1 Corinthians 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Ngaˬ lehˬ chaw yaˇ ve tawˇ hkawˇ leh mvuhˇ naw ma tcuh yaˇ ve tawˇ hkawˇ yaw puiˉ ve htawˇ, ha‸ pehnˇ ve maˇ cawˬ kʼo, bo lo kʼoˍ dawˆ ve awˬ hkawˇ leh shehnˍ hehˆ ve awˬ hkawˇ hkʼe ceh ngaˬ hpeh‸ ve yoˬ.

2Ngaˬ bon maˍ puiˉ ve maˇ kʼoˆ, faˉ taˍ ve hkʼa peu-eˬ leh cuˇ yiˍ hkʼa peu-eˬ hta‸ ngaˬ shiˍ ve maˇ kʼoˆ, hkʼaw teˇ hpaˍ hta‸ jiˆ kʼai gʼa tuˬ yonˍ ve nyi ma hkʼa biˇ cawˬ ve maˇ kʼoˆ, ha‸ pehnˇ ve maˇ cawˬ kʼo, ngaˬ te‸ chiˉ awˬ bon maˇ cawˬ.

3Ngaˬ ve mawˇ jeˬ hkʼa peu-eˬ shu hta‸ pehˬ piˇ tanˇ piˇ leh, ngaˬ awˬ to hta‸ ka‸ aˬ miˍ tuˉ tanˇ piˇ ve htawˇ, ha‸ pehnˇ ve maˇ cawˬ kʼo, ngaˬ te‸ chiˉ awˬ bon maˇ gʼa.

4Ha‸ pehnˇ ve lehˬ, dawˇ zuhˬ gaˇ zuhˬ leh ha kʼaˉ puiˉ ve yoˬ. Ha‸ pehnˇ ve lehˬ maˇ hkawehˉ puiˉ, maˇ caˆ muiˬ puiˉ, nyi ma uiˍ ve mvuh ve maˇ cawˬ.

5Ha‸ pehnˇ ve lehˬ, maˇ shawˍ maˇ caˆ maˇ te puiˉ, a shu yawˇ awˬ to awˬ pon maˇ ca puiˉ, nyi ma maˇ zuhˆ puiˉ, shu awˬ hkʼoˆ venˇbaˆ maˇ taˍ puiˉ.

6Ha‸ pehnˇ ve lehˬ, maˇ hteˇ maˇ cawˇ ve awˬ hkʼaw lo maˇ ha lehˬ puiˉ. Ya‸ hkʼaˇ hteˇ ve cawˇ ve awˬ hkʼaw lo ha lehˬ puiˉ ve yoˬ.

7Ha‸ pehnˇ ve lehˬ hkʼa peu-eˬ hta‸ hkanˍ puiˉ ve, hkʼa peu-eˬ hta‸ yonˍ puiˉ ve, hkʼa peu-eˬ hta‸ dawˇ law puiˉ ve leh, hkʼa peu-eˬ hta‸ yeunˇ hkanˍ puiˉ ve yoˬ.

8Ha‸ pehnˇ ve lehˬ maˇ luˬ puiˉ. Ya‸ hkʼaˇ, bon maˍ ve maˇ kʼoˆ, tawˇ laiˉ ceuˬ yaw chiˇ mvuh ve maˇ kʼoˆ, shiˍ puiˉ ve cuˇ yiˍ maˇ kʼoˆ, hkʼa peu-eˬ mehˉ kʼai tuˬ yoˬ.

9Chi beu‸ ngaˬ hui shiˍ taˍ ve lehˬ, maˇ biˇ sheˍ. Ngaˬ hui bon maˍ ve ka‸ maˇ biˇ sheˍ.

10Ya‸ hkʼaˇ, biˇ ve awˬ ceuˬ gaˬ la htaˇ, maˇ biˇ ve teˇ hpaˍ mehˉ kʼai tuˬ yoˬ.

11Ngaˬ yaˇ ehˉ hpeh‸ chehˇ htaˇ, yaˇ ehˉ hkʼe ngaˬ tawˇ yaw ve, yaˇ ehˉ hkʼe ngaˬ nyi ma cawˬ ve leh, yaˇ ehˉ hkʼe ngaˬ dawˇ nyi ve yoˬ. Ya‸ hkʼaˇ, ngaˬ chaw mawˇ hpeh‸ la htaˇ, yaˇ ehˉ ve awˬ liˇ awˬ hkʼaˇ teˇ hpaˍ hta‸ ngaˬ baˬ taˉ ve yoˬ.

12Chi beu‸ lehˬ, maˇ kehˬ da‸ ve mehˆ gʼeuˆ awˬ hkʼaw lo ngaˬ hui nyi chehˇ ve hkʼe yoˬ. Ya‸ hkʼaˇ oˇ htaˇ gaˬ kʼo, mehˆ hpfuhˇ tawˍ da‸ leh gʼa mawˬ da‸ tuˬ yoˬ. Chi beu‸ ngaˬ hkʼa biˇ maˇ shiˍ sheˍ. Ya‸ hkʼaˇ, chi beu‸ Gʼuiˬsha ngaˬ hta‸ shiˍ taˍ ve hkʼe, oˇ htaˇ gaˬ kʼo ngaˬ hkʼa biˇ shiˍ tuˬ yoˬ.

13Chi beu‸ lehˬ, yonˍ ve, dawˇ law ve leh ha‸ pehnˇ ve, chi shehˆ ceuˬ cawˬ taˍ ve yoˬ. Ya‸ hkʼaˇ, chi shehˆ ceuˬ awˬ hkʼaw lo uiˍ jaˇ ve lehˬ ha‸ pehnˇ ve teˇ ceuˬ yoˬ.

← Chapter 12 Jump to: Chapter 14 →