Ezra 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Yuˇda‸ leh Beˍyaˍmenˍ chaw hui hta‸ canˇ ve chaw teˇ hpaˍ lehˬ, shu mvuhˇmiˬ lo kʼaw‸ la taˍ ve Iˉsaˍreˍlaˆ chaw hui bon yehˬ hta‸ kʼaw‸ gu te chehˇ ve awˬ hkawˇ hta‸ gʼa kaˇ ve yoˬ.

2Hkʼe te leh yawˇ hui Zeˍruˆbaˍbeˍlaˆ leh Iˉsaˍreˍlaˆ chaw awˬ hoˉ awˬ naˬ teˇ hpaˍ geh kʼai leh, Ngaˬ hui htawˇ nawˬ hui bon yehˬ te chehˇ ve hta‸ ga laˇ gaˇ ve yoˬ. Awˬ lawn kʼo, Aˍsuˇriˆ jawˇmawˇ Eˇsaˍraˆhaˍdonˍ ngaˬ hui hta‸ choˬ kaˬ nawˬ hui geh ca chehˇ tcuh laˇ ve teˇ nyi hta‸ tanˬ leh, ngaˬ hui htawˇ nawˬ hui oˉ kʼoˍ pui chehˇ ve Gʼuiˬsha hta‸ oˉ kʼoˍ pui leh, yawˇ hta‸ tuˉ tanˇ piˇ chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

3Oˇ htaˇ Zeˍruˇbaˆbeˍlaˆ, Yawˇsuˆ leh Iˉsaˍreˍlaˆ awˬ hoˉ awˬ naˬ teˇ hpaˍ lehˬ, Nawˬ hui ga laˇ ve hta‸ ngaˬ hui maˇ loˍ. Paˇshaˇ mvuhˇmiˬ ve jawˇmawˇ lonˉ Kuˇruˆ ngaˬ hui hta‸ a hkaw-anˬ pe‸ laˇ taˍ peuˬ ve hkʼe, ngaˬ hui hkʼaˇ ngaˬ hui te tuˬ yoˬ, teh‸ yawˇ hui hta‸ kʼaw‸ yaw hkʼaw‸ piˇ ve yoˬ.

4Oˇ htaˇ, yawˇ hui geh ca chehˇ la taˍ ve chaw oˇ ve teˇ hpaˍ lehˬ, yawˇ hui bon yehˬ hta‸ maˇ gʼa kʼaw‸ gu te tuˬ, laiˉ ceuˬ kʼoˆ leh ho piˇ ve yoˬ.

5Yawˇ hui lehˬ, mvuhˇmiˬ jawˇmawˇ teˇ hpaˍ hta‸ la‸ shawnˍ piˇ leh, Yuˇda‸ chaw oˇ ve teˇ hpaˍ bon yehˬ hta‸ maˇ gʼa kʼaw‸ gu te tuˬ, tawˍ taˍ tcuh ve yoˬ. Yawˇ hui lehˬ, jawˇmawˇ Kuˇruˆ uˉpeunˍ chehˇ ve aw yanˇ hta‸ te leh jawˇmawˇ Daˍriˆ uˉ peunˍve awˬ yanˇ hkʼa gaˬ, Yuˇda‸ chaw teˇ hpaˍ hta‸ oˇ hkʼe te piˇ chehˇ ve yoˬ.

6Oˇ ve hkʼaw‸ nawˉ, Jawˇmawˇ Zeˍyiˆ mvuhˇmiˬ hta‸ kʼaw‸ uˉ peunˍ ve teˇ yanˇ, yawˇ hui lehˬ Yuˇda‸ chaw hui hta‸ venˇbaˆ taˍ ve li‸ teˇ kʼoˆ bvuh‸ leh jawˇmawˇ lonˉ hta‸ piˇ ve yoˬ.

7Jawˇmawˇ Aˍtaˍzeˍyiˆ Paˇshaˇ mvuhˇmiˬ hta‸ uˉ peunˍ chehˇ ve teˇ yanˇ, Taˍbeˍlaˆ leh yawˇ ve awˬ chawˇ teˇ hpaˍ lehˬ, Miˆtaˍreˍdaˆ geh jehˬ da‸ leh jawˇmawˇ lonˉ hta‸ li‸ teˇ kʼoˆ bvuh‸ piˇ ve yoˬ. Yawˇ hui li‸ oˇ ve hta‸ Aˍraˍmiˆ hkawˇ bvuh‸ taˍ leh, gʼaw maˍ piˇ htaˇ tcuhˉ kuiˬ gʼa kʼaw‸ yuˬ tawˆ maˍ piˇ ve yoˬ.

8Chi hkʼoˆ ka‸, jawˇmawˇ Reˍhonˍ leh mvuhˇmiˬ ve ceˇ leˇ lonˉ Sheˍmiˍshehˇ hui htawˇ, Yeˍruˆsaˍlehnˍ venˇ awˬ lawn jawˇmawˇ Aˍtaˍzeˍyiˆ hta‸ li‸ teˇ kʼoˆ bvuh‸ piˇ ve yoˬ.

9Li‸ oˇ ve awˬ hkʼaw lo, la‸ ma‸ nyiˉ taˍ ve chaw teˇ hpaˍ lehˬ, jawˇmawˇ Reˍhonˍ, ceˇ leˇ lonˉ Sheˍmiˍshehˇ, suhˉ jehˬ shehˍ hpaˇ teˇ hpaˍ leh, Eˇrehˆ venˇ, Baˍbuˍlonˍ venˇ, Eˇlanˍ mvuhˇmiˬ hkʼaw cawˬ ve Suˇsanˍ venˇ,

10chi teˇ hpa hkʼaw laˬ taˍ ve awˬ hoˉ awˬ naˬ hkʼa peu-eˬ leh, jawˇmawˇ lonˉ Aˍshuˇraˆbeˍniˆpaˍlaˆ gʼa‸ kʼoˬ piˇ ve pa taw, Saˍmaˍriˆ venˇ leh Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo ca chehˇ la taˍ ve chaw teˇ hpaˍ hpeh‸ ve yoˬ.

11Li‸ oˇ ve hkʼaw chi hkʼe bvuh‸ taˍ ve yoˬ. Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo chehˇ ve chaw teˇ hpaˍ, jawˇmawˇ lonˉ Aˍtaˍzeˍyiˆ hta‸ li‸ chi hkʼe bvuh‸ laˇ ve yoˬ.

12Jawˇmawˇ lonˉ nawˬ hta‸ ngaˬ hui chi hkʼe kʼoˆ laˇ gaˇ ve yoˬ, Shu ve mvuhˇmiˬ hkʼaw ca chehˇ kʼaw‸ la taˍ ve Yuˇda‸ chaw teˇ hpaˍ lehˬ, Yeˍruˆsaˍlehnˍ venˇ lo kʼaw‸ la leh, haiˬ ve venˇ oˇ ve hta‸ kʼaw‸ gu te chehˇ ve yoˬ. Yawˇ hui lehˬ, lanˇ venˇ hta‸ htawˇ kʼaw‸ gu kawˍ chehˇ leh, maˇ maw maw kʼo peuˬ tuˬ ve yoˬ.

13Jawˇmawˇ-oˬ, venˇ chi hta‸ kʼaw‸ gu te peuˬ leh, lanˇ venˇ hta‸ htawˇ kʼaw‸ gu kawˍ peuˬ ve kʼo, yawˇ hui nawˬ hta‸ awˬ hkawnˍ keu laˇ tuˬ ve maˇ heˆ. Hkʼe te leh, nawˬ ve hpu yawnˇ kʼai tuˬ yoˬ.

14Ngaˬ hui lehˬ, nawˬ ve kanˇ paˆ hawˉ lo chehˇ taˍ ve pa taw, chi hkʼe hpeh‸ la ve hta‸ maˇ mawˬ gaˇ.

15Hkʼe te leh, ngaˬ hui nawˬ hta‸ dawˇ hkʼaˇ chi hkʼe pe‸ laˇ gaˇ ve yoˬ. Nawˬ ve awˬ puˍ lonˉ hui ha‸ shaˉ taˍ ve li‸ daw teˇ hpaˍ hta‸ kʼaw‸ gʼa‸ hpfuhˆ nyi sheˍ. Oˇ hkʼe te ve kʼo, venˇ chi lehˬ haiˬ jaˇ ve venˇ hpeh‸ ve hta‸ maˇ kʼoˆ, teˇ co peuˬ teˇ co jawˇmawˇ teˇ hpaˍ hta‸ kʼaw‸ hpfuhˆ leh sho‸ sha‸ tuˬ te piˇ chehˇ ve venˇ hpeh‸ ve hta‸ maˇ kʼoˆ, nawˬ shiˍ la tuˬ yoˬ. Chaw chi teˇ hpaˍ lehˬ, uˉ peunˍ tuˬ hkʼa cawˇ haˍ ve chaw teˇ hpaˍ hpeh‸ ve yoˬ. Chi pa taw, venˇ chi luˬ kʼai taˍ ve yoˬ.

16Venˇ chi hta‸ kʼaw‸ gu te peuˬ leh, lanˇ venˇ teˇ hpaˍ hta‸ htawˇ kʼaw‸ gu kawˍ peuˬ ve kʼo, jawˇmawˇ nawˬ lehˬ Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ cawˬ ve mvuhˇmiˬ chi hta‸ kʼaw‸ uˉ peunˍ gʼa tuˬ ve maˇ heˆ, teh‸ jawˇmawˇ lonˉ hta‸ li‸ bvuh‸ piˇ ve yoˬ.

17Oˇ htaˇ jawˇmawˇ lonˉ lehˬ, Reˍhonˍ, ceˇ leˇ lonˉ Sheˍmiˍshehˇ, Saˍmaˍriˆ venˇ, leh Uˉhpaˍ raˆ iˉ kaˆ lawˬ mvuhˇ nyi kʼehˬ hpawˇ lo chehˇ ve chaw teˇ hpaˍ hta‸ li‸ chi hkʼe kʼaw‸ bvuh‸ feu piˇ ve yoˬ.

18Nawˬ hui ngaˬ hta‸ bvuh‸ laˇ ve li‸ hta‸ shu tcuhˉ kuiˬ yuˬ tawˆ leh gʼaw maˍ laˇ peuˬ.

19Li‸ daw teˇ hpaˍ hta‸ kʼaw‸ hpfuhˆ nyi tuˬ ngaˬ tawˇ piˇ ve teˇ yanˇ, Yeˍruˆsaˍlehnˍ venˇ lehˬ aˬ sho-eˬ htaˇ ka‸ te leh, jawˇmawˇ teˇ hpaˍ hta‸ kʼaw‸ hpfuhˆ leh sho‸ sha‸ tuˬ te puiˉ ve venˇ hpeh‸ ve hta‸ gʼa mawˬ ve yoˬ.

20Awˬ gʼaˇ uiˍ ve jawˇmawˇ teˇ hpaˍ, venˇ oˇ ve hta‸ maˇ kʼoˆ, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo cawˬ ve mvuhˇmiˬ hta‸ maˇ kʼoˆ, uˉ peunˍ leh awˬ hkawnˍ shaw caˇ ve hta‸ gʼa mawˬ ve yoˬ.

21Chi hta‸ pa taw, ngaˬ nawˬ hui hta‸ tawˇ awˬ suhˉ maˇ kʼaw‸ pe‸ laˇ sheˍ ve ceh ceh, yawˇ hui ve venˇ hta‸ maˇ gʼa kʼaw‸ gu te tuˬ hto piˇ-oˆ.

22Yawˇ hui maˇ gʼa haiˬ tawˆ la tuˬ, kanˉ chi ve hta‸ haˆ haˆ te-o, teh‸ yawˇ hui hta‸ kʼoˆ feu piˇ ve yoˬ.

23Reˍhonˍ, Sheˍmiˍshehˇ leh yawˇ hui ve awˬ chawˇ teˇ hpaˍ lehˬ, jawˇmawˇ Aˍtaˍzeˍyiˆ ve li‸ oˇ ve hta‸ gʼa mawˬ ve teˇ yanˇ, yawˇ hui Yeˍruˆsaˍlehnˍ venˇ lo haˆ haˆ kʼai leh, Yuˇda‸ chaw hui te chehˇ ve kanˉ hta‸ jehˇ tcuh taˍ ve yoˬ.

24Hkʼe te leh, Yuˇda‸ chaw teˇ hpaˍ lehˬ Paˇshaˇ mvuhˇmiˬ hta‸ jawˇmawˇ Daˍriˆ uˉ peunˍ ve nyiˇ hkʼaw‸ teˇ hkʼaw‸ htaˇ hkʼa gaˬ yawˇ hui te chehˇ ve kanˉ hta‸ jehˇ taˍ ve yoˬ.

← Chapter 3 Jump to: Chapter 5 →