Ecclesiastes 6

Lao Bible 2012 (ພຣະຄຳພີສັກສິ)

← Chapter 5 Jump to: Chapter 7 →

1ຂ້າພະເຈົ້າໄດ້ສັງເກດເຫັນວ່າ ຢູ່ໃຕ້ດວງຕາເວັນມີຄວາມອະຍຸດຕິທຳອັນໜັກໜ່ວງ.

2ພຣະເຈົ້າຈະໃຫ້ຄົນໃດຄົນໜຶ່ງຮັ່ງມີ, ມີກຽດ ແລະມີຊັບສົມບັດຄື: ໃຫ້ລາວມີທຸກສິ່ງທີ່ລາວຕ້ອງການ, ແຕ່ແລ້ວພັດບໍ່ໃຫ້ລາວສະໜຸກຢູ່ກັບສິ່ງນັ້ນ. ຄົນແປກໜ້າຊໍ້າພັດໄດ້ສະໜຸກຢູ່ກັບສິ່ງເຫຼົ່ານັ້ນແທນ. ມັນຊ່າງອະນິຈັງ ແລະບໍ່ເປັນການຖືກຕ້ອງເສຍເລີຍ.

3ຄົນໜຶ່ງອາດຈະມີລູກເຖິງຮ້ອຍຄົນ ແລະມີຊີວິດຍືນຍາວກໍໄດ້ ເຖິງແມ່ນວ່າລາວຈະມີອາຍຸຍືນຍາວຈັກເທົ່າໃດກໍຕາມ, ແຕ່ຖ້າລາວບໍ່ໄດ້ຮັບຄວາມສຸກທີ່ລາວຄວນໄດ້ຮັບ ແລະບໍ່ມີຄົນເຮັດພິທີຝັງສົບໃຫ້ຢ່າງມີກຽດແລ້ວ ຂ້າພະເຈົ້າຂໍບອກວ່າ, ເປັນແອນ້ອຍເກີດມາແລ້ວຕາຍກໍຍັງດີກວ່າ.

4ແອນ້ອຍເກີດມາບໍ່ໄດ້ຮັບປະໂຫຍດຫຍັງ ແລະບໍ່ມີຜູ້ໃດລະນຶກຄິດເຖິງລາວເລີຍ.

5ລາວບໍ່ເຄີຍເຫັນແສງແຈ້ງຂອງດວງຕາເວັນ ຫລືຮູ້ຈັກວ່າຊີວິດຄືຫຍັງຊໍ້າ, ແຕ່ຢ່າງນ້ອຍລາວກໍໄດ້ພັກຜ່ອນ

6ຄືໄດ້ພັກຜ່ອນຫລາຍກວ່າຄົນທີ່ບໍ່ເຄີຍມີຄວາມສະໜຸກຢູ່ໃນຊີວິດ ເຖິງແມ່ນວ່າລາວອາດຈະມີຊີວິດຢູ່ຮອດສອງພັນປີກໍຕາມ. ໃນທີ່ສຸດຄົນທັງສອງກໍຕ້ອງໄປສູ່ບ່ອນດຽວກັນ.

7ວຽກທຸກຊະນິດທີ່ຄົນໜຶ່ງເຮັດ ແມ່ນເພື່ອໃຫ້ມີອາຫານກິນພຽງພໍເທົ່ານັ້ນ, ແຕ່ລາວພໍບໍ່ເປັນຈັກເທື່ອ.

8ຄົນມີປັນຍາດີກວ່າຄົນໂງ່ຈ້າຢ່າງໃດແດ່? ເປັນການດີຫຍັງແດ່ທີ່ຄົນຍາກຈົນຮູ້ຈັກປະເຊີນໜ້າກັບຊີວິດ?

9ທຸກສິ່ງລ້ວນແຕ່ອະນິຈັງທັງສິ້ນ ແລະເປັນດັ່ງການແລ່ນໄລ່ໄປຕາມລົມ. ການພໍໃຈກັບສິ່ງທີ່ຕົນມີຢູ່ ກໍດີກວ່າການປ່ອຍຕົວເລື້ອຍໄປຕາມຕັນຫາຂອງຕົນ.

10ເຫດການທັງຫລາຍທີ່ເກີດຂຶ້ນດຽວນີ້ ແມ່ນໄດ້ຖືກກຳນົດໄວ້ແລ້ວແຕ່ນານ ແລະພວກເຮົາທຸກຄົນກໍຮູ້ວ່າມະນຸດ ໂຕ້ຖຽງກັບຜູ້ໃດຜູ້ໜຶ່ງທີ່ແຂງແຮງກວ່າຕົນກໍບໍ່ໄດ້.

11ຖຽງດົນເທົ່າໃດແຮ່ງບໍ່ມີປະໂຫຍດຫລາຍເທົ່ານັ້ນ ແລະເຈົ້າກໍບໍ່ມີຫຍັງດີຂຶ້ນເລີຍ.

12ຊີວິດມະນຸດຜ່ານພົ້ນໄປດັ່ງເງົາ. ໃຜຮູ້ໄດ້ແດ່ວ່າມີຫຍັງດີສຳລັບມະນຸດຢູ່ໃນໂລກອະນິຈັງອັນສັ້ນໆນີ້? ໃຜຮູ້ໄດ້ແດ່ວ່າຈະມີຫຍັງເກີດຂຶ້ນຢູ່ໃຕ້ດວງຕາເວັນ ຫລັງຈາກທີ່ລາວຕາຍໄປແລ້ວ?

← Chapter 5 Jump to: Chapter 7 →