1 Corinthians 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Ngaˬ lehˬ ponˬ peuˬ ve chaw hpeh‸ ve maˇ heˆ laˇ. Tcuh yaˇ ka‸ ngaˬ hpeh‸ ve maˇ heˆ laˇ. Ngaˬ hui ve Jawˇ mawˇ Yeˍsuˆ hta‸ ngaˬ gʼa mawˬ peuˬ ve maˇ heˆ laˇ. Nawˬ hui lehˬ, Jawˇmawˇ Yeˍsuˆ awˬ hkʼaw lo ngaˬ te taˍ ve kanˉ hpeh‸ ve maˇ heˆ laˇ.

2Shu awˬ pon ngaˬ tcuh yaˇ maˇ hpeh‸ htawˇ, nawˬ hui awˬ pon ngaˬ tcuh yaˇ hpeh‸ tehˬ ve yoˬ. Awˬ lawn kʼo, ngaˬ lehˬ Jawˇmawˇ Yeˍsuˆ ve tcuh yaˇ hpeh‸ ve yoˬ teh‸, nawˬ hui lehˬ ngaˬ ve shaˉ hkiˆ hpeh‸ ve yoˬ.

3Ngaˬ hta‸ lawˇ nyi ve chaw teˇ hpaˍ hta‸ ngaˬ chi hkʼe kʼaw‸ yaw hkʼaw‸ piˇ tuˬ yoˬ.

4Ngaˬ hui gʼa caˇ gʼa dawˬ tuˬ a hkaw-anˬ maˇ cawˬ laˇ.

5Awˬ kaˍ awˬ nu tcuh yaˇ teˇ hpaˍ, Jawˇ mawˇ Yeˍsuˆ ve awˬ nyi paˍ teˇ hpaˍ leh, Keˍhpaˆ hui hkʼa shuˍ shuˍ, awˬ miˇ ma hta‸ shiˍ toˇ tuˬ ngaˬ hui a hkaw-anˬ maˇ cawˬ laˇ.

6Ngaˬ leh Baˍnaˍbaˆ ceh tiˉ la‸ sheh kanˉ maˇ gʼa te tuˬ a hkaw-anˬ maˇ cawˬ laˇ.

7A shu yawˇ ve caˇ tuˬ hta‸ caˇ leh ma‸ yaˇ te ve chaw, a shu teˇ gʼaˇ cawˬ le. Hko te leh iˉ shiˍ maˇ shaˉ caˇ ve, a shu teˇ gʼaˇ cawˬ le. Ceˇ caˬ awˬ moˍ hta‸ hawˉ leh cuˉ gʼuiˬ maˇ dawˬ ve, a shu teˇ gʼaˇ cawˬ le.

8Chaw yaˇ ve tawˇ hkawˇ hta‸ cuˇ leh ngaˬ kʼoˆ ve laˇ. Awˬliˇtawˇhkawˇ htawˇ chi hkʼe kʼoˆ taˍ ve maˇ heˆ laˇ.

9Awˬ lawn kʼo, Moˉseˍ ve awˬliˇtawˇhkawˇ li‸ awˬ hkʼaw lo bvuh‸ taˍ ve hkʼe, Caˬ naˆ chehˇ ve nuˇ hta‸ maw‸ kʼaw maˇ gʼa hoˆ taˍ teh‸ bvuh‸ taˍ ve yoˬ. Gʼuiˬsha lehˬ nuˇ awˬ pon dawˇ nyi ve laˇ. Ngaˬ hui awˬ pon yawˇ dawˇ nyi leh kʼoˆ ve maˇ heˆ laˇ.

10Yoˬ, ngaˬ hui awˬ pon bvuh‸ taˍ ve yoˬ. Awˬ lawn kʼo, ti mi mehˇ ve chaw lehˬ, dawˇ law ve awˬ hkʼaw lo mehˇ cawˇ ve yoˬ. Caˬ jaw‸ ve chaw htawˇ, caˬ shiˍ gʼa tuˬ dawˇ law leh jaw‸ cawˇ ve yoˬ.

11Ngaˬ hui lehˬ, nawˬ hui awˬ hkʼaw lo co ha hpawˇ ve awˬ yawˇ sheˍ peuˬ leh, awˬ suhˍ awˬ shaˍ hpawˇ ve awˬ shiˍ teˇ hpaˍ hta‸ gʼa gʼeu‸ ve kʼo, ngaˬ hui te ya‸ ve teh‸ nawˬ hui dawˇ ve laˇ.

12Awˬ kaˍ awˬ nu chaw nawˬ hui geh awˬ suhˍ awˬ shaˍ hpawˇ ve awˬ shiˍ hta‸ gʼeu‸ tuˬ a hkaw-anˬ cawˬ ve kʼo, ngaˬ hui leuˉ leh a hkaw-anˬ cawˬ ve maˇ heˆ laˇ. Ya‸ hkʼaˇ, ngaˬ hui a hkaw-anˬ cawˬ htawˇ maˇ te. Awˬ lawn kʼo, Hkri‸ ve ha lehˬ ve bon hkawˇ hta‸ maˇ gʼa tawˍ taˍ tuˬ, hkʼa peu-eˬ hta‸ ngaˬ hui yeunˇ hkanˍ ve yoˬ.

13Bon yehˬ lonˉ awˬ hkʼaw lo kanˉ te ve chaw hui lehˬ, bon yehˬ lonˉ hta‸ caˉ da‸ ve caˇ tuˬ hta‸ gʼa caˇ leh, tanˇ kuiˬ lo kanˉ te ve chaw hui lehˬ, tanˇ taˍ ve teˇ hpaˍ hpaˍ hta‸ gʼa pehˬ caˇ ve hta‸ nawˬ hui maˇ shiˍ laˇ.

14Oˇ ve hkʼa shuˍ shuˍ, ha lehˬ ve bon hkawˇ maˍ piˇ ve chaw hui lehˬ, ha lehˬ ve bon hkawˇ maˍ piˇ ve hta‸ pa taw gʼa caˇ gʼa dawˬ tuˬ yoˬ teh‸, Jawˇmawˇ Yeˍsuˆ tawˇ piˇ taˍ ve yoˬ.

15Ya‸ hkʼaˇ ngaˬ lehˬ, chi teˇ hpaˍ hta‸ te tuˬ a hkaw-anˬ cawˬ ve ka‸ ngaˬ maˇ te. Nawˬ hui ngaˬ hta‸ chi hkʼe te laˇ tuˬ awˬ pon ngaˬ li‸ chi bvuh‸ laˇ ve maˇ heˆ. Awˬ lawn kʼo, chaw teˇ gʼaˇ gʼaˇ ngaˬ nyi ma uiˍ kuiˬ chi hta‸ te luˬ te mehˉ laˇ ve a‸ kehˉ, ngaˬ suh kʼo da‸ ve yoˬ.

16Ngaˬ ha lehˬ ve bon hkawˇ maˍ piˇ ve lehˬ, ngaˬ awˬ pon nyi ma uiˍ kuiˬ maˇ cawˬ. Awˬ lawn kʼo, ngaˬ ha lehˬ ve bon hkawˇ maˇ maˍ kʼo, chehˇ maˇ hpeh‸ leh, ngaˬ awˬ pon dawˇ haˍ jaˇ ve teˇ ceuˬ hpeh‸ ve yoˬ.

17Hpu maˇ caˇ leh ha lehˬ ve bon hkawˇ maˍ piˇ ve hta‸ ngaˬ te gaˇ leh te ve kʼo, awˬ bon gʼa ve yoˬ. Ya‸ hkʼaˇ, ngaˬ maˇ te gaˇ ve ka‸ ngaˬ hta‸ chiˇ a‸ taˍ laˇ ve kanˉ cawˬ leh gʼa te ve yoˬ.

18Hkʼe te leh, ngaˬ awˬ bon gʼa ve lehˬ hkʼaˬ hkʼe ve le. Ha lehˬ ve bon hkawˇ maˍ piˇ ve teˇ yanˇ, hpu caˇ tuˬ a hkaw-anˬ cawˬ ve ka‸ ngaˬ maˇ caˇ leh, na shehˍ hpaˇ hui te‸ chiˉ awˬ hpfuhˇ maˇ peuˬ ve pa taw, ngaˬ awˬ bon gʼa ve yoˬ.

19Ngaˬ lehˬ, chaw teˇ gʼaˇ ve awˬ ceˬ ka‸ maˇ hpeh‸ htawˇ, chaw maˇ maˇ hta‸ maˍ gʼa hpeh‸ tuˬ, chaw hkʼa peu-eˬ ve awˬ ceˬ ngaˬ hpeh‸ la peuˬ.

20Yuˇda‸ chaw hui hta‸ maˍ gʼa hpeh‸ tuˬ, Yuˇda‸ chaw hui awˬ pon Yuˇda‸ chaw hkʼe ngaˬ hpeh‸ la peuˬ. Ngaˬ awˬ to awˬ liˇ tawˇ hkawˇ awˬ hawˉ lo maˇ chehˇ htawˇ, awˬliˇtawˇhkawˇ awˬ hawˉ lo chehˇ ve chaw hui hta‸ maˍ gʼa hpeh‸ tuˬ, yawˇ hui awˬ pon awˬliˇtawˇhkawˇ awˬ hawˉ lo chehˇ ve chaw hkʼe ngaˬ hpeh‸ la peuˬ.

21Awˬliˇtawˇhkawˇ maˇ cawˬ ve chaw hui hta‸ maˍ gʼa hpeh‸ tuˬ, yawˇ hui awˬ pon awˬliˇtawˇhkawˇ maˇ cawˬ ve chaw hkʼe ngaˬ hpeh‸ la peuˬ. Gʼuiˬsha mehˆ gʼuˇ suhˍ lo ngaˬ awˬ pon awˬ liˇ tawˇ hkawˇ maˇ cawˬ ve maˇ heˆ. Hkri‸ ve awˬliˇtawˇhkawˇ awˬ hawˉ lo ngaˬ chehˇ ve yoˬ.

22Awˬ gʼaˇ nuˇ ve chaw hui hta‸ maˍ gʼa hpeh‸ tuˬ, yawˇ hui awˬ pon ngaˬ awˬ gʼaˇ nuˇ ve chaw hkʼe hpeh‸ la peuˬ. Hkʼaˬ hkʼe te leh chaw teˇ hpaˍ hpaˍ htaiˍ hkʼaw‸ ve hta‸ gʼa tuˬ, chaw hkʼa peu-eˬ awˬ pon ngaˬ teˇ ceuˬ le le hpeh‸ la peuˬ.

23Ha lehˬ ve bon hkawˇ ve awˬ bon hta‸ ngaˬ htawˇ shu geh teˇ geh gʼa tuˬ, ha lehˬ ve bon hkawˇ awˬ pon chi hkʼa peu-eˬ hta‸ ngaˬ te ve yoˬ.

24Gʼuiˇ da‸ ve awˬ hkʼaw lo, gʼuiˇ da‸ shehˍ hpaˇ hkʼa peu-eˬ gʼuiˇ ve htawˇ, teˇ gʼaˇ tiˉ la‸ shawnˍ gʼa ve hta‸ nawˬ hui maˇ shiˍ laˇ. Hkʼe te leh, nawˬ hui la‸ shawnˍ hta‸ gʼa tuˬ gʼuiˇ-oˆ.

25Gʼuiˇ da‸ ve pawehˇ awˬ hkʼaw lo gʼuiˇ da‸ ve chaw teˇ gʼaˇ le le lehˬ, teˇ ceuˬ le le awˬ hkʼaw lo a shu yawˇ awˬ to hta‸ o‸ yuˬ puiˉ ve yoˬ. Yawˇ hui lehˬ, luˬ puiˉ sheˆ puiˉ ve uˉ tcuhˍ hta‸ gʼa tuˬ te ve yoˬ. Ya‸ hkʼaˇ, ngaˬ hui lehˬ maˇ luˬ maˇ sheˆ puiˉ ve uˉ tcuhˍ hta‸ gʼa tuˬ te ve yoˬ.

26Hkʼe te leh, htawˇdawˇnawˬdawˇ te leh ngaˬ gʼuiˇ ve maˇ heˆ. Chu-eˬ da‸ ve teˇ yanˇ, hkʼe leˇ mvuhˇ haw hta‸ ceh ngaˬ chu-eˬ ve maˇ heˆ.

27Ya‸ hkʼaˇ, ngaˬ shu hta‸ bon maˍ piˇ peuˬ hkʼaw‸ nawˉ, ngaˬ awˬ to shawˍ baˬ taˍ ve chaw maˇ gʼa hpeh‸ tuˬ, ngaˬ ve awˬ to hta‸ chu-eˬ leh, ngaˬ ve awˬ to hta‸ uˉ peunˍ tuˬ te ve yoˬ.

← Chapter 8 Jump to: Chapter 10 →