Ezra 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Hkʼe te leh, jawˇmawˇ Daˍriˆ lehˬ Baˍbuˍlonˍ mvuhˇmiˬ hkʼaw cawˬ ve caˇ lanˇ teˇ hpaˍ hta‸ gʼa‸ hpfuhˆ nyi tcuh ve yoˬ.

2Meˍdiˆ mvuhˇmiˬ, Eˍbaˍtaˍnaˍ venˇ hkʼaw lo, li‸ daw teˇ maˬ hta‸ yawˇ hui kʼaw‸ hpfuhˆ mawˬ ve yoˬ. Li‸ oˇ ve hkʼaw lo chi hkʼe bvuh‸ taˍ ve yoˬ.

3Jawˇmawˇ Kuˇruˆ mvuhˇmiˬ hta‸ uˉ peunˍ ve teˇ hkʼaw‸ htaˇ, Gʼuiˬsha hta‸ tuˉ tanˇ kuiˬ Yeˍ ruˆ saˍlehnˍ venˇ hkʼaw lo bon yehˬ hta‸ kʼaw‸ gu te tcuh ve yoˬ. Bon yehˬ oˇ ve lehˬ, mvuh ve hpawˇ 60 shaw‸, kʼehˬ ve hpawˇ 60 shaw‸ gʼa cawˬ piˇ ve yoˬ.

4Bon yehˬ hta‸ ko tuˬ ve lehˬ, haˉ pui shehˆ htai‸ kawˍ peuˬ hkʼaw‸ nawˉ suhˆ teˇ htai‸ gʼa te kawˍ taˆ-e ve yoˬ. Bon yehˬ chi hta‸ gu te leh peuˬ ve awˬ hpfuhˇ hkʼa peu-eˬ, jawˇmawˇ ve shaˉ nanˉ hkʼaw yuˬ tawˆ piˇ tuˬ yoˬ.

5Chi awˬ hkʼoˆ, jawˇmawˇ Neˍbuˍhkaˍneˍzaˍ Yeˍruˆsaˍlehnˍ bon yehˬ hkʼaw yuˬ veu laˇ taˍ ve hpu, shi, leh bon yehˬ hkʼaw yehˇ tuˬ ve mawˇ hkʼa peu-eˬ, gʼa kʼaw‸ hkʼaw‸ piˇ ve yoˬ, teh‸ bvuh‸ taˍ ve yoˬ.

6Oˇ htaˇ jawˇmawˇ Daˍriˆ lehˬ, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo cawˬ ve mvuhˇmiˬ hta‸ uˉ peunˍ chehˇ ve jawˇmawˇ Taˍtaˍnehˇ, Sheˍtaˍbawˇzaˍnehˇ leh awˬ nu ve awˬ hoˉ awˬ naˬ teˇ hpaˍ hta‸ li‸ chi hkʼe kʼaw‸ bvuh‸ hkʼaw‸ piˇ ve yoˬ.

7Bon yehˬ kʼaw‸ gu te chehˇ ve hta‸ nawˬ hui taˇ te sho‸ sha‸ piˇ. Yuˇda‸ mvuhˇmiˬ hta‸ uˉ peunˍ chehˇ ve jawˇmawˇ leh, Yuˇda‸ chaw teˇ hpaˍ Gʼuiˬsha ve bon yehˬhta‸ kʼaw‸ gu te piˇ lawˬ-o‸.

8Nawˬ hui htawˇ, yawˇ hui hta‸ ga piˇ tuˬ ngaˬ tawˇ pe‸ laˇ ve yoˬ. Yawˇ hui te chehˇ ve kanˉ maˇ gʼa luˬ kʼai tuˬ, yawˇ hui yehˇ peuˬ taˍ ve hpu teˇ hpaˍ, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo shaw gʼa taˍ ve hpu hkʼaw yuˬ tawˆ piˇ-oˆ.

9Paw hkuˇ teˇ hpaˍ loˍ cawˇ ve mawˇ, nuˇ, yawˬ, caˬ hkʼa, aˉ leh‸, aˬ pehˉ meuˇ gʼuiˬ leh shaˍ lonˍ chu teˇ hpaˍ, nawˬ hui teˇ nyi le le gʼa ca piˇ ve yoˬ.

10Yawˇ hui mvuhˇ naw Gʼuiˬsha hta‸ tuˉ tanˇ leh, ngaˬ awˬ to leh ngaˬ ve yaˇ teˇ hpaˍ awˬ pon bon lawˬ laˇ hpeh‸ tuˬ, nawˬ hui chi hkʼe gʼa te piˇ ve yoˬ.

11Chaw teˇ gʼaˇ gʼaˇ ngaˬ ve tawˇ chi hta‸ maˇ na yuˬ ve kʼo, yawˇ ve yehˬ hkʼaw cawˬ ve suhˆ taˬ teˇ maˬ hta‸ yuˬ tawˆ leh, ba‸ che peuˬ hkʼaw‸ nawˉ, yawˇ hta‸ gʼa juˆ pehˍ ve yoˬ. Yawˇ ve yehˬ hta‸ htawˇ gʼa te luˬ piˇ ve yoˬ.

12Yeˍruˆsaˍlehnˍ venˇ hta‸ leuˆ yuˬ taˍ ve Gʼuiˬsha lehˬ, ngaˬ ve tawˇ hta‸ maˇ na yuˬ ve chaw hkʼaˬ ve teˇ gʼaˇ hta‸ maˇ kʼoˆ, te luˬ te sheˆ piˇ-oˆ. Ngaˬ tawˇ chi hkʼe pe‸ laˇ ve yoˬ. Ngaˬ ve tawˇ chi hta‸ nawˬ hui hkʼa deh‸ gʼa na yuˬ ve yoˬ, teh‸ li‸ kʼaw‸ bvuh‸ piˇ ve yoˬ.

13Oˇ htaˇ jawˇmawˇ Taˍtaˍnehˇ, Sheˍtaˍbawˇzaˍnehˇ leh awˬ nu ve awˬ hoˉ awˬ naˬ teˇ hpaˍ lehˬ, jawˇmawˇ lonˉ kʼoˆ ve hkʼe te ve yoˬ.

14Yuˇda‸ chaw teˇ hpaˍ lehˬ, bon yehˬ hta‸ hkʼa deh‸ kʼaw‸ caˉ leh gu te chehˇ taˍ ve yoˬ. Tcuh kaˍ paˍ Haˆgehˇ leh Zaˍhkaˍriˆ hui htawˇ, yawˇ hui hta‸ ga piˇ chehˇ ve yoˬ. Iˉsaˍreˍlaˆ ve Gʼuiˬsha, jawˇmawˇ Kuˇruˆ, Daˍriˆ, Aˍtaˍyeˍziˆ hui kʼoˆ taˍ ve hkʼe, yawˇ hui bon yehˬ hta‸ kʼaw‸ gu te peuˬ ve yoˬ.

15Jawˇmawˇ Daˍriˆ mvuhˇmiˬ hta‸ uˉ peunˍ ve 6 hkʼaw‸ teˇ hkʼaw‸, Aˍdaˍ ha pa shehˆ nyi htaˇ, yawˇ hui bon yehˬ hta‸ te peuˬ ve yoˬ.

16Hkʼe te leh, Paw hkuˇ, Leˍviˆ chaw leh Iˉsaˍreˍlaˆ chaw hkʼa peu-eˬ ha lehˬ ha kʼa bon yehˬ oˇ ve Gʼuiˬsha hta‸ chiˇ a‸ piˇ ve yoˬ.

17Oˇ ve teˇ nyi yawˇ hui lehˬ nuˇ 100 hkeh, yawˬ awˬ paˍ 200 hkeh, yawˬ ehˉ 400 hkeh, Gʼuiˬsha hta‸ tuˉ tanˇ piˇ ve yoˬ. Chi awˬ hkʼoˆ, Iˉsaˍreˍlaˆ chaw 12 ceuˬ cawˬ ve hkʼe, aˉ che‸ 12 hkeh tiˇ leh, venˇbaˆ gʼa ponˬ tuˬ Gʼuiˬsha hta‸ tuˉ tanˇ piˇ ve yoˬ.

18Moˉseˍ ve awˬliˇtawˇhkawˇ li‸ daw hkʼaw bvuh‸ taˍ ve hkʼe, bon yehˬ hkʼaw kanˉ te tuˬ ve paw hkuˇ leh Leˍviˆ chaw teˇ hpaˍ hta‸ htawˇ yawˇ hui leuˆ yuˬ ve yoˬ.

19Shu mvuhˇmiˬ lo kʼaw‸ la taˍ ve Iˉsaˍreˍlaˆ chaw oˇ ve teˇ hpaˍ lehˬ, ha pa awˉ lawˉ teˇ maˬ 14 nyi teˇ nyi htaˇ, Paˍsaˍhkaˍ pawehˇ hta‸ te ve yoˬ.

20Paw hkuˇ leh Leˍviˆ chaw hkʼa peu-eˬ, a shu yawˇ awˬ to hta‸ da‸ kehˬ piˇ taˍve yoˬ. Yawˇ hui lehˬ, shu mvuhˇmiˬ lo kʼaw‸ la taˍ ve chaw te hpaˍ, paw hkuˇ leh Leˍviˆ chaw hui awˬ pon Paˍsaˍhkaˍ pawehˇ caˇ tuˬ, to nuˇ to shaˆ teˇ hpaˍ hta‸ tiˇ pehˍ ve yoˬ.

21Paˍsaˍhkaˍ pawehˇ oˇ ve hta‸ shu mvuhˇmiˬ lo kʼaw‸ la taˍ ve Iˉsaˍreˍlaˆ chaw hkʼa peu-eˬ leh, Iˉsaˍreˍlaˆ ve Gʼuiˬsha hta‸ ceh tiˉ oˉ kʼoˍ pui chehˇ ve awˬ nu ve chaw ceuˬ te hpaˍ teˇ geh hpoˆ caˇ ve yoˬ.

22Suhˍ nyi hkʼa gaˬ, yawˇ hui pawehˇ oˇ ve hta‸ ha lehˬ ha kʼa te chehˇ ve yoˬ. Gʼuiˬsha lehˬ Aˍsuˇriˆ jawˇmawˇ hta‸ nyi ma gu piˇ leh, Gʼuiˬsha ve bon yehˬ hta‸ kʼaw‸ gu te tuˬ, awˬ gʼaˇ piˇ chehˇ ve pa taw, yawˇ hui ha lehˬ jaˇ ve yoˬ.

← Chapter 5 Jump to: Chapter 7 →