2 Samuel 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Oˇ ve hkʼaw‸ nawˉ Daˍviˆ kʼoˆ ve, Sawˉlu‸ ve yehˬ yaˇ kʼa yaˇ teˇ hpaˍ awˬ hkʼaw lo, chaw teˇ gʼaˇ gʼaˇ a sha‸ te‸ chehˇ ve cawˬ sheˍ laˇ. Cawˬ sheˍ ve kʼo, Yawˇnaˆtanˍ ve awˬ meh hta‸ pa taw, chaw oˇ ve hta‸ ngaˬ awˬ bon te piˇ gaˇ ve yoˬ, teh‸ kʼoˆ ve yoˬ.

2Sawˇlu‸ ve yehˬ yaˇ kʼa yaˇ teˇ hpaˍ awˬ hkʼaw, Ziˇbaˆ teh‸ kʼoˆ ve awˬ ceˬ paˍ teˇ gʼaˇ cawˬ ve yoˬ. Hkʼe te leh, shu yawˇ hta‸ Daˍviˆ geh shiˍ laˬ ve yoˬ. Oˇ htaˇ jawˇmawˇ lehˬ, Nawˬ Ziˇbaˆ yoˬ laˇ, teh‸ na nyi ve yoˬ. Chaw oˇ ve lehˬ, Jawˇmawˇ-oˬ, nawˬ kʼoˆ ve hkʼe cawˇ ve yoˬ, teh‸ kʼaw‸ yaw hkʼaw‸ piˇ ve yoˬ.

3Jawˇmawˇ yawˇ hta‸ kʼoˆ piˇve, Ngaˬ Gʼuiˬsha hta‸ ka ti‸ te taˍ ve hkʼe, chaw oˇ ve hta‸ awˬ bon te piˇ hpeh‸ tuˬ, Sawˉlu‸ ve yehˬ yaˇ kʼa yaˇ teˇ hpaˍ awˬ hkʼaw lo a sha‸ te‸ chehˇ sheˍ ve chaw teˇ gʼaˇ gʼaˇ cawˬ sheˍ laˇ, teh‸ yawˇ hta‸ na nyi ve yoˬ. Ziˇbaˆ kʼaw‸ yaw hkʼaw‸ leh kʼoˆ ve, Yawˇnaˆtanˍ ve yaˇ teˇ gʼaˇ cawˬ sheˍ. Ya‸ hkʼaˇ, yawˇ lehˬ hkui kʼaw‸ paˍ hpeh‸ ve yoˬ, teh‸ kʼoˆ piˇ ve yoˬ.

4Oˇ htaˇ jawˇmawˇ lehˬ, Yawˇ hkʼaˬ lo chehˇ le, teh‸ yawˇ hta‸ kʼaw‸ na nyi ve yoˬ. Yawˇ lehˬ, Lawˍdeˍbaˍ venˇ hkʼaw Aˍmeˍlaˆ ve yaˇ Maˍhkiˇraˆ ve yehˬ hkʼaw chehˇ taˍ ve yoˬ, teh‸ Ziˇbaˆ kʼaw‸ yaw hkʼaw‸ piˇ ve yoˬ.

5Hkʼe te leh, Daˍviˆ yawˇ hta‸ ca kuˬ tcuh ve yoˬ.

6Sawˉlu‸ ve awˬ hawehˍ, Yawˆnaˆtanˍ ve yaˇ Meˍfiˆboˍshehˆ gaˬ la ve teˇ yanˇ, yawˇ lehˬ Daˍviˆ mehˆ gʼuˇ suhˍ lo boˆ taˍ ve yoˬ. Oˇ htaˇ Daˍviˆ lehˬ, Meˍfiˆboˍshehˆ-oˬ, teh‸ kuˬ leh yawˇ lehˬ, Jawˇmawˇ-oˬ, ngaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.

7Daˍviˆ kʼoˆ ve, Taˇ kawˆ. Nawˬ pa Yawˇnaˆtanˍ ve awˬ meh hta‸ pa taw, ngaˬ nawˬ hta‸ ha‸ shaˉ laˇ tuˬ yoˬ. Nawˬ puˍ Sawˉlu‸ ve miˬguiˬ hkʼa peu-eˬ ngaˬ nawˬ hta‸ kʼaw‸ hkʼaw‸ laˇ leh, nawˬ lehˬ hkʼaˬ htaˆ ka‸ ngaˬ geh gʼa mui caˇ tuˬ yoˬ, teh‸ yawˇ hta‸ kʼoˆ piˇ ve yoˬ.

8Oˇ htaˇ Meˍfiˆboˍshehˆ miˬ chaˇ hkʼoˆ lo kʼaw‸ boˆ taˍ leh kʼoˆ ve, Jawˇmawˇ-oˬ, ngaˬ lehˬ suh taˍ ve hpuiˇ teˇ hkeh a‸ kehˉ da‸ leuˉ ve maˇ heˆ. Aˬ hto‸ ma pa taw, nawˬ ngaˬ hta‸ chi taw taw awˬ bon te laˇ ve le, teh‸ kʼoˆ ve yoˬ.

9Oˇ ve hkʼaw‸ nawˉ, jawˇmawˇ lehˬ Sawˉlu‸ ve awˬ ceˬ paˍ Ziˇbaˆ hta‸ kuˬ yuˬ leh yawˇ hta‸ kʼoˆ piˇ ve, Nawˬ ve awˬ shehˍ hpaˇ Sawˉlu‸ ve mawˇ jeˬ hkʼa peu-eˬ, ngaˬ Meˍfiˆboˍshehˆ hta‸ kʼaw‸ hkʼaw‸ piˇ ve yoˬ.

10Nawˬ awˬ to, nawˬ ve yaˇ teˇ hpaˍ leh, nawˬ ve awˬ ceˬ teˇ hpaˍ, nawˬ ve awˬ shehˍ hpaˇ Sawˉlu‸ ve yehˬ yaˇ kʼa yaˇ teˇ hpaˍ awˬ pon, ti mi te leh awˬ shiˍ awˬ nu gʼa gʼeu‸ jaw‸ keu piˇ ve yoˬ. Ya‸ hkʼaˇ, Meˍfiˆboˍshehˆ lehˬ hkʼaˬ htaˆ ka‸ ngaˬ geh gʼa mui caˇ tuˬ yoˬ, teh‸ Ziˇbaˆ hta‸ kʼoˆ piˇ ve yoˬ. (Ziˇbaˆ lehˬ, yaˇ paˍ teˇ chi ngaˇ gʼaˇ cawˬ leh, awˬ ceˬ paˍ nyiˇ chi gʼaˇ cawˬ ve yoˬ.)

11Oˇ htaˇ Ziˇbaˆ lehˬ, Jawˇmawˇ-oˬ, nawˬ kʼoˆ ve hkʼe ngaˬ na yuˬ leh te tuˬ yoˬ, teh‸ kʼaw‸ yaw hkʼaw‸ piˇ ve yoˬ. Hkʼe te leh, Meˍfiˆboˍshehˆ lehˬ jawˇmawˇ ve yaˇ teˇ hpaˍ hkʼa shuˍ, hkʼaˬ htaˆ ka‸ jawˇmawˇ geh mui caˇ ve yoˬ.

12Meˍfiˆboˍshehˆ lehˬ, Miˆhkaˍ teh‸ kʼoˆ ve yaˇ teˇ gʼaˇ cawˬ ve yoˬ. Ziˇbaˆ ve yehˬ yaˇ kʼa yaˇ hkʼa peu-eˬ, Meˍfiˆboˍshehˆ ve awˬ ceˬ hpeh‸ la ve yoˬ.

13Hkʼe te leh, hkui sheh nyiˇ paˉ paˉ luˬ kʼai peuˬ ve Meˍfiˆboˍshehˆ lehˬ, Yeˍruˆsaˍlehnˍ venˇ hkʼaw chehˇ taˍ leh, jawˇmawˇ geh mui caˇ chehˇ ve yoˬ.

← Chapter 8 Jump to: Chapter 10 →