Deuteronomy 30

Lao Bible (ฉบับอักษรลาว)

← Chapter 29 Jump to: Chapter 31 →

1ເຢຍ ຕອງ ຈ໊ຽນ ເມີ່ຍ ບົວ ກ໊ອງ ນ້າຍ ເຕີ໋ຍ ຫວ່າ, ເຊ ຢຽດ ຕສູ໊ງ ປວັງ ເຍີຍ ຫວ່າ ເຖສົາ ຕສ໋ຽວ ເຍີຍ ຫວ່າ, ທສວດ ຕ້າຍ ຕ໋ອຍ-ຕິ່ວ ວົ້ວ ຕສັ່ນ, ເມີ່ຍ ບົວ ຢ່າ ຕສຸ ຢຽມ ດສ໋ານ, ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ປຸນ ເມີ່ຍ ບົວ ຢຽມ ວົ້ວ ເຕີ໋ຍ ໝ່ານ ກົ໊ວະ ບຸດົ໋ງ, ເມີ່ຍ ບົວ ຢ່າ ຮນ້ຳ-ດສ໋ວນ ຈັ໋ງ ຕສຸ ນ້າຍ ເຕີ໋ຍ ຫວ່າ,

2ເມີ່ຍ ບົວ ເຖສົາ ເມີ່ຍ ບົວ ເຍີຍ ເຕສີ໊ຍ-ຟຸນ ຕສ່ຽວ ດສ໋ວນ ຕ້າຍ ລໍ໌ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຢ່າ ຫລົ່ງ ເດສ່ງ ໂຮຍ້ວ, ຫລົ່ງ ເດສ່ງ ຕສະເອີ໋ຍ, ໝວັງ ອີ້ ຮນອຍ ເຢຍ ຫັດ ເມີ່ຍ ບົວ ເຍີຍ ຢຽດ ຕສູ໊ງ ຫວ່າ,

3ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕສ່ຽວ ປຸນ ເມີ່ຍ ບົວ ຕຸ໊ ຫລົງ ຮນັ້ງ ໂລ໌ ວົ້ວ ນໍ. ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ຄໍ້-ລ່ຽນ ເມີ່ຍ ບົວ. ນິ່ນ ອ໋ອຍ ຊຽວ ເມີ່ຍ ບົວ, ຕົ້ງ ນິ່ນ ປຸນ ດສ໋ານ ຢຽມ ໝ່ານ ຝີງ ບຸດົ໋ງ ເຍີຍ ມ່ຽນ, ດສ໋ວນ ຕ້າຍ ກັ໊ບ ຕສຸ໊ນ.

4ໄມ້ ກຸ໊ນ ເມີ່ຍ ບົວ ຕສຸ ດສ໋ານ ມີ່ງ ຢຽມ ລູ່ງ ເດ໊ຍ ເກົ້າ ໂກ ເຈ໋ຍ ເຍີຍ ຕ໋ອງ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ຢຽມ ວົ້ວ ຊຽວ ຕສຸ໊ນ, ຕໍ້ ເມີ່ຍ ບົວ ດສ໋ວນ ຕ້າຍ.

5ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ຕໍ້ ເມີ່ຍ ບົວ ເປັຍ ມີ່ງ ຢຽມ ຕສິ້ນ ດ່າງ ເປ໋ນ ເມີ່ຍ ບົວ ເຍີຍ ອົງ-ຖາຍ ເຍີຍ ເຕີ່ຍ-ປູງ, ຢ່າ ອ໋ອຍ ປຸນ ເມີ່ຍ ບົວ ຕຸ໊ ເກົ້າ ຫລົງ ເກົ້າ ເປ໋ນ, ປຸນ ເມີ່ຍ ບົວ ເກົ້າ ຫຮຢາງ ເມີ່ຍ ບົວ ເຍີຍ ອົງ-ຖາຍ.

6ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ຈ໊ຳ ເມີ່ຍ ບົວ ເຖສົາ ເມີ່ຍ ບົວ ເຍີຍ ເຕສີ໊ຍ-ຟຸນ ເຍີຍ ໂຮຍ້ວ, ປຸນ ເມີ່ຍ ບົວ ຫລົ່ງ ເດສ່ງ ໂຮຍ້ວ, ຫລົ່ງ ເດສ່ງ ຕສະເອີ໋ຍ ຮນ້ຳ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຫວີ່ຍ ປຸນ ເມີ່ຍ ບົວ ຕຸ໊ ຕສຢັ້ງ ຈ໊ຽນ.

7ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ປຸນ ເມີ່ຍ ບົວ ເຍີຍ ວິນ-ວັ້ງ, ຕົ້ງ ດສອງ ເມີ່ຍ ບົວ, ໂຕສ໋ວ ໂຕະ ເມີ່ຍ ບົວ ວົ້ວ ເຕີ໋ຍ, ຕສຸ ນ້າຍ ເຕີ໋ຍ ຢຽດ ຕສູ໊ງ ຕສ໋ຽວ ເຍີຍ ຫວ່າ.

8ເມີ່ຍ ບົວ ແອ໋ງ ອ໋ອຍ ດສ໋ວນ ຕ້າຍ ໝວັງ ຕສ໊ຽວ, ຢ່າ ເອີຍ ເດສ່ງ ເຢຍ ອີ້ ຮນອຍ ຈິວ ປຸນ ເມີ່ຍ ບົວ ເຍີຍ ຢຽດ ຕສູ໊ງ ຫລີ່ງ.

9ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ປຸນ ເມີ່ຍ ບົວ ໂຕສ໋ວ ເຍີຍ ຫຍູ່ງໆ ກົງ ຕຸ໊ ຫລົງ, ປຸນ ເມີ່ຍ ບົວ ຕຸ໊ ຝຸຈ໊ວຍ ທສ້ຳ, ຕຸ໊ ແຊງ-ຄູ້ ທສ້ຳ, ປຸນ ເດົາ ທສວດ ແກງ-ຕສວັ໋ງ ຫລົງ. ຕສ໊ຽວ ແອ໋ງ ອ໋ອຍ ອະເຮນີ້ຍ ເມີ່ຍ ບົວ, ປຸນ ເມີ່ຍ ບົວ ຕຸ໊ ຫລົງ, ຮນັ້ງ ນິ່ນ ອະເຮນີ້ຍ ເມີ່ຍ ບົວ ເຍີຍ ອົງ-ຖາຍ ນໍ.

10ນິ່ນ ຮນັ້ງ ນ້າຍ ໂຕສ໋ວ ເຊ ກ໊ອງ ເມີ່ຍ ບົວ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ຫວ່າ, ເອີຍ ຈ໊ຽນ ນ້າຍ ປ໊ວນ ເລີ໌ຍ-ຫລັດ ໂຊວ ເຟ້ຍ ຈ໊ຽນ ເຍີຍ ເລີ໌ຍ-ຫລັດ ເຖສົາ ຫລີ່ງ, ຢ່າ ຫລົ່ງ ເດສ່ງ ໂຮຍ້ວ, ຫລົ່ງ ເດສ່ງ ຕສະເອີ໋ຍ ດສ໋ວນ ຕ້າຍ ລໍ໌ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.

11ເຢຍ ອີ້ ຮນອຍ ຫັດ ເມີ່ຍ ບົວ ເຍີຍ ເລີ໌ຍ-ຫລັດ ເຊ ໄມ້ ເຕສີ໌ຍ ເຫວີ່ຍ ເມີ່ຍ ບົວ ອະ ເຈ໋ຍ ດ່າງ, ຢ່າ ໄມ້ ເຕສີ໌ຍ ເລີ່ຍ ເມີ່ຍ ບົວ ໂກ.

12ເຊ ໄມ້ ເຕສີ໌ຍ ຢຽມ ກູ້ ຫງວ່າຍ ລູ່ງ ເມີ່ຍ ບົວ ຕສ່ຽວ ກ໊ອງ, “ຫາຍ ເຕົ້າ ອ໋ອຍ ຝາວ ລູ່ງ ເຖງ ເຢຍ ບົວ ເຕສ໊າະ ເອຈ່ຍ ແອ໋ງ ຕສຸ້ນ ປຸນ ເຢຍ ບົວ ໝວັງ ຢ່າ ເອີຍ ຈ໊ຽນ ໂຕສ໋ວ?”

13ນ້າຍ ເຕີ໋ຍ ເລີ໌ຍ-ຫລັດ ຢ່າ ໄມ້ ເຕສີ໌ຍ ຢຽມ ວົ້ວ ຫງ່ານ ຕສິ ຄ້ອຍ ຕສ່ຽວ ອ໋ອຍ ຕສຸ ໜ່າຍ, “ຫາຍ ເຕົ້າ ອ໋ອຍ ເຈ໋ຍ ຄ້ອຍ ມີ່ງ ເຖງ ເຢຍ ບົວ ເຕສ໊າະ ຕ້າຍ ແອ໋ງ ຕສຸ້ນ ປຸນ ເຢຍ ບົວ ໝວັງ ຢ່າ ເອີຍ ຈ໊ຽນ ໂຕສ໋ວ?”

14ວົ້ວ ເຕີ໋ຍ ເລີ໌ຍ-ຫລັດ ເຖສົາ ເມີ່ຍ ບົວ ຢຽມ ນ້າຍ, ຕສູ໊ງ ຢຽມ ເມີ່ຍ ບົວ ເຍີຍ ດສຸ້ຍ ຢ່າ ຢຽມ ເມີ່ຍ ບົວ ເຍີຍ ໂຮຍ້ວ ເຫວີ່ຍ ປຸນ ເມີ່ຍ ບົວ ເອີຍ ຈ໊ຽນ ໂຕສ໋ວ.

15ໝັ່ງ ມ່າະ! ເຢຍ ອີ້ ຮນອຍ ປຸນ ເມີ່ຍ ບົວ ມ່າຍ ຖຈັງ ກິ໊ນ ອ໋ອຍ ມ່າຍ ແໝ່ງ ຕສຢັ້ງ ໄຟ ໄຕ່, ຕຸ໊ ຫລົງ ໄຟ ຕຸ໊ ທສ້ຽວ.

16ເຊ ກ໊ອງ ເມີ່ຍ ບົວ ເອີຍ ຈ໊ຽນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ຫວ່າ, ຕົ້ງ ເຢຍ ອີ້ ຮນອຍ ຫັດ ເມີ່ຍ ບົວ ເຍີຍ ຫວ່າ, ຮນ້ຳ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຢັ້ງ ນິ່ນ ເຍີຍ ໂຕ໌, ກັນ ຫລົງ ນິ່ນ ເຍີຍ ເລີ໌ຍ-ຫລັດ ເຖສົາ ຫລີ່ງ ເຖສົາ ເລີ໌ຍ, ເມີ່ຍ ບົວ ຕສ່ຽວ ຕຸ໊ ຕສຢັ້ງ ຈ໊ຽນ ຢ່າ ຫຮຢາງ ຈ໊ຽນ ຝາວ. ເມີ່ຍ ບົວ ຕຸ໊ ເປັຍ ມີ່ງ ຢຽມ ຈ໊ຽນ ອ໋ອຍ ເປ໋ນ ເມີ່ຍ ບົວ ເຍີຍ ປ່ວນ ວົ້ວ ນອມ ເຕີ່ຍ-ປູງ ວົ້ວ ຕສັ່ນ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ອ໋ອຍ ເຖສີຍ ຟຸ ປຸນ ເມີ່ຍ ບົວ.

17ມປ່າ ເຊ ກ໊ອງ ເມີ່ຍ ບົວ ໂຮຍ້ວ ແຫງ່ງ, ໄມ້ ຄັ້ງ ໝວັງ ຕສ໊ຽວ, ຕສ່ຽວ ຕສຸ ດົ໊ວ ມີ່ງ ຟູ-ສູ ຕສັ່ງ ເຫຍ່ຍ ເຍີຍ ຕສ້ຽນ,

18ອີ້ ຮນອຍ ເຢຍ ເມ່ງໆ ເຍີຍ ຕສຸ້ນ ບົ໋ວ ເມີ່ຍ ບົວ, ເມີ່ຍ ບົວ ດົ່ງ ຫາຍ ຕສູ໊ງ ອ໋ອຍ ຕສຸ ໝຽດ. ເມີ່ຍ ບົວ ເຈ໋ຍ ຈໍແດນ ດ້າຍ ເປັຍ ອ໋ອຍ ເປ໋ນ ເມີ່ຍ ບົວ ເຍີຍ ປ່ວນ ວົ້ວ ນອມ ເຕີ່ຍ-ປູງ ເມີ່ຍ ບົວ ໄມ້ ຕຸ໊ ຕສຢັ້ງ ເລົ່າ.

19ເຢຍ ອີ້ ຮນອຍ ເຫ່ວ ລູ່ງ ເຖສົາ ເດົາ ເຖງ ເມີ່ຍ ບົວ ໂຕສ໋ວ ຕສອງ-ເຕສ໋ງ, ເຢຍ ປຸນ ເມີ່ຍ ບົວ ມ່າຍ ຖຈັງ ກິ໊ນ ອ໋ອຍ ຕສຢັ້ງ ໄຟ ໄຕ່, ອ໋ອຍ ຕຸ໊ ຟຸ ໄຟ ຕສຸ ຕສ໋ຽວ. ອີ້ ຕສັ່ນ ອ໋ອຍ ຕສຸ ກິ໊ນ ເມີ່ຍ ບົວ ອ໋ອຍ ຕຸ໊ ຕສຢັ້ງ ຈ໊ຽນ ເຫວີ່ຍ ປຸນ ເມີ່ຍ ບົວ ເຍີຍ ເຕສີ໊ຍ-ຟຸນ ໄຮ່ ຕຸ໊ ຕສຢັ້ງ ຈ໊ຽນ,

20ຢ່າ ຮນ້ຳ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ໝວັງ ນິ່ນ ເຍີຍ ຫວ່າ, ເຂົາ ວ້ວນ ນິ່ນ. ຮນັ້ງ ໜ່າຍ, ເມີ່ຍ ບົວ ເຖສົາ ເມີ່ຍ ບົວ ເຍີຍ ເຕສີ໊ຍ-ຟຸນ ຕຸ໊ ຕສຢັ້ງ ສ່ຽວ ຍ່ວນ ດ໊າວ ຢຽມ ຕສ໊ຽວ ໂຮ້ວ ຈ໊ຽນ ອ໋ອຍ ປຸນ ເມີ່ຍ ບົວ ເຍີຍ ອົງ-ຖາຍ, ອັບລາຮຳ, ອີສັກ ເຖສົາ ຢາໂຄບ ວົ້ວ ນອມ ເຕີ່ຍ-ປູງ.

← Chapter 29 Jump to: Chapter 31 →