2 Samuel 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to: Chapter 11 →

1Oˇ ve hkʼaw‸ nawˉ maˇ maw maw Aˍmawˇniˆ chaw hui ve jawˇmawˇ Naˍhaˆ suh-e leh, yawˇ ve yaˇ paˍ Haˍnonˍ jawˇmawˇ kʼaw‸ te ve yoˬ.

2Oˇ htaˇ Daˍviˆ lehˬ, Haˍnonˍ awˬ pa Naˍhaˆ ngaˬ hta‸ ka ti‸ yeˬ leh, ngaˬ hta‸ awˬ bon te laˇ ve hkʼe, chi beu‸ ngaˬ htawˇ Haˍnonˍ hta‸ ka ti‸ yeˬ leh awˬ bon kʼaw‸ te hkʼaw‸ piˇ cawˇ ve yoˬ, teh‸ kʼoˆ ve yoˬ. Hkʼe te leh, Daˍviˆ lehˬ yawˇ awˬ pa suh-e ve pa taw yawˇ htawˇ dawˇ haˍ jaˇ ve awˬ lawn, chaw hta‸ hpehˇ leh Haˍnonˍ hta‸ ca kʼoˆ piˇ tcuh ve yoˬ.

3Ya‸ hkʼaˇ, yawˇ hui Aˍmawˇniˆ mvuhˇmiˬ lo gaˬ la ve teˇ yanˇ, Aˍmawˇniˆ chaw awˬ hoˉ awˬ naˬ teˇ hpaˍ yawˇ hui ve jawˇmawˇ hta‸ kʼoˆ piˇ ve, Chaw chi teˇ hpaˍ nawˬ pa suh-e ve pa taw dawˇ haˍ jaˇ ve awˬ lawn ca kʼoˆ maˍ la ve yoˬ, teh‸ nawˬ dawˇ ve laˇ. Chi hkʼe maˇ heˆ. Yawˇ ngaˬ hui hta‸ bawˆ yuˬ tuˬ, ngaˬ hui ve venˇ hta‸ ca jaˆ nyi peu laˇ ve yoˬ, teh‸ kʼoˆ ve yoˬ.

4Hkʼe te leh, Haˍnonˍ lehˬ Daˍviˆ kʼai tcuh taˍ ve chaw oˇ ve teˇ hpaˍ hta‸ hpeh yuˬ leh, yawˇ hui ve paˇ tcuhˆ teˇ hkoˇ chiˇ baˬ piˇ peuˬ hkʼaw‸ nawˉ, yawˇ hui ve veu‸ kʼaˇ hta‸ htawˇ, hkui tcuhˉ kʼu awˬ na paˉ lo hkʼa gaˬ nuˆ baˬ piˇ leh kʼaw‸ kʼo‸-e tcuh ve yoˬ.

5Awˬ lawn chi hta‸ Daˍviˆ gʼa kaˇ ve teˇ yanˇ, yawˇ chaw hta‸ kʼaw‸ hpehˇ leh yawˇ hui hta‸ ca nyi tcuh ve yoˬ. Awˬ lawn kʼo, yawˇ hui ya‸ taw jaˇ leh yawˇ geh kʼaw‸ la maˇ gaˬ ve pa taw yoˬ. Hkʼe te leh, Daˍviˆ lehˬ yawˇ hui ve paˇ tcuhˆ kʼaw‸ zuhˬ la htaˇ hkʼa gaˬ, Yeˍriˆhkoˇ venˇ hkʼaw chehˇ taˍ tuˬ tawˇ shanˍ feu piˇ ve yoˬ.

6Daˍviˆ lehˬ yawˇ hui ve canˇ paˍ hpeh‸ la peuˬ ve hta‸ Aˍmawˇniˆ chaw teˇ hpaˍ shiˍ la ve teˇ yanˇ, Behˆyaˍhawˇbaˆ venˇ leh Zawˍbaˍ venˇ hkʼaw chehˇ ve Suˇriˆ ma‸ yaˇ nyiˇ meunˍ gʼaˇ, Tawˇbaˆ venˇ hkʼaw chehˇ ve ma‸ yaˇ teˇ meunˍ nyiˇ hinˉ gʼaˇ, leh jawˇmawˇ Maˍhkaˍ ve ma‸ yaˇ teˇ hinˉ gʼaˇ hta‸ ngaˍ taˍ ve yoˬ.

7Awˬ lawn chi hta‸ Daˍviˆ gʼa kaˇ htaˇ, Yaˍbaˆ hta‸ cheuˬ jaˇ ve ma‸ yaˇ teˇ hpaˍ shiˍ veu leh tawˆ kʼai tcuh ve yoˬ.

8Aˍmawˇniˆ chaw teˇ hpaˍ lehˬ, lanˇ venˇ taˍ meu‸ hpe‸ lo shaw taˍ ve yoˬ. Awˬ nu ve Suˇriˆ chaw, Tawˇbaˆ chaw leh Maˍhkaˍ ve ma‸ yaˇ teˇ hpaˍ lehˬ, miˬ tawˬ kuiˬ lo chehˇ taˍ ve yoˬ.

9Canˇ paˍ teˇ hpaˍ yawˇ hta‸ awˬ gʼuˇ suhˍ hpawˇ leh awˬ hkʼaw‸ nawˉ hpawˇ lo bawˆ la tuˬ ve hta‸ Yaˍbaˆ shiˍ ve teˇ yanˇ, yawˇ lehˬ cheuˬ jaˇ ve Iˉsaˍreˍlaˆ ma‸ yaˇ teˇ hpaˍ hpaˍ hta‸ Suˇriˆ chaw hta‸ bawˆ tuˬ hkʼa deh‸ gu taˍ tcuh ve yoˬ.

10Yawˇ lehˬ, awˬ nu ve ma‸ yaˇ teˇ hpaˍ hta‸ yawˇ ve awˬ nyi paˍ Aˍbiˆshehˇ hta‸ uˉ peunˍ tcuh leh Aˍmawˇniˆ chaw hui hta‸ bawˆ da‸ tuˬ gu taˍ tcuh ve yoˬ.

11Yaˍbaˆ yawˇ ve awˬ nyi paˍ hta‸ kʼoˆ piˇ ve, Suˇriˆ chaw teˇ hpaˍ ngaˬ hui hta‸ bawˆ gʼaˇ la ngaw ngaw cawˬ ve kʼo, ngaˬ hta‸ a ciˉ ca ga la-o. Aˍmawˇniˇ chaw hui nawˬ hta‸ bawˆ gʼaˇ ngaw ngaw cawˬ ve kʼo, ngaˬ nawˬ hta‸ ca ga la tuˬ yoˬ.

12Ha‸ hanˉ ve nyi ma cawˬ piˇ-oˆ. Ngaˬ hui ve chaw ceuˬ leh ngaˬ hui ve Gʼuiˬsha ve venˇ teˇ hpaˍ awˬ pon ngaˬ hui ma‸ gʼaˇ hte‸ bawˆ-a veuˬ. Gʼuiˬsha lehˬ yawˇ a loˍ cawˇ ve hkʼe te laˇ piˇ-oˆ, teh‸ kʼoˆ ve yoˬ.

13Yaˍbaˆ leh yawˇ ve ma‸ yaˇ teˇ hpaˍ, Suˇriˆ chaw hui hta‸ ca bawˆ-e ve yoˬ. Hkʼe te leh, Suˇriˆ chaw hui gʼuiˇ hpaw-e ve yoˬ.

14Aˍmawˇniˆ chaw teˇ hpaˍ lehˬ, Suˇriˆ chaw hui gʼuiˇ hpaw-e chehˇ ve hta‸ gʼa mawˬ ve teˇ yanˇ, yawˇ hui htawˇ Aˍbiˆshehˇ hta‸ tawˍ da‸ maˇ haˆ leh venˇ hkʼaw lo kʼaw‸ gʼuiˇ kʼo‸-e ve yoˬ. Hkʼe te leh, Yaˍbaˆ lehˬ bawˆ da‸ kuiˬ lo tu leh Yeˍruˆsaˍlehnˍ venˇ lo kʼaw‸ hpfuhˆ kʼo‸-e ve yoˬ.

15Suˉriˆ chaw teˇ hpaˍ lehˬ, yawˇ hui ma‸ bawˆ shonˇ peuˬ ve hta‸ gʼa shiˍ ve teˇ yanˇ, yawˇ hui ve ma‸ yaˇ teˇ hpaˍ hta‸ teˇ geh kuˬ hpoˆ ve yoˬ.

16Jawˇmawˇ Haˍdaˍdeˍzaˍ lehˬ, Uˉhpaˍraˆ gʼuiˬ ma mvuhˇ nyi tawˆ hpawˇ lo chehˇ taˍ ve Suˇriˆ chaw hui hta‸ ca kʼaw‸ kuˬ tcuh leh, yawˇ hui hkʼa peu-eˬ Haˍdaˍdeˍzaˍ ve ma‸ poˍ lonˉ Shawˇbehˆ geh teˇ geh Heˍlanˍ venˇ lo gaˬ la ve yoˬ.

17Awˬ lawn chi hta‸ Daˍviˆ gʼa kaˇ ve teˇ yanˇ, yawˇ ve ma‸ yaˇ teˇ hpaˍ hta‸ kuˬ hpawnˬ leh Yawˇdanˍ iˉ kaˆ lawˬ hta‸ hkanˍ peuˬ hkʼaw‸ nawˉ, Suˇriˆ chaw hui deh chehˇ taˍ kuiˬ Heˍlanˍ venˇ lo kʼai ve yoˬ.

18Oˇ kaˬ lo yawˇ hui bawˆ da‸ leh, Suˇriˆ chaw teˇ hpaˍ gʼuiˇ hpaw-e ve yoˬ. Daˍviˆ leh yawˇ ve ma‸ yaˇ teˇ hpaˍ lehˬ, Suˇriˆ chaw iˉ mvuhˇ lawˬ gʼa‸ paˍ suhˍ ha gʼaˇ leh, iˉ mvuhˇ ciˇ ve ma‸ yaˇ awˇ meunˍ gʼaˇ hta‸ tiˇ pehˍ piˇ ve yoˬ. Ma‸ poˍ lonˉ Shawˇbehˆ htawˇ bawˆ da‸ kuiˬ lo suh-e ve yoˬ.

19Jawˇmawˇ Haˍdaˍdeˍzaˍ ve awˬ ceˬ te chehˇ ve jawˇmawˇ teˇ hpaˍ lehˬ, Suˇriˆ chaw ma‸ bawˆ shonˇ peuˬ ve hta‸ gʼa shiˍ ve teˇ yanˇ, yawˇ hui Iˉsaˍreˍlaˆ chaw hui geh shaˉ caˆ caˇ leh, yawˇ hui ve awˬ ceˬ te ve yoˬ. Oˇ ve hkʼaw‸ nawˉ, Suˇriˆ chaw teˇ hpaˍ kʼaw‸ ga piˇ maˇ haˆ ve yoˬ.

← Chapter 9 Jump to: Chapter 11 →