Deuteronomy 18

Lao Bible (ฉบับอักษรลาว)

← Chapter 17 Jump to: Chapter 19 →

1ໂຕສ໋ວ ໄຊ ເຍີຍ ເລວີ ມ່ຽນ ເຖສົາ ເລວີ ຝີງ ເຍີຍ ຢຽດ ຕສູ໊ງ ມ່ຽນ ຢຽມ ອິສະລາເອນ ມ່ຽນ ກະຍົ໌ວ ໄມ້ ມ່າຍ ນິ່ນ ບົວ ເຍີຍ ປ່ວນ ຢ່າ ໄມ້ ຕຸ໊ ດສິບ ຫາຍ ຫຍູ່ງ. ນິ່ນ ບົວ ຫຍັ່ນ ເຍີຍ, ຮົບ ເຍີຍ, ເຊ ມ່ຽນ ຝົ່ງ ຫໍ່ ປົ໊ວ ເຕສ່ຍ ປຸນ ຕສ໊ຽວ ເຍີຍ ກະນ້າຍ. ນ້າຍ ເຊ ນິ່ນ ບົວ ຫອບ ຕສຸ ຕຸ໊ ເຍີຍ ປ່ວນ.

2ນິ່ນ ບົວ ໄມ້ ຕຸ໊ ເຖສົາ ນິ່ນ ບົວ ເຍີຍ ກໍ໋-ໂຢ໌ວ ມ່າຍ ດສິບ ເຍີຍ ປ່ວນ. ຕສ໊ຽວ ເປ໋ນ ນິ່ນ ບົວ ດສິບ ເຍີຍ ປ່ວນ ຮນັ້ງ ນິ່ນ ເຖສົາ ນິ່ນ ບົວ ແລ໌ງ ເຈ໋ຍ ເຍີຍ ຫວ່າ ນໍ.

3ແປະ ຝີງ ຝົ່ງ ຫໍ່ ເຕສ່ຍ ເຍີຍ ແຊງ-ຄູ້ ໄມ້ ກຸ໊ນ ງົ່ງ ໂກ໊ວ ໄຟ ປະກີ ຢູ້ງ, ອ໋ອຍ ຕສຸ ເຕສ໊າະ ປົ໌ວ-ຕສຸ້ຍ ເຖສົາ ອີ ປູງ ຂຳ-ປຸຍ ເຖສົາ ກະເຊຍ ອໍ໊ ປຸນ ໄຊ ມ່ຽນ.

4ອ໋ອຍ ຕສຸ ຕໍ້ ເມີ່ຍ ບົວ ເຍີຍ ຕ້າວ ຖອງ ລ່າງ ຕສິ, ຊຢັງ-ອະຫງຸ່ນ ຕິ໊ວ ເຖສົາ ກະລັ້ນ ໂຢ້ວ, ເຖສົາ ເມີ່ຍ ບົວ ເຍີຍ ຕ້າວ ປານ ປະກີ ຢູ້ງ ເປຢີຍ ຈິວ ປຸນ ນິ່ນ ບົວ,

5ເຫວີ່ຍ ຕສຸ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຢຽມ ເມີ່ຍ ບົວ ຝີງໆ ບຸດົ໋ງ ກິ໊ນ ນິ່ນ ບົວ ເຖສົາ ນິ່ນ ບົວ ເຍີຍ ເຕສີ໊ຍ-ຟຸນ ຕ້າຍ ໂຊ້ວ ຈ໊ຽນ ເຕ໊ງ ຕສ໊ຽວ ເຍີຍ ບົ໋ວ ຢຽດ ລິ໌ວ ຟູ-ສູ.

6ເຊ ກ໊ອງ ຫາຍ ເຕົ້າ ເລວີ ມ່ຽນ ຢຽມ ອິສະລາເອນ ເຍີຍ ຫາຍ ນອມ ຕສີ້ງ ມ່າຍ ໂຮຍ້ວ ອ໋ອຍ ມີ່ງ ຕສ໊ຽວ ກິ໊ນ ວົ້ວ ນອມ ຕ໋ອງ, ເຊວີ່ຍ ນິ່ນ ມີ່ງ ຢ່າ ຕຸ໊.

7ນິ່ນ ຕສ່ຽວ ເຕ໊ງ ຕສ໊ຽວ, ນິ່ນ ເຍີຍ ທິນ-ຮູ່ງ ເຍີຍ ບົ໋ວ ຟູ-ສູ, ຮນັ້ງ ເຖສົາ ນິ່ນ ຈວັ່ງ ຝີງ ເຍີຍ ເລວີ ມ່ຽນ ຢຽມ ຕສ໊ຽວ ເຍີຍ ດສະຮມຽນ ຟູ-ສູ ວົ້ວ ນໍ.

8ໄມ້ ກຸ໊ນ ນິ່ນ ໝ່າຍ ນິ່ນ ເຍີຍ ຈາ-ຕີ້ງ ຕຸ໊ ຍ່ານ ມປ່າ ນິ່ນ ຫຍັ່ນ ເຍີຍ ຮົບ ເຍີຍ ອ໋ອຍ ຕສຸ ຕຸ໊ ເຖສົາ ວົ້ວ ເຕີ໋ຍ ເລວີ ມ່ຽນ ຟີ່ ບົວະ.

9ເມີ່ຍ ບົວ ຕຸ໊ ເປັຍ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຖສີຍ ປຸນ ເຍີຍ ເຕີ່ຍ-ປູງ, ໄມ້ ຕູ໋ງ ຕສວດ ຢຽມ ວົ້ວ ເຍີຍ ຝີງໆ ມ່ຽນ ໂຕສ໋ວ ໂຢ໋ວ ໄຫ່, ກ້ຳ ເດສ໊ຍ ໄຫ່ ເຍີຍ ສີ່.

10ໄມ້ ຕູ໋ງ ປຸນ ເມີ່ຍ ບົວ ເຍີຍ ຫາຍ ເຕົ້າ ມ່ຽນ ເຕສ໊າະ ນິ່ນ ບົວ ເຍີຍ ຕອນ ໄຟ ເຊັຍ ໂຕສ໋ວ ປົ໊ວ ເຕສ່ຍ ເຍີຍ ກະນ້າຍ. ຢຽມ ເມີ່ຍ ບົວ ກະຍົ໌ວ ຢ່າ ໄມ້ ຕູ໋ງ ປຸນ ຫາຍ ເຕົ້າ ໂຈ້ວ ທສິມ, ໝັ່ງ ແໝ່ງ, ໂຕສ໋ວ ຟາດ,

11ປູ໋ງ ຕີງ ປູ໋ງ ຈ໋ຽມ, ກ໊ານ ເຮີຍ, ໂບ໊ວ ກວ໋າ ໄຟ ໂບ໊ວ ຟິນ.

12ຕະຟ່ານ ໂຕສ໋ວ ນ້າຍ ຫຍູ່ງ ສີ່ ເຍີຍ ມ່ຽນ, ຕສ໊ຽວ ໂຢ໋ວ ໄຫ່. ຫລາຍ ໂຕສ໋ວ ນ້າຍ ຫຍູ່ງ ສີ່, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕສຸ່ນ ນິ່ນ ບົວ ທສວດ ເມີ່ຍ ບົວ ເຍີຍ ວົ້ວ ດ່າງ ແໝງ.

13ເມີ່ຍ ບົວ ອ໋ອຍ ຕສຸ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ດສະຮມຽນ, ໂຕສ໋ວ ໄມ້ ມ່າຍ ຕ໋ອງ ເອກ້ມ ເຍີຍ ມ່ຽນ.

14ເມີ່ຍ ບົວ ອ໋ອຍ ຕສຸ່ນ ທສວດ ວົ້ວ ເຕີ໋ຍ ຝີງໆ ມ່ຽນ ເຊ ໝວັງ ໂຈ້ວ ທສິມ ເຖສົາ ໝັ່ງ ແໝ່ງ ເຍີຍ ມ່ຽນ. ມປ່າ ເມີ່ຍ ບົວ ແອ໊ະ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ໄມ້ ປຸນ ເມີ່ຍ ບົວ ຮນັ້ງ ວົ້ວ ເຕີ໋ຍ ມ່ຽນ ນໍ ໂຕສ໋ວ.

15ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ປຸນ ເຕົ້າ ໂຕ່ວ ຫວ່າ ມ່ຽນ ຮນັ້ງ ເຢຍ ນໍ, ຢຽມ ເມີ່ຍ ບົວ ເຍີຍ ກໍ໋-ໂຢ໌ວ ບຸດົ໋ງ ທສວດ ຕ້າຍ. ເມີ່ຍ ບົວ ອ໋ອຍ ຕສຸ ໝວັງ ນິ່ນ ເຍີຍ ຫວ່າ.

16ເຊ ຮນັ້ງ ຢຽມ ໂຮເລບ ບົງ ເມີ່ຍ ບົວ ໂທ້ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ. ເມີ່ຍ ບົວ ກ໊ອງ, “ໄມ້ ຕູ໋ງ ປຸນ ເຢຍ ບົວ ແອ໋ງ ໄຮ໌ ຕສ໊ຽວ, ເຢຍ ບົວ ເຍີຍ ທິນ-ຮູ່ງ ເຍີຍ ເຖຈຍ. ຢ່າ ໄມ້ ຕູ໋ງ ປຸນ ເຢຍ ບົວ ແອ໋ງ ປວັດ ນ້າຍ ກວ໋າ ຕົ້ມ ໂຕ໌ວ. ໄມ້ ເຕສີຍ ແອ໊ະ, ເດສ໋ຍ ເຢຍ ບົວ ຕສຸ ໄຕ່.”

17ຕສ໊ຽວ ກ໊ອງ ບົ໋ວ ເຢຍ, “ນິ່ນ ບົວ ຮນັ້ງ ນ້າຍ ກ໊ອງ ເຊ ຫລົງ ເຍີຍ.

18ເຢຍ ອ໋ອຍ ປຸນ ເຕົ້າ ໂຕ່ວ ຫວ່າ ມ່ຽນ ຮນັ້ງ ເມີ່ຍ ນໍ, ຢຽມ ນິ່ນ ບົວ ເຍີຍ ກໍ໋-ໂຢ໌ວ ບຸດົ໋ງ ທສວດ ຕ້າຍ. ເຢຍ ອ໋ອຍ ກ໊ອງ ເຍີຍ ຫວ່າ ເຢຍ ຈິວ ປຸນ ນິ່ນ. ນິ່ນ ຕສ່ຽວ ເຕສວີ້ຍ ຢ໊ຽດ ເຕສວີ້ຍ ເຫຍີ່ຍ ໂຕ່ວ ເຢຍ ບົ໋ວ ນິ່ນ ເຍີຍ ຢຽດ ຕສູ໊ງ ຫວ່າ ປຸນ ນິ່ນ ບົວ ໝວັງ.

19ຫາຍ ເຕົ້າ ໄມ້ ໝວັງ ນ້າຍ ເຕົ້າ ໂຕ່ວ ຫວ່າ ມ່ຽນ ເຕ໊ງ ເຢຍ ເຍີຍ ບົ໋ວ ໂຕ່ວ ເຍີຍ ຫວ່າ, ເຢຍ ກັ້ນ ຕສ່ຽວ ຕີ່ງ ວົ້ວ ເຕົ້າ ເຍີຍ ຕສຸ໌ຍ.

20ມປ່າ ເຊ ກ໊ອງ ມ່າຍ ຫາຍ ເຕົ້າ ໂຕ່ວ ຫວ່າ ມ່ຽນ ເຕ໊ງ ເຢຍ ເຍີຍ ບົ໋ວ ໂຕ່ວ ຕົ້ງ ເຢຍ ໄມ້ ບົ໋ວ ນິ່ນ ເຍີຍ ຫວ່າ, ໄຟ ເຕ໊ງ ກັ້ນ ເຕົ້າ ຕສ້ຽນ ເຍີຍ ບົ໋ວ ໂຕ່ວ ຫວ່າ, ວົ້ວ ເຕົ້າ ຕສູ໊ງ ອ໋ອຍ ຕສຸ ໄຕ່.”

21ເດສ໋ຍ ເມີ່ຍ ບົວ ຢຽມ ໂຮຍ້ວ ຮນ້ຳ, “ເຢຍ ບົວ ຮນັ້ງ ຫາຍ ນໍ ໄຮ່ ເຕສັ໊ຍ ຕຸ໊ ມ່ຽນ ໂຕ່ວ ເຍີຍ ຫວ່າ ເຊ ໄມ້ ເຕສີ໌ຍ ຕສ໊ຽວ ກ໊ອງ ເຍີຍ ຫວ່າ?”

22ເຊ ກ໊ອງ ໂຕ່ວ ຫວ່າ ມ່ຽນ ເຕ໊ງ ຕສ໊ຽວ ເຍີຍ ບົ໋ວ ໂຕ່ວ ຫວ່າ, ທສວດ ຕ້າຍ ເຍີຍ ສີ່ ຢ່າ ໄມ້ ຕ໋ອຍ ນິ່ນ ໂຕ່ວ ເຍີຍ ຫວ່າ, ວົ້ວ ເຕີ໋ຍ ຫວ່າ ໄມ້ ເຕສີ໌ຍ ຕສ໊ຽວ ກ໊ອງ ເຍີຍ ຫວ່າ. ວົ້ວ ເຕົ້າ ໂຕ່ວ ຫວ່າ ມ່ຽນ ກັ້ນ ຮນ້ຳ ທສວດ ຕ້າຍ ກ໊ອງ ຮນັ້ງ. ໄມ້ ຕູ໋ງ ກ້ຳ ເດສ໋ຍ ນິ່ນ.

← Chapter 17 Jump to: Chapter 19 →