1 Corinthians 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Ha‸ pehnˇ ve awˬ hkʼaˇ suh gʼaˇ hte‸ kʼai leh, co ha hpawˇ ve la‸ shawnˍ teˇ hpaˍ hta‸ gʼaˇ hte‸ sheˉ lai-o. Bon maˍ puiˉ ve la‸ shawnˍ hta‸ leuˉ leh sheˉ lai-o.

2Awˬ lawn kʼo, tawˇ laiˉ ceuˬ yaw chiˇ mvuh ve chaw lehˬ, chaw yaˇ hta‸ tawˇ yaw ve maˇ heˆ. Gʼuiˬsha hta‸ tawˇ yaw ve yoˬ. Yawˇ ve tawˇ hkawˇ hta‸ teˇ gʼaˇ ka‸ na maˇ gʼa. Awˬ ha hpu hta‸ pa taw, tcuhˉ kuiˬ naˉ ve teˇ hpaˍ hta‸ yawˇ yaw ve yoˬ.

3Ya‸ hkʼaˇ bon maˍ ve chaw lehˬ, chaw yaˇ hui hta‸ uiˍ la yeˬ la piˇ tuˬ, awˬ gʼaˇ piˇ tuˬ leh, dawˇ sha la piˇ tuˬ, yawˇ hui hta‸ tawˇ yaw ve yoˬ.

4Tawˇ laiˉ ceuˬ yaw chiˇ mvuh ve chaw lehˬ, yawˇ awˬ to hta‸ tiˉ uiˍ la yeˬ la piˇ ve yoˬ. Ya‸ hkʼaˇ bon maˍ ve chaw lehˬ, Hkri‸ yaˇ awˬ moˍ hta‸ uiˍ la yeˬ la piˇ ve yoˬ.

5Nawˬ hui hkʼa peu-eˬ tawˇ laiˉ ceuˬ yaw chiˇ mvuh gʼa tuˬ ngaˬ heuˆ gaˇ ve yoˬ. Ya‸ hkʼaˇ, chi a‸ kehˉ leuˉ leh nawˬ hui bon maˍ puiˉ tuˬ ngaˬ heuˆ gaˇ ve yoˬ. Awˬ lawn kʼo, tawˇ laiˉ ceuˬ yaw chiˇ mvuh ve chaw lehˬ, Hkri‸ yaˇ awˬ moˍ hta‸ uiˍ la yeˬ la piˇ tuˬ, tcuhˉ kuiˬ maˇ yuˬ tawˆ maˍ piˇ ve kʼo, bon maˍ puiˉ ve chaw teˇ gʼaˇ lehˬ yawˇ a‸ kehˉ uiˍ ve yoˬ.

6Awˬ viˉ awˬ nyi teˇ hpaˍ-oˬ, ngaˬ nawˬ hui geh laˬ leh tawˇ laiˉ ceuˬ yaw chiˇ mvuh ve htawˇ, hpeu‸ maˍ ve tawˇ hkawˇ, shiˍ puiˉ ve cuˇ yiˍ tawˇ hkawˇ, bon maˍ ve tawˇ hkawˇ, maˍ piˇ ve tawˇ hkawˇ, ngaˬ nawˬ hui hta‸ chi hkʼe ve tawˇ teˇ hkawˇ hkawˇ maˇ kʼoˆ maˍ laˇ ve kʼo, nawˬ hui awˬ pon aˬ hto‸ ma awˬ bon cawˬ le.

7Chi hkʼa shuˍ shuˍ, a sha‸ maˇ cawˬ ve awˬ ceuˬ teˇ hpaˍ, lehˉ lu maˇ kʼoˆ, tinˍ maˇ kʼoˆ, awˬ hkawˇ hkʼa deh‸ maˇ cehnˍ kʼo, hkʼaˬ hkʼe ve teˇ ceuˬ meuˆ gaˇ ve leh naˍ, hkʼaˬ hkʼe ve teˇ ceuˬ hteˆ gaˇ ve leh naˍ, shu hkʼaˬ hkʼe te shiˍ hpeh‸ tuˬ le.

8Behˬ heh ma meuˆ ve hkawˇ htawˇ maˇ cehnˍ kʼo, ma‸ bawˆ tuˬ awˬ pon a shu gu taˍ tuˬ le.

9Chi hkʼa shuˍ shuˍ, nawˬ hui maw‸ kʼaw yehˇ leh tawˇ yaw ve awˬ hkʼaw lo, shu na gʼa ve tawˇ hkawˇ maˇ yaw ve kʼo, nawˬ yaw ve tawˇ hkawˇ hta‸ shu hkʼaˬ hkʼe te shiˍ hpeh‸ tuˬ le. Awˬ lawn kʼo, nawˬ hui lehˬ mvuhˇ haw hta‸ tawˇ yaw piˇ ve hkʼe ceh hpeh‸ ve yoˬ.

10Miˬguiˬ hkʼoˆ lo tawˇ hkawˇ laiˉ ceuˬ cawˬ tuˬ yoˬ. Ya‸ hkʼaˇ, tcuhˉ kuiˬ maˇ cawˬ ve tawˇ hkawˇ teˇ ceuˬ ka‸ maˇ cawˬ.

11Tawˇ hkawˇ oˇ ve tcuhˉ kuiˬ hta‸ ngaˬ maˇ shiˍ kʼo, tawˇ yaw shehˍ hpaˇ mehˆ gʼuˇ suhˍ ngaˬ lehˬ shu mvuhˇmiˬ ve chaw hpeh‸ leh, tawˇ yaw shehˍ hpaˇ htawˇ, ngaˬ mehˆ gʼuˇ suhˍ shu mvuhˇmiˬ ve chaw hpeh‸ tuˬ yoˬ.

12Chi hkʼa shuˍ shuˍ, nawˬ hui htawˇ Awˬ ha hpu ve la‸ shawnˍ teˇ hpaˍ hta‸ sheˉ lai jaˇ ve chaw hui hpeh‸ ve pa taw, Hkri‸ yaˇ awˬ moˍ hta‸ uiˍ la yeˬ la piˇ puiˉ tuˬ leuˉ leh ca-o.

13Hkʼe te leh, tawˇ laiˉ ceuˬ yaw chiˇ mvuh ve chaw lehˬ, tcuhˉ kuiˬ yuˬ tawˆ gʼa tuˬ bon lawˬ cawˇ ve yoˬ.

14Awˬ lawn kʼo, ngaˬ tawˇ laiˉ ceuˬ yaw leh bon lawˬ ve kʼo, ngaˬ ve nyi ma hkʼaw bon lawˬ ve htawˇ, ngaˬ shiˍ puiˉ ve teˇ ceuˬ awˬ pon awˬ bon maˇ cawˬ.

15Hkʼe te leh, hkʼaˬ hkʼe te tuˬ le. Ngaˬ ve nyi ma awˬ hkʼaw lo ngaˬ bon lawˬ leh, ngaˬ ve shiˍ puiˉ ve teˇ ceuˬ awˬ hkʼaw lo htawˇ ngaˬ bon lawˬ tuˬ yoˬ. Ngaˬ ve nyi ma awˬ hkʼaw lo ngaˬ kʼa muiˬ chiˇ mvuh leh, ngaˬ ve shiˍ puiˉ ve teˇ ceuˬ awˬ hkʼaw lo htawˇ ngaˬ kʼa muiˬ chiˇ mvuh tuˬ yoˬ.

16Hkʼe maˇ heˆ leh, nyi ma awˬ hkʼaw lo ceh tiˉ bon hta‸ nawˬ chiˇ mvuh ve kʼo, Awˬ ha hpu ve la‸ shawnˍ maˇ cawˬ ve chaw teˇ gʼaˇ lehˬ, nawˬ chiˇ mvuh ve hkawˇ hta‸ na maˇ gʼa ve pa taw, hkʼaˬ hkʼe te, A menˬ teh‸ kʼoˆ hpeh‸ tuˬ le.

17Nawˬ lehˬ bon hta‸ hkʼa deh‸ chiˇ mvuh ve htawˇ, shu hta‸ uiˍ la yeˬ la piˇ maˇ gʼa.

18Ngaˬ lehˬ nawˬ hui hkʼa peu-eˬ a‸ kehˉ tawˇ laiˉ ceuˬ yaw chiˇ mvuh puiˉ ve pa taw, ngaˬ Gʼuiˬsha hta‸ chiˇ mvuh ve yoˬ.

19Ya‸ hkʼaˇ, Hkri‸ yaˇ awˬ moˍ hpawnˬ da‸ ve awˬ hkʼaw lo ngaˬ tawˇ laiˉ ceuˬ yaw chiˇ mvuh leh tawˇ teˇ meunˍ hkawˇ yaw ve a‸ kehˉ, ngaˬ shu hta‸ maˍ piˇ hpeh‸ tuˬ ngaˬ shiˍ puiˉ ve teˇ ceuˬ awˬ hkʼaw lo tawˇ ngaˇ hkawˇ ceh yaw gaˇ ve yoˬ.

20Awˬ viˉ awˬ nyi teˇ hpaˍ-oˬ, nawˬ hui dawˇ nyi ve awˬ hkʼaw lo, yaˇ ehˉ hkʼa shuˍ shuˍ taˇ hpeh‸ piˇ. Haiˬ ve awˬ hkʼaw lo yaˇ ehˉ hkʼe hpeh‸ piˇ-oˆ. Ya‸ hkʼaˇ, dawˇ nyi ve awˬ hkʼaw lo chaw mawˇ hkʼe hpeh‸ piˇ-oˆ.

21Awˬliˇtawˇhkawˇ awˬ hkʼaw lo bvuh‸ taˍ ve hkʼe, Awˬ kaˍ awˬ nu chaw ceuˬ ve ha tehˍ leh awˬ kaˍ awˬ nu chaw ceuˬ ve maw‸ kʼaw hta‸ ngaˬ cuˇ leh, chaw chi teˇ ceuˬ hta‸ ngaˬ tawˇ yaw piˇ tuˬ yoˬ. Ya‸ hkʼaˇ chi hkʼe te yaw piˇ ve htawˇ, yawˇ hui ngaˬ hta‸ na yuˬ tuˬ maˇ heˆ teh‸, Jawˇmawˇ Gʼuiˬsha kʼoˆ ve yoˬ.

22Hkʼe te leh, tawˇ laiˉ ceuˬ yaw chiˇ mvuh ve lehˬ, yonˍ ve chaw hui awˬ pon awˬ heˆ hpeh‸ ve maˇ heˆ. Maˇ yonˍ ve chaw hui awˬ pon awˬ heˆ hpeh‸ ve yoˬ. Bon maˍ ve teˇ ceuˬ lehˬ, maˇ yonˍ ve chaw hui awˬ pon maˇ heˆ. Yonˍ ve chaw hui awˬ pon yoˬ.

23Hkʼe te leh, Hkri‸ yaˇ awˬ moˍ hkʼa peu-eˬ hpawnˬ da‸ leh, yawˇ hui hkʼa peu-eˬ tawˇ laiˉ ceuˬ yaw chiˇ mvuh chehˇ htaˇ, Awˬ ha hpu ve la‸ shawnˍ maˇ cawˬ ve chaw hui, maˇ heˆ kʼo maˇ yonˍ ve chaw hui lo‸ la kʼo, nawˬ hui hta‸ chaw gʼuˇ yoˬ teh‸ yawˇ hui kʼoˆ tuˬ maˇ heˆ laˇ.

24Ya‸ hkʼaˇ, hkʼa peu-eˬ bon maˍ chehˇ ve kʼo, maˇ yonˍ ve chaw, maˇ heˆ kʼo Awˬ ha hpu ve la‸ shawnˍ maˇ cawˬ ve chaw teˇ gʼaˇ gʼaˇ lo‸ la htaˇ, bon maˍ ve chaw hkʼa peu-eˬ lehˬ yawˇ ve venˇbaˆ hta‸ hpeu‸ maˍ piˇ leh, yawˇ awˬ to venˇbaˆ cawˬ ve hta‸ yawˇ jawˬ la tuˬ yoˬ.

25Yawˇ nyi ma hkʼaw faˉ taˍ ve awˬ ceuˬ teˇ hpaˍ htawˇ tawˆ la tuˬ yoˬ. Oˇ htaˇ, yawˇ mehˆ hpfuhˇ miˬ chaˇ hkʼoˆ boˆ taˍ leh Gʼuiˬsha hta‸ oˉ kʼoˍ pui leh, Gʼuiˬsha nawˬ hui geh awˬ tehˬ awˬ na chehˇ ve yoˬ teh‸ yawˇ kʼoˆ tuˬ yoˬ.

26Awˬ viˉ awˬ nyi teˇ hpaˍ-oˬ, hkʼaˬ hkʼe le. Nawˬ hui hpawnˬ da‸ htaˇ, kʼa muiˬ hkawˇ kʼa ve, maˍ piˇ ve, hpeu‸ maˍ ve, tawˇ laiˉ ceuˬ yaw chiˇ mvuh ve, tcuhˉ kuiˬ yuˬ tawˆ ve, teˇ gʼaˇ le le teˇ gʼaˇ teˇ ceuˬ te ve yoˬ. Shu uiˍ la yeˬ la tuˬ awˬ pon hkʼa peu-eˬ hta‸ te-o.

27Tawˇ laiˉ ceuˬ yaw chiˇ mvuh ve chaw cawˬ kʼo, nyiˇ gʼaˇ shehˆ gʼaˇ awˬ hkʼoˆ taˇ yaw tcuh. Yawˇ hui teˇ gʼaˇ peuˬ teˇ gʼaˇ chiˇ mvuh peuˬ hkʼaw‸ nawˉ, teˇ gʼaˇ hta‸ tcuhˉ kuiˬ yuˬ tawˆ piˇ lawˬ-o‸.

28Ya‸ hkʼaˇ, Hkri‸ yaˇ awˬ moˍ hpawnˬ da‸ htaˇ, tcuhˉ kuiˬ yuˬ tawˆ shehˍ hpaˇ maˇ cawˬ ve kʼo, tawˇ laiˉ ceuˬ yaw chiˇ mvuh ve chaw hui hta‸ ta‸ iˉ chehˇ piˇ lawˬ-o‸. Yawˇ hui a shu yawˇ awˬ to hta‸ ka‸ Gʼuiˬsha hta‸ ka‸ na‸ uˉ te da‸ piˇ lawˬ-o‸.

29Bon maˍ paˍ nyiˇ gʼaˇ maˇ heˆ kʼo shehˆ gʼaˇ hta‸ maˍ tcuh leh, awˬ kaˍ awˬ nu chaw teˇ hpaˍ hta‸ hkʼa deh‸ shawˍ nyi dawˇ nyi piˇ lawˬ-o‸.

30Oˇ kaˬ lo mui taˍ ve awˬ kaˍ awˬ nu teˇ gʼaˇ gʼaˇ lehˬ, hpeu‸ maˍ laˇ ve teˇ ceuˬ ceuˬ hta‸ gʼa ve kʼo, awˉ lawˉ maˍ chehˇ ve teˇ gʼaˇ hta‸ ta‸ iˉ chehˇ piˇ lawˬ-o‸.

31Awˬ lawn kʼo, chaw hkʼa peu-eˬ henˇ yuˬ jawˬ yuˬ leh awˬ gʼaˇ gʼa tuˬ, nawˬ hui hkʼa peu-eˬ teˇ gʼaˇ peuˬ teˇ gʼaˇ bon maˍ hpeh‸ ve yoˬ.

32Bon maˍ paˍ hui ve nyi ma lehˬ, bon maˍ paˍ teˇ hpaˍ awˬ hawˉ lo chehˇ ve yoˬ.

33Awˬ lawn kʼo, Gʼuiˬsha lehˬ sho‸ sha‸ tuˬ te piˇ shehˍ hpaˇ hpeh‸ ve maˇ heˆ. Yawˇ lehˬ gawˬ lehˍ ve hta‸ te piˇ shehˍ hpaˇ Gʼuiˬsha hpeh‸ ve yoˬ.

34Hkri‸ yaˇ awˬ moˍ hkʼa peu-eˬ te chehˇ ve hkʼe, yaˇ miˇ teˇ hpaˍ lehˬ, Hkri‸ yaˇ awˬ moˍ awˬ hkʼaw lo ta‸ iˉ chehˇ cawˇ ve yoˬ. Awˬ lawn kʼo, yawˇ hui tawˇ yaw tuˬ a hkaw-anˬ maˇ cawˬ. Awˬliˇtawˇhkawˇ kʼoˆ taˍ ve hkʼe, yawˇ hui lehˬ shu awˬ hawˉ lo gʼa chehˇ ve yoˬ.

35Yawˇ hui teˇ ceuˬ ceuˬ shiˍ gaˇ ve kʼo, aˉ hkʼaw lo a shu yawˇ ve awˬ hpawˇ hta‸ na nyi cawˇ ve yoˬ. Awˬ lawn kʼo, yaˇ miˇ lehˬ Hkri‸ yaˇ awˬ moˍ awˬ hkʼaw lo tawˇ yaw ve kʼo, ya‸ taw tuˬ hpeh‸ ve yoˬ.

36Gʼuiˬsha ve tawˇ hkawˇ lehˬ, nawˬ hui awˬ hkʼaw lo awˉ lawˉ tawˆ la ve laˇ. Maˇ heˆ kʼo, nawˬ hui geh ceh tiˉ gaˬ la ve laˇ.

37Chaw teˇ gʼaˇ gʼaˇ bon maˍ paˍ hpeh‸ ve, maˇ heˆ kʼo Awˬ ha hpu la‸ shawnˍ cawˬ ve teh‸ yawˇ dawˇ ve kʼo, ngaˬ nawˬ hui hta‸ bvuh‸ laˇ ve teˇ hpaˍ lehˬ, Jawˇ mawˇ Yeˍsuˆ piˇ taˍ ve tawˇ hkawˇ hpeh‸ ve yoˬ teh‸, yawˇ shiˍ cawˇ ve yoˬ.

38Ya‸ hkʼaˇ, chaw teˇ gʼaˇ gʼaˇ maˇ shiˍ teh‸ kʼoˆ ve kʼo, ngaˬ hui htawˇ yawˇ hta‸ maˇ shiˍ.

39Hkʼe te leh, ngaˬ awˬ viˉ awˬ nyi teˇ hpaˍ-oˬ, bon maˍ puiˉ ve teˇ ceuˬ hta‸ sheˉ lai jaˇ ve nyi ma cawˬ piˇ-oˆ. Tawˇ laiˉ ceuˬ yaw chiˇ mvuh ve hta‸ htawˇ taˇ tawˍ taˍ.

40Ya‸ hkʼaˇ, hkʼa peu-eˬ ve hta‸ keunˍ da‸ cawˇ da‸ ve hkʼe, nyi sha ve awˬ hkʼaw lo te-o.

← Chapter 13 Jump to: Chapter 15 →