2 Samuel 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to: Chapter 13 →

1Gʼuiˬsha lehˬ, yawˇ ve tcuh kaˍ paˍ Naˍtanˍ hta‸ Daˍviˆ geh kʼai tcuh ve yoˬ. Naˍtanˍ Daˍviˆ geh laˬ leh kʼoˆ ve, Venˇ teˇ venˇ hkʼaw chaw nyiˇ gʼaˇ chehˇ taˍ ve yoˬ. Teˇ gʼaˇ lehˬ paw sha jaˇ leh, teˇ gʼaˇ lehˬ haˍ gʼawˇ jaˇ ve yoˬ.

2Paw sha ve chaw teˇ gʼaˇ lehˬ, nuˇ, yawˬ, maˇ maˇ cawˬ ve yoˬ.

3Ya‸ hkʼaˇ, haˍ gʼawˇ ve chaw lehˬ, yawˇ vuiˬ taˍ ve yawˬ ehˉ teˇ hkeh tiˉ cawˬ ve yoˬ. Yawˇ lehˬ, yawˬ ehˉ oˇ ve hta‸ hkʼa deh‸ ha‸ shaˉ piˇ leh, yawˬ ehˉ oˇ ve lehˬ yawˇ ve yaˇ teˇ hpaˍ geh teˇ geh uiˍ la chehˇ ve yoˬ.

4Teˇ nyi htaˇ, paw sha paˍ ve yehˬ lo hkehˉ chaw teˇ gʼaˇ gaˬ la ve yoˬ. Paw sha paˍ oˇ ve lehˬ, hkehˉ chaw hta‸ yawˇ ve ceˇ teˇ hkeh ka‸ maˇ tiˇ caˍ gaˇ. Hkʼe te leh, haˍ gʼawˇ ve chaw oˇ ve hpaˇ ve yawˬ ehˉ hta‸ yuˬ leh, hkehˉ chaw oˇ ve hta‸ te caˍ piˇ ve yoˬ, teh‸ yawˇ hta‸ kʼoˆ piˇ ve yoˬ.

5Daˍviˆ lehˬ chaw oˇ ve hta‸ nyi ma zuhˆ jaˇ leh kʼoˆ ve, Chi hkʼe te ve chaw lehˬ suh keunˍ ve yoˬ, teh‸ te‸ chehˇ ve Gʼuiˬsha hta‸ cuˇ leh ngaˬ hkanˍ ve yoˬ.

6Chaw oˇ ve lehˬ, shu ve mawˇ teˇ pun yuˬ taˍ ve awˬ pon awˇ pun gʼa kʼaw‸ shaiˍ piˇ ve yoˬ, teh‸ kʼoˆ ve yoˬ.

7Oˇ htaˇ Naˍtanˍ Daˍviˆ hta‸ kʼoˆ piˇ ve, Nawˬ lehˬ chaw oˇ ve hpaˇ hpeh‸ ve yoˬ. Iˉsaˍreˍlaˆ ve Jawˇmawˇ Gʼuiˬsha chi hkʼe kʼoˆ ve yoˬ. Ngaˬ nawˬ hta‸ Iˉsaˍreˍlaˆ chaw hui ve jawˇmawˇ te tcuh leh, Sawˉlu‸ ve la‸ sheh hkʼaw ponˬ piˇ taˍ ve yoˬ.

8Yawˇ ve mvuhˇmiˬ leh yawˇ ve awˬ miˇ ma teˇ hpaˍ ngaˬ nawˬ hta‸ piˇ taˍ ve yoˬ. Iˉsaˍreˍlaˆ leh Yuˇda‸ chaw hui ve mvuhˇmiˬ hkʼoˆ ngaˬ nawˬ hta‸ jawˇmawˇ te tcuh taˍ ve yoˬ. Chi teˇ hpaˍ nawˬ awˬ pon maˇ law‸ sheˍ ve kʼo, ngaˬ nawˬ hta‸ nyiˇ pun kʼaw‸ piˇ laˇ tuˬ sheˍ ve yoˬ.

9Aˬ hto‸ ma pa taw, nawˬ ngaˬ ve tawˇ hkawˇ hta‸ maˇ na yuˬ ve le. Aˬ hto‸ ma pa taw, nawˬ haiˬ ve kanˉ chi hta‸ te ve le. Nawˬ lehˬ, Uˇriˇya‸ hta‸ ma‸ bawˆ kuiˬ lo suh-e piˇ lawˬ leh, yawˇ ve awˬ miˇ ma hta‸ heuˆ taˍ ve yoˬ.

10Nawˬ lehˬ ngaˬ ve tawˇ hkawˇ hta‸ maˇ na leh, Uˇriˆya‸ ve awˬ miˇ ma hta‸ heuˆ ve pa taw, nawˬ ve awˬ ceuˬ awˬ hkʼaˇ teˇ hpaˍ hpaˍ hpuiˇ suh va‸ suh ve hkʼe gʼa te suh-e tuˬ yoˬ.

11Nawˬ ve yehˬ yaˇ kʼa yaˇ teˇ gʼaˇ, nawˬ hta‸ dawˇ haˍ tuˬ te laˇ tuˬ yoˬ. Nawˬ ve awˬ miˇ ma teˇ hpaˍ hta‸ ngaˬ yuˬ leh, awˬ nu ve chaw teˇ gʼaˇ hta‸ piˇ ve hta‸ nawˬ gʼa mawˬ ve teˇ yanˇ, ngaˬ ve tawˇ biˇ la peuˬ ve hta‸ nawˬ gʼa shiˍ tuˬ yoˬ. Chaw oˇ ve lehˬ, mvuhˇ law‸ kʼaw htaˇ nawˬ ve awˬ miˇ ma teˇ hpaˍ hta‸ hkʼa mvuhˇ hkʼa na te piˇ tuˬ yoˬ.

12Nawˬ lehˬ, baˬ kuiˬ lo venˇbaˆ te ve yoˬ. Ya‸ hkʼaˇ, ngaˬ lehˬ nawˬ te taˍ ve kanˉ chi hta‸ awˬ gʼeuˆ ba kuiˬ lo hpeu‸ tawˆ la leh, Iˉsaˍreˍlaˆ chaw hkʼa peu-eˬ hta‸ maw piˇ tuˬ yoˬ, teh‸ Daˍviˆ hta‸ kʼoˆ piˇ ve yoˬ.

13Oˇ htaˇ Daˍviˆ lehˬ, Ngaˬ Gʼuiˬsha hta‸ te ya‸ jaˇ peuˬ, teh‸ kʼoˆ ve yoˬ. Naˍtanˍ kʼaw‸ yaw hkʼaw‸ leh kʼoˆ ve, Gʼuiˬsha nawˬ hta‸ venˇbaˆ hpehˇ laˇ leh, nawˬ gʼa suh tuˬ ve maˇ heˆ.

14Ya‸ hkʼaˇ, nawˬ Gʼuiˬsha hta‸ nyi ma zuhˆ tuˬ te piˇ ve pa taw, nawˬ ve yaˇ gʼa suh-e tuˬ yoˬ, teh‸ Daˍviˆ hta‸ kʼoˆ piˇ ve yoˬ.

15Oˇ hkʼe kʼoˆ peuˬ hkʼaw‸ nawˉ, Naˍtanˍ tawˆ kʼai ve yoˬ. Gʼuiˬsha lehˬ, Uˇriˇya‸ miˇ ma geh paw la ve yaˇ oˇ ve hta‸ naˬ jaˇ piˇ lawˬ ve yoˬ.

16Daˍviˆ lehˬ, yaˇ oˇ ve kʼaw‸ chehˇ sha la tuˬ, Gʼuiˬsha geh bon gʼaˇ hte‸ lawˬ ve yoˬ. Yawˇ te‸ chiˉ caˇ tuˬ maˇ caˇ. Teˇ haˉ le le yawˇ ve bawehˇ hkʼaw lo‸-e leh, teˇ haˉ tanˇ hkuinˇ miˬ chaˇ hkʼoˆ lo chehˇ taˍ ve yoˬ.

17Yawˇ ve hawˉ yehˬ hta‸ ha‸ shaˉ chehˇ ve chaw teˇ hpaˍ, yawˇ geh kʼai leh yawˇ hta‸ tu la tuˬ hto piˇ ve htawˇ, yawˇ maˇ tu la. Yawˇ hui geh te‸ chiˉ caˇ tuˬ maˇ caˇ.

18Teˇ shinˉ ponˬ peuˬ hkʼaw‸ nawˉ, yaˇ oˇ ve suh-e ve yoˬ. Hawˉ yehˬ hkʼaw chehˇ taˍ ve chaw oˇ ve teˇ hpaˍ lehˬ, awˬ lawn chi Daˍviˆ hta‸ kʼoˆ piˇ maˇ haˆ. Yawˇ hui kʼoˆ ve, Yaˇ ehˉ oˇ ve te‸ chehˇ sheˍ htaˇ, ngaˬ hui yawˇ hta‸ tawˇ yaw piˇ ve ka‸ yawˇ te‸ chiˉ maˇ kʼaw‸ kʼoˆ laˇ. Yaˇ suh peuˬ, teh‸ ngaˬ hui yawˇ hta‸ hkʼa‸ hkʼe te kʼoˆ piˇ hpeh‸ tuˬ ve le. Yawˇ lehˬ kawˆ tuˬ uiˍ ve kanˉ teˇ ceuˬ ceuˬ te tawˆ la tuˬ yoˬ, teh‸ kʼoˆ ve yoˬ.

19Yawˇ hui tawˇ tsuh-ehˆ te da‸ chehˇ ve hta‸ Daˍviˆ gʼa mawˬ ve teˇ yanˇ, yawˇ ve yaˇ suh peuˬ ve hta‸ jawˬ la ve yoˬ. Hkʼe te leh, Yaˇ suh-oˬ laˇ, teh‸ yawˇ hui hta‸ na nyi ve yoˬ. Yoˬ, teh‸ yawˇ hui kʼaw‸ yaw hkʼaw‸ piˇ ve yoˬ.

20Oˇ htaˇ, Daˍviˆ tu la leh iˉ kaˆ hehˉ peuˬ hkʼaw‸ nawˉ, oˉ kʼoˍ puiˍ leh veu‸ kʼaˇ htaiˍ ve yoˬ. Oˇ hkʼe te peuˬ hkʼaw‸ nawˉ, Gʼuiˬsha ve bon yehˬ lo kʼai leh, Gʼuiˬsha hta‸ oˉ kʼoˍ ca pui ve yoˬ. Yawˇ hawˉ yehˬ lo kʼaw‸ gaˬ la ve teˇ yanˇ caˇ tuˬ gu tcuh leh awˍ caˇ ve yoˬ.

21Oˇ htaˇ, hawˉ yehˬ hkʼaw chehˇ ve chaw teˇ hpaˍ lehˬ, Nawˬ te ve kanˉ hta‸ ngaˬ hui ca dawˇ maˇ tawˆ. Yaˇ ehˉ te‸ chehˇ sheˍ htaˇ, nawˬ te‸ chiˉ caˇ tuˬ maˇ caˇ leh gʼaˇ hte‸ hawˬ chehˇ ve yoˬ. Ya‸ hkʼaˇ, yaˇ suh peuˬ hkʼaw‸ nawˉ, nawˬ tu la leh caˇ tuˬ caˇ ve yoˬ, teh‸ yawˇ hta‸ kʼoˆ piˇ ve yoˬ.

22Daˍviˆ yawˇ hui hta‸ kʼaw‸ yaw hkʼaw‸ piˇ leh kʼoˆ ve, Yoˬ, yaˇ ehˉ te‸ chehˇ sheˍ htaˇ, ngaˬ caˇ tuˬ ce leh hawˬ chehˇ ve yoˬ. Gʼuiˬsha ngaˬ hta‸ ha kʼaˉ laˇ kʼo yaˇ oˇ ve maˇ suh-e hehˉ, teh‸ ngaˬ dawˇ ve yoˬ.

23Ya‸ hkʼaˇ, chi beu‸ yaˇ suh-e peuˬ ve pa taw, ngaˬ caˇ tuˬ ce ve ka‸ aˬ hto‸ ma awˬ bon cawˬ le. Yaˇ oˇ ve hta‸ ngaˬ kʼaw‸ te‸ la piˇ gʼa tuˬ ve laˇ. Teˇ nyi kʼo, ngaˬ htawˇ yawˇ geh gʼa kʼai tuˬ yoˬ. Yawˇ ngaˬ geh kʼaw‸ la tuˬ ve maˇ heˆ, teh‸ kʼoˆ ve yoˬ.

24Oˇ ve hkʼaw‸ nawˉ, Daˍviˆ lehˬ yawˇ miˇ ma Beˍtaˍsheˍbaˆ hta‸ nyi ma sha la tuˬ tawˇ yaw piˇ leh, yawˇ geh kʼaw‸ zuh‸ ve yoˬ. Hkʼe te leh, yaˇ paˍ teˇ gʼaˇ kʼaw‸ paw la leh, yawˇ hta‸ Sawˉla‸monˍ teh‸ meh piˇ ve yoˬ.

25Gʼuiˬsha lehˬ, yaˇ paˍ oˇ ve hta‸ ha‸ jaˇ leh, Yaˇ paˍ oˇ ve hta‸ Yeˍdaˍdiˆ teh‸ ca meh piˇ-oˆ, teh‸ Naˍtanˍ hta‸ kʼoˆ piˇ ve yoˬ.

26Yaˍbaˆ lehˬ, Aˍmawˇniˆ chaw hui ve venˇ lonˉ Raˍbaˆ venˇ hta‸ bawˆ yuˬ gʼa la paˇ neˇ ve yoˬ.

27Hkʼe te leh, yawˇ Daˍviˆ hta‸ tawˇ shanˍ feu piˇ leh kʼoˆ ve, Ngaˬ Raˍbaˆ venˇ hta‸ bawˆ leh, yawˇ hui ve iˉ kaˆ gʼuiˬ po lonˉ hta‸ yuˬ gʼa taˍ peuˬ.

28Nawˬ geh cawˬ taˍ sheˍ ve ma‸ yaˇ teˇ hpaˍ hta‸ shiˍ veu laˇ leh, nawˬ awˬ to venˇ chi hta‸ ca bawˆ yuˬ la-o. Venˇ chi hta‸ ngaˬ bawˆ gʼaˇ ve yoˬ, teh‸ shu kʼoˆ ve hta‸ ngaˬ maˇ heuˆ gaˇ, teh‸ tawˇ shanˍ feu piˇ ve yoˬ.

29Hkʼe te leh, Daˍviˆ lehˬ yawˇ ve ma‸ yaˇ teˇ hpaˍ hta‸ shiˍ veu leh Raˍbaˆ venˇ hta‸ ca bawˆ yuˬ ve yoˬ.

30Yawˇ hui ve shaˉ ho‸ lonˉ Miˆlaˍkonˍ lehˬ 18 cawehˬ hpaˆ hawˇ ve shi uˉ tcuhˍ teˇ maˬ cawˬ leh, shi uˉ tcuhˍ oˇ ve awˬ hkʼoˆ lo awˬ hpfuhˇ hkʼaˆ ve shehnˉ shiˍ teˇ hpaˍ cawˬ ve yoˬ. Daˍviˆ lehˬ, shi uˉ tcuhˍ oˇ ve hta‸ yuˬ leh, yawˇ ve oˉ kʼoˍ hta‸ hkʼawˆ taˍ ve yoˬ. Chi awˬ hkʼoˆ, yawˇ lehˬ venˇ hkʼaw cawˬ ve awˬ hpfuhˇ hkʼaˆ ve mawˇ jeˬ maˇ maˇ yuˬ kʼai ve yoˬ.

31Yawˇ lehˬ venˇ yaˇ oˇ ve teˇ hpaˍ hta‸ suhˆ gʼeu‸ tcuh ve yoˬ. Teˇ hpaˍ hpaˍ hta‸ ciˉ kʼoˆ, ceˉ ceˇ teˇ hpaˍ te tcuh leh, teˇ hpaˍ hpaˍ hta‸ li kiˉ shiˍ chiˆ tcuh ve yoˬ. Awˬ nu ve Aˍmawˇniˆ venˇ teˇ hpaˍ hkʼaw chehˇ ve chaw hui hta‸ htawˇ, oˇ ve hkʼa shuˍ te tcuh ve yoˬ. Peuˬ hkʼaw‸ nawˉ, yawˇ ve ma‸ yaˇ teˇ hpaˍ hta‸ shiˍ veu leh Yeˍruˆsaˍlehnˍ venˇ lo kʼaw‸ kʼo‸-e ve yoˬ.

← Chapter 11 Jump to: Chapter 13 →