Ecclesiastes 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1ຈົ່ງລົງທຶນຄ້າຂາຍກັບຕ່າງປະເທດ ແລະໃນມື້ໜຶ່ງເຈົ້າກໍຈະໄດ້ກຳໄລ.

2ຈົ່ງລົງທຶນຂອງເຈົ້າໄວ້ໃນຫລາຍບ່ອນ ຫລາຍບ່ອນເທົ່າໃດແຮ່ງດີ ເພາະຢູ່ໃນໂລກນີ້ເຈົ້າບໍ່ຮູ້ວ່າ ອັນຕະລາຍຊະນິດໃດຈະມາຖືກເຈົ້າໃນຍາມໃດ.

3ບໍ່ວ່າຕົ້ນໄມ້ຈະລົ້ມລົງທາງທິດໃດ ມັນກໍຈະນອນຢູ່ໃນທິດທາງນັ້ນ. ເມື່ອເມກມືດໜາຝົນກໍຈະຕົກ.

4ຖ້າເຈົ້າລໍຖ້າໃຫ້ລົມແລະອາກາດເໝາະກ່ອນ ເຈົ້າກໍຈະບໍ່ໄດ້ປູກຝັງແລະໄດ້ເກັບກ່ຽວຫຍັງຈັກເທື່ອ.

5ພຣະເຈົ້າໄດ້ສ້າງສັບພະທຸກສິ່ງ ແລະເຈົ້າບໍ່ຮູ້ວ່າຊີວິດເລີ່ມປະກອບຂຶ້ນຢູ່ໃນແມ່ຍິງທີ່ຕັ້ງທ້ອງຢ່າງໃດ ສິ່ງທີ່ພຣະອົງດຳເນີນການ ເຈົ້າກໍແຮ່ງເຂົ້າໃຈບໍ່ໄດ້.

6ຈົ່ງປູກຝັງໃນຕອນເຊົ້າແລະໃນຕອນແລງດ້ວຍ. ເຈົ້າບໍ່ຮູ້ດອກວ່າມັນຈະງອກງາມໝົດ ຫລືຕົ້ນໜຶ່ງຈະດີກວ່າຕົ້ນອື່ນອີກ.

7ແສງແຈ້ງໃນຕອນກາງເວັນ ພາໃຫ້ເປັນທີ່ໜ້າຊົມແລະໜ້າຢູ່.

8ຈົ່ງຂອບພຣະຄຸນສຳລັບແຕ່ລະປີ ທີ່ອຳນວຍໃຫ້ເຈົ້າມີຊີວິດຢູ່. ບໍ່ວ່າເຈົ້າຈະອາຍຸຍືນຍາວເທົ່າໃດກໍຕາມ ຈົ່ງຈຳໄວ້ວ່າເຈົ້າຈະຕາຍຢູ່ຢ່າງຍາວນານ. ໃນທີ່ນັ້ນບໍ່ມີຫຍັງພໍທີ່ຈະຫວັງໄດ້ເລີຍ.

9ຄົນໜຸ່ມເອີຍ ຈົ່ງສະໜຸກຢູ່ໃນຄວາມໜຸ່ມແໜ້ນຂອງເຈົ້າ. ຈົ່ງຫາຄວາມສຸກເມື່ອເຈົ້າຍັງໜຸ່ມແໜ້ນຢູ່ ຈົ່ງເຮັດທຸກສິ່ງທີ່ເຈົ້າຕ້ອງການຢາກເຮັດ ແລະທຸກສິ່ງທີ່ເຈົ້າພໍໃຈເຮັດດ້ວຍ. ແຕ່ຈົ່ງຈຳໄວ້ວ່າ ພຣະເຈົ້າຈະຕັດສິນທຸກໆສິ່ງທີ່ເຈົ້າໄດ້ເຮັດນັ້ນ.

10ຢ່າໃຫ້ສິ່ງໃດເຮັດໃຫ້ພວກເຈົ້າອຸກໃຈຫລືເຈັບປວດ. ເຈົ້າຈະໜຸ່ມຕໍ່ໄປບໍ່ໄດ້ດົນນານ.

← Chapter 10 Jump to: Chapter 12 →