Ezra 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Oˇ htaˇ tcuh kaˍ paˍ Haˆgehˇ leh Iˉdoˍ ve yaˇ Zaˍhkaˍriˆ hui lehˬ, Yeˍruˆsaˍlehnˍ leh Yuˇda‸ mvuhˇmiˬ hkʼaw chehˇ ve Yuˇda‸ chaw teˇ hpaˍ hta‸ Gʼuiˬsha kʼoˆ ve tawˇ teˇ hpaˍ hto piˇ ve yoˬ.

2Shaˍteˍ laˆ ve yaˇ Zeˍruˆbaˍbeˍlaˆ leh Yawˇzaˍdehˆ ve yaˇ Yawˇsuˆ hui tawˇ oˇ ve teˇ hpaˍ hta‸ gʼa kaˇ ve teˇ yanˇ, yawˇ hui Gʼuiˬsha ve bon yehˬ hta‸ kʼaw‸ gu te ve yoˬ. Tcuh kaˍ paˍ oˇ ve nyiˇ gʼaˇ htawˇ yawˇ hui hta‸ ga piˇ ve yoˬ.

3Oˇ htaˇ, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ lo cawˬ ve mvuhˇmiˬ hta‸ uˉ peunˍ chehˇ ve jawˇmawˇ Taˍtaˍnehˇ, Sheˍtaˍbawˇzaˍnehˇ leh awˬ nu ve chaw uiˍ teˇ hpaˍ Yeˍruˆsaˍlehnˍ venˇ lo laˬ leh, Bon yehˬ hta‸ kʼaw‸ gu te tuˬ, a shu nawˬ hui hta‸ a hkaw-anˬ pe‸ laˇ ve le, teh‸ yawˇ hui hta‸ na nyi ve yoˬ.

4Yawˇ hui lehˬ, bon yehˬ hta‸ gu te chehˇ ve chaw hui ve awˬ meh hta‸ htawˇ bvuh‸ yuˬ ve yoˬ.

5Ya‸ hkʼaˇ, Gʼuiˬsha lehˬ Yuˇda‸ chaw awˬ hoˉ awˬ naˬ teˇ hpaˍ hta‸ ha‸ shaˉ piˇ chehˇ ve yoˬ. Mvuhˇmiˬ hta‸ uˉ peunˍ chehˇ ve jawˇmawˇ oˇ ve teˇ hpaˍ lehˬ, jawˇmawˇ Daˍriˆ geh li‸ bvuh feu leh, jawˇmawˇ ve li‸ maˇ kʼaw‸ gaˬ la sheˍ ve ceh ceh, ta‸ iˉ chehˇ taˍ sheˍ ve yoˬ.

6Hkʼe te leh, yawˇ hui jawˇmawˇ hta‸ li‸ chi hkʼe bvuh‸ feu piˇ ve yoˬ.

7Jawˇmawˇ Daˍriˆ-oˬ, nawˬ lehˬ gawˬ lehˍ ve hkʼaw mvuhˇmiˬ hta‸ gʼa uˉ peunˍ chehˇ piˇ-oˆ.

8Ngaˬ hui Yuˇda‸ mvuhˇmiˬ lo kʼai leh ca nyi ve teˇ yanˇ, Yuˇda‸ chaw teˇ hpa lehˬ, uiˍ jaˇ mvuh jaˇ ve Gʼuiˬsha ve bon yehˬ hta‸ kʼaw‸ gu te chehˇ taˍ ve hta‸ gʼa mawˬ ve yoˬ. Yawˇ hui lehˬ, haˉ pui shiˍ teˇ hpaˍ hta‸ kawˍ leh, awˬ hkʼoˆ lo toˉ la‸ lonˉ teˇ hpaˍ keu chehˇ taˍ ve yoˬ. Yawˇ hui kanˉ hkʼa deh‸ te chehˇ leh, awˬ meu-eˇ awˬ meu-eˇ peuˬ la chehˇ ve yoˬ.

9Hkʼe te leh, ngaˬ hui lehˬ Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸, a shu yawˇ hui hta‸ a hkaw-anˬ pe‸ laˇ leh bon yehˬ hta‸ kʼaw‸ gu te chehˇ ve aw lawn na nyi ve yoˬ.

10Kanˉ chi hta‸ awˬ hoˉ te leh sheh kʼai piˇ chehˇ ve chaw teˇ hpaˍ ve awˬ meh hta‸ htawˇ ngaˬ hui nawˬ hta‸ hto laˇ hpeh‸ tuˬ, bvuh‸ yuˬ taˍ ve yoˬ. Yawˇ hui chi hkʼe kʼoˆ ve yoˬ.

11Ngaˬ hui lehˬ, miˬguiˬ mvuhˇ naw Gʼuiˬsha ve awˬ ceˬ hpeh‸ ve yoˬ. Hkʼe te leh, ngaˬ hui lehˬ aˬ sho-eˬ kanˇ paˆ uiˍ ve Iˉsaˍreˍlaˆ jawˇmawˇ teˇ gʼaˇ te taˉ ve bon yehˬ chi hta‸ kʼaw‸ gu te chehˇ ve yoˬ.

12Ngaˬ hui ve awˬ puˍ awˬ pi teˇ hpaˍ lehˬ, mvuhˇ naw Gʼuiˬsha hta‸ nyi ma zuhˆ tuˬ te piˇ ve pa taw, yawˇ lehˬ Baˍbuˍlonˍ jawˇmawˇ Neˍbuˍhkaˍneˍzaˍ hta‸ cuˇ leh yawˇ hui hta‸ te luˬ te sheˆ piˇ ve yoˬ. Yawˇ lehˬ, bon yehˬ chi hta‸ htawˇ te luˬ piˇ leh, yawˇ hui hta‸ Baˍbuˍlonˍ mvuhˇmiˬ lo shiˍ kʼai piˇ ve yoˬ.

13Oˇ ve hkʼaw‸ nawˉ, Baˍbuˍlonˍ mvuhˇmiˬ hta‸ jawˇmawˇ Kuˇruˆ kʼaw‸ uˉ peunˍ ve teˇ yanˇ, yawˇ lehˬ bon yehˬ chi hta‸ kʼaw‸ gu te tuˬ a hkaw-anˬ pe‸ laˇ ve yoˬ.

14Yawˇ lehˬ, Neˍbuˍhkaˍneˍzaˍ Yeˍruˆsaˍlehnˍ venˇ hkʼaw yuˬ kʼai taˍ ve hpu, shi, leh bon yehˬ hkʼaw yehˇ tuˬ ve mawˇ hkʼa peu-eˬ hta‸ htawˇ kʼaw‸ hkʼaw‸ laˇ ve yoˬ. Mawˇ Chi hkʼa peu-eˬ Yuˇda‸ mvuhˇmiˬ hta‸ uˉ peunˍ chehˇ ve jawˇmawˇ Sheˍshaˍbaˍzaˍ hta‸ chiˇ a‸ piˇ ve yoˬ.

15Jawˇmawˇ lehˬ, mawˇ oˇ ve teˇ hpaˍ hta‸ Yeˍruˆsaˍlehnˍ venˇ lo yuˬ kʼo‸-e tcuh leh, bon yehˬ chi hta‸ ca kʼaw‸ gu te tcuh taˍ ve yoˬ.

16Hkʼe te leh, jawˇmawˇ Sheˍshaˍbaˍzaˍ awˬ to Yeˍruˆsaˍlehnˍ venˇ lo laˬ leh, bon yehˬ awˬ hkuiˉ puiˍ tanˬ kawˍ ve yoˬ. Oˇ ve teˇ nyi hta‸ te leh, bon yehˬ chi hta‸ kʼaw‸ gu te laˬ taˍ ve yoˬ. Ya‸ hkʼaˇ, gu maˇ peuˬ sheˍ teh‸ kʼoˆ ve yoˬ.

17Jawˇmawˇ-oˬ, nawˬ nyi ma cawˇ ve kʼo, jawˇmawˇ Kuˇruˆ awˬ tehˬ awˬ na chi hkʼe te tcuh taˍ ve hta‸ gʼa shiˍ tuˬ, Baˍbuˍlonˍ mvuhˇmiˬ hkʼaw cawˬ ve caˇ lanˇ teˇ hpaˍ hta‸ gʼa‸ chaˬ nyi tcuh-o. Peuˬ hkʼaw‸ nawˉ, nawˬ hkʼaˬ hkʼe kʼaw‸ te tcuh gaˇ ve ngaˬ hui hta‸ kʼaw‸ hto laˇ sheˍ, teh‸ li‸ bvuh‸ piˇ ve yoˬ.

← Chapter 4 Jump to: Chapter 6 →