Ezra 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Awˬ hkʼaw‸ nawˉ maˇ maw maw, Aˍtaˍyeˍziˆ Paˇshaˇ mvuhˇmiˬ hta‸ kʼaw‸ uˉ peunˍ ve yoˬ. Oˇ htaˇ, Eˉzaˍraˆ teh‸ kʼoˆ ve chaw teˇ gʼaˇ cawˬ ve yoˬ. Yawˇ lehˬ paw hkuˇ lonˉ Aˍronˍ ve awˬ ceuˬ awˬ hkʼaˇ hpeh‸ ve yoˬ. Eˇzaˍraˆ lehˬ, Seˍraˍyaˆ ve yaˇ hpeh‸ ve yoˬ. Aˍzaˍriˆ lehˬ, Hiˇlaˍhkiˆ ve yaˇ yoˬ.

2Hiˇlaˍhkiˆ lehˬ Shaˍlonˍ ve yaˇ yoˬ. Shaˍlonˍ lehˬ Zaˍdoˆ ve yaˇ yoˬ. Zaˍdoˆ lehˬ Aˍhiˇtuˆ ve yaˇ yoˬ.

3Aˍhiˇtuˆ lehˬ Aˍmaˍriˆ ve yaˇ yoˬ. Aˍmaˍriˆ lehˬ Meˍraˍyoˆ ve yaˇ yoˬ.

4Meˍraˍyoˆ lehˬ Zeˍraˍhiˆ ve yaˇ yoˬ. Zeˍraˍhiˆ lehˬ Awˇziˆ ve yaˇ yoˬ. Awˇziˆ lehˬ Buˇhkiˆ ve yaˇ yoˬ.

5Buˇhkiˆ lehˬ Aˍbiˇshuˍ ve yaˇ yoˬ. Aˍbiˇshuˍ lehˬ Hpiˇneˍhaˆ ve yaˇ yoˬ. Hpiˇneˍhaˆ lehˬ Eˇlaˍsaˍ ve yaˇ yoˬ. Eˇlaˍsaˍ lehˬ Aˍronˍ ve yaˇ yoˬ.

6Eˇzaˍraˆ lehˬ, Iˉsaˍreˍlaˆ ve Jawˇmawˇ Gʼuiˬsha Moˉseˍ hta‸ piˇ taˍ ve awˬliˇtawˇhkawˇ shiˍ shehˍ hpaˇ hpeh‸ ve yoˬ. Eˇzaˍraˆ lehˬ Gʼuiˬsha geh awˬ bon gʼa taˍ ve chaw hpeh‸ ve pa taw, yawˇ hkʼa lawˬ ve teˇ hpaˍ jawˇmawˇ yawˇ hta‸ te piˇ chehˇ ve yoˬ. Eˇzaˍraˆ lehˬ Baˍbuˍlonˍ mvuhˇmiˬ hkʼaw tu leh Yeˍruˆsaˍlehnˍ venˇ lo kʼai ve yoˬ.

7Paw hkuˇ, Leˍviˆ chaw, kʼa muiˬ hkawˇ kʼa paˍ, bon yehˬ shaw paˍ, leh bon yehˬ hkʼaw kanˉ te paˍ teˇ hpaˍ yawˇ geh teˇ geh kʼai ve yoˬ. Yawˇ hui Yeˍruˆsaˍlehnˍ venˇ lo kʼai ve lehˬ, Aˍtaˍzeˍziˆ jawˇmawˇ te ve suhˍ hkʼaw‸ teˇ hkʼaw‸ htaˇ yoˬ.

8Yawˇ hui lehˬ, ha pa awˉ lawˇ teˇ maˬ awˬ hkuiˉ puiˍ teˇ nyi htaˇ, Baˍbuˍlonˍ mvuhˇmiˬ hkʼaw tawˆ kʼai ve yoˬ.

9Gʼuiˬsha yawˇ hui hta‸ ha‸ shaˉ piˇ chehˇ ve pa taw, yawˇ hui lehˬ ha pa ngaˇ maˬ teˇ maˬ awˬ hkuiˉ puiˍ teˇ nyi htaˇ Yeˍruˆsaˍlehnˍ venˇ lo gaˬ la ve yoˬ.

10Eˇzaˍraˆ lehˬ, Gʼuiˬsha ve awˬliˇtawˇhkawˇ teˇ hpaˍ hta‸ hkʼaˬ htaˆ ka‸ gʼaw chehˇ henˇ chehˇ leh, Iˉsaˍreˍlaˆ chaw hui hta‸ maˍ piˇ tcuhˉ taˍ ve yoˬ.

11Jawˇmawˇ Aˍtaˍyeˍziˆ lehˬ, Gʼuiˬsha Iˉsaˍreˍlaˆ chaw hui hta‸ piˇ taˍ ve awˬliˇtawˇhkawˇ hta‸ shiˍ shehˍ hpaˇ Eˇzaˍraˆ hta‸ li‸ chi hkʼe bvuh‸ piˇ ve yoˬ.

12Mvuhˇ naw Gʼuiˬsha ve awˬliˇtawˇhkawˇ shiˍ shehˍ hpaˇ Eˇzaˍraˆ hta‸ ngaˬ jawˇmawˇ lonˉ Aˍtaˍyeˍziˆ li‸ chi hkʼe bvuh‸ laˇ ve yoˬ.

13Ngaˬ uˉ peunˍ chehˇ ve mvuhˇmiˬ hkʼaw hkʼa chehˇ taˍ ve paw hkuˇ, Leˍviˆ chaw leh, leh Iˉsaˍreˍlaˆ chaw hkʼa peu-eˬ, nawˬ geh Yeˍruˆsaˍlehnˍ venˇ lo kʼai gaˇ ve kʼo, kʼai tuˬ ngaˬ a hkaw-anˬ pe‸ laˇ ve yoˬ.

14Ngaˬ awˬ to leh ngaˬ ve a ma‸ lonˉ 7 gʼaˇ ve hkʼa peu-eˬ, nawˬ hta‸ Yeˍruˆsaˍlehnˍ venˇ lo kʼai tcuh leh, oˇ kaˬ lo chehˇ taˍ ve Iˉsaˍreˍlaˆ chaw teˇ hpaˍ, Gʼuiˬsha ve awˬliˇtawˇhkawˇ hta‸ hkʼaˬ ma na yuˬ chehˇ ve hta‸ ca kʼaw‸ chaˬ nyi tcuh taˍ ve yoˬ.

15Nawˬ lehˬ, ngaˬ awˬ to leh ngaˬ ve a ma‸ lonˉ teˇ hpaˍ, Iˉsaˍreˍlaˆ ve Gʼuiˬsha hta‸ tanˇ piˇ tuˬ gu taˍ ve hpu, shi, teˇ hpaˍ hta‸ Yeˍruˆsaˍlehnˍ venˇ lo gʼa yuˬ kʼo‸-e tuˬ yoˬ.

16Chi hkʼoˆ ka‸, nawˬ lehˬ Baˍbuˍlonˍ mvuhˇmiˬ hkʼaw shaw gʼa taˍ ve hpu, shi, teˇ hpaˍ lehˬ, Iˉsaˍreˍlaˆ chaw leh paw hkuˇ teˇ hpaˍ yawˇ hui ve Gʼuiˬsha ve bon yehˬ awˬ pon tanˇ piˇ taˍ ve tanˇ tuˬ teˇ hpaˍ hta‸ htawˇ, gʼa yuˬ kʼo‸-e piˇ tuˬ yoˬ.

17Nawˬ lehˬ hpu chi teˇ hpaˍ hta‸ yuˬ leh, nuˇ, yawˬ, caˬ shiˍ, a pehˉ meuˇ gʼuiˬ, chi teˇ hpaˍ hta‸ vuiˬ peuˬ hkʼaw‸ nawˉ, Gʼuiˬsha ve bon yehˬ hkʼaw gʼa tuˉ tanˇ piˇ ve yoˬ.

18Leuˉ taˍ ve hpu shi teˇ hpaˍ hta‸ nawˬ ve Gʼuiˬsha a loˍ cawˇ ve hkʼe, nawˬ dawˇ nyi leh yehˇ hpeh‸ ve yoˬ.

19Nawˬ hta‸ piˇ taˍ peuˬ ve bon yehˬ hkʼaw yehˇ loˍ ve mawˇ teˇ hpaˍ Gʼuiˬsha hta‸ nawˬ gʼa piˇ ve yoˬ.

20Bon yehˬ awˬ pon yehˇ tuˬ loˍ sheˍ ve mawˇ cawˬ sheˍ ve kʼo, jawˇmawˇ ve shaˉ nanˉ lo ca yuˬ la hpeh‸ ve yoˬ.

21Ngaˬ, jawˇmawˇ lonˉ Aˍtaˍyeˍziˆ lehˬ, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo chehˇ taˍ ve mvuhˇmiˬ awˬ hoˉ awˬ naˬ teˇ hpaˍ hta‸ htawˇ, tawˇ chi hkʼe pe‸ laˇ ve yoˬ. Mvuhˇ naw Gʼuiˬsha ve awˬliˇtawˇhkawˇ shiˍ shehˍ hpaˇ Eˇzaˍraˆ nawˬ hui geh hkʼa lawˬ ve mawˇ hkʼa peu-eˬ hta‸ nawˬ hui gʼa ca piˇ ve yoˬ.

22Hpu 2,500 chawehˬ, caˬ hkʼa 650 hkʼawˍ lawˇ, a pehˉ meuˇ gʼuiˬ 600 gaˍlanˍ, shaˍlonˍ chu 600 gaˍlanˍ, leh aˉ leh‸ loˍ ve hkʼe gʼa ga piˇ ve yoˬ.

23Mvuhˇ naw Gʼuiˬsha lehˬ, ngaˬ awˬ to hta‸ maˇ kʼoˆ, ngaˬ hkʼaw‸ nawˉ jawˇmawˇ te tuˬ ve chaw teˇ hpaˍ hta‸ maˇ kʼoˆ, nyi ma maˇ gʼa zuhˆ tuˬ, bon yehˬ awˬ pon loˍ ve mawˇ hkʼa peu-eˬ hta‸ nawˬ hui hkʼa deh‸ gʼa ca piˇ ve yoˬ.

24Nawˬ hui lehˬ, paw hkuˇ, Leˍviˆ chaw, kʼa muiˬ hkawˇ kʼa ve chaw, bon yehˬ hta‸ shaw shehˍ hpaˇ leh, bon yehˬ hkʼaw kanˉ te paˍ teˇ hpaˍ geh awˬ hkawnˍ maˇ gʼa shaw.

25Eˇzaˍraˆ-oˬ, nawˬ lehˬ nawˬ ve Gʼuiˬsha nawˬ hta‸ piˇ laˇ taˍ ve cuˇ yiˍ hta‸ yehˇ leh, Uˉhpaˍ raˆ iˉ kaˆ lawˬ mvuhˇ nyi kʼehˬ hpawˇ lo hkʼa chehˇ taˍ ve nawˬ ve chaw teˇ hpaˍ hta‸ uˉ peunˍ tuˬ, awˬ hoˉ awˬ naˬ leh suhˉ jehˬ shehˍ hpaˇ teˇ hpaˍ hta‸ gʼa leuˆ yuˬ ve yoˬ. Gʼuiˬsha ve awˬliˇtawˇhkawˇ hta‸ maˇ shiˍ ve chaw hui hta‸ htawˇ nawˬ gʼa maˍ piˇ ve yoˬ.

26Gʼuiˬsha ve awˬliˇtawˇhkawˇ leh, mvuhˇmiˬ ve awˬ liˇ hta‸ maˇ na yuˬ ve chaw lehˬ, tiˇ pehˍ ve, maˇ heˆ kʼo gʼa‸ kʼoˬ ve, maˇ heˆ kʼo mawˇ jeˬ hta‸ hiˉ yuˬ ve, maˇ heˆ kʼo htawnˍ hkʼaw hpeh keu ve hta‸ gʼa hkanˍ tuˬ yoˬ, teh‸ li‸ bvuh‸ piˇ ve yoˬ.

27Oˇ htaˇ Eˇzaˍraˆ chi hkʼe kʼoˆ ve yoˬ. Ngaˬ hui ve awˬ puˍ awˬ pi hui ve Gʼuiˬsha hta‸ chiˇ mvuh-o. Yawˇ lehˬ bon yehˬ hta‸ taˍ uiˍ taˍ mvuh piˇ tuˬ, jawˇmawˇ lonˉ ve nyi ma hta‸ gu piˇ taˍ peuˬ.

28Gʼuiˬsha ve awˬ bon hta‸ pa taw, ngaˬ lehˬ jawˇmawˇ lonˉ awˬ to, yawˇ ve a ma‸ lonˉ teˇ hpaˍ, leh yawˇ ve ma‸ poˍ lonˉ teˇ hpaˍ nyi ma cawˇ ve chaw hpeh‸ la taˍ peuˬ. Gʼuiˬsha ngaˬ hta‸ ha‸ hanˉ ve nyi ma pe‸ laˇ leh, Iˉsaˍreˍlaˆ chaw awˬ hoˉ awˬ naˬ laiˉ gʼaˇ ve hta‸ ngaˬ shiˍ hkʼaw‸ veu laˇ gʼa taˍ peuˬ, teh‸ kʼoˆ ve yoˬ.

← Chapter 6 Jump to: Chapter 8 →