2 Samuel 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Daˍviˆ ve yaˇ paˍ Aˍbaˆsaˍlonˍ lehˬ, awˬ hkiˇ awˬ naˬ da‸ jaˇ ve Taˍmaˍ teh‸ kʼoˆ ve awˬ nyi ma teˇ gʼaˇ cawˬ ve yoˬ. Awˬ nu ve Daˍviˆ yaˇ paˍ Aˍmaˍnonˍ lehˬ, yaˇ miˇ chi hta‸ hkʼawˇ faˍ jaˇ ve yoˬ.

2Yawˇ yaˇ miˇ chi hta‸ ha‸ jaˇ ve pa taw, naˬ hpeh‸ sheˬ ve yoˬ. Yaˇ miˇ chi lehˬ, yaˇ miˇ haˉ hpeh‸ ve pa taw, yawˇ maˇ gʼa taˬ teh‸ dawˇ ve yoˬ.

3Yawˇ lehˬ, Yawˇnaˍdaˆ teh‸ kʼoˆ ve awˬ chawˇ teˇ gʼaˇ cawˬ ve yoˬ. Chaw oˇ ve lehˬ, Daˍviˆ ve awˬ viˉ paˍ Shaˍmaˍ ve yaˇ hpeh‸ leh, laˆ jaˇ ve chaw hpeh‸ ve yoˬ.

4Yawˇnaˍdaˆ yawˇ hta‸ kʼoˆ piˇ ve, Nawˬ lehˬ jawˇmawˇ ve yaˇ hpeh‸ ve ka‸ nawˬ hta‸ nyi kʼo, dawˇ haˍ jaˇ ve hta‸ shuˍ ve yoˬ. Aˬ hto‸ ma hpeh‸ ve le. Ngaˬ hta‸ a ciˉ hto laˇ-oˆ, teh‸ yawˇ hta‸ na nyi ve yoˬ. Aˍmaˍnonˍ kʼaw‸ yaw hkʼaw‸ leh, Ngaˬ lehˬ Aˍbaˆsaˍlonˍ ve awˬ nyi ma Taˍmaˍ hta‸ ha‸ jaˇ ve yoˬ, teh‸ kʼoˆ ve yoˬ.

5Oˇ htaˇ Yawˇnaˍdaˆ kʼoˆ ve, Nawˬ chehˇ haˍ ve hkʼe te leh zuh‸ taˍ-o‸. Nawˬ pa nawˬ hta‸ ca nyi la ve teˇ yanˇ, yawˇ hta‸ chi hkʼe kʼoˆ piˇ-oˆ. Ngaˬ pa-oˬ, ngaˬ nyi ma Taˍmaˍ hta‸ choˬ kaˬ lo laˬ tcuh leh, ngaˬ hta‸ te caˍ te taw laˇ tcuh-o. Ngaˬ yawˇ hta‸ mawˬ hpeh‸ ve chehˇ kuiˬ lo yawˇ ngaˬ awˬ pon caˇ tuˬ gu leh, ngaˬ hta‸ yuˬ caˍ laˇ tcuh-o, teh‸ nawˬ pa hta‸ kʼoˆ piˇ-oˆ, teh‸ yawˇ hta‸ kʼoˆ piˇ ve yoˬ.

6Aˍmaˍnonˍ htawˇ chehˇ haˍ ve hkʼe te leh, zuh‸ chehˇ taˍ ve yoˬ. Jawˇmawˇ Daˍviˆ yawˇ hta‸ na nyi htaˇ, Aˍmaˍnonˍ yawˇ hta‸ kʼoˆ piˇ ve, Taˍmaˍ hta‸ choˬ kaˬ lo laˬ peu laˇ leh, ngaˬ yawˇ hta‸ mawˬ hpeh‸ ve chehˇ kuiˬ lo ngaˬ awˬ pon hkaoˍmonˇ te leh a ciˉ yuˬ caˍ laˇ tcuh-o, teh‸ kʼoˆ piˇ ve yoˬ.

7Hkʼe te leh, Daˍviˆ lehˬ Taˍmaˍ hta‸ awˬ viˉ paˍ Aˍmaˍnonˍ ve yehˬ lo kʼai tcuh leh, yawˇ awˬ pon caˇ tuˬ ca gu piˇ tcuh ve yoˬ.

8Taˍmaˍ tawˆ kʼai leh, Aˍmaˍnonˍ zuh‸ hpui hkʼaw zuh‸ chehˇ taˍ laˇ ve hta‸ gʼa mawˬ ve yoˬ. Hkʼe te leh, yawˇ junˍ meu-e hta‸ yuˬ leh Aˍmaˍnonˍ yawˇ hta‸ mawˬ hpeh‸ ve chehˇ kuiˬ lo yawˇ awˬ pon hkaoˍmonˇ te ve yoˬ.

9Peuˬ hkʼaw‸ nawˉ, hkaoˍmonˇ oˇ ve hta‸ yuˬ leh Aˍmaˍnonˍ hta‸ ca caˍ piˇ ve yoˬ. Ya‸ hkʼaˇ, yawˇ maˇ ha‸ yuˬ. Chaw hkʼa peu-eˬ hta‸ tawˆ kʼai tcuh-o, teh‸ yawˇ tawˇ piˇ leh, chaw hkʼa peu-eˬ tawˆ kʼai ve yoˬ.

10Oˇ htaˇ yawˇ lehˬ, Nawˬ te taˍ ve hkaoˍmonˇ ngaˬ geh yuˬ laˬ leh, nawˬ awˬ to ngaˬ hta‸ yuˬ caˍ laˇ-oˆ, teh‸ Taˍmaˍ hta‸ kʼoˆ piˇ ve yoˬ. Taˍmaˍ htawˇ hkaoˍmonˇ hta‸ yuˬ leh yawˇ geh kʼai ve yoˬ.

11Yawˇ hkaoˍmonˇ hta‸ yuˬ piˇ chehˇ ve teˇ yanˇ, Aˍmaˍnonˍ yawˇ ve la‸ sheh hta‸ gʼawˬ tiˍ taˍ leh, Choˬ kaˬ ngaˬ geh zuh‸ la-o, teh‸ yawˇ hta‸ kʼoˆ piˇ ve yoˬ.

12Ya‸ hkʼaˇ Taˍmaˍ kʼoˆ ve, Ngaˬ hta‸ chi hkʼe taˇ te laˇ. Chi hkʼe cha‸ chiˆ ve kanˉ hta‸ taˇ te-o.

13Hkʼaˬ hkʼe te leh chaw chi ma gʼuˇ suhˍ lo ngaˬ ve oˉ kʼoˍ chiˇ hpeh‸ tuˬ ve le. Iˉsaˍreˍlaˆ mvuhˇmiˬ hkʼaw nawˬ ka‸ awˬ me‸ awˬ hponˇ luˬ jaˇ tuˬ yoˬ. Jawˇmawˇ hta‸ tawˇ yaw piˇ-oˆ. Oˇ hkʼe te ve kʼo, nawˬ ngaˬ hta‸ gʼa tuˬ yoˬ, teh‸ yawˇ hta‸ kʼoˆ piˇ ve yoˬ.

14Ya‸ hkʼaˇ, yawˇ lehˬ Taˍmaˍ kʼoˆ ve tawˇ hta‸ maˇ na. Yawˇ lehˬ yaˇ miˇ a‸ kehˉ awˬ gʼaˇ uiˍ ve pa taw, yaˇ miˇ oˇ ve hta‸ yawˇ geh shiˍ zuh‸ leh, yawˇ hta‸ hkʼa mvuhˇ hkʼa na te piˇ ve yoˬ.

15Oˇ ve hkʼaw‸ nawˉ, Aˍmaˍnonˍ lehˬ Taˍmaˍ hta‸ nyi bawˬ jaˇ la ve yoˬ. Ponˬ laˬ htaˇ, yawˇ yaˇ miˇ oˇ ve hta‸ ha‸ ve a‸ kehˉ leuˉ leh, chi teˇ pawˆ yawˇ yaˇ miˇ oˇ ve hta‸ nyi bawˬ jaˇ ve yoˬ. Hkʼe te leh, Choˬ kaˬ lo tawˆ kʼai-o, teh‸ yaˇ miˇ oˇ ve hta‸ kʼoˆ piˇ ve yoˬ.

16Yaˇ miˇ kʼaw‸ yaw hkʼaw‸ leh kʼoˆ ve, Ngaˬ maˇ kʼai. Nawˬ ngaˬ hta‸ chi hkʼe te gʼa‸ kʼoˬ laˇ ve lehˬ, nawˬ ya‸ sheh ngaˬ hta‸ te laˇ ve kanˉ a‸ kehˉ venˇbaˆ uiˍ jaˇ ve yoˬ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, Aˍmaˍnonˍ lehˬ Taˍmaˍ kʼoˆ ve tawˇ hta‸ maˇ na.

17Hkʼe te leh, Aˍmaˍnonˍ lehˬ yawˇ ve awˬ ceˬ teˇ hpaˍ hta‸ kuˬ leh, Yaˇ miˇ chi hta‸ choˬ ka‸ lo shiˍ tawˆ-e loˬ. Yawˇ hta‸ yehˬ miˉ baˬ lo ca‸ kʼoˬ leh, yehˬ miˉ hta‸ kʼaw‸ hoˆ taˍ-o‸, teh‸ kʼoˆ piˇ ve yoˬ.

18Yawˇ ve awˬ ceˬ teˇ hpaˍ htawˇ, yaˇ miˇ oˇ ve hta‸ yehˬ baˬ lo shiˍ tawˆ-e leh, yehˬ miˉ hta‸ kʼaw‸ hoˆ taˍ ve yoˬ. Taˍmaˍ lehˬ, jawˇmawˇ ve yaˇ miˇ haˉ teˇ hpaˍ veu‸ ve veu‸ kʼaˇ hta‸ veu‸ deh taˍ ve yoˬ.

19Yawˇ ve oˉ kʼoˍ hkʼoˆ lo hkʼaw‸ laˉ hkaˆ pfuhˍ leh, yawˇ ve veu‸ kʼaˇ hta‸ tzuh‸ suhˍ peuˬ hkʼaw‸ nawˉ, gʼaˇ hte‸ hawˬ leh tawˆ kʼai ve yoˬ.

20Oˇ htaˇ, yawˇ ve awˬ viˉ paˍ Aˍbaˆsaˍlonˍ yawˇ hta‸ na nyi leh kʼoˆ ve, Aˍmaˍnonˍ nawˬ hta‸ hkʼa mvuhˇ hkʼa na te laˇ ve laˇ. Ngaˬ nyi ma-oˬ, chaw teˇ gʼaˇ hta‸ ka‸ taˇ hto piˇ. Yawˇ htawˇ ka‸ nawˬ ve awˬ viˉ paˍ hpeh‸ ve yoˬ. Yawˇ nawˬ hta‸ oˇ hkʼe te laˇ ve pa taw, nawˬ chi taw taw hpeh‸ bawˬ ve nyi ma taˇ cawˬ piˇ, teh‸ yawˇ hta‸ kʼoˆ piˇ ve yoˬ. Hkʼe te leh, Taˍmaˍ lehˬ dawˇ haˍ gaˇ haˍ ve hkʼaw Aˍbaˆsaˍlonˍ ve yehˬ hkʼaw chehˇ taˍ ve yoˬ.

21Jawˇmawˇ Daˍviˆ lehˬ, hpeh‸ la peuˬ ve awˬ lawn chi teˇ hpaˍ hta‸ gʼa shiˍ ve teˇ yanˇ, yawˇ nyi ma zuhˆ jaˇ ve yoˬ.

22Ya‸ hkʼaˇ, Aˍbaˆsaˍlonˍ lehˬ Aˍmaˍnonˍ hta‸ tawˇ teˇ peu-eˬ ka‸ maˇ yaw piˇ. Aˍmaˍnonˍ lehˬ, yawˇ ve awˬ nyi ma Taˍmaˍ hta‸ hkʼa mvuhˇ hkʼa na te piˇ ve pa taw, yawˇ Aˍmaˍnonˍ hta‸ beu‸ jaˇ ve yoˬ.

23Oˇ ve hkʼaw‸ nawˉ 2 hkʼaw‸ hkʼe gaˬ htaˇ, Aˍbaˆsaˍlonˍ lehˬ Eˇhpaˍrenˍ venˇ paˇ lo cawˬ ve Baˍlaˆhaˍzawˍ hkʼaˆ hkʼaw lo yawˬ mvuh nuˆ chehˇ ve yoˬ. Jawˇmawˇ yaˇ paˍ hkʼa peu-eˬ hta‸ yawˇ oˇ kaˬ lo kuˬ yuˬ ve yoˬ.

24Yawˇ jawˇmawˇ Daˍviˆ geh htawˇ kʼai leh, Jawˇmawˇ-oˬ, chi beu‸ ngaˬ yawˬ mvuh nuˆ chehˇ taˍ ve yoˬ. Nawˬ leh nawˬ ve ma‸ poˍ lonˉ teˇ hpaˍ htawˇ laˬ-o‸, teh‸ yawˇ hta‸ kʼoˆ piˇ ve yoˬ.

25Ya‸ hkʼaˇ, jawˇmawˇ kʼaw‸ yaw hkʼaw‸ leh kʼoˆ ve, Ngaˬ yaˇ paˍ-oˬ, ngaˬ laˬ maˇ hpeh‸ sheˍ. Ngaˬ hui hkʼa peu-eˬ kʼai ve kʼo, nawˬ awˬ pon haˍ jaˇ tuˬ yoˬ, teh‸ yawˇ hta‸ kʼoˆ piˇ ve yoˬ. Aˍbaˆsaˍlonˍ teˇ pawˆ peuˬ teˇ pawˆ kuˬ piˇ ve htawˇ, yawˇ awˬ pa kʼai maˇ hpeh‸ teh‸ ceh tiˉ kʼoˆ piˇ leh, yawˇ hta‸ tawˆ kʼai tcuh ve yoˬ.

26Oˇ htaˇ Aˍbaˆsaˍlonˍ lehˬ, Nawˬ kʼai maˇ hpeh‸ tehˬ ve kʼo, ngaˬ nyi paˍ Aˍmaˍnonˍ hta‸ kʼai tcuh piˇ-oˆ, teh‸ yawˇ ve awˬ pa hta‸ kʼoˆ piˇ ve yoˬ. Aˬ hto‸ ma pa taw, Aˍmaˍnonˍ gʼa kʼai tuˬ ve le, teh‸ jawˇmawˇ yawˇ hta‸ kʼaw‸ na nyi ve yoˬ.

27Ya‸ hkʼaˇ, Aˍbaˆsaˍlonˍ teˇ hkui teˇ hkui lawˬ ve pa taw, Daˍviˆ lehˬ Aˍmaˍnonˍ leh awˬ nu ve yawˇ ve yaˇ paˍ hkʼa peu-eˬ hta‸ Aˍbaˆsaˍlonˍ geh kʼai tcuh ve yoˬ.

28Aˍbaˆsaˍlonˍ lehˬ, jawˇmawˇ ve yaˇ teˇ hpaˍ hta‸ hti caˇ hti dawˬ ve pawehˇ lonˉ teˇ maˬ te leh ha‸ yuˬ piˇ ve yoˬ. Yawˇ ve awˬ ceˬ paˍ teˇ hpaˍ hta‸ yawˇ tawˇ shanˍ piˇ leh kʼoˆ ve, Nawˬ hui Aˍmaˍnonˍ hta‸ hkʼa deh‸ nyi taˍ-o‸. Yawˇ a pehˉ meuˇ gʼuiˬ dawˬ bvuhˆ la leh ngaˬ tawˇ pe‸ laˇ ve teˇ yanˇ, yawˇ hta‸ tiˇ pehˍ-o‸, teh‸ yawˇ hui hta‸ kʼoˆ piˇ taˍ ve yoˬ.

29Yawˇ ve awˬ ceˬ teˇ hpaˍ lehˬ, Aˍbaˆsaˍlonˍ kʼoˆ ve hkʼe Aˍmaˍnonˍ hta‸ tiˇ pehˍ ve yoˬ. Awˬ nu ve Daˍviˆ ve yaˇ hkʼa peu-eˬ, a shu yawˇ ve piˉ laˬ ciˇ leh hpaw-e ve yoˬ.

30Yawˇ hui aˉ hkʼaw lo hpaw kʼaw‸ la chehˇ ve teˇ yanˇ, chaw teˇ gʼaˇ Daˍviˆ geh laˬ leh, Aˍbaˆsaˍlonˍ nawˬ ve yaˇ hkʼa peu-eˬ hta‸ tiˇ pehˍ peuˬ, teh‸ yawˇ hta‸ kʼoˆ piˇ ve yoˬ.

31Tawˇ oˇ ve hta‸ Daˍviˆ gʼa kaˇ htaˇ, yawˇ pawˆ tu la leh yawˇ ve veu‸ kʼaˇ hta‸ tzuh‸ suhˍ leh, miˬ chaˇ hkʼoˆ boˆ sheˬ ve yoˬ. Yawˇ geh chehˇ taˍ ve awˬ ceˬ teˇ hpaˍ htawˇ, a shu yawˇ ve veu‸ kʼaˇ hta‸ tzuh‸ suhˍ ve yoˬ.

32Ya‸ hkʼaˇ, Daˍviˆ awˬ viˉ paˍ Shaˍmaˍ ve yaˇ Yawˇnaˍdaˆ kʼoˆ ve, Jawˇmawˇ-oˬ, yawˇ nawˬ ve yaˇ hkʼa peu-eˬ hta‸ tiˇ pehˍ ve maˇ heˆ. Aˍmaˍnonˍ teˇ gʼaˇ ceh tiˉ suh-e ve yoˬ. Aˍmaˍ nonˍ lehˬ, yawˇ ve awˬ nyi ma Taˍmaˍ hta‸ hkʼa mvuhˇ hkʼa na te piˇ ve teˇ nyi hta‸ tanˬ leh, Aˍbaˆsaˍlonˍ chi hkʼe te tuˬ dawˇ cheˆ taˍ peuˬ ve hta‸ ngaˬ hui dawˇ mawˬ hpeh‸ ve yoˬ.

33Nawˬ ve yaˇ hkʼa peu-eˬ suh peuˬ, teh‸ kʼoˆ ve tawˇ hta‸ taˇ yonˍ. Aˍmaˍnonˍ teˇ gʼaˇ tiˉ suh-e ve yoˬ, teh‸ yawˇ hta‸ kʼoˆ piˇ ve yoˬ.

34Oˇ hkʼe te taˉ peuˬ hkʼaw‸ nawˉ, Aˍbaˆsaˍlonˍ hpaw-e ve yoˬ. Jawˇmawˇ ve hawˉ yehˬ hta‸ shaw chehˇ ve ma‸ yaˇ lehˬ, Hawˉronˍnenˍ venˇ lo kʼai ve ya‸ kʼaw hpawˇ lo chiˇ nyi peu leh, Chaw moˍ lonˉ gʼuiˇ ya‸ la chehˇ ve yoˬ, teh‸ jawˇmawˇ hta‸ kʼoˆ piˇ ve yoˬ.

35Oˇ htaˇ, Yawˇnaˍdaˆ Daˍviˆ hta‸ kʼoˆ piˇ ve, Ngaˬ nawˬ hta‸ kʼoˆ piˇ taˍ peuˬ ve hkʼe, chaw oˇ ve teˇ hpaˍ lehˬ nawˬ ve yaˇ teˇ hpaˍ hpeh‸ ve yoˬ, teh‸ kʼoˆ ve yoˬ.

36Yawˇ oˇ hkʼe kʼoˆ peuˬ ve teˇ hkui, Daˍviˆ ve yaˇ teˇ hpaˍ hawˉ yehˬ hkʼaw lo‸ la leh, kuˬ hawˬ ve yoˬ. Daˍviˆ leh yawˇ ve ma‸ poˍ lonˉ teˇ hpaˍ htawˇ gʼaˇ hte‸ kuˬ hawˬ ve yoˬ.

37Aˍbaˆsaˍlonˍ lehˬ, Geˍsuˇriˆ mvuhˇmiˬ Aˍmiˇhuˆ ve jawˇmawˇ Taˍlaˍmehˇ geh hpaw-e ve yoˬ. Daˍviˆ lehˬ awˬ yanˇ maw chaweh yawˇ ve yaˇ Aˍmaˍnonˍ awˬ pon dawˇ haˍ leh hawˬ chehˇ ve yoˬ.

38Aˍbaˆsaˍlonˍ lehˬ, Geˍsuˇriˆ venˇ hkʼaw shehˆ hkʼaw‸ ca hpaw chehˇ taˍ ve yoˬ.

39Chi teˇ pawˆ jawˇmawˇ lehˬ, Aˍmaˍnonˍ awˬ pon dawˇ haˍ ve mehˉ kʼai leh, Aˍbaˆsaˍlonˍ hta‸ ceh tiˉ kʼaw‸ dawˇ nawˇ chehˇ ve yoˬ.

← Chapter 12 Jump to: Chapter 14 →