Ecclesiastes 10

Lao Bible 2012 (ພຣະຄຳພີສັກສິ)

← Chapter 9 Jump to: Chapter 11 →

1ແມງວັນຕາຍຍ່ອມເຮັດໃຫ້ນໍ້າຫອມທັງແກ້ວເໝັນໄດ້ສັນໃດ ຄວາມໂງ່ຈ້າພຽງແຕ່ເລັກນ້ອຍກໍຍ່ອມເຮັດໃຫ້ປັນຍາອັນຍິ່ງໃຫຍ່ຖືກເສຍຫາຍໄປໄດ້ສັນນັ້ນ.

2ຄົນມີປັນຍາເຮັດສິ່ງທີ່ຖືກຕ້ອງ ແລະຄົນໂງ່ຈ້າເຮັດສິ່ງທີ່ຜິດ ເລື່ອງນີ້ເປັນຂອງທຳມະດາ.

3ຄວາມໂງ່ຈ້າຂອງລາວຈະເຫັນໄດ້ຢ່າງຈະແຈ້ງ ແມ່ນແຕ່ຕໍ່ຄົນແປກໜ້າທີ່ລາວພົບຕາມທາງ ລາວເຮັດໃຫ້ທຸກຄົນຮູ້ວ່າຕົນເປັນຄົນໂງ່ຈ້າ.

4ຖ້າຜູ້ເປັນນາຍຂອງເຈົ້າໃຈຮ້າຍໃຫ້ເຈົ້າ ຢ່າສູ່ຟ້າວຍື່ນໃບລາອອກ ຖ້າເຈົ້າມິດງຽບເສີຍຢູ່ ຄວາມຜິດພາດອັນໃຫຍ່ຫລວງອາດຈະໄດ້ຮັບການອະໄພໃຫ້ກໍໄດ້.

5ຂ້າພະເຈົ້າໄດ້ສັງເກດເຫັນຄວາມບໍ່ຍຸດຕິທຳຢູ່ໃຕ້ດວງຕາເວັນ ຄືຄວາມບໍ່ຍຸດຕິທຳທີ່ຖືກກໍ່ຂຶ້ນໂດຍພວກຜູ້ປົກຄອງບ້ານເມືອງ.

6ຄົນໂງ່ຈ້າໄດ້ຮັບຕຳແໜ່ງສູງ ແຕ່ຄົນຮັ່ງມີພັດໄດ້ຮັບຕຳແໜ່ງຕໍ່າຕ້ອຍ.

7ຂ້າພະເຈົ້າໄດ້ເຫັນທາດຮັບໃຊ້ຂີ່ມ້າໄປດັ່ງເຈົ້ານາຍ ໃນຂະນະທີ່ເຈົ້ານາຍພັດຍ່າງໄປດັ່ງທາດຮັບໃຊ້.

8ຜູ້ທີ່ຂຸດຫລຸມໄວ້ ຕົນອາດຈະຕົກລົງໃນຫລຸມນັ້ນເອງກໍມີ ຜູ້ທີ່ທະລຸກຳແພງເມືອງເຂົ້າໄປ ງູອາດຈະຕອດຜູ້ນັ້ນກໍໄດ້.

9ຜູ້ທີ່ສະກັດຫີນນັ້ນອາດຈະເຈັບຕົວເພາະຫີນກໍມີ ແລະຜູ້ທີ່ຜ່າຟືນອາດຈະເຈັບຕົວເພາະຟືນກໍໄດ້.

10ຖ້າຂວານຂອງເຈົ້າປູ້ ແລະບໍ່ຝົນໃຫ້ຄົມ ເຈົ້າຈະຕ້ອງໃຊ້ແຮງຫລາຍເມື່ອເຈົ້າຟັນໄມ້. ສະນັ້ນ ປັນຍາຈຶ່ງເປັນບໍ່ເກີດແຫ່ງຄວາມສຳເລັດ.

11ຜູ້ເປັນໝໍງູກໍຈະມີປະໂຫຍດຫຍັງ ຖ້າລາວຖືກງູຕອດກ່ອນ.

12ຄຳເວົ້າຂອງຄົນສະຫລາດນຳກຽດມາສູ່ຕົນ, ແຕ່ຄົນໂງ່ຈ້າຖືກທຳລາຍເພາະຖ້ອຍຄຳທີ່ຕົນເວົ້າ.

13ລາວເລີ່ມເວົ້າດ້ວຍຖ້ອຍຄຳອັນໂງ່ງ່າວ ແລະລາວກໍມ້ວນທ້າຍດ້ວຍຄຳເວົ້າແບບບ້າບໍ.

14ຄົນໂງ່ຈ້ານັ້ນເວົ້າບໍ່ຮູ້ຈັກສຸດ. ບໍ່ມີຜູ້ໃດຮູ້ສິ່ງທີ່ຈະເກີດຂຶ້ນໃນຂັ້ນຕໍ່ໄປ ແລະບໍ່ມີຜູ້ໃດບອກພວກເຮົາໄດ້ວ່າ ຈະມີຫຍັງເກີດຂຶ້ນຕາມມາ ຫລັງຈາກທີ່ພວກເຮົາຕາຍໄປແລ້ວ.

15ຄົນໂງ່ຈ້າໂພດບໍ່ຮູ້ຮອດທາງເມືອເຮືອນ ແມ່ນແຕ່ເຮັດວຽກໜັກກໍບໍ່ເກີດປະໂຫຍດ.

16ປະເທດເດືອດຮ້ອນເມື່ອກະສັດຍັງໜຸ່ມແໜ້ນ ແລະບັນດາຜູ້ນຳກໍກິນລ້ຽງຈົນຮອດແຈ້ງແລະດື່ມຈົນເມົາ.

17ແຕ່ປະເທດທີ່ມີຄວາມສຸກນັ້ນ ເພາະມີກະສັດທີ່ຕັດສິນໃຈໄດ້ເອງ ແລະພວກຜູ້ນຳກໍກິນໃນເວລາອັນຖືກຕ້ອງ ຄືຄວບຄຸມຕົນໄດ້ບໍ່ໃຫ້ດື່ມຈົນເມົາ.

18ເມື່ອຄົນໜຶ່ງຂີ້ຄ້ານທີ່ຈະແປງຫລັງຄາ ຫລັງຄາກໍຈະຮົ່ວແລະເຮືອນກໍຈະເພພັງລົງ.

19ການກິນລ້ຽງເຮັດໃຫ້ມີຄວາມສຸກ ແລະເຫຼົ້າອະງຸ່ນກໍເຮັດໃຫ້ໂຮຮ້ອງ, ແຕ່ທັງສອງຢ່າງນັ້ນເປັນໄປບໍ່ໄດ້ ຖ້າບໍ່ມີເງິນ.

20ຢ່າສູ່ຕິຕຽນກະສັດແມ່ນແຕ່ລັບຫລັງເພິ່ນ ແລະຢ່າສູ່ຕິຕຽນຄົນຮັ່ງມີ ແມ່ນແຕ່ຢູ່ໃນຫ້ອງນອນສ່ວນຕົວຂອງເຈົ້າ. ນົກມີຫູໜູມີປີກ ຄຳເວົ້າຂອງເຈົ້າອາດຖືກນຳໄປບອກເພິ່ນກໍໄດ້.

← Chapter 9 Jump to: Chapter 11 →