bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
1 Corinthians 12
1 Corinthians 12
Lahu Bible Edited © Thailand Bible Society and Bible Society of Myanmar, 2010, 2020.
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 13 →
1
Awˬ viˉ awˬ nyi teˇ hpaˍ-oˬ, co ha hpawˇ ve la‸ shawnˍ teˇ hpaˍ awˬ lawn nawˬ hui shiˍ tuˬ ngaˬ heuˆ gaˇ ve yoˬ.
2
Nawˬ hui lawˇ kiˍ yaˇ hpeh‸ chehˇ ve teˇ yanˇ htaˇ, shu nawˬ hui hta‸ shiˍ kʼai ve hkʼe nawˬ hui kʼai leh, tawˇ yaw maˇ puiˉ ve shaˉ ho‸ teˇ hpaˍ hta‸ oˉ kʼoˍ ca pui ve hta‸ nawˬ hui shiˍ chehˇ ve yoˬ.
3
Hkʼe te leh, ngaˬ nawˬ hui hta‸ chi hkʼe shiˍ piˇ lawˬ gaˇ ve yoˬ. Yeˍsuˆ lehˬ hkeu taˍ ve chaw hpeh‸ ve yoˬ teh‸, chaw teˇ gʼaˇ ka‸ Gʼuiˬ sha ve Awˬ ha hpu hta‸ cuˇ leh kʼoˆ maˇ hpeh‸. Chi hkʼoˆ ka‸, da‸ ve kehˬ ve Awˬ ha hpu hta‸ maˇ cuˇ ve kʼo, Yeˍsuˆ lehˬ Jawˇmawˇ hpeh‸ ve yoˬ teh‸, chaw teˇ gʼaˇ ka‸ kʼoˆ maˇ hpeh‸.
4
La‸ shawnˍ laiˉ ceuˬ cawˬ ve htawˇ, Awˬ ha hpu teˇ gʼaˇ tiˉ cawˬ ve yoˬ.
5
Yeˍsuˆ awˬ pon te tuˬ ve kanˉ laiˉ ceuˬ cawˬ ve htawˇ, Jawˇmawˇ teˇ gʼaˇ tiˉ cawˬ ve yoˬ.
6
Te tawˆ la ve kanˉ laiˉ ceuˬ cawˬ ve htawˇ, chaw teˇ gʼaˇ le le awˬ hkʼaw lo hkʼa peu-eˬ te tawˆ la piˇ shehˍ hpaˇ lehˬ, Gʼuiˬsha teˇ gʼaˇ tiˉ cawˬ ve yoˬ.
7
Chaw hkʼa peu-eˬ awˬ pon awˬ bon cawˬ tuˬ, Awˬ ha hpu hpeu‸ maˍ laˇ ve teˇ ceuˬ, teˇ gʼaˇ le le hta‸ piˇ taˍ ve yoˬ.
8
Awˬ lawn kʼo Awˬ ha hpu lehˬ, chaw teˇ gʼaˇ hta‸ cuˇ yiˍ tawˇ hkawˇ piˇ ve yoˬ. Awˬ ha hpu oˇ ve lehˬ, awˬ kaˍ awˬ nu teˇ gʼaˇ hta‸ shiˍ puiˉ ve tawˇ hkawˇ piˇ ve yoˬ.
9
Awˬ ha hpu oˇ ve lehˬ, awˬ kaˍ awˬ nu teˇ gʼaˇ hta‸ yonˍ puiˉ ve teˇ ceuˬ piˇ ve yoˬ. Awˬ ha hpu oˇ ve teˇ gʼaˇ tiˉ lehˬ, awˬ kaˍ awˬ nu teˇ gʼaˇ hta‸ chaw naˬ hta‸ gu na-e piˇ puiˉ ve la‸ shawnˍ piˇ ve yoˬ.
10
Teˇ gʼaˇ hta‸ anˇ tuˬ te hpeh‸ tuˬ piˇ ve, teˇ gʼaˇ hta‸ bon maˍ puiˉ tuˬ piˇ ve, teˇ gʼaˇ hta‸ awˬ ha teˇ hpaˍ hta‸ fuiˍ da‸ pehˬ da‸ puiˉ tuˬ piˇ ve, teˇ gʼaˇ hta‸ tawˇ laiˉ ceuˬ yaw chiˇ mvuh puiˉ tuˬ piˇ ve, teˇ gʼaˇ hta‸ tawˇ laiˉ ceuˬ yaw chiˇ mvuh ve hta‸ tcuhˉ kuiˬ yuˬ tawˆ puiˉ tuˬ piˇ ve yoˬ.
11
Chi hkʼa peu-eˬ Awˬ ha hpu teˇ gʼaˇ tiˉ te tawˆ la leh, yawˇ a loˍ cawˇ ve hkʼe teˇ gʼaˇ peuˬ teˇ gʼaˇ hta‸ pehˬ piˇ ve yoˬ.
12
Awˬ to lehˬ, teˇ to tiˉ hpeh‸ leh awˬ hkʼeun maˇ maˇ cawˬ ve yoˬ. Awˬ to ve awˬ hkʼeun teˇ hpaˍ maˇ ve htawˇ, awˬ to teˇ to tiˉ hpeh‸ ve hkʼe, Hkri‸ htawˇ oˇ hkʼe hpeh‸ ve yoˬ.
13
Awˬ lawn kʼo, Yuˇda‸ chaw leh Heˍlaˍsaˆ chaw maˇ kʼoˆ, awˬ ceˬ leh ponˬ peuˬ ve chaw maˇ kʼoˆ, ngaˬ hui hkʼa peu-eˬ awˬ to teˇ to tiˉ hpeh‸ la tuˬ, Awˬ ha hpu teˇ gʼaˇ tiˉ awˬ hkʼaw lo ngaˬ hui baˆtiˆsaˬ hkanˍ taˍ peuˬ. Ngaˬ hui hkʼa peu-eˬ teˇ geh Awˬ ha hpu teˇ gʼaˇ tiˉ hta‸ gʼa dawˬ peuˬ.
14
Awˬ lawn kʼo, awˬ to lehˬ awˬ hkʼeun teˇ maˬ tiˉ cawˬ ve maˇ heˆ. Cawˬ maˇ ve yoˬ.
15
Hkui sheh lehˬ, Ngaˬ la‸ sheh maˇ heˆ ve pa taw awˬ to hta‸ maˇ caˉ da‸ teh‸ kʼoˆ ve htawˇ, oˇ hkʼe kʼoˆ ve pa taw awˬ to hta‸ maˇ caˉ da‸ ve maˇ heˆ.
16
Naˍ paw lehˬ, ngaˬ mehˆ shiˍ maˇ heˆ ve pa taw awˬ to hta‸ maˇ caˉ da‸ teh‸ kʼoˆ ve htawˇ, oˇ hkʼe kʼoˆ ve pa taw awˬ to hta‸ maˇ caˉ da‸ ve maˇ heˆ.
17
Awˬ to hkʼa peu-eˬ mehˆ shiˍ hpeh‸ ve kʼo, hkʼaˬ hkʼe te kaˇ hpeh‸ tuˬ ve le. Awˬ to hkʼa peu-eˬ naˍ paw hpeh‸ ve kʼo, hkʼaˬ hkʼe te nuˬ hpeh‸ tuˬ ve le.
18
Ya‸ hkʼaˇ, Gʼuiˬsha lehˬ yawˇ a loˍ cawˇ ve hkʼe, awˬ to awˬ hkʼaw lo awˬ hkʼeun teˇ hpaˍ hta‸ a shu yawˇ ve chehˇ kuiˬ lo keu taˍ ve yoˬ.
19
Awˬ hkʼeun hkʼa peu-eˬ lehˬ, awˬ hkʼeun teˇ maˬ tiˉ hpeh‸ ve kʼo, awˬ to hkʼaˬ hkʼe te cawˬ hpeh‸ tuˬ le.
20
Ya‸ hkʼaˇ, awˬ hkʼeun cawˬ maˇ ve htawˇ, awˬ to teˇ to tiˉ hpeh‸ ve yoˬ.
21
Mehˆ shiˍ lehˬ, Ngaˬ nawˬ hta‸ maˇ loˍ teh‸, la‸ sheh hta‸ kʼoˆ maˇ hpeh‸. Oˉ kʼoˍ htawˇ, Ngaˬ nawˬ hta‸ maˇ loˍ teh‸, hkui sheh hta‸ kʼoˆ maˇ hpeh‸.
22
Ya‸ hkʼaˇ, awˬ to awˬ hkʼaw lo awˬ gʼaˇ nuˇ ve teh‸ ngaˬ hui dawˇ ve awˬ hkʼeun teˇ hpaˍ htawˇ gʼa cawˬ ve yoˬ.
23
Awˬ to awˬ hkʼaw lo awˬ me‸ awˬ hponˇ maˇ cawˬ ve teh‸ ngaˬ hui dawˇ taˍ ve awˬ hkʼeun teˇ hpaˍ hta‸ leuˉ leh ngaˬ hui awˬ me‸ awˬ hponˇ piˇ ve yoˬ. Ngaˬ hui ve nyi maˇ sha ve awˬ hkʼeun teˇ hpaˍ hta‸ htawˇ, leuˉ leh nyi sha tuˬ ngaˬ hui te piˇ ve yoˬ.
24
Nyi sha chehˇ ve awˬ hkʼeun teˇ hpaˍ hta‸ oˇ hkʼe te tuˬ maˇ loˍ. Awˬ to awˬ hkʼaw lo hpaˆ da‸ guiˇ da‸ ve maˇ gʼa cawˬ leh, awˬ hkʼeun teˇ hpaˍ teˇ maˬ leh teˇ maˬ dawˇ nyi da‸ puiˉ tuˬ,
25
Gʼuiˬsha lehˬ awˬ to hta‸ caˉ da‸ piˇ ve awˬ hkʼaw lo, awˬ gʼaˇ nuˇ ve awˬ hkʼeun teˇ hpaˍ hta‸ leuˉ leh awˬ me‸ awˬ hponˇ piˇ ve yoˬ.
26
Awˬ hkʼeun teˇ maˬ tu‸ hkanˍ ve kʼo, awˬ hkʼeun hkʼa peu-eˬ htawˇ yawˇ geh tu‸ hkanˍ ve yoˬ. Awˬ hkʼeun teˇ maˬ awˬ me‸ awˬ hponˇ gʼa ve kʼo, awˬ hkʼeun hkʼa peu-eˬ htawˇ yawˇ geh gʼa ha lehˬ ve yoˬ.
27
Nawˬ hui lehˬ Hkri‸ ve awˬ to hpeh‸ leh, teˇ gʼaˇ peuˬ teˇ gʼaˇ awˬ to oˇ ve awˬ hkʼaw lo awˬ hkʼeun hpeh‸ ve yoˬ.
28
Gʼuiˬsha lehˬ, Hkri‸ yaˇ awˬ moˍ awˬ hkʼaw lo chaw chi teˇ hpaˍ hta‸ teh taˍ ve yoˬ. Awˉ lawˉ teˇ moˍ tcuh yaˇ hui, nyiˇ moˍ teˇ moˍ bon maˍ paˍ hui, shehˆ moˍ teˇ moˍ maˍ piˇ shehˍ hpaˇ hui, oˇ ve hkʼaw‸ nawˉ anˇ tuˬ te shehˍ hpaˇ hui, oˇ ve hkʼaw‸ nawˉ chaw naˬ hui hta‸ gu na-e piˇ puiˉ ve chaw hui, ga piˇ shehˍ hpaˇ hui, awˬ hoˉ te ve chaw hui leh, tawˇ laiˉ ceuˬ yaw chiˇ mvuh puiˉ ve chaw hui hta‸ Hkri‸ yaˇ awˬ moˍ awˬ hkʼaw lo Gʼuiˬsha teh taˍ peuˬ ve yoˬ.
29
Hkʼa peu-eˬ tcuh yaˇ hpeh‸ ve laˇ. Hkʼa peu-eˬ bon maˍ paˍ hpeh‸ ve laˇ. Hkʼa peu-eˬ maˍ piˇ shehˍ hpaˇ hpeh‸ ve laˇ. Hkʼa peu-eˬ anˇ tuˬ te shehˍ hpaˇ hpeh‸ ve laˇ.
30
Hkʼa peu-eˬ chaw naˬ hta‸ gu na-e piˇ puiˉ ve la‸ shawnˍ cawˬ ve laˇ. Hkʼa peu-eˬ tawˇ laiˉ ceuˬ yaw chiˇ mvuh puiˉ ve laˇ. Hkʼa peu-eˬ tcuhˉ kuiˬ yuˬ tawˆ puiˉ ve laˇ.
31
Nawˬ hui lehˬ, hkʼa peu-eˬ a‸ kehˉ da‸ ve la‸ shawnˍ teˇ hpaˍ hta‸ sheˉ lai jaˇ ve nyi ma cawˬ piˇ-oˆ. Chi hkʼoˆ ka‸, hkʼa peu-eˬ a‸ kehˉ da‸ jaˇ ve ya‸ kʼaw teˇ caˆ ngaˬ nawˬ hui hta‸ maˍ laˇ tuˬ yoˬ.
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 13 →
All chapters:
1
2
3
4
5
6
7
8
9
10
11
12
13
14
15
16