2 Samuel 20

Lahu Bible Edited © Thailand Bible Society and Bible Society of Myanmar, 2010, 2020.

← Chapter 19 Jump to: Chapter 21 →

1Beˍyaˍmenˍ awˬ ceuˬ awˬ hkʼaˇ awˬ hkʼaw lo, Beˍhkaˍriˆ ve yaˇ Sheˍbaˆ teh‸ kʼoˆ ve haiˬ ve chaw teˇ gʼaˇ cawˬ ve yoˬ. Yawˇ behˬ heh ma meuˆ leh kʼoˆ ve, Daˍviˆ luˬ suh sheˆ suh piˇ-oˆ. Ngaˬ hui yawˇ hkʼaˇ suh kʼai tuˬ ve maˇ heˆ. Iˉsaˍreˍlaˆ chaw teˇ hpaˍ-oˬ, laˬ-o‸. Ngaˬ hui aˉ hkʼaw lo kʼaw‸ kʼo‸-e veuˬ, teh‸ kʼoˆ ve yoˬ.

2Hkʼe te leh, Iˉsaˍreˍlaˆ chaw teˇ hpaˍ Daˍviˆ hta‸ baˬ taˉ leh Sheˍbaˆ hkʼaˇ suh kʼai ve yoˬ. Ya‸ hkʼaˇ, Yuˇda‸ chaw teˇ hpaˍ Daˍviˆ hta‸ ka ti‸ yeˬ leh, Yeˍruˆsaˍlehnˍ venˇ lo hkʼa gaˬ yawˇ hkʼaˇ suh gʼa‸ kʼai ve yoˬ.

3Daˍviˆ lehˬ, Yeˍruˆsaˍlehnˍ venˇ hkʼaw cawˬ ve yawˇ ve hawˉ yehˬ hkʼaw lo‸-e ve yoˬ. Yawˇ ve hawˉ yehˬ hta‸ ha‸ shaˉ tuˬ teh taˉ ve yawˇ ve awˬ miˇ ma i teˇ chi gʼaˇ hta‸ yuˬ leh ma‸ yaˇ hta‸ shaw tcuh ve yoˬ. Yawˇ lehˬ, yaˇ miˇ oˇ ve teˇ hpaˍ hkʼa loˍ ve awˬ ceuˬ hkʼa peu-eˬ hta‸ hkʼa deh‸ ga piˇ ve yoˬ. Ya‸ hkʼaˇ, yawˇ lehˬ yaˇ miˇ oˇ ve teˇ hpaˍ geh maˇ kʼaw‸ zuh‸-o. Yawˇ hui a sha‸ te‸ chehˇ ve teˇ co-e mehˇchawˇma hkʼa shuˍ hpeh‸ ve yoˬ.

4Oˇ ve hkʼaw‸ nawˉ jawˇmawˇ lehˬ, Hpa‸ nyi kʼo Yuˇda‸ chaw hkʼa peu-eˬ ve hta‸ shiˍ veu laˇ leh ngaˬ geh laˬ-o‸, teh‸ Aˍmaˍsaˍ hta‸ kʼoˆ piˇ ve yoˬ.

5Aˍmaˍsaˍ lehˬ, yawˇ hui hta‸ ca kuˬ tuˬ tawˆ kʼai ve yoˬ. Ya‸ hkʼaˇ, yawˇ lehˬ jawˇmawˇ tinˍ piˇ taˍ ve awˬ yanˇ hkʼaw maˇ kʼaw‸ gaˬ la.

6Hkʼe te leh, jawˇmawˇ Aˍbiˆshehˇ hta‸ kuˬ yuˬ leh, Sheˍbaˆ lehˬ Aˍbaˆsaˍlonˍ a‸ kehˉ ngaˬ hui hta‸ te sho‸ sha‸ laˇ gʼa ve yoˬ. Chi hta‸ pa taw, ngaˬ ve ma‸ yaˇ teˇ hpaˍ hta‸ shiˍ veu leh yawˇ hkʼaˇ suh kʼai-o. Oˇ hkʼe maˇ te ve kʼo, yawˇ lehˬ venˇ teˇ hpaˍ hpaˍ hta‸ bawˆ yuˬ leh, ngaˬ hui geh tawˆ kʼai tuˬ yoˬ, teh‸ yawˇ hta‸ kʼoˆ piˇ ve yoˬ.

7Hkʼe te leh, Yaˍbaˆ ve ma‸ yaˇ Hkeˍraˍtiˆ chaw, Peˍlaˍtiˆ chaw leh awˬ nu ve ma‸ yaˇ hkʼa peu-eˬ, Aˍbiˆshehˇ hkʼaˇ suh gʼa‸ kʼai ve yoˬ. Yawˇ hui Yeˍruˆsaˍlehnˍ venˇ hkʼaw tu leh, Sheˍbaˆ hkʼaˇ suh gʼa‸ yuˬ kʼai ve yoˬ.

8Yawˇ hui Giˉbonˍ venˇ paˇ lo cawˬ ve haˉ pui shiˍ lonˉ awˬ paˇ lo gaˬ ve teˇ yanˇ, Aˍmaˍsaˍ hta‸ gʼa mawˬ ve yoˬ. Yaˬbaˆ lehˬ, ma‸ bawˆ tuˬ veuˬ kʼaˇ hkʼa deh‸ veu‸ deh taˍ leh aˉhtaw teˇ maˬ pfuhˇ taˍ ve yoˬ. Yawˇ awˬ gʼuˇ suhˍ lo jiˆ laˬ ve teˇ yanˇ, yawˇ ve aˉhtaw miˬ chaˇ hkʼoˆ lo ce ve yoˬ.

9Oˇ htaˇ Yaˍbaˆ lehˬ, Awˬ chawˇ-oˬ, chehˇ sha chehˇ-aw laˇ, teh‸ Aˍmaˍsaˍ hta‸ kʼoˆ piˇ ve yoˬ. Yawˇ lehˬ Aˍmaˍsaˍ hta‸ boˆ nu ve hkʼe te leh, yawˇ ve la‸ sha paˉ la‸ sheh Aˍmaˍsaˍ ve paˇ tcuhˆ hta‸ yuˬ tiˍ taˍ ve yoˬ.

10Aˍmaˍsaˍ lehˬ, Yaˍbaˆ yuˬ taˍ ve aˉhtaw hta‸ shaˍ ti‸ maˇ te. Hkʼe te leh, Yaˍ baˆ yawˇ ve gʼoˇ peˬ hta‸ juˆ hpehˇ leh, awˬ gʼuˬ tehˆ tawˆ la ve yoˬ. Aˍmaˍsaˍ suh-e ve pa taw, Yaˍbaˆ yawˇ hta‸ nyiˇ pawˆ kʼaw‸ juˆ tuˬ maˇ loˍ ve yoˬ. Oˇ ve hkʼaw‸ nawˉ, Yaˍbaˆ leh yawˇ ve awˬ nyi paˍ Aˍbiˆshehˇ hui Sheˍbaˆ hkʼaˇ suh gʼa‸ yuˬ kʼai ve yoˬ.

11Yaˍbaˆ ve ma‸ yaˇ teˇ gʼaˇ lehˬ, Aˍmaˍsaˍ suh taˍ ve awˬ to paˇ lo huˉ taˍ leh, Yaˍbaˆ leh Daˍviˆ hpawˇ chehˇ ve chaw teˇ hpaˍ, Yaˍbaˆ hkʼaˇ suh kʼai-o, teh‸ kuˬ ve yoˬ.

12Aˍmaˍsaˍ lehˬ, ya‸ kʼaw hkʼoˆ lo paiˍ taˍ ve yoˬ. Yaˍbaˆ ve ma‸ yaˇ oˇ ve lehˬ, chaw teˇ gʼaˇ le le oˇ kaˬ lo huˉ nyi chehˇ ve hta‸ gʼa mawˬ ve yoˬ. Hkʼe te leh, yawˇ lehˬ chaw suh ku-i oˇ ve hta‸ ya‸ kʼaw hawˉ lo gʼawˬ baˬ leh, aˉ boˆ teˇ maˬ yuˬ beh taˍ ve yoˬ.

13Chaw suh ku-i oˇ ve hta‸ ya‸ kʼaw hawˉ gʼawˬ baˬ peuˬ hkʼaw‸ nawˉ, ma‸ yaˇ teˇ gʼaˇ le le Sheˍbaˆ hta‸ gʼa‸ yuˬ tuˬ Yaˍbaˆ hkʼaˇ suh kʼai ve yoˬ.

14Sheˍbaˆ lehˬ, Iˉsaˍreˍlaˆ mvuhˇmiˬ hkʼaˬ ti chi ti lo caw toˇ peuˬ hkʼaw‸ nawˉ, Aˍbeˍlaˆbehˆmaˍhkaˍ venˇ lo gaˬ la ve yoˬ. Beˍhkaˍriˆ awˬ ceuˬ awˬ hkʼaˇ hkʼa peu-eˬ htawˇ, yawˇ geh teˇ geh venˇ oˇ ve lo laˬ ve yoˬ.

15Yaˍbaˆ leh yawˇ ve ma‸ yaˇ teˇ hpaˍ venˇ oˇ ve lo gaˬ la leh, venˇ hta‸ caw hoˆ taˍ ve yoˬ. Yawˇ hui lehˬ lanˇ venˇ hta‸ je‸ yuˬ nehˉ leh, lanˇ venˇ oˇ ve paiˍ tuˬ awˬ hawˉ lo gʼaˇ hte‸ hkʼawˆ duˇ chehˇ ve yoˬ.

16Venˇ oˇ ve awˬ hkʼaw lo cuˇ yiˍ cawˬ ve yaˇ miˇ teˇ gʼaˇ chehˇ taˍ ve yoˬ. Yawˇ lehˬ, lanˇ venˇ hkʼoˆ chehˇ taˍ leh, Nawˬ hui teˇ hpaˍ-oˬ, na sheˍ. Yaˍbaˆ hta‸ choˬ kaˬ laˬ tuˬ kʼoˆ piˇ-oˆ. Ngaˬ yawˇ hta‸ tawˇ yaw gaˇ ve yoˬ, teh‸ kʼoˆ ve yoˬ.

17Yaˍbaˆ oˇ kaˬ lo kʼai leh, Nawˬ Yaˍbaˆ yoˬ laˇ, teh‸ yaˇ miˇ oˇ ve yawˇ hta‸ na nyi ve yoˬ. Yoˬ, teh‸ Yaˍbaˆ kʼaw‸ yaw hkʼaw‸ piˇ ve teˇ yanˇ, Jawˇmawˇ-oˬ, ngaˬ kʼoˆ ve tawˇ hta‸ na sheˍ, teh‸ kʼoˆ ve yoˬ. Ngaˬ na chehˇ taˍ ve yoˬ, teh‸ Yaˍbaˆ yawˇ hta‸ kʼaw‸ yaw hkʼaw‸ piˇ ve yoˬ.

18Yaˇ miˇ kʼaw‸ kʼoˆ ve, Aˬ sho-eˬ htaˇ chaw yaˇ teˇ hpaˍ lehˬ, Aˍbeˍlaˆ venˇ lo kʼai leh ca lawˬ ve kʼo, nawˬ heuˆ gaˇ ve hkʼe gʼa tuˬ yoˬ, teh‸ kʼoˆ da‸ ve yoˬ. Yawˇ hui kʼoˆ ve hkʼe ka‸ te chehˇ ve yoˬ.

19Ngaˬ hui ve venˇ chi lehˬ, uiˍ jaˇ ve venˇ hpeh‸ leh, Iˉsaˍreˍlaˆ mvuhˇmiˬ hkʼaw cawˬ ve awˬ nu ve venˇ teˇ hpaˍ a‸ kehˉ ka ti‸ yeˬ leh gawˬ da‸ jaˇ ve venˇ hpeh‸ ve yoˬ. Aˬ hto‸ ma pa taw, nawˬ venˇ chi hta‸ ca te luˬ la ve le. Gʼuiˬsha ve venˇ chi hta‸ nawˬ luˬ kʼai piˇ lawˬ gaˇ ve laˇ, teh‸ yawˇ hta‸ kʼoˆ piˇ ve yoˬ.

20Oˇ htaˇ Yaˍbaˆ kʼaw‸ yaw hkʼaw‸ leh kʼoˆ ve, Ngaˬ chi hkʼe maˇ te taˬ. Ngaˬ lehˬ, nawˬ hui ve venˇ hta‸ te luˬ tuˬ ve maˇ heˆ.

21Chi hkʼe te tuˬ ngaˬ hui laˬ ve maˇ heˆ. Eˇhpaˍrenˍ mvuhˇmiˬ hkʼaw chehˇ ve Beˍhkaˍriˆ ve yaˇ Sheˍbaˆ lehˬ, jawˇmawˇ Daˍviˆ hta‸ kʼaw‸ hpfuhˆ ve yoˬ. Chaw chi hpaˇ ngaˬ hui hta‸ chiˇ a‸ laˇ-oˆ. Oˇ hkʼe te ve kʼo, ngaˬ hui venˇ chi hkʼaw tawˆ kʼai tuˬ yoˬ, teh‸ kʼoˆ ve yoˬ. Oˇ htaˇ yaˇ miˇ oˇ ve lehˬ, Chaw chi hpaˇ ve oˉ koˍ hta‸ ngaˬ hui lanˇ venˇ hkʼoˆ chehˇ taˍ leh, nawˬ hui geh baˬ peu laˇ tuˬ yoˬ, teh‸ kʼoˆ ve yoˬ.

22Oˇ hkʼe kʼoˆ peuˬ hkʼaw‸ nawˉ, yaˇ miˇ oˇ ve venˇ hkʼaw kʼaw‸ kʼo‸-e leh, venˇ yaˇ teˇ hpaˍ hta‸ yawˇ ve dawˇ hkʼaˇ kʼoˆ maˍ piˇ ve yoˬ. Yawˇ hui Sheˍbaˆ ve oˉ kʼoˍ hta‸ tawˆ yuˬ leh, Yaˍbaˆ geh lo baˬ peu piˇ ve yoˬ. Oˇ htaˇ, Yaˍbaˆ behˬ heh ma meuˆ leh venˇ oˇ ve hkʼaw tawˆ kʼai ve yoˬ. Yaˍbaˆ lehˬ Yeˍruˆsaˍlehnˍ venˇ lo jawˇmawˇ geh kʼaw‸ kʼo‸-e ve yoˬ.

23Yaˍbaˆ lehˬ, Iˉsaˍreˍlaˆ ma‸ yaˇ hkʼa peu-eˬ awˬ hkʼoˆ ma‸ poˍ lonˉ hpeh‸ ve yoˬ. Yawˇyaˍdaˆ ve yaˇ Beˍnaˍyaˆ lehˬ Daˍviˆ ve a sha‸ hta‸ shaw chehˇ ve Hkeˍraˍtiˆ chaw leh Peˍlaˍtiˆ chaw hui ve ma‸ poˍ lonˉ hpeh‸ ve yoˬ.

24Aˍdawˇranˍ lehˬ, kanˉ te chehˇ ve awˬ ceˬ teˇ hpaˍ awˬ hkʼoˆ nyi shehˍ hpaˇ awˬ hoˉ hpeh‸ ve yoˬ. Aˍhiˇluˆ ve yaˇ Yawˇshaˍhpaˆ lehˬ, mawˇ jeˬ hta‸ ha‸ shaˉ shehˍ hpaˇ awˬ hoˉ lonˉ hpeh‸ ve yoˬ.

25Sheˍvaˆ lehˬ, shaˉ nanˉ hkʼaw ve ceˇ leˇ lonˉ hpeh‸ ve yoˬ. Zaˍdoˆ leh Aˍbyaˍtaˍ hui lehˬ, paw hkuˇ teˇ hpaˍ hpeh‸ ve yoˬ.

26Yaˍiˇraˆ ve yaˇ Iˇraˆ htawˇ, Daˍviˆ ve paw hkuˇ teˇ gʼaˇ hpeh‸ ve yoˬ.

← Chapter 19 Jump to: Chapter 21 →