Ezra 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Kanˉ chi hkʼa peu-eˬ hta‸ te peuˬ ve teˇ yanˇ, Iˉsaˍreˍlaˆ chaw awˬ hoˉ awˬ naˬ teˇ hpaˍ ngaˬ geh laˬ leh, Iˉsaˍreˍlaˆ chaw, paw hkuˇ, leh Leˍviˆ chaw hui lehˬ, Hkaˍnaˍniˆ chaw, Aˍmawˇ niˆ chaw, Mawˇbaˆ chaw, Eˇjiˇtu‸ chaw, Hiˆtiˆ chaw, Hpeˍraˍziˆ chaw, Yeˍbuˇsiˆ chaw leh Aˍmawˇriˆ chaw hui hta‸ awˬ chawˇ te da‸ chehˇ ve awˬ lawn ngaˬ hta‸ kʼoˆ laˇ ve yoˬ.

2Yuˇda‸ chaw teˇ hpaˍ lehˬ, buiˇshaˆaˉnaˆ chaw hui hta‸ heuˆ da‸ chehˇ ve pa taw, Gʼuiˬsha ve da‸ kehˬ ve chaw teˇ hpaˍ cha‸ chiˆ kʼai chehˇ ve yoˬ. Mvuhˇmiˬ hpawˇ kanˉ te chehˇ ve awˬ hoˉ awˬ naˬ teˇ hpaˍ lehˬ, shu a‸ kehˉ cha‸ chiˆ ve chaw hpeh‸ chehˇ ve yoˬ.

3Awˬ lawn chi hta‸ ngaˬ gʼa kaˇ ve teˇ yanˇ, ngaˬ lehˬ dawˇ haˍ jaˇ ve hkʼaw, ngaˬ ve veu‸ kʼaˇ hta‸ tzuh‸ suhˍ leh, ngaˬ ve uˉ hkeh mvuh leh paˇ tcuhˆ hta‸ htawˇ chiˇ baˬ peuˬ hkʼaw‸ nawˉ, jo mui taˍ ve yoˬ.

4Mvuhˇ hpeu‸ hpawˇ tuˉ tanˇ ve awˬ yanˇ gaˬ htaˇ hkʼa gaˬ, ngaˬ jo mui taˍ ve yoˬ. Oˇ htaˇ, venˇbaˆ chi hta‸ pa taw Iˉsaˍreˍlaˆ ve Gʼuiˬsha hta‸ kawˆ ve chaw hkʼa peu-eˬ ngaˬ geh hpawnˬ laˬ ve yoˬ.

5Mvuhˇ hpeu‸ hpawˇ tuˉ tanˇ ve awˬ yanˇ gaˬ la htaˇ, ngaˬ ve la‸ sheh che leh, ngaˬ ve Jawˇmawˇ Gʼuiˬsha geh bon chi hkʼe lawˬ ve yoˬ.

6Gʼuiˬsha-oˬ, nawˬ mehˆ gʼuˇ suhˍ lo ngaˬ ve oˉ kʼoˍ chiˇ tuˬ, ngaˬ ya‸ taw jaˇ ve yoˬ. Ngaˬ hui ve venˇbaˆ teˇ hpaˍ lehˬ, ngaˬ hui ve oˉ kʼoˍ a‸ kehˉ mvuh jaˇ leh, mvuhˇ naw ma hkʼa shuˍ mvuh jaˇ peuˬ.

7Ngaˬ hui ve awˬ puˍ awˬ pi lonˉ teˇ hpaˍ hta‸ te leh ya‸ nyi hkʼa gaˬ, nawˬ ve chaw teˇ hpaˍ lehˬ, venˇbaˆ hta‸ tiˉ te chehˇ taˍ ve yoˬ. Ngaˬ hui chi hkʼe venˇbaˆ hta‸ ceh tiˉ te chehˇ ve pa taw, ngaˬ hui teˇ hpaˍ, ngaˬ hui ve jawˇmawˇ teˇ hpaˍ, leh ngaˬ hui ve paw hkuˇ teˇ hpaˍ lehˬ, shu ve la‸ sheh hkʼaw lo gʼa gaˬ leh, ya‸ nyi ngaˬ hui hpeh‸ chehˇ ve hkʼe, shu te luˬ te sheˆ laˇ ve leh shu ve mvuhˇmiˬ lo shiˍ kʼai laˇ ve hta‸ gʼa hkanˍ chehˇ ve yoˬ. Ngaˬ hui ve awˬ me‸ awˬ hponˇ htawˇ luˬ kʼai peuˬ.

8Ngaˬ hui ve Gʼuiˬsha-oˬ, chi beu‸ teˇ hkui teˇ yanˇ nawˬ lehˬ ngaˬ hui hta‸ ha kʼaˉ laˇ leh, da‸ kehˬ ve chehˇ kuiˬ chi ve hkʼaw chehˇ tcuh laˇ tuˬ, ngaˬ hui hta‸ ponˬ laˇ taˍ ve yoˬ. Shu ve awˬ ceˬ te chehˇ taˍ kuiˬ lo nawˬ ngaˬ hui hta ponˬ laˇ leh, ngaˬ hui hta‸ a sha‸ te‸ ve awˬ suhˉ teˇ ceuˬ kʼaw‸ piˇ laˇ taˍ ve yoˬ.

9Ngaˬ hui lehˬ, shu ve awˬ ceˬ hpeh‸ ve yoˬ. Ya‸ hkʼaˇ, nawˬ ngaˬ hui hta‸ maˇ chiˇ baˬ taˉ laˇ. Nawˬ lehˬ Paˇshaˇ mvuhˇmiˬ ve jawˇmawˇ lonˉ ngaˬ hui hta‸ nyi ma cawˇ tuˬ te piˇ leh, luˬ kʼai sheˆ kʼai taˍ peuˬ ve nawˬ ve bon yehˬ hta‸ kʼaw‸ gu te tuˬ, yawˇ ngaˬ hui hta‸ a hkaw-anˬ pe‸ laˇ taˍ peuˬ ve yoˬ.

10Ya‸ hkʼaˇ Gʼuiˬsha-oˬ, hpeh‸ la taˍ peuˬ ve awˬ ceuˬ chi teˇ hpaˍ hta‸ ngaˬ hui hkʼaˬ hkʼe gʼa kʼaw‸ kʼoˆ tuˬ ve le.

11Ngaˬ hui lehˬ, nawˬ ve awˬ ceˬ tcuh kaˍ paˍ teˇ hpaˍ hta‸ cuˇ leh, nawˬ ngaˬ hui hta‸ pe‸ laˇ taˍ peuˬ ve awˬliˇtawˇhkawˇ teˇ hpaˍ hta‸ ponˬ peuˉ kʼai peuˬ ve yoˬ. Ngaˬ hui ca chehˇ tuˬ ve mvuhˇmiˬ lehˬ, maˇ da‸ maˇ kehˬ leh oˇ kaˬ lo chehˇ taˍ ve chaw teˇ hpaˍ htawˇ cha‸ chiˆ ve kanˉ hta‸ ceh tiˉ te chehˇ ve yoˬ, teh‸ yawˇ hui ngaˬ hta‸ kʼoˆ maˍ laˇ taˍ peuˬ.

12Chi hkʼoˆ ka‸, ngaˬ hui lehˬ ha lehˬ ha kʼa chehˇ gaˇ leh, ngaˬ hui ve awˬ ceuˬ awˬ hkʼaˇ teˇ hpaˍ hta‸ htawˇ oˇ hkʼe hpeh‸ tcuh piˇ gaˇ ve kʼo, chaw oˇ ve teˇ hpaˍ hta‸ maˇ gʼa heuˆ tuˬ, yawˇ hui ngaˬ hui hta‸ kʼoˆ laˇ taˍ peuˬ ve yoˬ.

13Ngaˬ hui te ya‸ ve venˇbaˆ teˇ hpaˍ awˬ pon, nawˬ ngaˬ hui hta‸ ciˍ yanˍ laˇ peuˬ hkʼaw‸ nawˉ, nawˬ ngaˬ hui hta‸ ciˍ yanˍ laˇ chehˇ ve hta‸ ngaˬ hui shiˍ la ve yoˬ. Ngaˬ hui te taˍ peuˬ ve kanˉ hta‸ shawˍ nyi ve kʼo, nawˬ ngaˬ hui hta‸ ciˍ yanˍ laˇ ve lehˬ i jaˇ sheˍ ve awˬ hkʼoˆ, nawˬ ngaˬ hui hta‸ kʼaw‸ caˉ leh a sha‸ te‸ chehˇ tcuh laˇ sheˍ ve yoˬ.

14Oˇ hkʼe hpeh‸ ve pa taw, hkʼaˬ hkʼe te leh ngaˬ hui nawˬ ve awˬliˇtawˇhkawˇ teˇ hpaˍ hta‸ ponˬ leuˉ leh, haiˬ ve chaw oˇ ve teˇ hpaˍ hta‸ heuˆ da‸ hpeh‸ tuˬ ve le. Ngaˬ hui oˇ hkʼe kʼaw‸ te ve kʼo, nawˬ ngaˬ hui hta‸ nyi ma zuhˆ jaˇ leh, ngaˬ hui hkʼa peu-eˬ ve hta‸ te luˬ te sheˆ laˇ tuˬ ve yoˬ. Ngaˬ hui teˇ gʼaˇ ka‸ gʼa ponˬ tuˬ ve maˇ heˆ.

15Iˉsaˍreˍlaˆ ve jawˇmawˇ Gʼuiˬsha-oˬ, nawˬ lehˬ hteˇ ve cawˇ ve Gʼuiˬsha hpeh‸ ve yoˬ. Ya‸ hkʼaˇ, nawˬ ngaˬ hui hta‸ ponˬ laˇ taˍ ve yoˬ. Ngaˬ hui ve venˇbaˆ teˇ hpaˍ nawˬ hta‸ hpeu‸ maˍ laˇ ve yoˬ. Ngaˬ hui lehˬ, nawˬ mehˆ gʼuˇ suhˍ lo laˬ maˇ keunˍ ve chaw teˇ hpaˍ hpeh‸ ve yoˬ, teh‸ kʼoˆ ve yoˬ.

← Chapter 8 Jump to: Chapter 10 →