2 Samuel 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Oˇ ve hkʼaw‸ nawˉ Daˍviˆ lehˬ, Ngaˬ Yuˇda‸ mvuhˇmiˬ hkʼaw cawˬ ve venˇ teˇ venˇ venˇ lo gʼa kʼai tuˬ laˇ, teh‸ Gʼuiˬsha hta‸ na nyi ve yoˬ. Kʼai loˬ, teh‸ Gʼuiˬsha yawˇ hta‸ kʼaw‸ yaw hkʼaw‸ piˇ ve yoˬ. Hkʼaˬ ve teˇ venˇ lo gʼa kʼai tuˬ le, teh‸ kʼaw‸ na nyi htaˇ, Heˍbronˍ venˇ lo kʼai-o, teh‸ Gʼuiˬsha yawˇ hta‸ kʼaw‸ yaw hkʼaw‸ piˇ ve yoˬ.

2Hkʼe te leh, Daˍviˆ lehˬ yawˇ ve awˬ miˇ ma Yeˍzeˍreˍlaˆ venˇ yaˇ Aˍhiˆnonˍ leh Kaˍmeˍlaˆ venˇ yaˇ Naˍbaˍlaˆ ve awˬ miˇ ma Aˍbiˆgeˍlaˆ hta‸ shiˍ veu leh Heˍbronˍ venˇ lo kʼai ve yoˬ.

3Chi awˬ hkʼoˆ, yawˇ lehˬ yawˇ ve ma‸ yaˇ teˇ hpaˍ leh, yawˇ hui ve miˇ yaˇ hkʼa peu-eˬ hta‸ htawˇ shiˍ veu leh Heˍbronˍ venˇ paˇ lo chehˇ taˍ ve yoˬ.

4Oˇ htaˇ, Yuˇda‸ mvuhˇmiˬ hkʼaw chehˇ ve chaw teˇ hpaˍ, Heˍbronˍ venˇ lo hpawnˬ laˬ leh, Daˍviˆ hta‸ Yuˇda‸ mvuhˇmiˬ ve jawˇmawˇ hpeh‸ la tuˬ naˍ manˇ pfuhˍ piˇ ve yoˬ.

5Giˇlaˆ mvuhˇmiˬ hkʼaw chehˇ ve Yaˍbehˆ venˇ yaˇ teˇ hpaˍ, Sawˉlu‸ hta‸ ca gʼawˆ tuˍ piˇ peuˬ ve awˬ lawn hta‸ Daˍviˆ gʼa kaˇ ve teˇ yanˇ, chaw oˇ ve teˇ hpaˍ hta‸ yawˇ tawˇ shanˍ feu piˇ leh kʼoˆ ve, Nawˬ hui lehˬ a shu yawˇ ve jawˇmawˇ hta‸ ka ti‸ yeˬ leh, ca gʼawˆ tuˍ piˇ ve pa taw, Gʼuiˬsha nawˬ hui hta‸ awˬ bon na‸ piˇ-oˆ.

6Chi beu‸ htawˇ, Gʼuiˬsha nawˬ hui hta‸ ha kʼaˉ leh awˬ bon na‸ piˇ-oˆ. Nawˬ hui chi hkʼe te taˍ peuˬ ve pa taw, ngaˬ htawˇ nawˬ hui hta‸ awˬ bon kʼaw‸ te hkʼaw‸ laˇ tuˬ yoˬ.

7Ha‸ hanˉ leh awˬ gʼaˇ uiˍ ve chaw hpeh‸ piˇ-oˆ. Nawˬ hui ve jawˇmawˇ Sawˉlu‸ lehˬ suh peuˬ. Chi beu‸ Yuˇda‸ mvuhˇmiˬ yaˇ teˇ hpaˍ ngaˬ hta‸ yawˇ hui ve jawˇmawˇ te tuˬ, naˍ manˇ pfuhˍ laˇ taˍ peuˬ, teh‸ yawˇ hui hta‸ kʼoˆ feu piˇ ve yoˬ.

8Neˍraˆ ve yaˇ paˍ Sawˉlu‸ ve ma‸ poˍ lonˉ Aˍbaˍnaˍ lehˬ, Sawˉlu‸ ve yaˇ paˍ Iˉsaˍboˍshehˆ hta‸ shiˍ veu leh, Yawˇdanˍ iˉ kaˆ lawˬ hta‸ hkanˍ tawˆ-e peuˬ hkʼaw‸ nawˉ, Maˍhaˍnenˍ venˇ lo kʼai ve yoˬ.

9Oˇ kaˬ lo yawˇ lehˬ, Iˉsaˍboˍshehˆ hta‸ Giˇlaˆ, Aˍshaˍ, Yeˍzaˍreˍlaˆ, Eˇhpaˍrenˍ, Beˍyaˍmenˍ leh Iˉsaˍreˍlaˆ mvuhˇmiˬ hkʼa peu-eˬ awˬ hkʼoˆ jawˇmawˇ te tcuh ve yoˬ.

10Iˉsaˍboˍshehˆ lehˬ, Iˉsaˍreˍlaˆ mvuhˇmiˬ hkʼoˆ jawˇmawˇ tanˬ te ve teˇ yanˇ, yawˇ ve a sha‸ 40 hkʼaw‸ gaˬ peuˬ ve yoˬ. Yawˇ Iˉsaˍreˍlaˆ chaw hui hta‸ nyiˇ hkʼaw‸ uˉ peunˍ ve yoˬ. Ya‸ hkʼaˇ, Yuˇda‸ mvuhˇmiˬ hkʼaw chehˇ ve chaw teˇ hpaˍ lehˬ, Daˍviˆ hta‸ ka ti‸ yeˬ chehˇ ve yoˬ.

11Hkʼe te leh, yawˇ lehˬ Heˍbronˍ venˇ hkʼaw 7 hkʼaw‸ leh ha pa 6 maˬ uˉ peunˍ chehˇ ve yoˬ.

12Aˍbaˍnaˍ leh Iˉsaˍboˍshehˆ ve ma‸ poˍ lonˉ teˇ hpaˍ Maˍhaˍnenˍ venˇ hkʼaw tu leh Giˇbonˍ venˇ lo kʼai ve yoˬ.

13Yeˍruˇyaˆ ve yaˇ paˍ Yaˍbaˆ leh Daˍviˆ ve ma‸ poˍ lonˉ teˇ hpaˍ htawˇ, oˇ kaˬ lo kʼai ve yoˬ. Yawˇ hui oˇ kaˬ lo hpuˇ da‸ leh gʼuiˬ po choˬ paˉ oˇ paˉ lo mui taˍ ve yoˬ.

14Oˇ htaˇ Aˍbaˍnaˍ lehˬ, Ngaˬ huiˉ maˬ ve ma‸ yaˇ teˇ hpaˍ hta‸ leˍ guiˇ tcuh piˇ nyi-a veuˬ, teh‸ Yaˍbaˆ hta‸ kʼoˆ piˇ ve yoˬ. Yaˍbaˆ htawˇ, Te tcuh nyi, teh‸ kʼoˆ ve yoˬ.

15Hkʼe te leh, Iˉsaˍboˍshehˆ ve ma‸ yaˇ Beˍyaˍmenˍ chaw 12 gʼaˇ tu la leh, Daˍviˆ ve ma‸ yaˇ teˇ chi nyiˇ gʼaˇ htawˇ tu la ve yoˬ.

16Chaw oˇ ve nyiˇ moˍ lehˬ, teˇ gʼaˇ ve oˉ kʼoˍ hta‸ teˇ gʼaˇ yuˬ tiˍ taˍ leh, nyi kuˇ hpawˇ lo aˉ hte‸ juˆ keu da‸ ve yoˬ. Hkʼe te leh, yawˇ hui hkʼa peu-eˬ suh-e ve yoˬ. Chi hta‸ pa taw, Giˇbonˍ venˇ paˇ lo ve chehˇ kuiˬ oˇ ve hta‸ Aˉ hte‸ miˬguiˬ, teh‸ kʼoˆ ve yoˬ.

17Oˇ hkʼe te peuˬ hkʼaw‸ nawˉ, yawˇ hui gʼaˇ hte‸ bawˆ da‸ ve yoˬ. Aˍbaˍnaˍ leh Iˉsaˍreˍlaˆ chaw teˇ hpaˍ lehˬ, Daˍviˆ ve chaw teˇ hpaˍ hta‸ maˇ gʼaˇ ve yoˬ.

18Yeˍruˇyaˆ ve yaˇ paˍ Yaˍbaˆ, Aˍbiˆshehˇ, leh Aˍsaˍheˍlaˆ htawˇ oˇ kaˬ lo chehˇ taˍ ve yoˬ. Aˍsaˍheˍlaˆ lehˬ, hkuiˉ zuhˬ hkʼa shuˍ gʼuiˇ gehˬ jaˇ ve yoˬ.

19Yawˇ tu leh Aˍbaˍnaˍ hkʼaˇ suh gʼa‸ yuˬ kʼai ve yoˬ.

20Aˍbaˍnaˍ kʼaw‸ hpfuhˆ nyi leh, Aˍsaˍheˍlaˆ-oˬ, nawˬ ngaˬ hkʼaˇ suh‸ gʼa‸ yuˬ chehˇ ve laˇ, teh‸ kʼoˆ ve yoˬ. Yoˬ, teh‸ yawˇ kʼaw‸ yaw hkʼaw‸ piˇ ve yoˬ.

21Oˇ htaˇ Aˍbaˍnaˍ lehˬ, Ngaˬ hta‸ taˇ gʼa‸ yuˬ. Ma‸ yaˇ teˇ gʼaˇ gʼaˇ hta‸ gʼa‸ yuˬ leh, yawˇ ve mawˇ hta‸ yuˬ-o‸, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, Aˍsaˍ heˍlaˆ lehˬ yawˇ hta‸ tiˉ gʼa‸ yuˬ chehˇ ve yoˬ.

22Aˍbaˍnaˍ yawˇ hta‸ teˇ pawˆ kʼaw‸ kʼoˆ piˇ ve, Ngaˬ hta‸ taˇ gʼa‸ yuˬ. Nawˬ suh gaˇ ve laˇ. Hkʼaˬ hkʼe te leh ngaˬ nawˬ viˉ paˍ Yaˍbaˆ hta‸ kʼaw‸ hpuˇ da‸ hpeh‸ tuˬ le, teh‸ kʼoˆ ve yoˬ.

23Ya‸ hkʼaˇ, Aˍsaˍheˍlaˆ maˇ na. Hkʼe te leh, Aˍbaˍnaˍ lehˬ yawˇ ve gehˇ hta‸ hkʼaw‸ nawˉ hpawˇ lo juˆ hkʼaw‸ peu leh, Aˍshaˍheˍlaˆ ve gʼoˇ pe‸ hta‸ heuˆ leh hkʼaw‸ nawˉ hpawˇ lo pawnˍ tawˆ-e ve yoˬ. Aˍsaˍheˍlaˆ oˇ kaˬ lo ceh paˍ suh-e ve yoˬ. Oˇ kaˬ lo gaˬ la ve chaw hkʼa peu-eˬ yawˇ awˬ paˇ lo huˉ chehˇ taˍ ve yoˬ.

24Ya‸ hkʼaˇ, Yaˍbaˆ leh Aˍbiˆshehˇ yawˇ huiˉ maˬ Aˍbaˍnaˍ hkʼaˇ suh gʼa‸ yuˬ kʼai ve yoˬ. Mvuhˇ nyi lo‸-e ve teˇ yanˇ, yawˇ huiˉ maˬ lehˬ Giˇbonˍ hteunˍ lo kʼai ve ya‸ kʼaw‸ hpuiˇ lo cawˬ ve Aˍmaˍ hkʼaw lo gaˬ la ve yoˬ. Hkʼaw chi lehˬ, Giˇbonˍ venˇ mvuhˇ nyi tawˆ hpawˇ lo cawˬ ve yoˬ.

25Beˍyaˍmenˍ chaw teˇ hpaˍ lehˬ, Aˍbaˍnaˍ geh teˇ geh hkʼaw teˇ shiˍ awˬ hkʼoˆ lo chehˇ taˍ ve yoˬ.

26Oˇ htaˇ Aˍbaˍnaˍ Yaˍbaˆ hta‸ kʼoˆ piˇ ve, Ngaˬ hui hkʼaˬ htaˆ ka‸ chi hkʼe tiˉ bawˆ da‸ chehˇ tuˬ ve laˇ. Awˬ leh meuˇ teˇ nyi gaˬ kʼo, dawˇ haˍ tuˬ awˬ ceuˬ ceh tiˉ cawˬ taˉ tuˬ ve hta‸ nawˬ maˇ dawˇ mawˬ laˇ. Ngaˬ hui lehˬ, nawˬ hui ve mvuhˇmiˬ yaˇ teˇ hpaˍ hpeh‸ ve yoˬ. Nawˬ ve chaw teˇ hpaˍ ngaˬ hui hta‸ hkʼaˬ maw maw gʼa‸ yuˬ chehˇ tuˬ sheˍ ve le, teh‸ kʼoˆ ve yoˬ.

27Yaˍbaˆ kʼaw‸ yaw hkʼaw‸ leh kʼoˆ ve, Nawˬ tawˇ maˇ yaw tawˆ la ve hkʼe kʼo, ngaˬ ve chaw teˇ hpaˍ shawˉ pawˍ mvuhˇ htiˇ la htaˇ hkʼa gaˬ nawˬ hui hta‸ gʼa‸ yuˬ chehˇ tuˬ ve yoˬ, teh‸ te‸ chehˇ ve Gʼuiˬsha hta‸ cuˇ leh ngaˬ hkanˍ ve yoˬ, teh‸ kʼoˆ ve yoˬ.

28Oˇ htaˇ, Yaˍbaˆ behˬ heh ma meuˆ leh, yawˇ ve chaw teˇ hpaˍ Iˉsaˍreˍlaˆ chaw hui hta‸ maˇ kʼaw‸ gʼa‸ yuˬ-o. Hkʼe te leh, ma‸ bawˆ ve jehˇ sheˬ ve yoˬ.

29Aˍbaˍnaˍ leh yawˇ ve ma‸ yaˇ teˇ hpaˍ, teˇ haˉ tanˇ hkuinˇ Yawˇdanˍ miˬ tawˬ kuiˬ hta‸ hpanˍ kʼo‸-e ve yoˬ. Yawˇ hui Yawˇdanˍ iˇ kaˆ lawˬ hta‸ hkanˍ leh teˇ sha gʼuˇ kʼai peuˬ hkʼaw‸ nawˉ Maˍhaˍnenˍ venˇ lo kʼaw‸ gaˬ la ve yoˬ.

30Ma‸ bawˆ da‸ ve peuˬ hkʼaw‸ nawˉ, Yaˍbaˆ yawˇ ve ma‸ yaˇ teˇ hpaˍ hta‸ kʼaw‸ gʼaw nyi ve teˇ yanˇ, Aˍsaˍheˍlaˆ hta‸ maˇ shawˍ ve yawˇ ve ma‸ yaˇ teˇ chi kʼawˇ gʼaˇ mehˉ kʼai taˍ ve hta‸ gʼa mawˬ ve yoˬ.

31Daˍviˆ ve ma‸ yaˇ teˇ hpaˍ lehˬ Beˍyaˍmenˍ chaw Aˍbaˍnaˍ ve ma‸ yaˇ 360 gʼaˇ hta‸ tiˇ pehˍ piˇ ve yoˬ.

32Yaˍbaˆ leh yawˇ ve ma‸ yaˇ teˇ hpaˍ, Aˍsaˍheˍlaˆ ve awˬ to hta‸ Behˍlehˍhehnˍ venˇ lo kʼaw‸ yuˬ kʼo‸-e leh oˇ kaˬ lo tuˍ piˇ ve yoˬ. Hkʼe te taˉ peuˬ hkʼaw‸ nawˉ, yawˇ hui teˇ haˉ tanˇ hkuinˇ tu kʼo‸-e leh, mvuhˇ htiˇ la htaˇ Heˍbronˍ venˇ lo kʼaw‸ gaˬ la ve yoˬ.

← Chapter 1 Jump to: Chapter 3 →