Deuteronomy 22

Lao Bible (ฉบับอักษรลาว)

← Chapter 21 Jump to: Chapter 23 →

1ເຊ ກ໊ອງ ປວັດ ເມີ່ຍ ບົວ ເຍີຍ ກໍ໋-ໂຢ໌ວ ເຍີຍ ງົ່ງ ໄຟ ປະກີ ຢູ້ງ ຕ່ອງ ເຈົ໊າ ວົ້ວ ນ່າ, ໄມ້ ຕູ໋ງ ໂຕສ໋ວ ຮນັ້ງ ໄມ້ ເກວນ ໄມ້ ສີ່ ເຍີຍ. ຕສູ໊ງ ອ໋ອຍ ຕສຸ ເຄນ ດສ໋ວນ ປຸນ ເມີ່ຍ ເຍີຍ ກໍ໋-ໂຢ໌ວ.

2ເຊ ກ໊ອງ ວົ້ວ ເຕົ້າ ກໍ໋-ໂຢ໌ວ ເລີ່ຍ ເມີ່ຍ ບົວ ໂກ, ໄຟ ໄມ້ ຮິ້ວ ຕຸ໊ ຫາຍ ເຕົ້າ ເຍີຍ ແຊງ-ຄູ້, ອ໋ອຍ ຕສຸ ເຄນ ດສ໋ວນ ເມີ່ຍ ບົວ ເຍີຍ ເປຢົ໊າ ອັນ ຈ໊ຽນ ວົ້ວ, ຕສົ໊ວ ເມີ່ຍ ບົວ ເຍີຍ ກໍ໋-ໂຢ໌ວ ຕ້າຍ ລໍ໌ ຕສ່ຽວ ຝູງ ດສ໋ວນ ປຸນ ນິ່ນ.

3ກໍ໋-ໂຢ໌ວ ເຍີຍ ລໍ່ ໄຟ ນິ່ນ ເຍີຍ ລຸຍ ໄຟ ນິ່ນ ເຍີຍ ຫາຍ ຫຍູ່ງ ກະນ້າຍ ອ໋ອຍ ຕສຸ ຟີ່ ຮນັ້ງ ເຍີຍ ຝູງ ດສ໋ວນ. ໄມ້ ຕູ໋ງ ໂຕສ໋ວ ຮນັ້ງ ໄມ້ ເກວນ ໄມ້ ສີ່ ເຍີຍ.

4ເຊ ກ໊ອງ ປວັດ ກໍ໋-ໂຢ໌ວ ເຍີຍ ລໍ່ ໄຟ ງົ່ງ ດອບ ວົ້ວ ເຈົ໊າ, ໄມ້ ຕູ໋ງ ໂຕສ໋ວ ຮນັ້ງ ໄມ້ ເກວນ ໄມ້ ສີ່ ເຍີຍ. ອ໋ອຍ ຕສຸ ຫລຽບ ເຈ໌ຍ ຊິນ ຕ້າຍ.

5ມເຊັຍ ຕອນ ໄມ້ ຕູ໋ງ ຕສຸ໊ ມຈັ່ງ ຕອນ ເຍີຍ ລຸຍ-ໂຫວ. ມຈັ່ງ ຕອນ ຢ່າ ໄມ້ ຕູ໋ງ ຕສຸ໊ ມເຊັຍ ຕອນ ເຍີຍ ລຸຍ-ໂຫວ. ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ໂຢ໋ວ ໄຫ່ ໂຕສ໋ວ ນ້າຍ ຫຍູ່ງ ສີ່ ເຍີຍ ມ່ຽນ.

6ເຊ ກ໊ອງ ປວັດ ເໜາະ ເລົ໌າ ຢຽມ ວົ້ວ ເຈົ໊າ-ເຮລນ, ໄມ້ ກຸ໊ນ ຢຽມ ດຢັ໋ງ ໄຟ ກະເດ໊ຍ ເດົາ, ປວັດ ເໜາະ ມາ ປົ່ວ ຕອນ ໄຟ ປົ່ວ ເຈົ໋າ, ໄມ້ ຕູ໋ງ ລ່ຽມ ມາ ເຖສົາ ເໜາະ ຕອນ ເຕສ໊າະ.

7ຕສູ໊ງ ອ໋ອຍ ຕສຸ ປູ໋ງ ເໜາະ ມາ, ມປ່າ ເຕສ໊າະ ເໜາະ ຕອນ ຕຸ໊ ເຍີຍ. ຮນັ້ງ ໜ່າຍ ເມີ່ຍ ບົວ ຕສ່ຽວ ຕຸ໊ ຫລົງ, ຕສຢັ້ງ ຕຸ໊ ສ່ຽວ ຍ່ວນ ດ໊າວ.

8ເມີ່ຍ ບົວ ຫາຍ ຕສັ່ນ ໂຕສ໋ວ ຊຢັງ-ເປຢົ໊າ ອ໋ອຍ ຕສຸ ເວີ່ຍ ຈ໊ຽນ ເປຢົ໊າ-ງໍ່ ເຍີຍ ເປຢີຍ ປູງ ຮລັງ ເຕີ໋ຍ. ເຊ ກ໊ອງ ມ່ຽນ ດ໊ອດ ໄຕ່, ເປຢົ໊າ ຕສົງ ມ່ຽນ ຕສ່ຽວ ໄມ້ ຕສຸ ດາມ-ຕອງ.

9ໄມ້ ຕູ໋ງ ເຕສ໊າະ ກັ້ນ ຫຍູ່ງ ຍິມ ຕສວັ໋ງ ເມີ່ຍ ບົວ ເຍີຍ ອະຫງຸ່ນ ຫຮວີງ. ເຊ ກ໊ອງ ຮນັ້ງ ນ້າຍ ໂຕສ໋ວ, ລ່ຽມ ຕສວັ໋ງ ເຍີຍ ກະນ້າຍ ເຖສົາ ອະຫງຸ່ນ ປ໊ຽວ, ກັ້ນ ໄມ້ ຕຸ໊ ຫລົ່ງ. ອ໋ອຍ ຕສຸ ຕໍ້ ມີ່ງ ຕສັ່ງ ທິນ-ຮູ່ງ ເຍີຍ ເປຢົ໊າ.

10ໄມ້ ຕູ໋ງ ຫລົ່ງ ງົ່ງ ເຖສົາ ລໍ່ ຈວັ່ງ ດຢັ໋ງ-ກ໌າ ດາມ ໄລ່ ເດົາ.

11ໄມ້ ຕູ໋ງ ຕສຸ໊ ປະກີ ຢູ້ງ ເປຢີຍ ເຖສົາ ຫລະມ່າ ສຸຍ ຕສອບ ຈ໊ຽນ ດັ໊ດ ຕ້າຍ ເຍີຍ ລຸຍ.

12ເມີ່ຍ ບົວ ຕສຸ໊ ເຍີຍ ຕົ້ມ ລຸຍ-ດ໊າວ, ລຸຍ-ຊຢາມ-ເຈັ໊ຍ ເຍີຍ ເປຢີຍ ນອມ ເກ໊າະ ອ໋ອຍ ຕສຸ ຕີ໋ງ ຈ໊ຽນ ອກີ້ງ ໂອກວ.

13ເຊ ກ໊ອງ ມ່າຍ ເຕົ້າ ມ່ຽນ ຫລົ່ງ ເອົ໊າ ຢ່າ ເຖສົາ ນິ່ນ ເປວີ໋ຍ, ອກະຮ້າ ດສອງ ນິ່ນ,

14ຕສ່ຽວ ລໍ໌ ເຈົ໊າ ກ໊ອງ ໂຕະ ປ່າຍ ເອົ໊າ ເຍີຍ ເມ່ງ ເຕົ້າ. ນິ່ນ ກ໊ອງ, “ເຢຍ ຫລົ່ງ ວົ້ວ ຕສັ່ນ ເຢຍ ໄມ້ ປວັດ ນິ່ນ ມ່າຍ ຈັ໋ງ-ໂຫ່ ປຸນ ທສີງ ນິ່ນ ເຊ ໄມ້ ເປວີ໋ຍ ເຈ໋ຍ ຕອນ ເຍີຍ ເຊັຍ.”

15ເຊັຍ ເຍີຍ ເຕ໋ຍ ໝ່າ ຕສ່ຽວ ອ໋ອຍ ຕສຸ ຕໍ້ ຫຍູ່ງ ຈັ໋ງ-ໂຫ່ ທສວດ ຕ້າຍ ມີ່ງ ເຖົາ ຕສີ້ງ ແກ້ງ ດ່າງ, ມ່ຽນ ໂກ໋ ວົ້ວ, ປຸນ ທສີງ ນິ່ນ ບົວ ເຍີຍ ເຊັຍ ໄມ້ ເປວີ໋ຍ ເຈ໋ຍ ຕອນ.

16ເຊັຍ ເຍີຍ ເຕຍ ຕສ່ຽວ ກ໊ອງ ບົ໋ວ ມ່ຽນ ໂກ໋, “ເຢຍ ປຸນ ເຢຍ ເຍີຍ ເຊັຍ ນ້າຍ ເຕົ້າ ມ່ຽນ ຫລົ່ງ ໂຕສ໋ວ ເອົ໊າ ມປ່າ ອີ້ ຕສັ່ນ ນິ່ນ ດສອງ.

17ນິ່ນ ຕສູ໊ງ ກ໊ອງ ໂຕະ ເຢຍ ເຍີຍ ເຊັຍ. ນິ່ນ ກ໊ອງ, ‘ເຢຍ ໄມ້ ປວັດ ເມີ່ຍ ເຍີຍ ເຊັຍ ມ່າຍ ຈັ໋ງ-ໂຫ່ ປຸນ ທສີງ ນິ່ນ ໄມ້ ເປວີ໋ຍ ເຈ໋ຍ ຕອນ.’ ຕົ້ງ ນ້າຍ ອ໊ະ! ນ້າຍ ໂຕສ໋ວ ຈັ໋ງ-ໂຫ່ ປຸນ ທສີງ ເຢຍ ເຍີຍ ເຊັຍ ໄມ້ ດສຢ່າວ ເຈ໋ຍ ຕອນ.” ເຊັຍ ເຍີຍ ເຕ໋ຍ ໝ່າ ຕສ່ຽວ ເຕສ໊າະ ໂຕສ໋ວ ຈັ໋ງ-ໂຫ່ ວົ້ວ ຄວ້າຍ ເດຍ ທານ ຈ໊ຽນ ມ່ຽນ ໂກ໋ ເຍີຍ ດສະຮມຽນ ໂຕສ໋ວ ຕສອງ-ເຕສ໋ງ.

18ວົ້ວ ນອມ ຕສີ້ງ ເຍີຍ ມ່ຽນ ໂກ໋ ຕສ່ຽວ ເຕສ໊າະ ວົ້ວ ເຕົ້າ ໂອກ໋ ຕ້າຍ ຫລົ່ງ ປຢ໊າ-ປິນ ເບ໊າະ,

19ແອ໋ງ ປາດ ນິ່ນ ຫຍີ່ ຕສຽບ ຫລົວະ ລູ໌ງ ຍ່ານ ຈິວ ປຸນ ເຊັຍ ເຍີຍ ເຕຍ, ເຫວີ່ຍ ຕສຸ ນິ່ນ ປຸນ ຢຽດ ເຕົ້າ ໄມ້ ເປວີ໋ຍ ເຈ໋ຍ ໂອກ໋ ເຍີຍ ອິສະລາເອນ ເຊັຍ ດ໊ອດ ເມ່ງ ເຕົ້າ. ວົ້ວ ເຕົ້າ ເຊັຍ ຖສໍ່ ເປ໋ນ ນິ່ນ ເຍີຍ ເອົ໊າ, ນິ່ນ ຢຽດ ລິ໌ວ ໄມ້ ໄຮ່ ເລີ່ຍ ກວັ່ງ.

20ມປ່າ ເຊ ກ໊ອງ ນິ່ນ ໂກ໋ ເຍີຍ ຫວ່າ ຕສຽນ ເຍີຍ, ເຊັຍ ຢ່າ ລໍ໌ ໄມ້ ຕຸ໊ ຫາຍ ຫຍູ່ງ ໂຕສ໋ວ ຕສອງ-ເຕສ໋ງ ປຸນ ທສີງ ນິ່ນ ໄມ້ ດສຢ່າວ ເຈ໋ຍ ຕອນ,

21ນິ່ນ ບົວ ຕສ່ຽວ ຕໍ້ ນ້າຍ ເຕົ້າ ເຊັຍ ທສວດ ຕ້າຍ ຢຽມ ນິ່ນ ເຍີຍ ເຕຍ ເຍີຍ ເປຢົ໊າ ເຍີຍ ແກ້ງ ດ່າງ. ວົ້ວ ນອມ ຕສີ້ງ ເຍີຍ ຕສວັ໋ງ ມຈັ່ງ ຕອນ ຕສ່ຽວ ເຕສ໊າະ ຫລະເປຢີ໊ຍ ຕສົງ ໄຕ່, ເຫວີ່ຍ ຕສຸ ນິ່ນ ຢຽມ ອິສະລາເອນ ມ່ຽນ ບຸດົ໋ງ ໂຕສ໋ວ ໄຍ້ ໄຫ່ ເຍີຍ ສີ່. ນິ່ນ ຖສໍ່ ຢຽມ ນິ່ນ ເຍີຍ ເຕຍ ເຍີຍ ເປຢົ໊າ ວົ້ວ ຕສັ່ນ ນິ່ນ ໂຕສ໋ວ ຮນັ້ງ ໝ່າຍ ປ໊ວນ-ຊິນ ເຍີຍ ມເຊັຍ ຕອນ ນໍ. ຮນັ້ງ ນ້າຍ ໂຕສ໋ວ, ຕສ່ຽວ ປຸນ ຢຽມ ເມີ່ຍ ບົວ ບຸດົ໋ງ ໄມ້ ມ່າຍ ນ້າຍ ຫຍູ່ງ ເອ໊າະ ສີ່.

22ເຊ ກ໊ອງ ປວັດ ເຕົ້າ ມ່ຽນ ຫຮຢຽນ ກັ້ນ ເຕົ້າ ມ່ຽນ ເຍີຍ ເອົ໊າ, ອີ ເຕົ້າ ຕສູ໊ງ ອ໋ອຍ ຕສຸ ຕີ່ງ ຕສຸ໌ຍ ໄຕ໋ ໄຕ່. ຮນັ້ງ ນ້າຍ ໂຕສ໋ວ ຕສ່ຽວ ປຸນ ຢຽມ ອິສະລາເອນ ມ່ຽນ ບຸດົ໋ງ ໄມ້ ມ່າຍ ນ້າຍ ຫຍູ່ງ ເອ໊າະ ສີ່.

23ເຊ ກ໊ອງ ມ່າຍ ເຕົ້າ ໄມ້ ດສຢ່າວ ເຈ໋ຍ ຕອນ ເຍີຍ ເຊັຍ, ມ່ຽນ ຢ່າ ກ໊ອງ ຕສຢັ້ງ ນິ່ນ ໝີ່ ອ໊ະ, ມ່າຍ ເຕົ້າ ມຈັ່ງ ຕອນ ປວັ້ງ ຕສຸ ນິ່ນ ຢຽມ ວົ້ວ ຕສີ້ງ ຕສ່ຽວ ເຖສົາ ນິ່ນ ເປວີ໋ຍ,

24ເມີ່ຍ ບົວ ອ໋ອຍ ຕສຸ ຕໍ້ ນິ່ນ ບົວ ອີ ເຕົ້າ ທສວດ ກະເຫຍ່ຍ ຕສິ ຕສີ້ງ ແກ້ງ ດ່າງ ແອ໋ງ ຫລົ່ງ ຫລະເປຢີ໊ຍ ຕສົງ ໄຕ່ ນິ່ນ ບົວ. ວົ້ວ ເຕົ້າ ເຊັຍ ຕສຸ ໄຕ໋ ໄຕ່ ເຫວີ່ຍ ຕສຸ ນິ່ນ ຢຽມ ຕສີ້ງ ກະຍົ໌ວ ຢ່າ ໄມ້ ເຫ່ວ ບຸຍ ໂທ້ ມ່ຽນ ຕ້າຍ ເຖງ. ວົ້ວ ເຕົ້າ ມຈັ່ງ ຕອນ ໄຕ່ ເຫວີ່ຍ ຕສຸ ນິ່ນ ຫຮຢຽນ ກັ້ນ ເຕົ້າ ມ່ຽນ ເຍີຍ ເອົ໊າ. ຮນັ້ງ ນ້າຍ ໂຕສ໋ວ ຕສ່ຽວ ປຸນ ຢຽມ ເມີ່ຍ ບົວ ບຸດົ໋ງ ໄມ້ ມ່າຍ ນ້າຍ ຫຍູ່ງ ເອ໊າະ ສີ່.

25ມປ່າ ເຊ ກ໊ອງ ມ່າຍ ເຕົ້າ ມຈັ່ງ ຕອນ ປວັ້ງ ຕສຸ ເຕົ້າ ຕົ້ງ ມ່ຽນ ກ໊ອງ ຕສຢັ້ງ ເຍີຍ ເຊັຍ ຢຽມ ວົ້ວ ນ່າ ຕສ່ຽວ ເຕສ໊າະ ຈ໊ຽນ ນ້າຍ ເຕົ້າ ເຊັຍ ທສາ, ຂູງ ອ໋ອຍ ຕສຸ ເຕສ໊າະ ນ້າຍ ເຕົ້າ ມຈັ່ງ ຕອນ ໄຕ໋ ໄຕ່ ຮນັ້ງ.

26ໄມ້ ຕູ໋ງ ໂຕສ໋ວ ຫາຍ ຫຍູ່ງ ປຸນ ວົ້ວ ເຕົ້າ ເຊັຍ ເຫວີ່ຍ ຕສຸ ນິ່ນ ໄມ້ ໂຕສ໋ວ ຫາຍ ຫຍູ່ງ ຕສຸ໌ຍ ຕສີ່ ຕຸ໊ ໄຕ່. ນ້າຍ ຫຍູ່ງ ສີ່ ເຊ ຮນັ້ງ ມ່ຽນ ປ່າໆ ມີ່ງ ເບ໊າະ ໄຕ່ ເຕົ້າ ນິ່ນ ເຍີຍ ລ໌າງ ຕສັ່ງ ມ່ຽນ,

27ເຫວີ່ຍ ຕສຸ ນ້າຍ ເຕົ້າ ມຈັ່ງ ຕອນ ຢຽມ ວົ້ວ ນ່າ ປວັ້ງ ຕສຸ ນ້າຍ ເຕົ້າ ຕົ້ງ ມ່ຽນ ກ໊ອງ ຕສຢັ້ງ ເຍີຍ ເຊັຍ ຕສ່ຽວ ທສາ ນິ່ນ. ໄມ້ ກຸ໊ນ ເຊັຍ ທຈະ ເຫ່ວ ຢ່າ ໄມ້ ມ່າຍ ຫາຍ ເຕົ້າ ຕ້າຍ ໂອຈ໋ວ ນິ່ນ.

28ເຊ ກ໊ອງ ມ່າຍ ເຕົ້າ ມຈັ່ງ ຕອນ ປວັ້ງ ເຕົ້າ ໄມ້ ດສຢ່າວ ເຈ໋ຍ ຕອນ ຢ່າ ໄມ້ ມ່າຍ ມ່ຽນ ກ໊ອງ ຕສຢັ້ງ ເຍີຍ ເຊັຍ ຕສ່ຽວ ເຕສ໊າະ ຈ໊ຽນ ນິ່ນ ທສາ ຢ່າ ມ່າຍ ມ່ຽນ ປວັດ,

29ທສາ ເຊັຍ ວົ້ວ ເຕົ້າ ມຈັ່ງ ຕອນ ອ໋ອຍ ຕສຸ ປຸນ ຕສຽບ ຮມ໌ ລູ໌ງ ຍ່ານ ເຊັຍ ເຍີຍ ເຕຍ ເຫວີ່ຍ ຕສຸ ນິ່ນ ປ່າຍ ວົ້ວ ເຕົ້າ ເຊັຍ. ເຊັຍ ຕສ່ຽວ ເປ໋ນ ນິ່ນ ເຍີຍ ເອົ໊າ ໝີ່ ອ໊ະ. ນິ່ນ ຢຽດ ລິ໌ວ ໄມ້ ໄຮ່ ເລີ່ຍ ກວັ່ງ.

30ມ່ຽນ ໄມ້ ຕູ໋ງ ຫລົ່ງ ເຕຍ ເຍີຍ ເອົ໊າ ໂຕສ໋ວ ກັ້ນ ເຍີຍ ເອົ໊າ. ຮນັ້ງ ນ້າຍ ໂຕສ໋ວ ປ່າຍ ຕສຸ ກັ້ນ ເຍີຍ ເຕຍ.

← Chapter 21 Jump to: Chapter 23 →