1 Corinthians 15 — Lahu Bible Edited © Thailand Bible Society and Bible Society of Myanmar, 2010, 2020.

1Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ maˍ piˇ taˍ peuˬ ve ha lehˬ ve bon hkawˇ nawˬ hui hta‸ kʼaw‸ dawˇ nawˇ laˇ ve yoˬ. Ha lehˬ ve bon hkawˇ oˇ ve hta‸ nawˬ hui ha‸ yuˬ peuˬ leh, oˇ ve awˬ hkʼaw lo nawˬ hui yeˬ chehˇ ve yoˬ.

2Ha lehˬ ve bon hkawˇ oˇ ve hta‸ nawˬ hui hkʼe leˇ yonˍ ve teˇ ceuˬ maˇ heˆ leh hkʼa deh‸ vawˆ yeˬ taˍ ve kʼo, oˇ ve hta‸ pa taw nawˬ hui htaiˍ hkʼaw‸ ve hta‸ gʼa ve yoˬ.

3Awˬ lawn kʼo, ngaˬ gʼa taˍ ve awˬ lawn uiˍ ve teˇ ceuˬ ngaˬ nawˬ hui hta‸ maˍ laˇ peuˬ ve yoˬ. Awˬ lawn oˇ ve lehˬ, Li‸ hpu hkʼaw bvuh‸ taˍ ve hkʼe, Hkri‸ lehˬ ngaˬ hui ve venˇbaˆ awˬ pon hkanˍ suh peuˬ.

4Tuˍ hpfuh hkʼaw tuˍ peuˬ hkʼaw‸ nawˉ, Li‸ hpu hkʼaw bvuh‸ taˍ ve hkʼe, shehˍ nyi teˇ nyi gaˬ htaˇ yawˇ kʼaw‸ te‸ tu la ve yoˬ.

5Yawˇ lehˬ, Keˍhpaˆ hta‸ yawˇ awˬ to maw piˇ peuˬ hkʼaw‸ nawˉ, tcuh yaˇ teˇ chi nyiˇ gʼaˇ hta‸ ka‸ maw piˇ ve yoˬ.

6Oˇ ve awˬ hkʼaw‸ nawˉ, teˇ pawˆ tiˉ awˬ viˉ awˬ nyi ngaˇ ha gʼaˇ hpaˆ hta‸ ka‸ yawˇ awˬ to kʼaw‸ maw piˇ ve yoˬ. Chaw oˇ ve teˇ hpaˍ chi beu‸ hkʼa gaˬ maˇ-awˍ ve te‸ chehˇ sheˍ ve yoˬ. Ya‸ hkʼaˇ, teˇ hpaˍ hpaˍ suh peuˬ.

7Awˬ hkʼaw‸ nawˉ Yaˍkoˆ hta‸ ka‸ yawˇ maw piˇ leh, awˬ hkʼaw‸ nawˉ tcuh yaˇ hkʼa peu-eˬ hta‸ ka‸ yawˇ awˬ to kʼaw‸ maw piˇ ve yoˬ.

8Ngaˬ lehˬ awˬ yanˇ maˇ gaˬ sheˍ ka‸ paw la ve yaˇ ehˉ hkʼe hpeh‸ ve htawˇ, awˬ leh teˇ pawˆ yawˇ awˬ to ngaˬ hta‸ htawˇ maw laˇ ve yoˬ.

9Awˬ lawn kʼo, ngaˬ lehˬ tcuh yaˇ hui awˬ hkʼaw lo i jaˇ ve teˇ gʼaˇ hpeh‸ ve yoˬ. Gʼuiˬ sha ve Hkri‸ yaˇ awˬ moˍ hta‸ ngaˬ fawˉ mehˍ jaw ve pa taw, shu ngaˬ hta‸ tcuh yaˇ kʼoˆ tuˬ ve hta‸ ka‸ ngaˬ maˇ keunˍ ve yoˬ.

10Ya‸ hkʼaˇ, ngaˬ tcuh yaˇ hpeh‸ chehˇ ve lehˬ, Gʼuiˬsha ve awˬ bon hta‸ pa taw yoˬ. Ngaˬ gʼa ve awˬ bon htawˇ hkʼe leˇ hpeh‸ ve maˇ heˆ. Awˬ kaˍ awˬ nu tcuh yaˇ hui a‸ kehˉ leuˉ leh ngaˬ kanˉ te ve yoˬ. Ya‸ hkʼaˇ, ngaˬ te ve maˇ heˆ. Gʼuiˬsha ve awˬ bon ngaˬ geh cawˬ leh, awˬ bon oˇ ve kanˉ te ve yoˬ.

11Hkʼe te leh, ngaˬ awˬ to maˇ kʼoˆ, yawˇ hui htawˇ maˇ kʼoˆ, chi hkʼe bon maˍ leh, nawˬ hui htawˇ chi hkʼe yonˍ taˍ peuˬ ve yoˬ.

12Hkri‸ lehˬ suh kuiˬ lo kʼaw‸ te‸ tu la peuˬ teh‸, ngaˬ hui bon maˍ ve kʼo, suh ve chaw hui kʼaw‸ te‸ tu la ve maˇ cawˬ teh‸ nawˬ hui awˬ hkʼaw lo chaw teˇ hpaˍ hpaˍ hkʼaˬ hkʼe te kʼoˆ hpeh‸ ve le.

13Suh ve chaw hui kʼaw‸ te‸ tu la ve maˇ cawˬ kʼo, Hkri‸ lehˬ kʼaw‸ te‸ tu la peuˬ ve maˇ heˆ.

14Hkri‸ lehˬ maˇ kʼaw‸ te‸ tu la ve kʼo, ngaˬ hui bon maˍ ve chi, hkʼe leˇ hpeh‸ leh, ngaˬ hui yonˍ ve htawˇ hkʼe leˇ hpeh‸ ve yoˬ.

15Chi hkʼoˆ ka‸, ngaˬ hui lehˬ Gʼuiˬsha ve awˬ lawn maˇ heˆ heˆ ve shaˉ hkiˆ hkanˍ shehˍ hpaˇ hpeh‸ ve yoˬ. Awˬ lawn kʼo, Gʼuiˬsha lehˬ Hkri‸ hta‸ suh kuiˬ lo kʼaw‸ te‸ tu la piˇ peuˬ teh‸, Gʼuiˬsha awˬ lawn ngaˬ hui shaˉ hkiˆ hkanˍ ve yoˬ. Ya‸ hkʼaˇ, suh ve chaw hta‸ awˬ tehˬ awˬ na maˇ kʼaw‸ te‸ tu la piˇ ve kʼo, Hkri‸ hta‸ htawˇ yawˇ kʼaw‸ te‸ tu la piˇ ve maˇ heˆ.

16Awˬ lawn kʼo, suh ve chaw hui hta‸ maˇ kʼaw‸ te‸ tu la piˇ ve kʼo, Hkri‸ hta‸ htawˇ kʼaw‸ te‸ tu la piˇ peuˬ ve maˇ heˆ.

17Hkri‸ lehˬ maˇ kʼaw‸ te‸ tu la ve kʼo, nawˬ hui yonˍ ve teˇ ceuˬ hkʼe leˇ hpeh‸ leh, nawˬ hui ve venˇbaˆ awˬ hkʼaw lo nawˬ hui chehˇ sheˍ ve yoˬ.

18Chi hkʼoˆ ka‸, Hkri‸ awˬ hkʼaw lo suh peuˬ ve chaw hui lehˬ luˬ kʼai peuˬ.

19Chi beu‸ ngaˬ hui a sha‸ te‸ chehˇ ve teˇ yanˇ ceh tiˉ Hkri‸ awˬ hkʼaw lo dawˇ law tuˬ cawˬ ve kʼo, chaw hkʼa peu-eˬ a‸ kehˉ ngaˬ hui hta‸ ha kʼaˉ tuˬ cawˬ ve yoˬ.

20Ya‸ hkʼaˇ Hkri‸ lehˬ suh kuiˬ lo awˬ tehˬ awˬ na kʼaw‸ te‸ tu la peuˬ leh, suh peuˬ ve chaw hui awˬ hkʼaw lo awˉ lawˉ naw‸ la ve awˬ shiˍ hpeh‸ ve yoˬ.

21Awˬ lawn kʼo, chaw teˇ gʼaˇ hta‸ pa taw suh ve teˇ ceuˬ cawˬ la ve hkʼe, chaw teˇ gʼaˇ hta‸ pa taw suh ve chaw hui kʼaw‸ te‸ tu la ve teˇ ceuˬ cawˬ la ve yoˬ.

22Aˍdanˍ awˬ hkʼaw lo chaw hkʼa peu-eˬ suh ve hkʼe, Hkri‸ awˬ hkʼaw lo chaw hkʼa peu-eˬ kʼaw‸ te‸ tu la tuˬ yoˬ.

23Ya‸ hkʼaˇ, chaw teˇ gʼaˇ le le a shu yawˇ ve awˬ yanˇ cawˇ ve hkʼe kʼaw‸ te‸ tu la tuˬ yoˬ. Hkri‸ lehˬ awˉ lawˉ naw‸ ve awˬ shiˍ hpeh‸ ve yoˬ. Awˬ hkʼaw‸ nawˉ Hkri‸ kʼaw‸ ya‸ la ve teˇ yanˇ, yawˇ hta‸ hkʼa caˉ da‸ ve chaw teˇ hpaˍ kʼaw‸ te‸ tu la tuˬ yoˬ.

24Oˇ ve hkʼaw‸ nawˉ awˬ leh meuˇ gaˬ la tuˬ yoˬ. Oˇ htaˇ yawˇ lehˬ uˉ peunˍ ve hkʼa peu-eˬ, aˉ yaˇ hkʼa peu-eˬ leh, kanˇ paˆ hkʼa peu-eˬ hta‸ te luˬ peuˬ hkʼaw‸ nawˉ, yawˇ Awˬ pa Gʼuiˬsha hta‸ mvuhˇmiˬ chiˇ a‸ piˇ tuˬ yoˬ.

25Hkri‸ lehˬ canˇ paˍ hkʼa peu-eˬ hta‸ yawˇ ve hkui taw kʼaw awˬ hawˉ lo taˍ htaˇ hkʼa gaˬ yawˇ gʼa uˉ peunˍ tuˬ yoˬ.

26Awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ hta‸ yoˬ.

27Awˬ lawn kʼo, awˬ ceuˬ hkʼa peu-eˬ hta‸ Yaˇ hpu ve hkui taw kʼaw awˬ hawˉ lo Gʼuiˬsha teh taˍ ve yoˬ. Ya‸ hkʼaˇ, awˬ ceuˬ hkʼa peu-eˬ Yaˇ hpu awˬ hawˉ lo chehˇ ve teh‸ kʼoˆ ve teˇ yanˇ, awˬ ceuˬ hkʼa peu-eˬ ve hta‸ yawˇ awˬ hawˉ lo teh taˍ piˇ shehˍ hpaˇ lehˬ, yawˇ awˬ hawˉ lo maˇ chehˇ ve hta‸ hkʼa tawˍ lehˆ gʼa shiˍ ve yoˬ.

28Awˬ ceuˬ hkʼa peu-eˬ ve hta‸ Yaˇ hpu awˬ hawˉ lo teh taˍ peuˬ htaˇ, yawˇ awˬ hawˉ lo hkʼa peu-eˬ hta‸ teh taˍ piˇ shehˍ hpaˇ Gʼuiˬsha awˬ hawˉ lo Yaˇ hpu htawˇ chehˇ tuˬ yoˬ. Awˬ lawn kʼo, Gʼuiˬsha lehˬ teˇ ceuˬ le le awˬ hkʼaw lo hkʼa peu-eˬ hpeh‸ tuˬ ve hta‸ pa taw yoˬ.

29Suh peuˬ ve chaw hui awˬ pon baˆtiˆsaˬ hkanˍ ve chaw hui lehˬ, aˬ hto‸ ma pa taw ca hkanˍ ve le. Suh ve chaw hui awˬ tehˬ awˬ na maˇ kʼaw‸ te‸ tu la ve kʼo, aˬ hto‸ ma pa taw yawˇ hui ve awˬ tan shu baˆtiˆsaˬ hkanˍ yuˬ ve le.

30Ngaˬ hui htawˇ, aˬ hto‸ ma pa taw teˇ naˍ riˍ le le kawˆ tuˬ dawˇ haˍ tuˬ ve hta‸ gʼa hkanˍ chehˇ ve le.

31Awˬ viˉ awˬ nyi teˇ hpaˍ-oˬ, ngaˬ hui ve Jawˇmawˇ Yeˍsuˆ Hkri‸ awˬ hkʼaw lo nawˬ hui hta‸ pa taw ngaˬ nyi ma uiˍ kuiˬ cawˬ leh, teˇ nyi le le suh ve teˇ ceuˬ hta‸ hpuˇ da‸ chehˇ ve yoˬ teh‸ ngaˬ kʼoˆ hpeh‸ ve yoˬ.

32Shu te jaw ve hkʼe, ngaˬ lehˬ Eˇfeˇsu‸ venˇ awˬ hkʼaw lo haiˬ ve to nuˇ to shaˆ teˇ hpaˍ hta‸ gʼa loˍ yuˬ da‸ jaw ve htawˇ, ngaˬ awˬ pon aˬ hto‸ ma awˬ bon cawˬ le. Suh ve chaw hui maˇ kʼaw‸ te‸ tu la kʼo, shu kʼoˆ ve hkʼe, Shawˉ pawˍ ngaˬ hui gʼa suh tuˬ ve pa taw, caˇ bvuhˆ dawˬ bvuhˆ te chehˇ-a veuˬ.

33Nawˬ hui taˇ dawˇ ya‸. Haiˬ ve chaw teˇ hpaˍ hta‸ awˬ chawˇ te ve teˇ ceuˬ lehˬ, da‸ ve awˬ liˇ teˇ hpaˍ hta‸ te luˬ ve yoˬ.

34Nawˇ la leh hteˇ ve cawˇ ve awˬ hkʼaˇ suh te kʼai-o. Venˇbaˆ hta‸ taˇ kʼaw‸ te. Awˬ lawn kʼo, chaw teˇ hpaˍ hpaˍ Gʼuiˬ sha hta‸ maˇ shiˍ. Nawˬ hui ya‸ taw tuˬ ngaˬ chi hkʼe kʼoˆ ve yoˬ.

35Ya‸ hkʼaˇ, teˇ gʼaˇ gʼaˇ chi hkʼe na nyi laˇ tuˬ yoˬ. Suh ve chaw hui lehˬ, hkʼaˬ hkʼe te kʼaw‸ te‸ tu la tuˬ le. Hkʼaˬ hkʼe ve awˬ to cawˬ leh kʼaw‸ tawˆ la tuˬ le teh‸ kʼoˆ tuˬ yoˬ.

36Maˇ dawˇ nyi puiˉ ve chaw-oˬ, nawˬ sheˍ ve awˬ yawˇ lehˬ, maˇ luˬ maˇ suh ve kʼo, te‸ la tuˬ maˇ heˆ.

37Chi hkʼoˆ ka‸, nawˬ sheˍ ve lehˬ, hpeh‸ la tuˬ ve awˬ cehˬ hta‸ nawˬ sheˍ ve maˇ heˆ. Caˬ yawˇ, maˇ heˆ kʼo awˬ kaˍ awˬ nu awˬ yawˇ teˇ hpaˍ hta‸ ceh nawˬ sheˍ ve yoˬ.

38Gʼuiˬsha lehˬ yawˇ a loˍ cawˇ ve hkʼe, awˬ yawˇ hta‸ awˬ cehˬ hpeh‸ la piˇ ve yoˬ. Awˬ yawˇ teˇ ceuˬ le le hta‸ htawˇ, a shu yawˇ ve awˬ cehˬ hpeh‸ la piˇ ve yoˬ.

39Shaˍ hkʼa cawˬ ve lehˬ, teˇ ceuˬ tiˉ hpeh‸ ve maˇ heˆ. Chaw yaˇ ve awˬ shaˍ teˇ ceuˬ, to nuˇ to shaˆ ve awˬ shaˍ teˇ ceuˬ, ngaˆ awˬ shaˍ teˇ ceuˬ leh, ngaˇ awˬ shaˍ teˇ ceuˬ hpeh‸ ve yoˬ.

40Mvuhˇ naw ma hta‸ caˉ da‸ ve awˬ to teˇ hpaˍ cawˬ leh, miˬguiˬ hta‸ caˉ da‸ ve awˬ to teˇ hpaˍ htawˇ cawˬ ve yoˬ. Mvuhˇ naw ma hta‸ caˉ da‸ ve awˬ to teˇ hpaˍ ve awˬ me‸ awˬ hponˇ teˇ ceuˬ hpeh‸ leh, miˬguiˬ hta‸ caˉ da‸ ve awˬ to teˇ hpaˍ ve awˬ me‸ awˬ hponˇ htawˇ teˇ ceuˬ hpeh‸ ve yoˬ.

41Mvuhˇ nyi ve awˬ me‸ awˬ hponˇ teˇ ceuˬ, ha pa ve awˬ me‸ awˬ hponˇ teˇ ceuˬ leh, meu‸ keu teˇ hpaˍ ve awˬ me‸ awˬ hponˇ teˇ ceuˬ hpeh‸ ve yoˬ. Meu‸ keu teˇ hpaˍ htawˇ, teˇ shiˍ leh teˇ shiˍ awˬ me‸ awˬ hponˇ peun da‸ ve yoˬ.

42Suh peuˬ ve chaw hui kʼaw‸ te‸ tu la tuˬ ve lehˬ, oˇ ve hkʼa shuˍ shuˍ hpeh‸ tuˬ yoˬ. Awˬ to lehˬ, luˬ puiˉ kuiˇ puiˉ ve awˬ hkʼaw lo sheˍ leh, maˇ luˬ maˇ kuiˇ puiˉ ve awˬ hkʼaw lo kʼaw‸ te‸ tu la piˇ tuˬ yoˬ.

43Awˬ me‸ awˬ hponˇ maˇ cawˬ ve awˬ hkʼaw lo sheˍ leh, awˬ me‸ awˬ hponˇ cawˬ ve awˬ hkʼaw lo kʼaw‸ te‸ tu la piˇ tuˬ yoˬ. Awˬ gʼaˇ nuˇ ve awˬ hkʼaw lo sheˍ leh, kanˇ paˆ uiˍ ve awˬ hkʼaw lo kʼaw‸ te‸ tu la piˇ tuˬ yoˬ.

44Sheˍ ve teˇ yanˇ, awˬ suhˍ awˬ shaˍ awˬ to hpeh‸ leh, kʼaw‸ te‸ tu la piˇ ve teˇ yanˇ, co ha ve awˬ to hpeh‸ tuˬ yoˬ. Awˬ suhˍ awˬ shaˍ ve awˬ to cawˬ ve kʼo, co ha ve awˬ to htawˇ cawˬ ve yoˬ.

45Chi hkʼa shuˍ shuˍ, awˉ lawˉ peuˇ ve Aˍdanˍ teˇ gʼaˇ lehˬ, a sha‸ te‸ ve chaw hpeh‸ la ve yoˬ teh‸ bvuh‸ taˍ ve yoˬ. Awˬ leh meuˇ ve Aˍdanˍ teˇ gʼaˇ lehˬ, a sha‸ te‸ piˇ shehˍ hpaˇ hpeh‸ ve yoˬ.

46Co ha hta‸ caˉ da‸ ve awˉ lawˉ laˬ ve maˇ heˆ. Awˬ suhˍ awˬ shaˍ hta‸ caˉ da‸ ve teˇ ceuˬ awˉ lawˉ laˬ leh, oˇ ve hkʼaw‸ nawˉ co ha hta‸ caˉ da‸ ve teˇ ceuˬ laˬ ve yoˬ.

47Awˉ lawˉ peuˇ ve chaw lehˬ, je‸ hpeh‸ leh, miˬguiˬ lo tawˆ la ve yoˬ. Nyiˇ gʼaˇ teˇ gʼaˇ lehˬ, mvuhˇ naw ma lo tawˆ la ve yoˬ.

48Je‸ hta‸ caˉ da‸ ve chaw teˇ hpaˍ lehˬ, je‸ lo tawˆ la ve chaw oˇ ve teˇ gʼaˇ hkʼa shuˍ shuˍ hpeh‸ ve yoˬ. Mvuhˇ naw ma hta‸ caˉ da‸ ve chaw teˇ hpaˍ lehˬ, mvuhˇ naw ma lo tawˆ la ve chaw oˇ ve teˇ gʼaˇ hkʼa shuˍ shuˍ hpeh‸ ve yoˬ.

49Ngaˬ hui lehˬ, je‸ lo tawˆ la ve chaw teˇ gʼaˇ ve awˬ ho‸ awˬ han hta‸ pfuhˇ ve hkʼe, mvuhˇ naw ma lo tawˆ la ve chaw teˇ gʼaˇ ve awˬ ho‸ awˬ han hta‸ htawˇ ngaˬ hui pfuhˇ tuˬ yoˬ.

50Awˬ viˉ awˬ nyi teˇ hpaˍ-oˬ, ngaˬ nawˬ hui hta‸ chi hkʼe kʼoˆ laˇ ve yoˬ. Awˬ suhˍ awˬ shaˍ awˬ to lehˬ, Gʼuiˬsha ve mvuhˇ miˬ awˬ hkʼaw lo lo‸-e maˇ hpeh‸. Luˬ puiˉ kuiˇ puiˉ ve awˬ ceuˬ lehˬ, maˇ luˬ maˇ kuiˇ puiˉ ve awˬ ceuˬ awˬ hkʼaw lo lo‸-e maˇ hpeh‸.

51Nyi loˬ, tcuhˉ kuiˬ naˉ jaˇ ve tawˇ teˇ hkawˇ ngaˬ nawˬ hui hta‸ hto maˍ laˇ shaˍ. Nyiˬ hui hkʼa peu-eˬ gʼa suh tuˬ ve maˇ heˆ.

52Ya‸ hkʼaˇ, awˬ leh meuˇ ve behˬ heh ma meuˆ ve teˇ yanˇ, teˇ hkui tiˉ, mehˆ teˇ me‸ tiˉ awˬ hkʼaw lo, nyiˬ hui hkʼa peu-eˬ gʼa pa tuˬ yoˬ. Awˬ lawn kʼo, behˬ heh ma awˬ hkawˇ bvuhˬ la tuˬ yoˬ. Oˇ htaˇ, suh peuˬ ve chaw hui lehˬ, maˇ luˬ maˇ kuiˇ puiˉ ve awˬ hkʼaw lo kʼaw‸ te‸ tu la leh, nyiˬ hui htawˇ gʼa pa tuˬ yoˬ.

53Awˬ lawn kʼo, luˬ puiˉ kuiˇ puiˉ ve awˬ ceuˬ chi lehˬ, maˇ luˬ maˇ kuiˇ puiˉ ve awˬ ceuˬ hta‸ gʼa veu‸ deh tuˬ yoˬ. Suh puiˉ ve awˬ ceuˬ chi htawˇ, maˇ suh puiˉ ve awˬ ceuˬ hta‸ gʼa veu‸ deh tuˬ yoˬ.

54Luˬ puiˉ kuiˇ puiˉ ve awˬ ceuˬ lehˬ, maˇ luˬ maˇ kuiˇ puiˉ ve awˬ ceuˬ hta‸ veu‸ deh leh, suh puiˉ ve awˬ ceuˬ htawˇ maˇ suh puiˉ ve awˬ ceuˬ hta‸ veu‸ deh ve teˇ yanˇ, Li‸ hpu hkʼaw bvuh‸ taˍ ve tawˇ chi teˇ hkawˇ biˇ la tuˬ yoˬ. Gʼaˇ ve teˇ ceuˬ lehˬ, suh ve teˇ ceuˬ hta‸ hehˆ dawˬ peuˬ.

55Suh ve teˇ ceuˬ-oˬ, nawˬ gʼaˇ tuˬ hkʼaˬ lo cawˬ le. Suh ve teˇ ceuˬ-oˬ, nawˬ ve awˬ viˇ hkʼaˬ lo cawˬ le.

56Suh ve awˬ viˇ lehˬ, venˇbaˆ hpeh‸ ve yoˬ. Venˇbaˆ ve kanˇ paˆ lehˬ, awˬliˇtawˇhkawˇ hpeh‸ ve yoˬ.

57Ya‸ hkʼaˇ ngaˬ hui ve Jawˇmawˇ Yeˍsuˆ Hkri‸ hta‸ pa taw ngaˬ hui hta‸ gʼaˇ shehˍ hpaˇ hpeh‸ piˇ lawˬ ve Gʼuiˬsha hta‸ chiˇ mvuh-o.

58Hkʼe te leh, ngaˬ ha‸ ve awˬ viˉ awˬ nyi teˇ hpaˍ-oˬ, nyi ma yeˬ ve chaw, te kuiˬ dawˇ kuiˬ yeˬ ve chaw leh, Jawˇmawˇ Yeˍsuˆ ve kanˉ hta‸ hkʼaˬ htaˆ ka‸ gʼaˇ hte‸ te chehˇ ve chaw hpeh‸ piˇ-oˆ. Awˬ lawn kʼo, Jawˇmawˇ Yeˍsuˆ awˬ pon nawˬ hui te ve kanˉ lehˬ hkʼe leˇ hpeh‸ ve maˇ heˆ teh‸ shiˍ chehˇ-oˆ.