Ezra 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Ha pa suhˍ maˬ teˇ maˬ gaˬ la htaˇ, shu mvuhˇmiˬ lo kʼaw‸ la taˍ ve Iˉsaˍreˍlaˆ chaw hkʼa peu-eˬ a shu yawˇ ve chehˇ kuiˬ lo tu leh Yeˍruˆsaˍlehnˍ venˇ lo hpawnˬ laˬve yoˬ.

2Oˇ htaˇ, Yawˇzaˍdehˆ ve yaˇ Yawˇsuˆ leh awˬ nu ve paw hkuˇ teˇ hpaˍ, Saˍlaˍteˍlaˆ ve yaˇ Yeˍruˇbaˆbeˍlaˆ leh yawˇ ve awˬ ceuˬ awˬ hkʼaˇ teˇ hpaˍ lehˬ, Gʼuiˬsha ve chaw Moˉseˍ ve awˬliˇtawˇhkawˇ li‸ daw aw hkʼaw lo bvuh‸ taˍ ve hkʼe, Gʼuiˬsha hta‸ tuˉ tanˇ piˇ tuˬ ve tuˉ tanˇ kuiˬ hta‸ kʼaw‸ gu te ve yoˬ. Oˇ ve hkʼaw‸ nawˉ, yawˇ hui teˇ shawˉ teˇ hpeu‸ le, oˇ ve awˬ hkʼoˆ lo Gʼuiˬsha hta‸ tuˉ tanˇ piˇ ve yoˬ.

3Yawˇ hui lehˬ, mvuhˇmiˬ hkʼaw chehˇ taˍ ve awˬ nu ve chaw teˇ hpaˍ hta‸ kawˆ ve htawˇ, tuˉ tanˇ kuiˬ oˇ ve hta‸ kʼaw‸ gu te ve yoˬ. Oˇ ve hkʼaw‸ nawˉ, yawˇ hui teˇ shawˉ teˇ hpeu‸ le oˇ ve awˬ hkʼoˆ lo Gʼuiˬsha hta‸ tuˉ tanˇ piˇ ve yoˬ.

4Awˬliˇtawˇhkawˇ li‸ daw awˬ hkʼaw lo bvuh‸ taˍ ve hkʼe, yawˇ hui lehˬ aˉ po kʼo pawehˇ hta‸ htawˇ te leh, Gʼuiˬsha hta‸ tuˉ tanˇ piˇ ve yoˬ.

5Chi hkʼoˆ ka‸, yawˇ hui lehˬ te muiˬ te jaw ve tuˉ tanˇ tuˬ teˇ hpaˍ hta‸ tuˉ tanˇ leh, ha pa tawˬ htaˇ te ve pawehˇ te htaˇ htawˇ, Gʼuiˬsha hta‸ tuˉ tanˇ piˇ ve yoˬ. Gʼuiˬsha hta‸ oˉ kʼoˍ pui leh bon lawˬ ve hta‸ htawˇ kʼaw‸ te leh, Gʼuiˬsha hta‸ tanˇ piˇ tuˬ ve mawˇ teˇ hpaˍ htawˇ hkʼa deh‸ kʼaw‸ tanˇ piˇ ve yoˬ.

6Yawˇ hui lehˬ, bon yehˬhta‸ maˇ gʼa gu te sheˍ. Ya‸ hkʼaˇ, ha pa suhˍ maˬ teˇ maˬ awˬ hkuiˉ puiˍ teˇ nyi htaˇ, yawˇ hui Gʼuiˬsha hta‸ tuˉ tanˇ piˇ ve yoˬ.

7Yawˇ hui lehˬ, haˉ pui htawˆ paˍ leh la‸shaˉmaˉ teˇ hpaˍ hta‸ gʼaˇ hpfuhˇ piˇ tuˬ hpu tanˇ piˇ ve yoˬ. Chi hkʼoˆ ka‸, Leˍbaˍnonˍ hkʼaw hkʼoˆ lo cawˬ ve htawˇ cehˬ teˇ hpaˍ hta‸ pa yuˬ tuˬ, yawˇ hui ve caˇ tuˬ dawˬ tuˬ leh shaˍlonˍ chu teˇ hpaˍ hta‸Tuˇruˆ leh Siˉdonˍ venˇ lo feu piˇ ve yoˬ. Suhˆ oˇ ve teˇ hpaˍ lehˬ, laˇ tsuhˇ gʼuiˬ hta‸ hpanˍ leh Yuˇpeˍ venˇ lo gʼa yuˬ laˬ ve yoˬ. Chi hkʼe te tuˬ, Paˇshaˇ mvuhˇmiˬ hta‸ uˉ peunˍ chehˇ ve jawˇmawˇ Kuˇruˆ a hkaw-anˬ piˇ taˍ ve yoˬ.

8Hkʼe te leh, yawˇ hui Yeˍruˆsaˍlehnˍ venˇ lo kʼaw‸ gaˬ la peuˬ hkʼaw‸ nawˉ, nyiˇ hkʼaw‸ teˇ hkʼaw‸, ha pa nyiˇ maˬ teˇ maˬ gaˬ la htaˇ, yawˇ hui kanˉ tanˬ te ve yoˬ. Zeˍruˆbaˍbeˍlaˆ, Yawˇ suˆ, paw hkuˇ, Leˍviˆ chaw teˇ hpaˍ leh, shu mvuhˇmiˬ lo kʼaw‸ la taˍ ve chaw hkʼa peu-eˬ, kanˉ hpawnˬ te ve yoˬ. A sha‸ 20 hkʼaw‸ hpaˆ gaˬ peuˬ ve Leˍviˆ chaw hkʼa peu-eˬ ve hta‸ bon yehˬ hkʼaw kanˉ te tcuh ve yoˬ.

9Hkʼe te leh, Leˍviˆ chaw Yawˇsuˆ leh yawˇ ve awˬ ceuˬ awˬ hkʼaˇ teˇ hpaˍ maˇ kʼoˆ, Hawˇdaˍ viˆ awˬ ceuˬ awˬ hkʼaˇ Kaˍmeˍlaˆ leh yawˇ ve awˬ ceuˬ awˬ hkʼaˇ teˇ hpaˍ maˇ kʼoˆ, bon yehˬ hkʼaw kanˉ teˇ geh te ve yoˬ. (Yawˇ hui hta‸ Heˍnaˍdaˆ awˬ ceuˬ awˬ hkʼaˇ, Leˍviˆ chaw teˇ hpaˍ ga piˇ chehˇ ve yoˬ).

10Yawˇ hui bon yehˬ awˬ hkuiˉ puiˍ tanˬ kawˍ ve teˇ yanˇ, paw hkuˇ teˇ hpaˍ lehˬ a shu yawˇ ve behˬ heh ma hta‸ yuˬ leh huˉ taˍ ve yoˬ. Leˍviˆ chaw, Aˍsaˆ awˬ ceuˬ awˬ hkʼaˇ teˇ hpaˍ lehˬ, shehˍ hta‸ yuˬ leh huˉ taˍ ve yoˬ. Jawˇmawˇ Daˍviˆ awˬ hkʼaˇ gu taˍ ve hkʼe, yawˇ hui Gʼuiˬsha hta‸ chiˇ mvuh ve yoˬ.

11Yawˇ hui Gʼuiˬsha hta‸ chiˇ mvuh leh kʼoˆ ve, Gʼuiˬsha lehˬ da‸ jaˇ leh, yawˇ Iˉsaˍreˍlaˆ hta‸ ha‸ ve teˇ ceuˬ co co taiˍ taiˍ yeˬ chehˇ ve yoˬ, teh‸ kʼoˆ ve yoˬ. Bon yehˬ awˬ hkuiˉ puiˍ tanˬ kawˍ chehˇ ve pa taw, chaw yaˇ teˇ hpaˍ awˬ hkawˇ bvuhˬ chaweh kuˬ leh Gʼuiˬsha hta‸ chiˇ mvuh ve yoˬ.

12A sha‸ mawˇ la peuˬ ve paw hkuˇ, Leˍviˆ chaw leh awˬ hoˉ awˬ naˬ teˇ hpaˍ lehˬ, awˉ lawˉ peuˇ ve bon yehˬ teˇ maˬ hta‸ gʼa mawˬ jaw taˉ peuˬ ve yoˬ. Yawˇ hui lehˬ, bon yehˬ awˬ hkuiˉ puiˍ tanˬ kawˍ chehˇ ve hta‸ nyi taˍ leh gʼaˇ hte‸ hawˬ ve yoˬ Ya‸ hkʼaˇ, awˬ nu ve chaw teˇ hpaˍ ha lehˬ leh gʼaˇ hte‸ kuˬ chehˇ ve yoˬ.

13Ha lehˬ leh kuˬ chehˇ ve awˬ hkawˇ leh, kuˬ hawˬ chehˇ ve awˬ hkawˇ hta‸ chaw teˇ gʼaˇ ka‸ ca pehˬ da‸ maˇ gʼa. Awˬ lawn kʼo, yawˇ hui kuˬ chehˇ ve awˬ hkawˇ hta‸ vuiˇ kuiˬ lo ka‸ gʼa kaˇ ve yoˬ.

← Chapter 2 Jump to: Chapter 4 →