1 Corinthians 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Nawˬ hui teˇ gʼaˇ gʼaˇ awˬ viˉ awˬ nyi hta‸ tawˇ te da‸ tuˬ cawˬ htaˇ, Hkri‸ yaˇ hui geh maˇ kʼai leh, nawˬ hui hta‸ suhˉ jehˬ laˇ tuˬ lawˇ kiˍ yaˇ hui geh kʼai ve laˇ.

2Hkri‸ yaˇ hui lehˬ, miˬguiˬ yaˇ hui hta‸ suhˉ gʼa jehˬ tuˬ ve hta‸ nawˬ hui maˇ shiˍ laˇ. Nawˬ hui lehˬ, miˬguiˬ yaˇ hta‸ suhˉ gʼa jehˬ kʼo, i jaˇ ve awˬ lawn teˇ hpaˍ hta‸ nawˬ hui suhˉ jehˬ maˇ keunˍ leh laˇ.

3Nyiˬ hui lehˬ, mvuhˇ naw ma tcuh yaˇ hui hta‸ suhˉ gʼa jehˬ tuˬ ve hta‸ nawˬ hui maˇ shiˍ laˇ. Hkʼe te leh, miˬguiˬ hkʼoˆ te‸ chehˇ ve awˬ yanˇ awˬ hkʼaw lo leuˉ leh suhˉ gʼa jehˬ tuˬ ve maˇ heˆ laˇ.

4Chi hkʼe ve teˇ hpaˍ hta‸ suhˉ jehˬ tuˬ cawˬ ve kʼo, awˬ me‸ awˬ hponˇ maˇ cawˬ teh‸ Hkri‸ yaˇ awˬ moˍ shawˍ taˍ ve chaw teˇ hpaˍ hta‸ suhˉ jehˬ shehˍ hpaˇ te tcuh tuˬ, nawˬ hui teh taˍ ve laˇ.

5Ngaˬ chi hkʼe kʼoˆ ve lehˬ, nawˬ hui ya‸ taw tuˬ awˬ pon ngaˬ kʼoˆ ve yoˬ. Awˬ viˉ awˬ nyi teˇ gʼaˇ leh teˇ gʼaˇ maˇ cawˇ da‸ ve awˬ kaˍ lo jehˬ cheˆ tuˬ, nawˬ hui awˬ hkʼaw lo cuˇ yiˍ cawˬ ve chaw teˇ gʼaˇ ka‸ maˇ cawˬ leh laˇ.

6Ya‸ hkʼaˇ, awˬ viˉ awˬ nyi teˇ gʼaˇ leh teˇ gʼaˇ tawˇ te da‸ ve awˬ hkʼoˆ, maˇ yonˍ ve chaw hui mehˆ gʼuˇ suhˍ ka‸ tawˇ te da‸ ve law leˇ.

7Nawˬ hui teˇ gʼaˇ leh teˇ gʼaˇ tawˇ te da‸ ve pa taw, nawˬ hui awˬ pon co ha hpawˇ shonˇ ve teˇ ceuˬ hpeh‸ ve yoˬ. Shu te ya‸ laˇ ve hta‸ aˬ hto‸ ma pa taw nawˬ hui maˇ hkanˍ le. Shu nawˬ hui ve mawˇ heˍ caˇ laˇ ve hta‸ aˬ hto‸ ma pa taw nawˬ hui maˇ hkanˍ le.

8Ya‸ hkʼaˇ, nawˬ hui hkʼaˇ nawˬ hui shu hta‸ te ya‸ leh heˍ caˇ chehˇ ve awˬ hkʼoˆ, nawˬ hui ve awˬ viˉ awˬ nyi teˇ hpaˍ hta‸ chi hkʼe te chehˇ ve yoˬ.

9Maˇ hteˇ maˇ cawˇ ve chaw teˇ hpaˍ lehˬ, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e ve nawˬ hui maˇ shiˍ laˇ. Nawˬ hui taˇ dawˇ ya‸. Guiˇ ya‸ ve chaw, shaˉ ho‸ hta‸ oˉ kʼoˍ puiˬ ve chaw, haˉ chawˇ haˉ paˆ te ve chaw, hawˉ hkʼaˆ chawˇ hawˉ hkʼaˆ peh‸ ve tzuhˆ ve awˬ hkʼaˇ suh te kʼai ve chaw,

10shu mawˇ hta‸ hkʼawˇ ve chaw, shu mawˇ shu jeˬ hta‸ sheˉ lai ve chaw, tzuhˬ dawˬ bvuhˆ ve chaw, hkʼa mvuhˇ hkʼa na kʼoˆ ve chaw leh, shu mawˇ hta‸ hiˉ yuˬ lu yuˬ ve chaw teˇ hpaˍ lehˬ, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e.

11Awˉ lawˉ htaˇ nawˬ hui teˇ hpaˍ hpaˍ chi hkʼe ve chaw hpeh‸ jaw ve yoˬ. Ya‸ hkʼaˇ, chi beu‸ nawˬ hui tsuhˇ hkʼa peuˬ leh da‸ la kehˬ la peuˬ. Jawˇmawˇ Yeˍsuˆ Hkri‸ ve awˬ meh leh ngaˬ hui ve Gʼuiˬsha ve Awˬ ha hpu awˬ hkʼaw lo nawˬ hui hteˇ ve cawˇ ve chaw hpeh‸ la peuˬ.

12Ngaˬ hkʼa peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hkʼaˇ, hkʼa peu-eˬ ve hta‸ te tuˬ awˬ bon cawˬ ve maˇ heˆ. Ngaˬ hkʼa peu-eˬ ve hta‸ te tuˬ a hkaw-anˬ cawˬ ve yoˬ. Ya‸ hkʼaˇ, hkʼaˬ ve teˇ ceuˬ awˬ hawˉ lo maˇ kʼoˆ, ngaˬ lehˬ awˬ ceˬ te tuˬ ve maˇ heˆ.

13Caˇ tuˬ lehˬ, gʼoˇ peˬ awˬ pon yoˬ. Gʼoˇ peˬ lehˬ, caˇ tuˬ awˬ pon yoˬ. Ya‸ hkʼaˇ Gʼuiˬsha lehˬ, chi nyiˇ ceuˬ ceuˬ hta‸ te luˬ piˇ tuˬ yoˬ. Awˬ to lehˬ, haˉ chawˇ haˉ paˆ te tuˬ awˬ pon hpeh‸ ve maˇ heˆ. Jawˇmawˇ Yeˍsuˆ awˬ pon hpeh‸ ve yoˬ. Jawˇmawˇ Yeˍsuˆ htawˇ awˬ to awˬ pon hpeh‸ ve yoˬ.

14Gʼuiˬsha lehˬ, yawˇ ve kanˇ paˆ hta‸ yehˇ leh Jawˇmawˇ Yeˍsuˆ hta‸ kʼaw‸ te‸ tu la piˇ ve hkʼe, ngaˬ hui hta‸ htawˇ yawˇ kʼaw‸ te‸ tu la piˇ tuˬ yoˬ.

15Nawˬ hui ve awˬ to lehˬ, Hkri‸ ve awˬ hkʼeun teˇ hpaˍ hpeh‸ ve hta‸ nawˬ hui maˇ shiˍ laˇ. Hkʼe te leh, Hkri‸ ve awˬ hkʼeun teˇ hpaˍ hta‸ ngaˬ yuˬ leh meh maˬ lanˉ ve awˬ hkʼeun hpeh‸ piˇ lawˬ tuˬ ve laˇ. Maˇ heˆ taˬ.

16Meh maˬ lanˉ hta‸ caˉ da‸ ve chaw lehˬ, yawˇ geh awˬ to teˇ to tiˉ hpeh‸ la ve hta‸ nawˬ hui maˇ shiˍ laˇ. Awˬ lawn kʼo, yawˇ huiˉ maˬ lehˬ, teˇ to tiˉ hpeh‸ la tuˬ yoˬ teh‸ Li‸ hpu hkʼaw bvuh‸ taˍ ve yoˬ.

17Ya‸ hkʼaˇ, Jawˇmawˇ Yeˍsuˆ hta‸ caˉ da‸ ve chaw lehˬ, yawˇ geh co ha teˇ maˬ tiˉ hpeh‸ ve yoˬ.

18Haˉ chawˇ haˉ paˆ te ve hta‸ jaw kʼai loˬ. Chaw yaˇ te ve awˬ kaˍ awˬ nu venˇbaˆ hkʼa peu-eˬ lehˬ, a shu yawˇ awˬ to awˬ baˬ hpawˇ lo hpeh‸ ve yoˬ. Ya‸ hkʼaˇ, haˉ chawˇ haˉ paˆ te ve chaw lehˬ, a shu yawˇ ve awˬ to hta‸ te ya‸ ve yoˬ.

19Nawˬ hui ve awˬ to lehˬ, da‸ ve kehˬ ve Awˬ ha hpu ve bon yehˬ hpeh‸ ve hta‸ nawˬ hui maˇ shiˍ laˇ. Yawˇ lehˬ, Gʼuiˬsha lo laˬ leh nawˬ hui awˬ hkʼaw lo chehˇ taˍ ve yoˬ. Nawˬ hui ve awˬ to lehˬ, nawˬ hui ve mawˇ hpeh‸ ve maˇ heˆ.

20Awˬ lawn kʼo, Gʼuiˬsha awˬ hpfuhˇ piˇ leh nawˬ hui hta‸ vuiˬ hkʼaw‸ taˍ peuˬ. Hkʼe te leh, nawˬ hui ve awˬ to awˬ hkʼaw lo Gʼuiˬsha hta‸ awˬ me‸ awˬ hponˇ cawˬ piˇ-oˆ.

← Chapter 5 Jump to: Chapter 7 →