2 Samuel 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Sawˉlu‸ suh peuˬ hkʼaw‸ nawˉ, Daˍviˆ lehˬ Aˍmaˍlehˆ chaw hui hta‸ bawˆ gʼaˇ taˉ leh Ziˆkaˍlaˆ venˇ hkʼaw nyiˇ nyi chehˇ taˍ ve yoˬ.

2Shehˆ nyi teˇ nyi gaˬ htaˇ, Sawˉlu‸ ve ma‸ yaˇ teˇ gʼaˇ yawˇ geh gʼuiˇ gaˬ la ve yoˬ. Yawˇ dawˇ haˍ jaˇ ve hta‸ hpeu‸ maˍ tuˬ, yawˇ ve veu‸ kʼaˇ hta‸ tzuh‸ suhˍ leh yawˇ ve oˉ kʼoˍ hkʼoˆ lo je‸ meu-e hkaˆ pfuhˍ taˍ ve yoˬ. Yawˇ Daˍviˆ geh laˬ leh, yawˆ yan ve hkʼaw miˬ chaˇ hkʼoˆ boˆ taˍ ve yoˬ.

3Oˇ htaˇ Daˍviˆ lehˬ, Nawˬ hkʼaˬ lo laˬ ve le teh‸, yawˇ hta‸ na nyi ve yoˬ. Ngaˬ lehˬ ma‸ bawˆ kuiˬ lo hpaw tawˆ la ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

4Hkʼaˬ hkʼe hpeh‸ ve awˬ lawn ngaˬ hta‸ hto laˇ-oˆ, teh‸ Daˍviˆ yawˇ hta‸ kʼoˆ piˇ ve yoˬ. Yawˇ kʼoˆ ve, Ngaˬ hui ve ma‸ yaˇ teˇ hpaˍ bawˆ da‸ kuiˬ lo gʼuiˇ hpaw-e leh, ngaˬ hui ve ma‸ yaˇ suh maˇ jaˇ ve yoˬ. Sawˉlu‸ leh yawˇ ve yaˇ paˍ Yawˉnaˆtanˍ hui htawˇ suh peuˬ ve yoˬ, teh‸ kʼoˆ piˇ ve yoˬ.

5Oˇ htaˇ Daˍviˆ lehˬ, Sawˉlu‸ leh Yawˇnaˆtanˍ suh-e ve nawˬ hkʼaˬ hkʼe te shiˍ ve le, teh‸ yawˇ hta‸ kʼaw‸ na nyi ve yoˬ.

6Yawˇ kʼaw‸ yaw hkʼaw‸ leh kʼoˆ ve, Oˇ ve teˇ yanˇ ngaˬ lehˬ, Giˇlaˍbawˇ hkʼaw hkʼoˆ lo chehˇ taˍ ve yoˬ. Sawˉlu‸ lehˬ, yawˇ ve gehˇ hta‸ ngeh huˉ chehˇ leh, canˇ paˍ ve iˉ mvuhˇ lawˬ teˇ hpaˍ shanˬ te shanˬ yawˇ hta‸ neˇ la chehˇ ve yoˬ.

7Oˇ htaˇ yawˇ hpfuhˆ nyi leh ngaˬ hta‸ mawˬ ve teˇ yanˇ, ngaˬ hta‸ kuˬ laˇ ve yoˬ. Jawˇmawˇ-oˬ, aˬ hto‸ ma le, teh‸ ngaˬ yawˇ hta‸ kʼoˆ piˇ ve teˇ yanˇ,

8ngaˬ a shu hpeh‸ ve hta‸ yawˇ na nyi laˇ ve yoˬ. Ngaˬ Aˍmaˍlehˆ chaw hpeh‸ ve awˬ lawn yawˇ hta‸ kʼoˆ piˇ ve yoˬ.

9Oˇ htaˇ yawˇ lehˬ, Ngaˬ hta‸ hkaˆ ce heuˆ laˇ leh suh la paˇ neˇ ve yoˬ. Choˬ kaˬ laˬ leh ngaˬ hta‸ a ciˉ tiˇ pehˍ laˇ-oˆ, teh‸ kʼoˆ laˇ ve yoˬ.

10Hkʼe te leh, yawˇ suh-e tuˬ ve hta‸ ngaˬ shiˍ ve pa taw, ngaˬ kʼai leh yawˇ hta‸ tiˇ pehˍ piˇ ve yoˬ. Oˇ hkʼe te peuˬ hkʼaw‸ nawˉ, yawˇ ve shi uˉ tcuhˍ leh yawˇ ve la‸ kawˬ hta‸ yuˬ veu laˇ leh nawˬ geh laˬ ve yoˬ, teh‸ kʼoˆ ve yoˬ.

11Oˇ htaˇ Daˍviˆ dawˇ haˍ jaˇ leh, yawˇ ve veu‸ kʼaˇ hta‸ tzuh‸ suhˍ ve yoˬ. Yawˇ ve chaw teˇ hpaˍ htawˇ, a shu yawˇ ve veu‸ kʼaˇ hta‸ tzuh‸ suhˍ ve yoˬ.

12Mvuhˇ hpeu‸ la htaˇ hkʼa gaˬ yawˇ hui Sawˉlu‸ leh Yawˇnaˆtanˍ awˬ pon maˇ kʼoˆ, Gʼuiˬsha ve Iˉsaˍreˍlaˆ chaw teˇ hpaˍ awˬ pon maˇ kʼoˆ, dawˇ haˍ leh caˇ tuˬ ce chehˇ ve yoˬ. Awˬ lawn kʼo, Iˉsaˍreˍlaˆ chaw maˇ maˇ tiˇ pehˍ ve hta‸ gʼa hkanˍ ve pa taw yoˬ.

13Oˇ ve hkʼaw‸ nawˉ Daˍviˆ lehˬ, Nawˬ hkʼaˬ lo chehˇ ve le, teh‸ yawˇ hta‸ awˬ lawn ca kʼoˆ piˇ la ve chaw oˇ ve hta‸ na nyi ve yoˬ. Chaw oˇ ve lehˬ, Ngaˬ Aˍmaˍlehˆ chaw hpeh‸ leh, nawˬ ve mvuhˇmiˬ hkʼaw chehˇ taˍ ve yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ.

14Nawˬ lehˬ Gʼuiˬsha leuˆ yuˬ taˍ ve jawˇmawˇ hta‸ tiˇ pehˍ haˆ law leˇ, teh‸ Daˍviˆ yawˇ hta‸ kʼoˆ piˇ ve yoˬ.

15Yawˇ oˇ hkʼe kʼoˆ peuˬhkʼaw‸ nawˉ, yawˇ ve ma‸ yaˇ teˇ gʼaˇ hta‸ kuˬ leh, Chaw chi hpaˇ hta‸ tiˇ pehˍ-o‸, teh‸ yawˇ hta‸ kʼoˆ piˇ ve yoˬ. Ma‸ yaˇ oˇ ve htawˇ, Aˍmaˍlehˆ chaw oˇ ve hta‸ tiˇ pehˍ ve yoˬ.

16Oˇ ve hkʼaw‸ nawˉ Daˍviˆ lehˬ, Chi hkʼe hpeh‸ la tuˬ nawˬ hkʼaˇ nawˬ te ve yoˬ. Gʼuiˬsha leuˆ yuˬ taˍ ve jawˇmawˇ hta‸ nawˬ tiˇ pehˍ piˇ peuˬ teh‸ kʼoˆ ve lehˬ, nawˬ awˬ to hta‸ nawˬ ciˍ yanˍ piˇ ve yoˬ, teh‸ Aˍmaˍlehˆ chaw oˇ ve hta‸ kʼoˆ piˇ ve yoˬ.

17Daˍviˆ lehˬ, Sawˉlu‸ leh Yawˇnaˆtanˍ awˬ pon dawˇ haˍ leh kʼa muiˬ hkawˇ chi hkʼe kʼoˆ kʼa ve yoˬ.

18Yawˇ kʼa ve kʼa muiˬ hkawˇ chi, Yuˇda‸ mvuhˇmiˬ hkʼaw chehˇ ve chaw hui hta‸ htawˇ maˍ piˇ tcuh ve yoˬ. (Kʼa muiˬ hkawˇ chi hta‸ Yaˍshaˍ li‸ daw hkʼaw bvuh‸ keu taˍ ve yoˬ.)

19Iˉsaˍreˍlaˆ ve hkʼaw pui teˇ hpaˍ awˬ hkʼoˆ lo ngaˬ hui ve awˬ hoˉ awˬ naˬ teˇ hpaˍ suh-e ve yoˬ. Ha‸ hanˉ jaˇ ve ngaˬ hui ve ma‸ yaˇ teˇ hpaˍ htawˇ paiˍ ve yoˬ.

20Awˬ lawn chi hta‸ Gaˍtaˆ venˇ leh Aˍshaˆkeˍlonˍ venˇ hkʼaw chehˇ ve chaw hui hta‸ taˇ ca hto piˇ. Hpiˇliˇtiˆ yaˇ miˇ teˇ hpaˍ leh buiˇshaˆaˉnaˆ chaw hui ve yaˇ miˇ teˇ hpaˍ hta‸ taˇ ha lehˬ tcuh.

21Giˇlaˍbawˇ hkʼaw hkʼoˆ lo mvuhˇ yeˬ maˇ kʼoˆ, ciˍ gʼuiˬ maˇ kʼoˆ, taˇ ce la piˇ, hkʼaw oˇ ve teˇ hpaˍ hkʼaˬ htaˆ ka‸ yiˍ lehˍ cawˬ piˇ-oˆ. Awˬ lawn kʼo, ha‸ hanˉ ve ma‸ yaˇ teˇ hpaˍ ve htanˬ tuˬ oˇ kaˬ lo ce taˍ ve yoˬ. Sawˉlu‸ ve htanˬ tuˬ htawˇ yawˇ taˆ peuˬ.

22Yawˇnaˆtanˍ ve hkaˆ lehˬ, kawˆ tuˬ uiˍ jaˇ leh, Sawˉlu‸ ve aˉhtaw lehˬ, ha kʼaˉ puiˉ ve teˇ ceuˬ maˇ cawˬ. Awˬ gʼaˇ uiˍ ve chaw hta‸ dawˆ baˬ leh, canˇ paˍ teˇ hpaˍ hta‸tiˇ pehˍ piˇ ve yoˬ.

23Sawˉlu‸ leh Yawˇnaˆtanˍ lehˬ, ha‸ puiˉ jaˇ leh da‸ jaˇ ve yoˬ. Yawˇ huiˉ maˬ teˇ geh te‸ chehˇ leh, teˇ geh suh-e ve yoˬ. Yawˇ huiˉ maˬ lehˬ, aˉ ceˬ a‸ kehˉ gehˬ jaˇ leh, laˇ caˬ shiˉ a‸ kehˉ awˬ gʼaˇ uiˍ jaˇ ve yoˬ.

24Iˉsaˍreˍlaˆ yaˇ miˇ teˇ hpaˍ-oˬ, Sawˉlu‸ awˬ pon dawˇ haˍ leh paˆ hawˬ chehˇ-oˆ. Yawˇ lehˬ nawˬ hui hta‸ awˬ hpfuhˇ hkʼaˆ jaˇ ve veu‸ kʼaˇ ca feuˉ laˇ leh, hpu hkʼeun shi hkʼeun teˇ hpaˍ ca tcuhˉ laˇ taˍ ve yoˬ.

25Ha‸ hanˉ jaˇ ve ma‸ yaˇ teˇ hpaˍ paiˍ peuˬ, yawˇ hui lehˬ, ma‸ bawˆ kuiˬ lo tiˇ pehˍ ve hta‸ gʼa hkanˍ ve yoˬ. Yawˇ naˆtanˍ htawˇ hkʼaw hkʼoˆ lo suh taˍ ve yoˬ.

26Ngaˬ nyi paˍ Yawˇnaˆtanˍ-oˬ, ngaˬ nawˬ awˬ pon dawˇ haˍ leh paˆ hawˬ chehˇ ve yoˬ. Nawˬ ngaˬ hta‸ hkʼaˬ ma ha‸ jaˇ ve le. Nawˬ ngaˬ hta‸ ha‸ ve teˇ ceuˬ hkʼaˬ ma anˇ tuˬ uiˍ jaˇ ve le. Nawˬ ngaˬ hta‸ ha‸ ve teˇ ceuˬ lehˬ, yaˇ miˇ teˇ hpaˍ ha‸ laˇ ve a‸ kehˉ uiˍ leuˉ ve yoˬ.

27Ha‸ hanˉ ve ma‸ yaˇ teˇ hpaˍ paiˍ peuˬ. Yawˇ hui ve la‸ caˉ teˇ hpaˍ lehˬ, kʼaw‸ yehˇ maˇ hpeh‸-o, teh‸ kʼoˆ ve yoˬ.

Jump to: Chapter 2 →