Ecclesiastes 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ຄົນມີປັນຍາເທົ່ານັ້ນຈຶ່ງຈະຮູ້ໄດ້ວ່າ ສິ່ງນັ້ນໝາຍເຖິງຫຍັງແທ້. ປັນຍາເຮັດໃຫ້ລາວຍິ້ມແຍ້ມແຈ່ມໃສ ແລະໃຫ້ສີໜ້າບູດບຶ້ງຂອງລາວຫາຍໄປ.

2ຈົ່ງເຮັດຕາມສິ່ງທີ່ກະສັດສັ່ງ ແລະຢ່າຟ້າວຕັດສິນໃຈເຮັດຄຳສັນຍາໃດໆກັບພຣະເຈົ້າ.

3ກະສັດເຮັດທຸກສິ່ງທີ່ເພິ່ນມັກໄດ້. ສະນັ້ນ ຈົ່ງອອກໜີໄປໃຫ້ພົ້ນໜ້າເພິ່ນ; ຢ່າຢູ່ໃນບ່ອນອັນຕະລາຍເຊັ່ນນັ້ນເລີຍ.

4ກະສັດເຮັດທຸກສິ່ງດ້ວຍອຳນາດ ແລະບໍ່ມີຜູ້ໃດທ້າທາຍສິ່ງທີ່ເພິ່ນເຮັດນັ້ນໄດ້.

5ເມື່ອໃດທີ່ເຈົ້າເຊື່ອຟັງຄຳສັ່ງຂອງເພິ່ນ ເຈົ້າກໍປອດໄພ; ແລະຄົນມີປັນຍາກໍຮູ້ວ່າຕົນຈະເຮັດຢ່າງໃດແລະຍາມໃດ.

6ມີເວລາອັນຖືກຕ້ອງແລະມີວິທີທາງອັນເໝາະສົມສຳລັບເຮັດທຸກສິ່ງ, ແຕ່ພວກເຮົາຊ່າງຮູ້ໜ້ອຍເຫລືອເກີນ

7ບໍ່ມີຜູ້ໃດໃນພວກເຮົາຮູ້ຈັກສິ່ງທີ່ກຳລັງເກີດຂຶ້ນ ແລະບໍ່ມີຜູ້ໃດບອກພວກເຮົາໄດ້.

8ບໍ່ມີຜູ້ໃດຊ່ວຍຕົນບໍ່ໃຫ້ຕາຍໄດ້ ຫລືແກ່ຍາວວັນຕາຍຂອງຕົນອອກໄປໄດ້. ເປັນການຮົບທີ່ພວກເຮົາໜີພົ້ນບໍ່ໄດ້ ແລະພວກເຮົາກໍສໍ້ໂກງບໍ່ໄດ້ດ້ວຍ.

9ຂ້າພະເຈົ້າໄດ້ພິຈາລະນາເບິ່ງຢ່າງຄັກແນ່ ເຖິງທຸກສິ່ງທີ່ໄດ້ເກີດຂຶ້ນຢູ່ໃຕ້ດວງຕາເວັນ ຄືບ່ອນທີ່ມະນຸດໃຊ້ອຳນາດຢູ່ເໜືອເພື່ອນມະນຸດດ້ວຍກັນ ແລະເຮັດໃຫ້ຊີວິດຂອງເຂົາລຳບາກຍາກແຄ້ນ.

10ແມ່ນແລ້ວ ຂ້າພະເຈົ້າໄດ້ເຫັນພວກຄົນຊົ່ວຖືກຝັງໄວ້ໃນຂຸມຝັງສົບ, ແຕ່ເວລາກັບຈາກປ່າຊ້າ ຄົນຕ່າງກໍຍົກຍ້ອງພວກເຂົາໃນທຸກເມືອງ ທີ່ພວກເຂົາໄດ້ເຮັດການຊົ່ວນັ້ນ ຊ່າງອະນິຈັງແທ້.

11ເປັນຫຍັງຄົນຈຶ່ງພ້ອມທີ່ຈະເຮັດຊົ່ວກັນແທ້? ກໍເພາະຄົນທີ່ເຮັດຊົ່ວນັ້ນບໍ່ໄດ້ຖືກລົງໂທດໃຫ້ໄວທັນການ.

12ຄົນບາບຜູ້ໜຶ່ງອາດໄດ້ເຮັດຊົ່ວໄວ້ຕັ້ງຮ້ອຍຢ່າງ ແລະຍັງມີຊີວິດຢູ່. ເອີແມ່ນແລ້ວ ຂ້າພະເຈົ້າຮູ້ສິ່ງທີ່ພວກເຂົາເວົ້າວ່າ, “ຖ້າທ່ານຢຳເກງພຣະເຈົ້າ ທຸກສິ່ງກໍຈະເປັນໄປໂດຍດີ;

13ແຕ່ສຳລັບຄົນຊົ່ວທຸກສິ່ງຈະບໍ່ເປັນໄປໂດຍດີ. ຊີວິດພວກເຂົາເປັນດັ່ງເງົາ ແລະພວກເຂົາຈະຕ້ອງຕາຍແຕ່ຍັງໜຸ່ມ ເພາະພວກເຂົາບໍ່ໄດ້ຢຳເກງພຣະເຈົ້າ.”

14ແຕ່ກໍເປັນເລື່ອງໄຮ້ປະໂຫຍດ ຈົ່ງເບິ່ງສິ່ງທີ່ເກີດຂຶ້ນຢູ່ໃນໂລກນີ້ ບາງຄັ້ງຄົນດີໄດ້ຮັບໂທດຂອງຄົນຊົ່ວ ແລະຄົນຊົ່ວໄດ້ຮັບບຳເໜັດຂອງຄົນດີ. ຂ້າພະເຈົ້າວ່າຊ່າງອະນິຈັງແທ້ໆ.

15ສະນັ້ນ ຂ້າພະເຈົ້າຈຶ່ງແນ່ໃຈໄດ້ວ່າ ມະນຸດຄວນເຮັດໃຫ້ຕົນສະໜຸກສະໜານ ເພາະຄວາມສຸກຢ່າງດຽວທີ່ມະນຸດມີຢູ່ໃຕ້ດວງຕາເວັນຄື: ກິນແລະດຶ່ມແລະເຮັດໃຫ້ຕົນສະໜຸກສະໜານ ຢ່າງໜ້ອຍລາວກໍເຮັດສິ່ງນີ້ໄດ້ ໃນຂະນະທີ່ບຸກບືນເຮັດວຽກຕະຫລອດຊີວິດ ທີ່ພຣະເຈົ້າປະທານໃຫ້ແກ່ຕົນຢູ່ໃຕ້ດວງຕາເວັນ.

16ເມື່ອໃດຂ້າພະເຈົ້າພະຍາຍາມທຳຕົນເປັນຄົນມີປັນຍາ ແລະຮຽນຮູ້ສິ່ງທີ່ເປັນຢູ່ໃນໂລກນີ້ ເມື່ອນັ້ນຂ້າພະເຈົ້າກໍສຳນຶກໃນໃຈໄດ້ວ່າ ມະນຸດອາດອົດຫລັບອົດນອນຕະຫລອດມື້ຕະຫລອດຄືນ

17ແລະບໍ່ສາມາດເຂົ້າໃຈສິ່ງທີ່ພຣະເຈົ້າກຳລັງກະທຳການນັ້ນໄດ້ຈັກເທື່ອ. ເຖິງແມ່ນວ່າເຂົາອົດສາພະຍາຍາມຄົ້ນຫາຈັກພຽງໃດກໍຕາມ ເຂົາກໍຈະພົບບໍ່ໄດ້ຈັກເທື່ອ. ຄົນມີປັນຍາອາດອວດຕົວວ່າຮູ້, ແຕ່ວ່າພວກເຂົາບໍ່ຮູ້.

← Chapter 7 Jump to: Chapter 9 →