Ezra 1

Lahu Bible Edited © Thailand Bible Society and Bible Society of Myanmar, 2010, 2020.

Jump to: Chapter 2 →

1Paˇshaˇ mvuhˇmiˬ hta‸ jawˇmawˇ Kuˇruˆ tanˬ uˉ peunˍ ve teˇ hkʼaw‸ htaˇ Gʼuiˬsha lehˬ yawˇ ve nyi ma hta‸ gu piˇ leh, yawˇ lehˬ yawˇ uˉ peunˍ chehˇ ve mvuhˇmiˬ hkʼaˬ ti chi ti lo, tawˇ chi hkʼe shanˍ feu piˇ ve yoˬ. Chi ve lehˬ, Yeˍraˍmiˆ kʼoˆ taˍ ve tawˇ teˇ hpaˍ biˇ la tuˬ awˬ pon hpeh‸ ve yoˬ.

2Chi lehˬ, jawˇmawˇ Kuˇruˆ ve tawˇ hpeh‸ ve yoˬ. Mvuhˇ naw ma Gʼuiˬsha lehˬ, miˬguiˬ hkʼa peu-eˬ hta‸ uˉ peunˍ tuˬ ngaˬ hta‸ jawˇmawˇ te tcuh laˇ leh, Yuˇda‸ mvuhˇmiˬ Yeˍruˆsaˍlehnˍ venˇ hkʼaw cawˬ ve bon yehˬ hta‸ kʼaw‸ gu te tuˬ, ngaˬ hta‸ kanˉ chiˇ a‸ laˇ ve yoˬ.

3Nawˬ hui geh Gʼuiˬsha chehˇ piˇ-oˆ. Nawˬ hui Yeˍruˆsaˍlehnˍ venˇ lo gʼa kʼai leh, Iˉsaˍreˍlaˆ ve Gʼuiˬsha awˬ pon bon yehˬ hta‸ gʼa ca gu tuˬ yoˬ.

4Shu mvuhˇmiˬ hkʼaw chehˇ taˍ ve Yuˇda‸ chaw teˇ hpaˍ ka‸ kʼaw‸ kʼo‸-e gaˇ ve kʼo, yawˇ hui awˬ paˇ awˬ kui lo chehˇ ve chaw teˇ hpaˍ lehˬ, yawˇ hui hta‸ gʼa ga piˇ ve yoˬ. Yawˇ hui lehˬ, Yuˇda‸ chaw oˇ ve teˇ hpaˍ hta‸ hpu, shi, caˇ tuˬ dawˬ tuˬ, leh to nuˇ to shaˆ teˇ hpaˍ gʼa tanˇ feu piˇ ve yoˬ, teh‸ shanˍ feu piˇ ve yoˬ.

5Oˇ htaˇ, Yuˇda‸ leh Beˍyaˍmenˍ awˬ hoˉ awˬ naˬ teˇ hpaˍ, pawˇ hkuˇ leh Leˍviˆ chaw teˇ hpaˍ, leh Gʼuiˬsha hkʼa dawˇ pawnˍ piˇ ve awˬ nu ve chaw teˇ hpaˍ lehˬ, Yeˍruˆsaˍlehnˍ venˇ hkʼaw cawˬ ve Gʼuiˬsha ve bon yehˬ hta‸ kʼaw‸ gu te tuˬ gu taˍ hehnˇ taˍ ve yoˬ.

6Yawˇ hui awˬ paˇ awˬ kui lo chehˇ ve chaw teˇ hpaˍ htawˇ, yawˇ hui bon yehˬ hta‸ kʼaw‸ gu tuˬ awˬ pon, hpu te taˍ ve mu‸ hkʼu leh hkehˇ teˇ hpaˍ, shi, caˇ tuˬ dawˬ tuˬ, to nuˇ to shaˆ teˇ hpaˍ leh awˬ nu ve awˬ hpfuhˇ hkʼaˆ ve mawˇ teˇ hpaˍ tanˇ feu piˇ ve yoˬ.

7Jawˇmawˇ Kuˇruˆ htawˇ, jawˇmawˇ Neˍbuˍhkaˍneˍzaˍ Yeˍruˆsaˍlehnˍ venˇ hkʼaw yuˬ veu laˇ leh, yawˇ ve gʼuiˬsha teˇ hpaˍ ve bon yehˬ hkʼaw teh taˍ ve kawˆ leh hkehˇ teˇ hpaˍ, yawˇ hui hta‸ kʼaw‸ hkʼaw‸ piˇ ve yoˬ.

8Yawˇ lehˬ, mawˇ oˇ ve teˇ hpaˍ hta‸ yawˇ ve mawˇ ha‸ shaˉ shehˍ hpaˇ Miˆtaˍreˍdaˆ hta‸ chiˇ a‸ piˇ leh, yawˇ teˇ caˉ Yuˇda‸ mvuhˇmiˬ hta‸ uˉ peunˍ chehˇ ve jawˇmawˇ Sheˍshaˍbaˍzaˍ hta‸ kʼaw‸ chiˇ a‸ piˇ ve yoˬ.

9Jawˇmawˇ Kuˇruˆ kʼaw‸ hkʼaw‸ piˇ ve mawˇ teˇ hpaˍ lehˬ, shi te taˍ ve hkehˇ pe le 30 maˬ, hpu te taˍ ve hkehˇ pe le 1,000 maˬ, awˬ nu ve hkehˇ pe le 29 maˬ, shi te taˍ ve kawˆ ehˉ 30 maˬ, hpu te taˍ ve kawˆ ehˉ 410 maˬ, awˬ nu ve mu‸ hkʼu hkehˇ 1,000 maˬ,

11hkʼa peu-eˬ hta‸ shawˍ nyi kʼo, hpu leh shi yuˬ te taˍ ve hkehˇ hkʼa peu-eˬ 5,400 maˬ cawˬ ve yoˬ. Shaˍshaˍbaˍzaˍ lehˬ mawˇ oˇ ve teˇ hpaˍ hta‸ yuˬ peuˬ hkʼaw‸ nawˉ, shu mvuhˇmiˬ hkʼaw chehˇ taˍ ve Yuˇda‸ chaw teˇ hpaˍ hta‸ shiˍ leh Yeˍruˆsaˍlehnˍ venˇ lo kʼo‸-e ve yoˬ.

Jump to: Chapter 2 →