Ezra 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Jawˇmawˇ lonˉ Aˍtaˍyeˍziˆ mvuhˇmiˬ hta‸ uˉ peunˍ chehˇ ve awˬ yanˇ awˬ hkʼaw lo, Eˇzaˍraˆ geh teˇ geh Yeˍruˆsaˍlehnˍ venˇ lo kʼaw‸ la taˍ ve Iˉsaˍreˍlaˆ chaw awˬ hoˉ awˬ naˬ teˇ hpaˍ lehˬ,

2Hpiˇneˍhaˆ awˬ ceuˬ awˬ hkʼaˇ Geˍraˍsonˍ, Iˉtaˍmaˍ awˬ ceuˬ awˬ hkʼaˇ Daˍyeˍlaˆ, Daˍviˆ awˬ ceuˬ awˬ hkʼaˇ Sheˍhkaˍniˆ ve yaˇ Yaˍtoˆ, Paˍroˆ awˬ ceuˬ awˬ hkʼaˇ Zaˍhkaˍriˆ, leh yawˇ ve chaw 150 gʼaˇ,

3Paˍhaˆmawˇbaˆ awˬ ceuˬ awˬ hkʼaˇ Zeˍraˍhiˆ ve yaˇ Eˇlawˇnehˇ leh yawˇ ve chaw 200 gʼaˇ, Zaˍtoˆ awˬ ceuˬ awˬ hkʼaˇ Yaˍhaˍzeˍlaˆ ve ya Sheˍhkaˍriˆ leh yawˇ ve chaw 300 gʼaˇ, Aˍdenˍ awˬ ceuˬ awˬ hkʼaˇ Yawˉnaˆtanˬ ve yaˇ Eˇbehˆ leh yawˇ ve chaw 50 gʼaˇ, Eˇlanˍ awˬ ceuˬ awˬ hkʼaˇ Aˍtaˍliˆ ve yaˇ Yeˍshaˍyaˆ leh yawˇ ve chaw 70 gʼaˇ, Sheˍhpaˍtiˆ awˬ ceuˬ awˬ hkʼaˇ Miˆhkeˍlaˆ ve yaˇ Zeˍbaˍdiˆ leh yawˇ ve chaw 80 gʼaˇ, Yaˍ baˆ awˬ ceuˬ awˬ hkʼaˇ Yaˍheˍlaˆ ve yaˇ Awˇbaˍdiˆ leh yawˇ ve chaw 218 gʼaˇ, Baˍniˆ awˬ ceuˬ awˬ hkʼaˇ Yawˇsiˍhpiˆ ve yaˇ Sheˍlawˇmiˆ leh yawˇ ve chaw 160 gʼaˇ, Beˍbehˇ awˬ ceuˬ awˬ hkʼaˇ Zaˍhkaˍriˆ leh yawˇ ve chaw 28 gʼaˇ, Aˍzaˍgaˆ ve awˬ ceuˬ awˬ hkʼaˇ Kaˍkaˍtanˍ ve yaˇ Yawˇhaˍnanˍ leh yawˇ ve chaw 110 gʼaˇ, Aˍdawˇniˆkanˍ awˬ ceuˬ awˬ hkʼaˇ Eˇliˆhpeˍlehˆ, Yo-eˍlaˆ, Shaˍmaˍyaˆ leh yawˇ hui ve awˬ ceuˬ awˬ hkʼaˇ 60 gʼaˇ, (yawˇ hui lehˬ, awˬ hkʼaw‸ nawˉ heh‸ kʼaw‸ la ve yoˬ) Biˇgaˍveˍ awˬ ceuˬ awˬ hkʼaˇ Zaˍkuˇtaˆ, Uˇtehˇ leh yawˇ hui ve chaw 70 gʼaˇ hpeh‸ve yoˬ.

15Ngaˬ lehˬ Iˉsaˍreˍlaˆ chaw hkʼa peu-eˬ hta‸ Aˍvaˍhaˍ venˇ lo duˇ keu taˍ ve iˉ kaˆ gʼuiˬ hkʼaˇ paˇ lo kuˬ hpawnˬ leh oˇ kaˬ lo 3 nyi chehˇ taˍ ve yoˬ. Oˇ kaˬ lo paw hkuˇ te hpaˍ hta‸ ngaˬ gʼa mawˬ ve htawˇ, Leˍviˆ chaw teˇ gʼaˇ hta‸ ka‸ maˇ gʼa mawˬ.

16Hkʼe te leh, ngaˬ lehˬ Iˉsaˍreˍlaˆ chaw awˬ hoˉ awˬ naˬ hpeh‸ ve Eˇlaˍzaˍ Aˍreˍlaˆ, Sheˍmaˍ yaˆ, Eˇlaˆnaˍtanˍ, Yaˍrehˆ, Eˇlaˆnaˍtanˍ, Maˍtanˍ, Zaˍhkaˍriˆ, Meˍshuˆlanˍ, chaw chi ve kʼawˇ gʼaˇ leh, saˍla‸ Yawˇyaˍreˆ leh saˍla‸ Eˇlaˆnaˍtanˍ hui hta‸ kuˬ yuˬve yoˬ.

17Ngaˬ yawˇ hui hta‸ Kaˍsiˍhpoˆ venˇ hkʼaw chehˇ ve awˬ hoˉ lonˉ Iˉdoˍ geh kʼai tcuh leh, Gʼuiˬsha ve bon yehˬ hkʼaw kanˉ te paˍ peu laˇ tuˬ ca kʼoˆ piˇ tcuh ve yoˬ.

18Gʼuiˬsha bon hta‸ pa taw, yawˇ lehˬ kanˉ te puiˉ jaˇ ve Maˍhaˍliˆ awˬ ceuˬ awˬ hkʼaˇ Leˍviˆ chaw Sheˍraˍbiˆ leh yawˇ ve awˬ ceuˬ awˬ hkʼaˇ teˇ chi hiˉ gʼaˇ hta‸ peu laˇ ve yoˬ.

19Chi hkʼoˆ ka‸ yawˇ lehˬ, Meˍraˍriˆ awˬ ceuˬ awˬ hkʼaˇ Haˍshaˍbiˆ, Yeˍshaˍyaˆ leh yawˇ hui ve awˬ viˉ awˬ nyi nyiˇ chi gʼaˇ hta‸ htawˇ peu laˇ ve yoˬ.

20Hkʼe te leh, jawˇmawˇ Daˍviˆ awˬ hkʼaˇ gu taˍ ve hkʼe, Leˍviˆ chaw hui hta‸ ga piˇ tuˬ, bon yehˬ hkʼaw kanˉ te paˍ 220 gʼaˇ cawˬ la ve yoˬ. Yawˇ hui ve awˬ meh hta‸ htawˇ hkʼa deh‸ bvuh‸ yuˬ taˍ ve yoˬ.

21Ngaˬ lehˬ oˇ kaˬ Aˍhaˍvaˍ iˉ kaˆ gʼuiˬ hkʼaˇ paˇ lo chehˇ taˍ leh, Ngaˬ hui hkʼa peu-eˬ leh ngaˬ hui ve mawˇ jeˬ teˇ hpaˍ hta‸ Gʼuiˬsha ha‸ shaˉ laˇ tuˬ, caˇ tuˬ ce leh bon lawˬ-o‸, teh‸ yawˇ hui hta‸ kʼoˆ piˇ ve yoˬ.

22Ngaˬ Yeˍruˆsaˍlehnˍ venˇ lo kʼaw‸ la chehˇ htaˇ, ya‸ kʼaw kʼaˉ lo ngaˬ hui hta‸ ha‸ shaˉ laˇ tuˬ, jawˇmawˇ lonˉ geh ma‸ yaˇ teˇ moˍ ca lawˬ veu laˇ ve hkʼe kʼo, gʼa ya‸ taw jaˇ tuˬ yoˬ. Ngaˬ hui ve Gʼuiˬsha lehˬ, yawˇ hta‸ gʼaˇ va ve chaw hui hta‸ ha‸ shaˉ piˇ leh, yawˇ hta‸ hpfuhˆ ve chaw hui hta‸ ciˍ yanˍ piˇ tuˬ yoˬ.

23Hkʼe te leh, ngaˬ hui caˇ tuˬ ce leh, Gʼuiˬsha ha‸ shaˉ laˇ tuˬ bon lawˬ ve yoˬ. Yawˇ lehˬ ngaˬ hui ve bon lawˬ hkawˇ hta‸ na yuˬ ve yoˬ.

24Ngaˬ lehˬ paw hkuˇ Sheˍraˍbiˆ, Haˍshaˍbiˆ, leh awˬ nu ve paw hkuˇ teˇ chi gʼaˇ hta‸ leuˆ yuˬ ve yoˬ.

25Peuˬ hkʼaw‸ nawˉ, jawˇmawˇ lonˉ awˬ to, yawˇ ve a ma‸ lonˉ teˇ hpaˍ leh Iˉsaˍreˍlaˆ chaw hui tanˇ feu laˇ taˍ ve hpu shi leh awˬ nu ve mawˇ teˇ hpaˍ hta‸ ngaˬ tsuh nyi leh, paw hkuˇ teˇ hpaˍ hta‸ chiˇ a‸ piˇ ve yoˬ.

26Ngaˬ yawˇ hui hta‸ chiˇ a‸ piˇ ve mawˇ teˇ hpaˍ lehˬ, hpu - 14,050 cawehˬ, hpu kawˆ - 100 maˬ, shi - 1,468 cawehˬ, shi kawˆ - 20 maˬ, kuiˇ te taˍ ve hkehˇ pe le 2 maˬ yoˬ.

28Ngaˬ yawˇ hui hta‸ chi hkʼe kʼoˆ piˇ ve, Nawˬ hui lehˬ, nawˬ hui ve awˬ puˍ awˬ pi teˇ hpaˍ ve Gʼuiˬsha awˬ pon da‸ kehˬ ve chaw teˇ hpaˍ hpeh‸ ve yoˬ. Chi hkʼa shuˍ, tanˇ taˍ ve mawˇ chi teˇ hpaˍ htawˇ da‸ kehˬ ve mawˇ hpeh‸ ve yoˬ.

29Nawˬ hui bon yehˬ lo gaˬ htaˇ hkʼa gaˬ, mawˇ chi teˇ hpaˍ hta‸ hkʼa deh‸ ha‸ shaˉ taˍ-o‸. Oˇ kaˬ paw hkuˇ hui ve bawehˇ lo gaˬ htaˇ, nawˬ hui mawˇ chi teˇ hpaˍ hta‸ teˇ pawˆ kʼaw‸ tsuh nyi leh, paw hkuˇ, Leˍviˆ chaw leh Iˉsaˍreˍlaˆ awˬ hoˉ awˬ naˬ hui hta‸ kʼaw‸ chiˇ a‸ piˇ-oˆ, teh‸ yawˇ hui hta‸ kʼoˆ piˇ ve yoˬ.

30Hkʼe te leh, paw hkuˇ leh Leˍviˆ chaw oˇ ve teˇ hpaˍ lehˬ, Yeˍruˆsaˍlehnˍ bon yehˬ lo yuˬ kʼai tuˬve hpu shi leh hkehˇ oˇ ve teˇ hpaˍ hta‸ hkʼa deh‸ ha‸ shaˉ taˍ ve yoˬ.

31Ha pa awˉ lawˉ peuˇ teˇ maˬ teˇ chi nyiˇ nyi teˇ nyi htaˇ, ngaˬ hui Aˍhaˍvaˍ iˉ kaˆ gʼuiˬ hkʼaˇ lo tu leh Yeˍruˆsaˍlehnˍ venˇ lo kʼo‸-e ve yoˬ. Gʼuiˬsha lehˬ ngaˬ hui hta‸ ha‸ shaˉ taˍleh, canˇ paˍ teˇ hpaˍ ve la‸ sheh hkʼaw ponˬ laˇ ve yoˬ.

32Yeˍruˆsaˍlehnˍ venˇ lo kʼaw‸ gaˬ la htaˇ, ngaˬ hui shehˆ nyi hkʼa gaˬ jehˇ chehˇ taˍ ve yoˬ.

33Oˇ ve hkʼaw‸ nawˉ, 4 nyi teˇ nyi htaˇ ngaˬ hui bon yehˬ lo kʼai leh, hpu shi leh awˬ nu ve mawˇ teˇ hpaˍ hta‸ hkʼa deh‸ kʼaw‸ tsuh nyi peuˬ hkʼaw‸ nawˉ, Uˇriˇya‸ ve yaˇ paw hkuˇ lonˉ Meˍraˍmoˆ hta‸ chiˇ a‸ piˇ ve yoˬ. Yaw geh lo Hpiˇnaˍhaˆ ve yaˇ Eˇlaˍsaˍ leh Leˍviˆ chaw Yawˇsuˆ ve yaˇ Yawˇzaˍbaˆ leh Biˇniˍ ve yaˇ Nawˇdiˆ hui chehˇ taˍ ve yoˬ

34Mawˇ teˇ ceuˬ le le ve hta‸ hkʼa deh‸ gʼaw nyi leh tsuh nyi peu hkʼaw‸ nawˉ, caˇ lanˇ hkʼa deh‸ te taˍ ve yoˬ.

35Oˇ hkʼe te peuˬ hkʼaw‸ nawˉ, shu mvuhˇmiˬ lo kʼaw‸ la taˍ ve chaw hkʼa peu-eˬ, Iˉsaˍreˍlaˆ ve Gʼuiˬsha hta‸ tuˉ tanˇ piˇ ve yoˬ. Yawˇ hui lehˬ Iˉsaˍreˍlaˆ chaw hkʼa peu-eˬ awˬ pon, yawˬ paˍ lonˉ 96 hkeh, yawˬ ehˉ 70 hkeh, leh aˉ che‸ 12 hkeh tuˉ tanˇ piˇ ve yoˬ.

36Oˇ ve hkʼaw‸ nawˉ, yawˇ hui lehˬ jawˇmawˇ lonˉ bvuh‸ taˍ ve li‸ hta‸ yuˬ tawˆ leh, Uˉhpaˍraˆ iˉ kaˆ lawˬ mvuhˇ nyi kʼehˬ hpawˇ teˇ tawn hta‸ uˉ peunˍ chehˇ ve jawˇmawˇ leh awˬ hoˉ awˬ naˬ teˇ hpaˍ hta‸ piˇ ve yoˬ. Hkʼe te leh, yawˇ hui lehˬ bon yehˬ gu te tuˬ loˍ ve mawˇ teˇ hpaˍ hkʼa deh‸ ga laˇ ve yoˬ.

← Chapter 7 Jump to: Chapter 9 →