Deuteronomy 19

Lao Bible (ฉบับอักษรลาว)

← Chapter 18 Jump to: Chapter 20 →

1ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຕສ໊າະ ນິ່ນ ອ໋ອຍ ຈິວ ປຸນ ເມີ່ຍ ບົວ ວົ້ວ ນອມ ເຕີ່ຍ-ປູງ ວົ້ວ ເຕີ໋ຍ ກົ໊ວະ ເຍີຍ ມ່ຽນ ໄພ ກວັ່ງ ວົ້ວ ຕສັ່ນ, ເມີ່ຍ ບົວ ຢ່າ ຕຸ໊ ຕສຸ່ນ ນິ່ນ ບົວ ທສວດ, ເປັຍ ມີ່ງ ຢຽມ ຈ໊ຽນ ນິ່ນ ບົວ ເຍີຍ ຕສີ້ງ ເຖສົາ ນິ່ນ ບົວ ເຍີຍ ເປຢົ໊າ,

2ອ໋ອຍ ຕສຸ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ດສິບ ວົ້ວ ນອມ ເຕີ່ຍ-ປູງ ກັ້ນ ຖສະເຫລ່ງ ກິ໊ນ ທສວດ ປົວ ນອມ ຕສີ້ງ.

3ອ໋ອຍ ຕສຸ ຄອຍ ເຈົ໊າ ມີ່ງ ເຖົາ ວົ້ວ ເຕີ໋ຍ ຕສີ້ງ, ຢ່າ ເຕສ໊າະ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ດສິບ ເຍີຍ ເຕີ່ຍ-ປູງ ປຸນ ໂຕສ໋ວ ປົວ ໂກ໊ວ ເຫວີ່ຍ ປຸນ ທສະ-ໂປ່ວ ໄຕ໋ ມ່ຽນ ເຍີຍ ມ່ຽນ ໄຮ່ ເປຢົ໋າ ມີ່ງ ວົ້ວ ເຕີ໋ຍ ຕສີ້ງ ຢຽມ.

4ຢຽມ ນ້າຍ ມີ່ງ ກ໊ອງ ມ່ຽນ ໄຕ໋ ມ່ຽນ ເປຢົ໋າ ມີ່ງ ຢຽມ ເສຍ ແໝ່ງ ຕສີ້ງ ເຫວີ່ຍ ໂອຈ໋ວ ແໝ່ງ ເຍີຍ ເຈົ໊າ-ໂຫລ່ວ, ເຊ ມ່ຽນ ທສະ-ໂປ່ວ ໄຕ໋ ຕສຸ ມ່ຽນ ໄຕ່, ໄມ້ ເຕສີ໌ຍ ລ່ານ ຫັ່ນ ລ່ານ ໄຕ໋.

5ຮນັ້ງ ມ່ຽນ ເຖສົາ ເຕົ້າ ຈວັ່ງ ລ໌າງ ເຍີຍ ຕ່ອຍ ເປັຍ ຫລົ່ມ ກ໋ອຍ ດຢັ໋ງ. ນິ່ນ ເຝງ ໂປ໊ວ ກ໋ອຍ ດຢັ໋ງ ວົ້ວ ຕສັ່ນ, ໂປ໊ວ ດຸ໊ດ ມີ່ງ ເບ໊າະ ຕສຸ ນິ່ນ ເຍີຍ ຕ່ອຍ ໄຕ່. ນິ່ນ ຕສ່ຽວ ເປຢົ໋າ ມີ່ງ ຢຽດ ນອມ ນ້າຍ ເຕີ໋ຍ ຕສີ້ງ ໂອຈ໋ວ ນິ່ນ ເຍີຍ ແໝ່ງ.

6ໄມ້ ເຕສີຍ ແອ໊ະ, ອ໋ອຍ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ເຖຈຍ ເຈ໌ຍ! ໄຫ່, ຕສຸ່ນ ນິ່ນ. ເຊ ກ໊ອງ ເຈົ໊າ ປະຫລະ ໂກ, ຕສຸ່ນ ຕຸ໊ ຕສ່າຍ ຢ່າ ໄຕ໋ ນິ່ນ ໄມ້ ກຸ໊ນ ໄມ້ ຫອບ ຕສຸ ໄຕ່, ເຫວີ່ຍ ຕສຸ ນິ່ນ ໄມ້ ເຕສີ໌ຍ ຫັ່ນ ນິ່ນ ເຍີຍ ຕ່ອຍ ຖສີງ ໄຕ໋.

7ເຫວີ່ຍ ນ້າຍ ເຢຍ ຫັດ ເມີ່ຍ ບົວ ອ໋ອຍ ຕສຸ ກັ້ນ ຖສະເຫລ່ງ ກິ໊ນ ທສວດ ປົວ ນອມ ຕສີ້ງ.

8ເຊ ກ໊ອງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ທສັບ ເມີ່ຍ ບົວ ເຍີຍ ກັ໊ບ-ຈ໋າຍ ທສວດ ຕສິ໋ວ ນິ່ນ ໂຮ້ວ ປຸນ ເມີ່ຍ ບົວ ເຍີຍ ອົງ-ຖາຍ, ຢ່າ ເຕສ໊າະ ນິ່ນ ແລ໌ງ ປຸນ ນິ່ນ ບົວ ເຍີຍ ເຕີ່ຍ-ປູງ ຢຽດ ຕສູ໊ງ ຈິວ ປຸນ ເມີ່ຍ ບົວ,

9ຢ່າ ຕະຟ່ານ ເມີ່ຍ ບົວ ເອີຍ ຈ໊ຽນ ເຢຍ ອີ້ ຮນອຍ ຫັດ ເມີ່ຍ ບົວ ເຍີຍ ຢຽດ ຕສູ໊ງ ເລີ໌ຍ, ເຊ ຮນ້ຳ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕສັ່ນໆ ຢັ້ງ ນິ່ນ ເຍີຍ ເຈົ໊າ, ເມີ່ຍ ບົວ ອ໋ອຍ ຕສຸ ແອ໋ງ ກັ້ນ ຖສະເຫລ່ງ ທິບ ປົວ ນອມ ຕສີ້ງ.

10ອ໋ອຍ ຕສຸ ທິບ ນ້າຍ ເຕີ໋ຍ ຕສີ້ງ ເຫວີ່ຍ ປຸນ ໄມ້ ໂຕສ໋ວ ຕ່ອງ ເຍີຍ ມ່ຽນ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ດສິບ ເຍີຍ ເຕີ່ຍ-ປູງ ໄມ້ ຕສຸ ໄຕ໋ ໄຕ່. ເມີ່ຍ ບົວ ກັ້ນ ຢ່າ ໄມ້ ຕສຸ ເຫວີ່ຍ ນ້າຍ ເຕີ໋ຍ ສີ່ ຕສຸ ດາມ-ຕອງ.

11ມປ່າ ເຊ ກ໊ອງ ມ່າຍ ເຕົ້າ ມ່ຽນ ດສອງ ເຖສົາ ນິ່ນ ຈວັ່ງ ລ໌າງ ມ່ຽນ ຕສ່ຽວ ປີ໋ງ ຈ໊ຽນ ຕສົ໊ວ ເບ໊າະ ໄຕ່ ນິ່ນ, ວົ້ວ ເຕົ້າ ຕສ່ຽວ ເປຢົ໋າ ມີ່ງ ເຖົາ ຢຽດ ນອມ ວົ້ວ ເຕີ໋ຍ ເສຍ ແໝ່ງ ຕສີ້ງ,

12ນິ່ນ ກັ້ນ ເຍີຍ ປ໊ວນ-ຕສີ້ງ ເຍີຍ ມ່ຽນ ໂກ໋ ອ໋ອຍ ຕສຸ ພ້າຍ ມ່ຽນ ມີ່ງ ເຕສ໊າະ ນິ່ນ ດສ໋ວນ ຕ້າຍ ຈິວ ປຸນ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ໄຕ໋ ນິ່ນ ໄຕ່.

13ເມີ່ຍ ບົວ ໄມ້ ຕູ໋ງ ຄໍ້-ລ່ຽນ ນິ່ນ. ຢຽມ ອິສະລາເອນ ມ່ຽນ ບຸດົ໋ງ ອ໋ອຍ ຕສຸ ປຸນ ໄມ້ ມ່າຍ ໄຕ໋ ໄມ້ ໂຕສ໋ວ ຕ່ອງ ເຍີຍ ມ່ຽນ ເຍີຍ ສີ່, ເຫວີ່ຍ ປຸນ ເມີ່ຍ ບົວ ຕຸ໊ ຫລົງ.

14ເມີ່ຍ ບົວ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ຈິວ ປຸນ ເມີ່ຍ ບົວ ເຍີຍ ເຕີ່ຍ-ປູງ, ໄມ້ ຕູ໋ງ ຊຸ້ຍ ຈວັ່ງ ລ໌າງ ມ່ຽນ ເຍີຍ ເດົາ-ເຕີ່ຍ ກັ໊ບ-ເອກ໋ນ ໂຕສ໋ວ ຈັ໋ງ-ໂຫ່ ເຍີຍ ຫລະເປຢີ໊ຍ-ຕົ່ງ. ນ້າຍ ເຊ ຕສິ້ນ ປານ ມ່ຽນ ຕີ່ງ ຕ້າຍ ເຍີຍ ກັ໊ບ-ຈ໋າຍ.

15ໄມ້ ກຸ໊ນ ມ່ຽນ ປ໌າມ ຫາຍ ຫຍູ່ງ ຕສຸ໌ຍ ໄຟ ໂຕສ໋ວ ຕ່ອງ ຫາຍ ຫຍູ່ງ ສີ່, ດຸ ເຕົ້າ ມ່ຽນ ໂຕສ໋ວ ຕສອງ-ເຕສ໋ງ ເຊ ໄມ້ ເກົ໋າ ຕີ່ງ ນິ່ນ ເຍີຍ ຕສຸ໌ຍ. ອ໋ອຍ ຕສຸ ມ່າຍ ອີ ໄຟ ປົວ ເຕົ້າ ໂຕສ໋ວ ຕສອງ-ເຕສ໋ງ ຖສີງ ຕີ່ງ.

16ເຊ ກ໊ອງ ມ່າຍ ເຕົ້າ ມ່ຽນ ໂຕສ໋ວ ຈ໊າ ຕສອງ-ເຕສ໋ງ ອ໋ອຍ ຫ່ອຍ ມ່ຽນ,

17ນ້າຍ ເຕີ໋ຍ ອີ ເຕົ້າ ມ່າຍ ສີ່ ເຍີຍ ມ່ຽນ ອ໋ອຍ ຕສຸ ມີ່ງ ຢຽມ ຕສ໊ຽວ ເຍີຍ ດສະຮມຽນ, ຕອງ ຈ໊ຽນ ຕົ້ງ ວົ້ວ ຕສັ່ນ ໂຕສ໋ວ ໄຊ ມ່ຽນ ເຍີຍ ກົງ ເຍີຍ ໄຊ ມ່ຽນ ເຖສົາ ຊ້ຽມ ຕສຸ໌ຍ ຈຽນ.

18ຊ້ຽມ ຕສຸ໌ຍ ຈຽນ ຕສ່ຽວ ຫລົງໆ ເຍີຍ ຕສ້າ ໝ່ວນ ນິ່ນ ບົວ ເຍີຍ ສີ່. ເຊ ກ໊ອງ ຕສ້າ ທສວດ ຕສອງ-ເຕສ໋ງ ມ່ຽນ ກ໊ອງ-ແປະ, ໂຕສ໋ວ ຈ໊າ ຕສອງ-ເຕສ໋ງ ຫ່ອຍ ນິ່ນ ເຍີຍ ກໍ໋-ໂຢ໌ວ,

19ອ໋ອຍ ຕສຸ ໂຕສ໋ວ ປຸນ ນິ່ນ ຮນັ້ງ ນິ່ນ ເຈ໌ຍ ໂຮຍ້ວ ໂຕສ໋ວ ປຸນ ນິ່ນ ເຍີຍ ກໍ໋-ໂຢ໌ວ ນໍ. ອ໋ອຍ ຕສຸ ປຸນ ນ້າຍ ເຕີ໋ຍ ເອ໊າະ ສີ່ ຢຽມ ເມີ່ຍ ບົວ ບຸດົ໋ງ ຕສຸດ ເດສ່ງ.

20ຕສວັ໋ງ ມ່ຽນ ໄຮ໌ ນ້າຍ ເຕີ໋ຍ ສີ່ ຕສ່ຽວ ກ້ຳ ເດສ໋ຍ ໄຫ່. ຢຽມ ເມີ່ຍ ບົວ ບຸດົ໋ງ ຢຽດ ລິ໌ວ ໄມ້ ມ່າຍ ມ່ຽນ ກ໊າມ ໂຕສ໋ວ ນ້າຍ ຫຍູ່ງ ເອ໊າະ ສີ່.

21ໄມ້ ຕູ໋ງ ຄໍ້-ລ່ຽນ ນ້າຍ ຫຍູ່ງ ມ່ຽນ. ອ໋ອຍ ຕສຸ ແໝ່ງ ຈ໊າວ ແໝ່ງ, ມຕສີງ ຈ໊າວ ມຕສີງ, ຍ່າ ຈ໊າວ ຍ່າ, ປົ໌ວ ຈ໊າວ ປົ໌ວ, ເຕສົ໋າ ຈ໊າວ ເຕສົ໋າ.

← Chapter 18 Jump to: Chapter 20 →