meuˇ maˇ shoˍ ve hkʼe taˇ kʼaw‸ te. Chaw teˇ gʼaˇ gʼaˇ hta‸ kuˬ yuˬ htaˇ, awˬ guiˬ meuˇ maˇ shoˍ ve chaw hpeh‸ ve laˇ. Awˬ guiˬ meuˇ shoˍ ve taˇ te.

19Awˬ lawn kʼo, awˬ guiˬ meuˇ shoˍ ve maˇ kʼoˆ, awˬ guiˬ meuˇ maˇ shoˍ ve maˇ kʼoˆ, te‸ chiˉ awˬ bon maˇ cawˬ. Gʼuiˬsha ve awˬliˇtawˇhkawˇ hta‸ na yuˬ leh te ve teˇ ceuˬ ceh tiˉ awˬ bon cawˬ ve yoˬ.

20Teˇ gʼaˇ peuˬ teˇ gʼaˇ kuˬ yuˬ htaˇ hpeh‸ chehˇ taˍ ve hkʼe ceh, hpeh‸ chehˇ taˍ sheˍ.

21Nawˬ hta‸ kuˬ yuˬ htaˇ, nawˬ awˬ ceˬ hpeh‸ chehˇ ve laˇ. Chi ve hta‸ nawˬ taˇ dawˇ haˍ. Ya‸ hkʼaˇ, awˬ ceˬ te ve awˬ hkʼaw lo nawˬ ponˬ hpeh‸ ve hkʼe kʼo, nawˬ tawˆ kʼai cawˇ ve yoˬ.

22Awˬ lawn kʼo, awˬ ceˬ hpeh‸ chehˇ htaˇ, Jawˇmawˇ Yeˍsuˆ kuˬ yuˬ taˍ ve chaw teˇ gʼaˇ lehˬ, Jawˇmawˇ Yeˍsuˆ ve ponˬ ve chaw hpeh‸ la ve yoˬ. Chi hkʼa shuˍ shuˍ, ponˬ ve chaw hpeh‸ chehˇ htaˇ, Jawˇmawˇ Yeˍsuˆ kuˬ yuˬ taˍ ve chaw teˇ gʼaˇ lehˬ, yawˇ ve awˬ ceˬ hpeh‸ la ve yoˬ.

23Gʼuiˬsha awˬ hpfuhˇ piˇ leh nawˬ hui hta‸ vuiˬ hkʼaw‸ taˍ ve pa taw, chaw yaˇ ve awˬ ceˬ taˇ hpeh‸ la piˇ.

24Awˬ viˉ awˬ nyi teˇ hpaˍ-oˬ, nawˬ hui hta‸ kuˬ yuˬ htaˇ teˇ gʼaˇ peuˬ teˇ gʼaˇ hpeh‸ chehˇ taˍ ve hkʼe, Gʼuiˬsha geh teˇ geh oˇ hkʼe hpeh‸ chehˇ taˍ-o‸.

25Yaˇ miˇ haˉ teˇ hpaˍ awˬ pon Jawˇmawˇ Yeˍsuˆ geh ngaˬ gʼa taˍ ve tawˇ maˇ cawˬ. Ya‸ hkʼaˇ, Jawˇmawˇ Yeˍsuˆ ha kʼaˉ laˇ ve awˬ bon hta‸ pa taw ngaˬ ka ti‸ yeˬ ve chaw hpeh‸ ve hkʼe, ngaˬ ve dawˇ hkʼaˇ nawˬ hui hta‸ hto laˇ ve yoˬ.

26Hkʼe te leh, chi beu‸ tu‸ hkanˍ jaˇ ve awˬ yanˇ gaˬ la ve pa taw, chaw teˇ gʼaˇ le le a shu yawˇ hpeh‸ chehˇ ve hkʼe chehˇ taˍ ve kʼo, da‸ jaˇ ve yoˬ.

27Nawˬ awˬ miˇ ma cawˬ laˇ. Cawˬ kʼo, yawˇ hta‸ taˇ baˬ. Nawˬ awˬ miˇ ma maˇ cawˬ laˇ. Maˇ cawˬ kʼo awˬ miˇ ma taˇ heuˆ.

28Ya‸ hkʼaˇ, nawˬ awˬ miˇ ma heuˆ ve kʼo, venˇbaˆ te ve maˇ heˆ. Yaˇ miˇ haˉ htawˇ, awˬ hpawˇ heuˆ ve kʼo, venˇbaˆ te ve maˇ heˆ. Ya‸ hkʼaˇ, chi hkʼe te ve chaw lehˬ, awˬ suhˍ awˬ shaˍ hpawˇ gʼa tu‸ gʼa hkanˍ tuˬ yoˬ. Tu‸ ve hkanˍ ve chi ngaˬ nawˬ hui hta‸ ponˬ piˇ gaˇ ve yoˬ.

29Awˬ viˉ awˬ nyi teˇ hpaˍ-oˬ, ngaˬ kʼoˆ gaˇ ve lehˬ, awˬ yanˇ ngeh jaˇ peuˬ. Chi beu‸ hta‸ tanˬ leh, awˬ miˇ ma cawˬ ve chaw lehˬ, awˬ miˇ ma maˇ cawˬ ve chaw hkʼe chehˇ-oˆ.

30Paˆ hawˬ kehˇ hawˬ ve chaw lehˬ, maˇ hawˬ ve chaw hkʼe chehˇ-oˆ. Ha lehˬ ve chaw lehˬ, maˇ ha lehˬ ve chaw hkʼe chehˇ-oˆ. Mawˇ vuiˬ ve chaw lehˬ, mawˇ maˇ cawˬ ve chaw hkʼe chehˇ-oˆ.

31Miˬguiˬ hta‸ caˉ da‸ ve teˇ hpaˍ hta‸ ca ve chaw lehˬ, maˇ ca ve chaw hkʼe chehˇ-oˆ. Awˬ lawn kʼo, miˬguiˬ ve awˬ liˇ awˬ hkʼaˇ lehˬ, pa kʼai mehˉ kʼai chehˇ ve yoˬ.

32Nawˬ hui maˇ gʼa dawˇ haˍ tuˬ ngaˬ heuˆ gaˇ ve yoˬ. Awˬ miˇ ma maˇ cawˬ ve chaw lehˬ, hkʼaˬ hkʼe te leh Jawˇmawˇ Yeˍsuˆ nyi ma cawˇ tuˬ, Jawˇmawˇ Yeˍsuˆ ve kanˉ hta‸ yawˇ dawˇ nyi leh shaˍ ti‸ taˍ puiˉ ve yoˬ.

33Ya‸ hkʼaˇ, awˬ miˇ ma cawˬ ve chaw teˇ gʼaˇ lehˬ, hkʼaˬ hkʼe te leh awˬ miˇ ma nyi ma cawˇ tuˬ, miˬguiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ. Yawˇ lehˬ, nyi ma nyiˇ hkʼaˇ dawˇ puiˉ ve yoˬ.

34Awˬ hpawˇ maˇ cawˬ ve yaˇ miˇ leh yaˇ miˇ haˉ teˇ hpaˍ lehˬ, hkʼaˬ hkʼe te leh awˬ to hpawˇ leh co ha hpawˇ da‸ la kehˬ la tuˬ, Jawˇmawˇ Yeˍsuˆ ve kanˉ hta‸ yawˇ hui dawˇ nyi leh shaˍ ti‸ taˍ puiˉ ve yoˬ. Ya‸ hkʼaˇ, awˬ hpawˇ cawˬ ve yaˇ miˇ lehˬ, hkʼaˬ hkʼe te leh awˬ hpawˇ nyi ma cawˇ tuˬ miˬguiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ.

35Ngaˬ chi hkʼe kʼoˆ ve lehˬ, nawˬ hui awˬ pon awˬ bon cawˬ tuˬ ngaˬ kʼoˆ ve yoˬ. Ngaˬ nawˬ hui hta‸ va htaw ve maˇ heˆ. Ya‸ hkʼaˇ, nawˬ hui lehˬ, keunˍ ve cawˇ ve hkʼe te leh, nyi ma htawˇ hpfuhˆ nawˬ hpfuhˆ maˇ cawˬ ve awˬ hkʼaw lo Jawˇmawˇ Yeˍsuˆ awˬ pon kanˉ hkʼa deh‸ te tuˬ, ngaˬ chi hkʼe kʼoˆ ve yoˬ.

36Awˬ pa teˇ gʼaˇ lehˬ, yawˇ ve awˬ yaˇ miˇ, yaˇ miˇ haˉ te ve awˬ yanˇ ponˬ leh, awˬ hpawˇ maˇ heuˆ ve teˇ ceuˬ maˇ da‸ teh‸ dawˇ ve kʼo, awˬ yaˇ miˇ awˬ hpawˇ heuˆ gaˇ ve hkʼe heuˆ piˇ lawˬ-o‸. Awˬ pa lehˬ, venˇbaˆ te ve maˇ heˆ. Yawˇ huiˉ maˬ hta‸ heuˆ da‸ tcuh-o.

37Ya‸ hkʼaˇ, a shu htawˇ maˇ kʼoˆ, nyi ma yeˬ leh yawˇ ve yaˇ miˇ hta‸ awˬ hpawˇ maˇ heuˆ tcuh ka‸ hpeh‸ chehˇ ve awˬ hkʼoˆ, yawˇ te gaˇ ve hkʼe te hpeh‸ leh, yawˇ hta‸ awˬ hpawˇ maˇ heuˆ tcuh tuˬ nyi ma awˬ hkʼaw lo dawˇ cheˆ taˍ ve kʼo, yawˇ da‸ ve hta‸ te ve yoˬ.

38Hkʼe te leh, yawˇ ve yaˇ miˇ hta‸ awˬ hpawˇ heuˆ tcuh ve chaw lehˬ da‸ ve hta‸ te ve yoˬ. Maˇ heuˆ tcuh ve chaw htawˇ, leuˉ leh da‸ ve hta‸ te ve yoˬ.

39Awˬ miˇ ma lehˬ, yawˇ ve awˬ hpawˇ maˇ suh ve ceh ceh, yawˇ ve awˬ hpawˇ geh hpeh ka taˍ ve yoˬ. Yawˇ ve awˬ hpawˇ suh peuˬ kʼo, yawˇ heuˆ gaˇ ve chaw hta‸ kʼaw‸ heuˆ hpeh‸ ve yoˬ. Ya‸ hkʼaˇ, Jawˇmawˇ Yeˍsuˆ hta‸ cuˇ ve awˬ hkʼaw lo ceh tiˉ heuˆ hpeh‸ ve yoˬ.

40Ngaˬ dawˇ ve lehˬ, maˇ kʼaw‸ heuˆ leh chehˇ hpeh‸ ve kʼo, leuˉ leh yawˇ pon ha lehˬ tuˬ cawˬ ve yoˬ. Ngaˬ chi hkʼe kʼoˆ ve lehˬ, Gʼuiˬ sha ve Awˬ ha hpu cawˬ leh kʼoˆ ve teh‸ dawˇ ve yoˬ.

← Chapter 6 Jump to: Chapter 8 →