2 Samuel 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Oˇ ve hkʼaw‸ nawˉ, mvuhˇ kaˆ yanˇ gaˬ la leh jawˇmawˇ teˇ hpaˍ ma‸ bawˆ yanˇ gaˬ la ve teˇ yanˇ, Daˍviˆ lehˬ yawˇ ve ma‸ ponˍ lonˉ Yaˍbaˆ, awˬ nu ve ma‸ poˍ teˇ hpaˍ leh, Iˉsaˍreˍlaˆ ma‸ yaˇ teˇ hpaˍ hta‸ ma‸ bawˆ kuiˬ lo kʼai tcuh ve yoˬ. Yawˇ hui lehˬ, Aˍmawˇniˆ chaw hui hta‸ ma‸ bawˆ gʼaˇ leh, Raˍbaˆ venˇ hta‸ caw hoˆ taˍ ve yoˬ. Ya‸ hkʼaˇ, Daˍviˆ lehˬ Yeˍruˆsaˍlehnˍ venˇ hkʼaw chehˇ taˍ ve yoˬ.

2Teˇ nyi htaˇ, Daˍviˆ lehˬ yawˇ zuh‸ kuiˬ lo nawˇ la leh, yawˇ ve hawˉ yehˬ hkʼaw, ya‸ kʼaw te toˇ guiˇ chehˇ ve teˇ yanˇ, yaˇ miˇ teˇ gʼaˇ iˉ kaˆ hehˉ chehˇ ve hta‸ gʼa mawˬ ve yoˬ. Yaˇ miˇ oˇ ve lehˬ awˬ hkiˇ awˬ naˬ da‸ jaˇ ve yoˬ.

3Hkʼe te leh, yaˇ miˇ oˇ ve a shu hpeh‸ ve hta‸ gʼa shiˍ tuˬ, yawˇ ve chaw teˇ gʼaˇ hta‸ hpehˇ leh ca na nyi tcuh ve yoˬ. Yaˇ miˇ oˇ ve lehˬ, Eˍlinˍ ve yaˇ miˇ hpeh‸ leh Hiˇtiˆ chaw Uˇriˇya‸ miˇ ma hpeh‸ ve hta‸ yawˇ gʼa shiˍ ve yoˬ.

4Hkʼe te leh, Daˍviˆ yawˇ ve chaw hta‸ kʼaw‸ hpehˇ leh yaˇ miˇ oˇ ve hta‸ ca shiˍ tcuh ve yoˬ. Yaˇ miˇ oˇ ve yawˇ geh gaˬ la ve teˇ yanˇ, yawˇ yaˇ miˇ oˇ ve geh zuh‸ ve yoˬ. (Yaˇ miˇ oˇ ve lehˬ, yaˇ miˇ awˬ liˇ laˬ peuˬ leh, yawˇ ve awˬ to hta‸ da‸ tuˬ kehˬ tuˬ te taˍ peuˬ ve yoˬ.) Oˇ ve hkʼaw‸ nawˉ, yaˇ miˇ oˇ ve yawˇ ve yehˬ lo kʼaw‸ kʼo‸-e ve yoˬ.

5Maˇ maw maw yaˇ miˇ oˇ ve lehˬ, yawˇ yaˇ hu la peuˬ ve hta‸ gʼa shiˍ leh, Daˍviˆ hta‸ ca kʼaw‸ hto piˇ tcuh ve yoˬ.

6Oˇ htaˇ Daˍviˆ lehˬ, Hiˇtiˆ chaw Uˇriˇya‸ hta‸ ngaˬ geh kʼaw‸ la peu laˇ-oˆ, teh‸ Yaˍbaˆ hta‸ tawˇ shanˍ feu piˇ ve yoˬ. Hkʼe te leh, Yaˍbaˆ yawˇ hta‸ Daˍviˆ geh kʼo‸-e tcuh ve yoˬ.

7Uˇriˇya‸ kʼaw‸ gaˬ la ve teˇ yanˇ, Daˍviˆ lehˬ ma‸ bawˆ ve hkʼaˬ hkʼe hpeh‸ chehˇ ve awˬ lawn leh, Yaˍbaˆ leh Iˉsaˍreˍlaˆ ma‸ yaˇ teˇ hpaˍ hkʼaˬ hkʼe hpeh‸ chehˇ ve awˬ lawn na nyi ve yoˬ.

8Oˇ ve hkʼaw‸ nawˉ Daˍviˆ lehˬ, Nawˬ ve yehˬ hkʼaw teˇ hkui teˇ yanˇ ca kʼaw‸ jehˇ taˍ-o‸, teh‸ Uˇriˇyaˆ hta‸ kʼoˆ piˇ ve yoˬ. Uˇriˆyaˆ tawˆ kʼai leh, Daˍviˆ lehˬ yawˇ ve yehˬ lo la‸ shawnˍ teˇ hpaˍ ca yuˬ kʼoˬ piˇ tcuh ve yoˬ.

9Ya‸ hkʼaˇ, Uˇriˇya‸ lehˬ yawˇ ve yehˬ lo maˇ kʼo‸-e. Yawˇ lehˬ oˇ ve teˇ haˉ jawˇmawˇ ve a sha‸ shaw paˍ hui geh teˇ geh jawˇmawˇ ve hawˉ yehˬ yehˬmiˉhpe‸ lo zuh‸ ve yoˬ.

10Uˇriˇya‸ yawˇ ve yehˬ lo maˇ kʼo‸-e ve hta‸ Daˍviˆ gʼa kaˇ ve teˇ yanˇ, Nawˬ aˉ hkʼaw maˇ gʼa chehˇ ve maw jaˇ peuˬ. Aˬ hto‸ ma pa taw, nawˬ ve yehˬ lo maˇ kʼo‸-e ve le, teh‸ yawˇ hta‸ na nyi ve yoˬ.

11Uˇriˇya‸ kʼaw‸ yaw hkʼaw‸ leh kʼoˆ ve, Iˉsaˍreˍlaˆ chaw leh Yuˇda‸ chaw teˇ hpaˍ, ma‸ bawˆ kuiˬ lo chehˇ taˍ ve yoˬ. Gʼuiˬsha ve ka ti‸ shaˉ caˆ ta kʼoˍ htawˇ yawˇ hui geh chehˇ taˍ ve yoˬ. Ngaˬ ve ma‸ poˍ lonˉ Yaˍbaˆ leh yawˇ awˬ hawˉ ve ma‸ poˍ teˇ hpaˍ lehˬ heh puiˉ hkʼaw lo zuh‸ chehˇ taˍ ve yoˬ. Hkʼaˬ hkʼe te leh ngaˬ aˉ hkʼaw kʼo‸-e leh, ngaˬ miˇ ma geh ca zuh‸ chehˇ taˍ hpeh‸ tuˬ le. Gʼuiˬsha te‸ chehˇ ve hkʼe, ngaˬ lehˬ chi hkʼe ca te maˇ hpeh‸ taˬ, teh‸ Daˍviˆ hta‸ kʼaw‸ kʼoˆ piˇ ve yoˬ.

12Daˍviˆ kʼaw‸ kʼoˆ ve, Hkʼe yoˬ kʼo, nawˬ ya‸ nyi choˬ kaˬ lo chehˇ taˍ-o‸. Shawˉ pawˍ kʼo, ngaˬ nawˬ hta‸ ma‸ bawˆ kuiˬ lo kʼaw‸ kʼai peu laˇ tuˬ yoˬ, teh‸ Uˇriˇya‸ hta‸ kʼoˆ piˇ ve yoˬ. Hkʼe te leh, Uˇriˇya‸ lehˬ oˇ ve teˇ nyi Yeˍruˆsaˍlehnˍ venˇ hkʼaw kʼaw‸ chehˇ taˍ ve yoˬ.

13Oˇ ve teˇ haˉ Daˍviˆ yawˇ hta‸ awˍ kuˬ caˍ piˇ leh, yawˇ hta‸ a pehˉ meuˇ gʼuiˬ maˇ maˇ taw piˇ ve yoˬ. Ya‸ hkʼaˇ, Uˇriˇya‸ lehˬ yawˇ ve yehˬ lo maˇ kʼo‸-e. Jawˇmawˇ a sha‸ shaw paˍ hui geh ca zuh‸ taˍ ve yoˬ.

14Shawˉ pawˍ mvuhˇ shawˉ Daˍviˆ lehˬ, yawˇ ve ma‸ poˍ lonˉ Yaˍbaˆ hta‸ li‸ teˇ kʼoˆ bvuh‸ piˇ leh, Uˇriˇya‸ hta‸ yuˬ kʼai tcuh ve yoˬ.

15Li‸ oˇ ve hkʼaw, Uˇriˇya‸ hta‸ ma‸ bawˆhehnˇ jaˇ kuiˬ teˇ kaˬ lo kʼai tcuh-o, teh‸ bvuh‸ taˍ ve yoˬ.

16Yaˍbaˆ lehˬ venˇ oˇ ve hta‸ bawˆ yuˬ chehˇ ve teˇ yanˇ, Uˇriˇyaˆ hta‸ ma‸ bawˆ hehnˇ jaˇ kuiˬ teˇ kaˬ lo kʼai tcuh ve yoˬ.

17Canˇ paˍ teˇ hpaˍ venˇ hkʼaw tawˆ la leh, yawˇ hui hta‸ ca bawˆ la ve yoˬ. Hkʼe te leh, Daˍviˆ ve ma‸ poˍ teˇ hpaˍ hpaˍ tiˇ pehˍ ve hta‸ gʼa hkanˍ ve yoˬ. Uˇriˇya‸ htawˇ oˇ kaˬ lo suh-e ve yoˬ.

18Oˇ ve hkʼaw‸ nawˉ, Yaˍbaˆ lehˬ ma‸ bawˆ ve hkʼaˬ hkʼe hpeh‸ chehˇ ve awˬ lawn chaw hta‸ hpehˇ leh Daˍviˆ hta‸ awˬ lawn ca kʼaw‸ kaˇ piˇ ve yoˬ.

19Yawˇ chaw oˇ ve hta‸ tawˇ shanˍ feu piˇ leh kʼoˆ ve, Ma‸ bawˆ ve awˬ lawn chi teˇ hpaˍ nawˬ jawˇmawˇ hta‸ hto maˍ piˇ peuˬ ve teˇ yanˇ, yawˇ nyi ma zuhˆ la leh nawˬ hta‸ chi hkʼe kʼaw‸ kʼoˆ laˇ tuˬ yoˬ.

20Aˬ hto‸ ma pa taw, nawˬ hui venˇ awˬ paˇ neˇ lo kʼai ve le. Canˇ paˍ teˇ hpaˍ lanˇ venˇ hkʼoˆ chehˇ taˍ leh, nawˬ hui hta‸ hkaˆ bawˆ hpehˇ laˇ tuˬ ve hta‸ nawˬ hui maˇ shiˍ laˇ.

21Yeˍruˆbaˍlaˆ ve yaˇ Aˍbiˆmaˍlehˆ hkʼaˬ hkʼe te suh-e ve hta‸ nawˬ hui maˇ dawˇ nawˇ leh laˇ. Yawˇ Taˍbehˆ venˇ hta‸ ca bawˆ htaˇ, yaˇ miˇ teˇ gʼaˇ lanˇ venˇ hkʼoˆ chehˇ taˍ leh, haˉ pui mawˍ teˇ maˬ hpehˇ ce piˇ ve pa taw yawˇ gʼa suh-e ve yoˬ. Aˬ hto‸ ma pa taw, nawˬ hui lanˇ venˇ awˬ paˇ neˇ lo kʼai ve le, teh‸ nawˬ htaˬ kʼoˆ laˇ tuˬ yoˬ. Jawˇmawˇ nawˬ hta‸ chi hkʼe kʼoˆ laˇ ve kʼo, Nawˬ ve ma‸ poˍ Uˇriˇya‸ htawˇ suh peuˬ, teh‸ yawˇ hta‸ kʼaw‸ kʼoˆ piˇ-oˆ, teh‸ yawˇ hta‸ tawˇ hkʼa deh‸ shanˍ piˇ taˍ ve yoˬ.

22Chaw oˇ ve Daˍviˆ geh kʼo‸-e leh, Yaˍbaˆ kʼoˆ ve tawˇ oˇ ve hkʼa peu-eˬ Daˍviˆ hta‸ kʼoˆ piˇ ve yoˬ.

23Yawˇ kʼoˆ ve, Canˇ paˍ teˇ hpaˍ lehˬ, ngaˬ hui a‸ kehˉ awˬ gʼaˇ uiˍ jaˇ ve yoˬ. Yawˇ hui ngaˬ hui hta‸ bawˆ da‸ tuˬ tawˆ la ve yoˬ. Ya‸ hkʼaˇ, ngaˬ hui yawˇ hui hta‸ venˇ hkʼaw kʼaw‸ gʼa‸ keu piˇ ve yoˬ.

24Oˇ ve hkʼaw‸ nawˉ, yawˇ hui lanˇ venˇ hkʼoˆ chehˇ taˍ leh ngaˬ hui hta‸ hkaˆ bawˆ hpehˇ laˇ leh, nawˬ ve ma‸ poˍ teˇ hpaˍ hpaˍ suh-e ve yoˬ. Nawˬ ve ma‸ poˍ Uˇriˇya‸ htawˇ suh peuˬ, teh‸ Daˍviˆ hta‸ kʼoˆ piˇ ve yoˬ.

25Daˍviˆ chaw oˇ ve hta‸ kʼoˆ piˇ ve, Yaˍbaˆ nyi ma maˇ gʼa luˬ tuˬ yawˇ hta‸ awˬ gʼaˇ ca kʼaw‸ piˇ-oˆ. Awˬ lawn kʼo, ma‸ bawˆ kuiˬ lo a shu teˇ gʼaˇ suh-e tuˬ chaw teˇ gʼaˇ ka‸ kʼoˆ maˇ hpeh‸. Venˇ oˇ ve hta‸ hehnˇ chaweh kʼaw‸ canˍ bawˆ leh te luˬ piˇ tuˬ, Yaˍbaˆ hta‸ ca kʼaw‸ kʼoˆ piˇ-oˆ, teh‸ chaw oˇ ve hta‸ kʼoˆ piˇ ve yoˬ.

26Yawˇ ve awˬ hpawˇ suh peuˬ ve hta‸ Beˍtaˍsheˍbaˆ gʼa kaˇ ve teˇ yanˇ, yawˇ dawˇ haˍ jaˇ leh gʼaˇ hte‸ paˆ hawˬ chehˇ ve yoˬ.

27Yawˇ dawˇ haˍ leh paˆ hawˬ ve awˬ yanˇ ponˬ kʼai ve teˇ yanˇ, Daˍviˆ chaw hta‸ hpehˇ leh yawˇ hta‸ ca shiˍ tcuh ve yoˬ. Hkʼe te leh, yaˇ miˇ oˇ ve Daˍviˆ ve awˬ miˇ ma hpeh‸ la leh, yawˇ awˬ pon yaˇ paˍ teˇ gʼaˇ paw la piˇ ve yoˬ. Ya‸ hkʼaˇ, Gʼuiˬsha lehˬ Daˍviˆ te taˍ ve kanˉ hta‸ nyi ma maˇ cawˇ.

← Chapter 10 Jump to: Chapter 12 →