Ezra 10

Lahu Bible Edited © Thailand Bible Society and Bible Society of Myanmar, 2010, 2020.

← Chapter 9 Jump to:

1Eˇzaˍraˆ bon yehˬ gʼuˇ suhˍ lo venˇbaˆ oˇ ve teˇ hpaˍ hta‸ hpeu‸ maˍ leh hawˬ chehˇ ve teˇ yanˇ, Iˉsaˍreˍlaˆ chaw hawˉ hkʼaˆ, yaˇ miˇ leh yaˇ ehˉ teˇ hpaˍ, yawˇ paˇ lo hpoˆ chehˇ taˍ ve yoˬ.

2Oˇ htaˇ, Eˇlanˍ awˬ ceuˬ awˬ hkʼaˇ Yeˍheˍlaˆ ve yaˇ Sheˍhkaˍniˆ Eˇzaˍraˆ hta‸ chi hkʼe kʼoˆ piˇ ve yoˬ. Ngaˬ hui lehˬ, buiˇshaˆaˉnaˆ chaw teˇ hpaˍ hta‸ heuˆ leh Gʼuiˬsha hta‸ te ya‸ jaˇ peuˬ. Ya‸ hkʼaˇ, Iˉsaˍreˍlaˆ chaw awˬ pon dawˇ law kuiˬ a ciˉ cawˬ sheˍ.

3Chi hta‸ pa taw, yaˇ miˇ oˇ ve teˇ hpaˍ leh, yawˇ hui ve yaˇ teˇ hpaˍ hta‸ ngaˬ hui gʼa‸ kʼoˬ piˇ tuˬ yoˬ, teh‸ Gʼuiˬsha mehˆ gʼuˇ suhˍ ka ti‸ te cawˇ ve yoˬ. Nawˬ awˬ to leh, Gʼuiˬsha ve awˬliˇtawˇhkawˇ hta‸ na yuˬ chehˇ ve chaw teˇ hpaˍ kʼoˆ laˇ ve hkʼe, ngaˬ hui na yuˬ leh te tuˬ yoˬ. Gʼuiˬsha ve awˬliˇtawˇhkawˇ hkʼaw kʼoˆ taˍ ve hkʼe, ngaˬ hui te tuˬ yoˬ.

4Chi hkʼe te tuˬ nawˬ ve kanˉ hpeh‸ ve yoˬ. Ngaˬ hui lehˬ nawˬ hkʼaw‸ nawˉ paˉ lo chehˇ taˍ ve yoˬ. Chi beu tu te loˬ, teh‸ yawˇ hta‸ kʼoˆ piˇ ve yoˬ.

5Oˇ htaˇ, Eˇzaˍraˆ lehˬ Sheˍhkaˍniˆ kʼoˆ ve hkʼe te tuˬ, paw hkuˇ teˇ hpaˍ, Leˍviˆ chaw teˇ hpaˍ leh Iˉsaˍreˍlaˆ chaw hkʼa peu-eˬ ve hta‸ hkanˍ tcuh ve yoˬ.

6Oˇ ve hkʼaw‸ nawˉ, yawˇ bon yehˬ lo tu leh Eˇlaˍsheˆ ve yaˇ Yeˍhawˇhaˍnanˍ ve bawehˇ hkʼaw lo‸-e leh, oˇ kaˬ lo teˇ haˉ tanˇ hkuinˇ shu mvuhˇmiˬ lo kʼaw‸ la taˍ ve Iˉsaˍreˍlaˆ chaw hui ve venˇbaˆ awˬ pon dawˇ haˍ leh hawˬ chehˇ taˍ ve yoˬ. Yawˇ lehˬ te‸ chiˉ maˇ caˇ maˇ dawˬ.

7Shu mvuhˇmiˬ lo hkʼa kʼaw‸ la taˍ ve Iˉsaˍreˍlaˆ chaw hkʼa peu-eˬ Yeˍruˆsaˍlehnˍ venˇ lo hpawnˬ laˬ tuˬ tawˇ shanˍ feu piˇ ve yoˬ.

8Shehˆ nyi awˬ hkʼaw lo maˇ gaˬ la ve chaw hta‸ yawˇ ve mawˇ hkʼa peu-eˬ hiˉ yuˬ leh, yawˇ hta‸ buiˇshaˆaˉnaˆ chaw hkʼe shawˍ taˍ tuˬ kʼoˆ feu piˇ tcuh ve yoˬ.

9Shehˆ nyi teˇ nyi, ha pa kʼawˇ maˬ teˇ maˬ, nyiˇ chi nyi htaˇ, Yuˇda‸ leh Beˍyaˍmenˍ mvuhˇmiˬ hkʼaw chehˇ taˍ ve hawˉ hkʼaˆ paˍ hkʼa peu-eˬ, bon yehˬ paˇ lo hpawnˬ gaˬ la ve yoˬ. Mvuhˇ yeˬ ka‸ gʼaˇ hte‸ laˬ chehˇ ve yoˬ. Mvuhˇ yeˬ hta‸ pa taw maˇ kʼoˆ, hpawnˬ da‸ tuˬ ve awˬ lawn chi a yeˇ uiˍ jaˇ ve hta‸ pa taw maˇ kʼoˆ, chaw yaˇ teˇ gʼaˇ le le cheˇ cheˇ veˆ veˆ hpeh‸ chehˇ taˍ ve yoˬ.

10Oˇ htaˇ, paw hkuˇ Eˉzaˍraˆ tu la leh, yawˇ hui hta‸ tawˇ yaw piˇ ve yoˬ. Yawˇ kʼoˆ ve, Nawˬ hui ka ti‸ maˇ yeˬ leh buiˇshaˆaˉnaˆ chaw hta‸ heuˆ ve pa taw, Iˉsaˍreˍlaˆ chaw awˬ hkʼoˆ lo venˇbaˆ gaˬ la peuˬ ve yoˬ.

11Chi hta‸ pa taw, nawˬ hui chi beu‸ a shu yawˇ ve venˇbaˆ Gʼuiˬsha hta‸ hpeu‸ maˍ piˇ leh, yawˇ ve a loˍ cawˇ ve hkʼe te-o. Ngaˬ hui ve mvuhˇmiˬ hkʼaw ca chehˇ la taˍ ve buiˇshaˆaˉnaˆ chaw hui hta‸ awˬ chawˇ maˇ kʼaw‸ te da‸ leh, nawˬ hui heuˆ taˍ ve buiˇshaˆaˉnaˆ yaˇ miˇ teˇ hpaˍ hta‸ chiˇ baˬ loˬ, teh‸ yawˇ hui hta‸ kʼoˆ piˇ ve yoˬ.

12Oˇ htaˇ chaw yaˇ teˇ hpaˍ lehˬ, Nawˬ kʼoˆ ve hkʼe ngaˬ hui na yuˬ leh te tu yoˬ, teh‸ kʼoˆ ve yoˬ.

13Yawˇ hui kʼaw‸ caˉ leh kʼoˆ ve, Hpawnˬ laˬ ve chaw maˇ jaˇ leh, mvuhˇ yeˬ htawˇ gʼaˇ hte‸ laˬ chehˇ ve yoˬ. Ngaˬ hui choˬ ka‸ lo chi hkʼe te huˉ chehˇ maˇ hpeh‸-o. Kanˉ chi ve lehˬ, teˇ nyi, nyiˇ nyi tiˉ hkʼaw te peuˬ gʼa tuˬ ve kanˉ maˇ heˆ. Awˬ lawn kʼo, ngaˬ hui awˬ hkʼaw lo buiˇshaˆaˉnaˆ chaw hta‸ heuˆ taˍ ve chaw cawˬ maˇ jaˇ ve yoˬ.

14Chi hta‸ pa taw, ngaˬ hui ve awˬ hoˉ awˬ naˬ teˇ hpaˍ hta‸ Yeˍruˆsaˍlehnˍ venˇ hkʼaw chehˇ tcuh taˉ leh, kanˉ chi hta‸ te piˇ lawˬ-o‸. Buiˇshaˆaˉnaˆ chaw hta‸ heuˆ taˍ ve chaw hui hta‸ teˇ pawˆ teˇ gʼaˇ kuˬ yuˬ leh chaˬ nyi-o. Chi hkʼe te ve kʼo, Gʼuiˬsha nyi ma zuhˆ ve mehˉ kʼai tuˬ yoˬ, teh‸ kʼoˆ ve yoˬ.

15Chi hkʼe te tuˬ ve hta‸ maˇ dawˇ cawˇ ve chaw lehˬ, Aˍsaˍheˍlaˆ ve yaˇ Yawˇnaˆtanˍ leh Tiˉkaˍvaˍ ve yaˇ Yaˍhaˍziˆ yawˇ huiˉ maˬ tiˉ cawˬ ve yoˬ. Meˍshuˆlanˍ leh Leˍviˆ chaw Shaˍbeˍtehˇ htawˇ yawˇ huiˉ maˬ hpawˇ chehˇ ve yoˬ.

16Shu mvuhˇmiˬ lo kʼaw‸ la taˍ ve chaw hkʼa peu-eˬ, oˇ hkʼe te tuˬ nyi ma cawˇ ve yoˬ. Hkʼe te leh, paw hkuˇ Eˇzaˍraˆ lehˬ, awˬ hoˉ awˬ naˬ teˇ hpaˍ hta‸ leuˆ yuˬ leh, yawˇ hui ve awˬ meh teˇ hpaˍ hta‸ bvuh‸ yuˬ taˍ ve yoˬ. Awˬ hkʼaw‸ nawˉ teˇ ha pa awˉ lawˉ peuˇ ve teˇ nyi htaˇ, yawˇ hui tanˬ leh chaˬ nyi ve yoˬ.

17Ha pa shehˆ maˬ peuˬ hkʼaw‸ nawˉ, buiˇshaˆaˉnaˆ chaw hui hta‸ heuˆ taˍ ve chaw hui ve caˇ lanˇ yuˬ peuˬ ve yoˬ.

18Paw hkuˇ awˬ ceuˬ awˬ hkʼaˇ awˬ hkʼaw lo, buiˇshaˆaˉnaˆ chaw hta‸ heuˆ taˍ ve chaw teˇ hpaˍ lehˬ, Yawˇsuˆ awˬ ceuˬ awˬ hkʼaˇ Yeˍhawˉzaˍbaˆ ve yaˇ teˇ hpaˍ, Maˍseˍyaˆ, Eˇlaˍsaˍ, Yaˍrehˆ leh Gaˍdaˍliˆ hui hpeh‸ve yoˬ.

19Yawˇ hui lehˬ, a shu yawˇ heuˆ taˍ ve awˬ miˇ ma hta‸ baˬ leh, yawˇ hui venˇbaˆ gʼa ponˬ tuˬ, yawˬ paˍ lonˉ teˇ hkeh tuˉ tanˇ tuˬ ka ti‸ te ve yoˬ.

20Iˉmeˍraˆ awˬ ceuˬ awˬ hkʼaˇ awˬ hkʼaw lo, Haˍnaˍniˆ leh Zeˍbaˍdiˆ hui hpeh‸ ve yoˬ.

21Haˍrenˍ awˬ ceuˬ awˬ hkʼaˇ awˬ hkʼaw lo, Maˍseˍyaˆ, Eˇliˇya‸, Sheˍmaˍyaˆ, Yeˍheˍlaˆ leh Awˇziˆ hui hpeh‸ve yoˬ.

22Paˍsuˇriˆ awˬ ceuˬ awˬ hkʼaˇ awˬ hkʼaw lo Eˇlawˇnehˇ, Maˍseˍyaˆ, Iˉshaˍmaˍlaˆ, Naˍtaˍneˍ laˆ, Yawˇzaˍbaˆ leh Eˇlaˍsaˍ hui hpeh‸ ve yoˬ.

23Leˍviˆ awˬ ceuˬ awˬ hkʼaˇ awˬ hkʼaw lo, Yawˇzaˍbaˆ, Sheˍmiˆ, Keˍliˇtaˆ teh‸ kʼoˆ ve Keˍlaˍyaˆ, Peˍtaˍhiˆ, Yuˇda‸ leh Eˇlaˍzaˍ hui hpeh‸ ve yoˬ.

24Kʼa muiˬ hkawˇ kʼa shehˍ hpaˇ teˇ hpaˍ awˬ hkʼaw lo, Eˇlaˍsheˆ hpeh‸ ve yoˬ. Bon yehˬ ha‸ shaˉ shehˍ hpaˇ teˇ hpaˍ awˬ hkʼaw lo, Shaˍlonˍ, Teˍlehˍ, leh Uˇriˆ hui hpeh‸ ve yoˬ.

25Awˬ nu ve Iˉsaˍreˍlaˆ chaw teˇ hpaˍ awˬ hkʼaw lo, Paˍroˆ awˬ ceuˬ awˬ hkʼaˇ Raˍmiˆ, Yeˍziˆ, Maˍlaˍhkiˇyaˆ, Miˇyaˍmenˍ, Eˇlaˍsaˍ, Maˍlaˍhkiˇyaˆ, leh Beˍnaˍyaˆ hui hpeh‸ ve yoˬ.

26Eˇlanˍ awˬ ceuˬ awˬ hkʼaˇ awˬ hkʼaw lo, Maˍtaˍniˆ, Zaˍhkaˍriˆ, Yeˍheˍlaˆ, Aˍbaˍdiˆ, Yeˍraˍmoˆ leh Eˇliˇya‸ hui hpeh‸ ve yoˬ.

27Zaˍtoˆ awˬ ceuˬ awˬ hkʼaˇ awˬ hkʼaw lo, Eˇlawˇnehˇ, Eˇlaˍsheˆ, Maˍtaˍniˆ, Yeˍraˍmoˆ, Zaˍbaˆ leh Aˍziˆzaˆ hui hpeh‸ ve yoˬ.

28Beˍbehˇ awˬ ceuˬ awˬ hkʼaˇ awˬ hkʼaw lo Yeˍhawˇhaˍnanˍ, Haˍnaˍniˆ, Zaˍbehˇ, leh Aˍtaˍlehˇ hui hpeh‸ ve yoˬ.

29Baˍniˆ awˬ ceuˬ awˬ hkʼaˇ awˬ hkʼaw lo Meˍsuˆlanˍ, Maˍloˆ, Aˍdaˍyaˆ, Yaˍshoˆ, Saˍlaˆ leh Yeˍraˍmoˆ hui hpeh‸ ve yoˬ.

30Paˍhaˆmawˇbaˆ awˬ ceuˬ awˬ hkʼaˇ awˬ hkʼaw lo Aˍnaˍnaˆ, Hkeˍlaˍlaˆ, Beˍnaˍyaˆ, Maˍseˍyaˆ, Maˍtaˍniˆ, Beˍzaˍleˍlaˆ, Biˇniˆ leh Maˍnaˍseˍ hui hpeh‸ ve yoˬ.

31Haˍrenˍ awˬ ceuˬ awˬ hkʼaˇ awˬ hkʼaw lo, Eˇlaˍzaˍ, Iˉshiˆyaˍ, Maˍlaˍhkiˇyaˆ, Sheˍmaˍyaˆ, Siˉmonˍ, Beˍyaˍmenˍ, Maˍloˆ leh Sheˍmaˍriˆ hui hpeh‸ ve yoˬ.

33Haˍsonˍ awˬ ceuˬ awˬ hkʼaˇ awˬ hkʼaw lo, Maˍtaˍniˆ, Maˍtaˍtaˍ, Zaˍbaˆ, Eˇliˇhpeˍlehˆ, Yeˍraˍmehˇ, Maˍnaˍseˍ leh Sheˍmiˆ hui hpeh‸ ve yoˬ.

34Baˍniˆ ve awˬceuˬ awˬ hkʼaˇ awˬ hkʼaw lo, Maˍdehˇ, Aˍmaˍranˍ, Yuˍlaˆ, Beˍnaˍniˆ, Beˍdiˆ, Hkeˍluˆ, Vaˍniˆ, Meˍraˍmoˆ, Eˇlaˍsheˆ, Maˍtaˍniˆ, Maˍtaˍnehˇ leh Yaˍsawˇ hui hpeh‸ve yoˬ.

38Biˇniˍ awˬ ceuˬ awˬ hkʼaˇ awˬ hkʼaw lo Sheˍmiˆ, Sheˍlaˍmiˆ, Naˍtanˍ, Aˍdaˍyaˆ, Maˍhkanˍnaˍdeˍbehˇ, Shaˍshehˇ, Saˍrehˇ, Aˍzaˍreˍlaˆ, Sheˍleˍmiˆ, Sheˍmaˍriˆ, Shaˍlonˍ, Aˍmaˍriˆ leh Yoˇseh‸ hui hpeh‸ ve yoˬ.

43Neˍbawˇ awˬ ceuˬ awˬ hkʼaˇ awˬ hkʼaw lo, Yeˍlaˆ, Maˍtiˇtiˆ, Zaˍbaˆ, Zeˍbiˇnaˆ, Yaˍdehˇ, Yawˇlaˆ, leh Beˍnaˍniˆ hui hpeh‸ ve yoˬ.

44Chaw chi teˇ hpaˍ lehˬ, buiˇshaˆaˉnaˆ chaw hui hta‸ heuˆ taˍ ve chaw teˇ hpaˍ hpeh‸ ve yoˬ. Hkʼe te leh, chaw oˇ ve teˇ hpaˍ lehˬ, a shu yawˇ ve awˬ miˇ hta‸ hta‸ baˬ leh, yawˇ hui ve yaˇ teˇ hpaˍ hta‸ htawˇ gʼa‸ kʼoˬ piˇ ve yoˬ.

← Chapter 9 Jump to: