1 Corinthians 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Hkʼe te leh, ngaˬ hui lehˬ Hkri‸ ve awˬ ceˬ hpeh‸ leh, Gʼuiˬsha ve naˉ jaˇ ve awˬ lawn teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ teh‸, shu ngaˬ hui hta‸ shawˍ taˍ laˇ cawˇ ve yoˬ.

2Ha‸ shaˉ shehˍ hpaˇ teˇ hpaˍ lehˬ, ka ti‸ yeˬ ve chaw gʼa hpeh‸ ve yoˬ.

3Ya‸ hkʼaˇ, nawˬ hui maˇ kʼoˆ, awˬ kaˍ awˬ nu chaw maˇ kʼoˆ, ngaˬ hta‸ suhˉ jehˬ laˇ ve lehˬ, i jaˇ ve awˬ ceuˬ hpeh‸ ve yoˬ teh‸ ngaˬ shawˍ taˍ ve yoˬ. Ngaˬ hkʼaˇ ngaˬ awˬ to hta‸ ka‸ suhˉ maˇ jehˬ.

4Awˬ lawn kʼo, ngaˬ awˬ to ya‸ kuiˬ cawˬ ve hta‸ ngaˬ maˇ dawˇ. Ya‸ hkʼaˇ, chi hta‸ pa taw ngaˬ hteˇ ve cawˇ ve chaw hpeh‸ ve maˇ heˆ. Ngaˬ hta‸ suhˉ jehˬ shehˍ hpaˇ lehˬ, Jawˇmawˇ Yeˍsuˆ yoˬ.

5Hkʼe te leh, awˬ yanˇ maˇ gaˬ sheˍ ve ceh ceh, hkʼaˬ ve teˇ ceuˬ awˬ lawn hta‸ maˇ kʼoˆ, suhˉ taˇ taˆ sheˍ. Jawˇmawˇ Yeˍsuˆ gaˬ la htaˇ naˆ ho‸ ve awˬ hkʼaw lo faˉ taˍ ve awˬ ceuˬ teˇ hpaˍ hkʼa tawˍ lehˆ tawˆ la tuˬ yawˇ te leh, chaw yaˇ ve nyi ma dawˇ hkʼaˇ teˇ hpaˍ hta‸ yawˇ hpeu‸ tawˆ la tuˬ yoˬ. Oˇ htaˇ, a shu yawˇ keunˍ ve hkʼe chaw teˇ gʼaˇ le le hta‸ Gʼuiˬsha chiˇ mvuh piˇ tuˬ yoˬ.

6Awˬ viˉ awˬ nyi teˇ hpaˍ-oˬ, awˬ lawn chi teˇ hpaˍ ngaˬ bvuh‸ laˇ ve lehˬ, ngaˬ leh Aˍpawˇlu‸ hta‸ nawˬ hui henˇ yuˬ jawˬ yuˬ hpeh‸ tuˬ, nawˬ hui awˬ pon ngaˬ tawˇ pa haˉ te maˍ laˇ ve yoˬ. Li‸ hpu hkʼaw bvuh‸ taˍ ve awˬ hkʼaˇ suh ceh tiˉ nawˬ hui te tuˬ leh, teˇ gʼaˇ hta‸ chiˇ uiˍ chiˇ mvuh leh teˇ gʼaˇ hta‸ maˇ shawˍ maˇ caˆ nawˬ hui maˇ gʼa te tuˬ, ngaˬ chi hkʼe te maˍ laˇ ve yoˬ.

7Awˬ lawn kʼo, shu hta‸ peun da‸ tuˬ a shu nawˬ hta‸ te laˇ ve le. Gʼuiˬsha geh gʼa taˍ ve maˇ heˆ kʼo, nawˬ aˬ hto‸ ma cawˬ le. Gʼuiˬsha geh gʼa taˍ ve kʼo, Gʼuiˬsha geh maˇ gʼa ve hkʼe te leh aˬ hto‸ ma te nawˬ nyi ma uiˍ ve le.

8Chi beu‸ lehˬ, nawˬ hui nyi hkʼaˇ suh peuˬ leˇ. Chi beu‸ lehˬ, nawˬ hui paw sha la peuˬ leˇ. Ngaˬ hui maˇ heˆ ka‸, nawˬ hui uˉ peunˍ gʼa ve law leˇ. Nawˬ hui awˬ tehˬ awˬ na uˉ peunˍ tuˬ ve hta‸ ngaˬ heuˆ gaˇ ve yoˬ. Oˇ hkʼe hpeh‸ ve kʼo, ngaˬ hui htawˇ nawˬ hui geh teˇ geh gʼa uˉ peunˍ tuˬ yoˬ.

9Awˬ lawn kʼo, tiˇ pehˍ ve hta‸ gʼa hkanˍ tuˬ suhˉ taˆ peuˬ ve chaw hui hkʼe, Gʼuiˬ sha lehˬ ngaˬ hui tcuh yaˇ teˇ hpaˍ hta‸ awˬ leh meuˇ htaˇ maw piˇ tuˬ awˬ pon teh taˍ ve yoˬ teh‸ ngaˬ dawˇ ve yoˬ. Ngaˬ hui lehˬ, miˬguiˬ yaˇ hui, mvuhˇ naw ma tcuh yaˇ hui leh chaw yaˇ hui mehˆ gʼuˇ suhˍ nyi guiˇ tuˬ awˬ pon ceh hpeh‸ ve yoˬ.

10Ngaˬ hui Hkri‸ awˬ pon cuˇ yiˍ maˇ cawˬ ve chaw hpeh‸ ve ka‸, nawˬ hui lehˬ Hkri‸ awˬ hkʼaw lo cuˇ yiˍ cawˬ paˍ hpeh‸ ve yoˬ. Ngaˬ hui awˬ gʼaˇ nuˇ ve chaw hpeh‸ ve ka‸, nawˬ hui lehˬ awˬ gʼaˇ uiˍ ve chaw hpeh‸ ve yoˬ. Nawˬ hui awˬ me‸ awˬ hponˇ cawˬ ve chaw hpeh‸ ve ka‸, ngaˬ hui lehˬ shu shawˍ baˬ taˍ ve chaw hpeh‸ ve yoˬ.

11Chi beu‸ hkʼa gaˬ ngaˬ hui lehˬ, awˍ meu‸ ve, iˉ kaˆ shiˉ ve, maˇ gʼa veu‸ maˇ gʼa deh ve, dawˆ ve tiˇ ve hta‸ gʼa hkanˍ leh, chehˇ kuiˬ awˬ ti maˇ cawˬ ve chaw hpeh‸ ve yoˬ.

12Ngaˬ hui ve la‸ sheh kanˉ gʼaˇ hte‸ gʼa te caˇ chehˇ ve yoˬ. Shu ngaˬ hui hta‸ hkʼa mvuhˇ hkʼa na kʼoˆ laˇ htaˇ, ngaˬ hui bon kʼaw‸ na‸ piˇ ve yoˬ. Shu ngaˬ hui hta‸ fawˉ mehˍ laˇ htaˇ, ngaˬ hui yeunˇ hkanˍ ve yoˬ.

13Shu ngaˬ hui hta‸ maˇ shawˍ maˇ caˆ kʼoˆ laˇ htaˇ, kʼaw‸ cawˇ da‸ tuˬ ngaˬ hui lawˬ hkawˉ ve yoˬ. Chi beu‸ hkʼa gaˬ miˬguiˬ ve cha‸ chiˆ ve teˇ ceuˬ hkʼe ngaˬ hui hpeh‸ leh, hkʼa peu-eˬ ve hta‸ shu shiˆ baˬ taˍ ve awˬ puiˍ taˆ hkʼe hpeh‸ ve yoˬ.

14Nawˬ hui ya‸ taw tuˬ ngaˬ chi hkʼe bvuh‸ ve maˇ heˆ. Ya‸ hkʼaˇ, nawˬ hui hta‸ ngaˬ ha‸ ve yaˇ hkʼa shuˍ shuˍ shawˍ taˍ leh, shaˍ ti‸ pe‸ laˇ ve yoˬ.

15Awˬ lawn kʼo, Hkri‸ awˬ hkʼaw lo nawˬ hui saˍ la‸ awˬ meunˍ gʼaˇ hkʼe cawˬ htawˇ, awˬ pa laiˉ gʼaˇ maˇ cawˬ. Ngaˬ ha lehˬ ve bon hkawˇ hta‸ cuˇ leh nawˬ hui hta‸ Yeˍsuˆ Hkri‸ awˬ hkʼaw lo paw la piˇ peuˬ.

16Hkʼe te leh, ngaˬ te ve hkʼa shuˍ shuˍ nawˬ hui te tuˬ, ngaˬ nawˬ hui hta‸ lawˬ hkawˉ ve yoˬ.

17Chi hta‸ pa taw, Jawˇmawˇ Yeˍsuˆ awˬ hkʼaw lo ka ti‸ yeˬ ve, ngaˬ ha‸ ve yaˇ Tiˆmoˉseˍ hta‸ nawˬ hui geh ngaˬ peu laˇ ve yoˬ. Teˇ kaˬ le le lo chehˇ ve Hkri‸ yaˇ awˬ moˍ hkʼa peu-eˬ hta‸ ngaˬ maˍ piˇ ve hkʼe, Hkri‸ awˬ hkʼaw lo ngaˬ te ve awˬ hkʼaˇ teˇ hpaˍ yawˇ nawˬ hui hta‸ kʼaw‸ dawˇ nawˇ piˇ tuˬ yoˬ.

18Ngaˬ nawˬ hui geh maˇ laˬ teh‸ chaw teˇ hpaˍ hpaˍ dawˇ leh nyi ma uiˍ chehˇ ve yoˬ.

19Ya‸ hkʼaˇ, Jawˇmawˇ Yeˍsuˆ a loˍ cawˇ ve kʼo, maˇ maw maw ngaˬ nawˬ hui geh laˬ tuˬ yoˬ. Ngaˬ gaˬ la htaˇ, ngaˬ gʼa shiˍ tuˬ ve lehˬ, nyi ma uiˍ ve mvuh ve chaw oˇ ve teˇ hpaˍ ve tawˇ hkawˇ hta‸ maˇ heˆ, yawˇ hui kanˇ paˆ cawˬ maˇ cawˬ ve hta‸ gʼa shiˍ tuˬ yoˬ.

20Awˬ lawn kʼo, Gʼuiˬsha ve mvuhˇmiˬ lehˬ, tawˇ yaw ve hkawˇ hta‸ caˉ da‸ ve maˇ heˆ. Kanˇ paˆ hta‸ caˉ da‸ ve yoˬ.

21Nawˬ hui hkʼaˬ hkʼe heuˆ gaˇ ve le. Ngaˬ lehˬ, suhˆ taˬ yuˬ leh gʼa laˬ tuˬ ve laˇ. Maˇ heˆ kʼo, ha‸ pehnˇ ve leh nyi ma nuˇ nehˬ ve awˬ hkʼaw lo gʼa laˬ tuˬ ve laˇ.

← Chapter 3 Jump to: Chapter 5 →