Deuteronomy 20

Lao Bible (ฉบับอักษรลาว)

← Chapter 19 Jump to: Chapter 21 →

1ເມີ່ຍ ບົວ ທສວດ ມີ່ງ ເຖສົາ ວິນ-ວັ້ງ ເບ໊າະ ຈ໋າ ວົ້ວ ຕສັ່ນ, ປວັດ ມ໌າ ເຖສົາ ເບ໊າະ ຈ໋າ ເຍີຍ ມ໌າ-ເທສຍ ເຖສົາ ນິ່ນ ບົວ ເຍີຍ ແປງ ເກົ້າ ທສ້ຳ ເມີ່ຍ ບົວ ເຍີຍ, ຢ່າ ໄມ້ ຕູ໋ງ ກ້ຳ ເດສ໋ຍ ເຫວີ່ຍ ຕສຸ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕົ້ງ ຕໍ້ ເມີ່ຍ ບົວ ທສວດ ອີຢິ໊ບ ເຕີ່ຍ-ປູງ ວົ້ວ ເຕົ້າ, ເຖສົາ ເມີ່ຍ ບົວ ຢຽມ.

2ອ໊າ ລ່ຳ ທສວດ ມີ່ງ ເບ໊າະ ຈ໋າ ວົ້ວ ຕສັ່ນ, ໄຊ ມ່ຽນ ຕສ່ຽວ ຢຽມ ແປງ ເຍີຍ ດສະຮມຽນ ຕ໋ອຍ ນິ່ນ ບົວ ກ໊ອງ,

3“ໂອ ອິສະລາເອນ ມ່ຽນ ອ່າ, ໝວັງ ຫລົງ ໂອ່. ອີ້ ຮນອຍ ເມີ່ຍ ບົວ ອ໋ອຍ ຕສຸ ທສວດ ມີ່ງ ເຖສົາ ເມີ່ຍ ບົວ ເຍີຍ ວິນ-ວັ້ງ ເບ໊າະ ຈ໋າ. ໄມ້ ຕູ໋ງ ໂຮຍ້ວ ເມົາ, ໄມ້ ຕູ໋ງ ກ້ຳ ເດສ໋ຍ, ໄມ້ ຕູ໋ງ ໂຮຍ້ວ ຫລຸ່ນ ໄຟ ຕສຸ ວິນ-ວັ້ງ ແຮະ ເມີ່ຍ ບົວ,

4ເຫວີ່ຍ ຕສຸ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຖສົາ ເມີ່ຍ ບົວ ມີ່ງ, ອ໋ອຍ ເຫວີ່ຍ ເມີ່ຍ ບົວ ເບ໊າະ ເມີ່ຍ ບົວ ເຍີຍ ວິນ-ວັ້ງ, ປຸນ ເມີ່ຍ ບົວ ຕຸ໊ ຮີ່ງ.”

5ແປງ-ເປຢີ໊ຍ ອ໋ອຍ ຕສຸ ກ໊ອງ ບົ໋ວ ນິ່ນ ບົວ ເຍີຍ ແປງ, “ມ່າຍ ຫາຍ ເຕົ້າ ກົ໊ມ ຕສຢັ໋ງ ຊຢັງ-ເປຢົ໊າ ຢ່າ ໄມ້ ແກ້ງ ຝູງ ປຸນ ທິນ-ຮູ່ງ? ມ່າຍ ນໍ, ກຸ໊ນ ດສ໋ວນ ເປຢົ໊າ ອ໊ະ. ເດສ໋ຍ ເບ໊າະ ຈ໋າ ຕສຸ ໄຕ່, ກັ້ນ ເຕົ້າ ຕສ່ຽວ ຝູງ ນິ່ນ ເຍີຍ ເປຢົ໊າ.

6ມ່າຍ ຫາຍ ເຕົ້າ ຕສວັ໋ງ ອະຫງຸ່ນ ປ໊ຽວ ຢ່າ ໄມ້ ແກ້ງ ຕຸ໊ ຫຍັ່ນ? ມ່າຍ ນໍ, ກຸ໊ນ ດສ໋ວນ ເປຢົ໊າ ອ໊ະ. ເດສ໋ຍ ເບ໊າະ ຈ໋າ ຕສຸ ໄຕ່, ກັ້ນ ເຕົ້າ ຕສ່ຽວ ຕຸ໊ ຫຍັ່ນ.

7ມ່າຍ ຫາຍ ເຕົ້າ ກ໊ອງ ຕສຢັ້ງ ເອົ໊າ ຢ່າ ໄມ້ ແກ້ງ ໂຕສ໋ວ ທສີງ-ຈາ? ມ່າຍ ນໍ, ກຸ໊ນ ດສ໋ວນ ເປຢົ໊າ ອ໊ະ. ເດສ໋ຍ ເບ໊າະ ຈ໋າ ຕສຸ ໄຕ່, ກັ້ນ ເຕົ້າ ຕສ່ຽວ ຫລົ່ງ ນິ່ນ ເຍີຍ ເອົ໊າ.”

8ແປງ-ເປຢີ໊ຍ ອ໋ອຍ ຕສຸ ແອ໋ງ ບົ໋ວ ນິ່ນ ບົວ ເຍີຍ ຕສວັ໋ງ ແປງ, “ຫາຍ ເຕົ້າ ກ້ຳ ເດສ໋ຍ, ໂຮຍ້ວ ເມົາ? ມ່າຍ ນໍ, ກຸ໊ນ ດສ໋ວນ ເປຢົ໊າ ອ໊ະ. ເດສ໋ຍ ໄຮ່ ໂຕສ໋ວ ປຸນ ນິ່ນ ເຍີຍ ຈວັ່ງ ໂຕສ໋ວ ແປງ ເຍີຍ ຕ່ອຍ ໂຮຍ້ວ ເມົາ ຮນັ້ງ ນິ່ນ ນໍ.”

9ແປງ-ເປຢີ໊ຍ ເຖສົາ ແປງ ກ໊ອງ ລິ໌ວ, ນິ່ນ ບົວ ອ໋ອຍ ຕສຸ ພ້າຍ ເຕີ໋ຍ ມ່ຽນ ໂຕສ໋ວ ເປຢີ໊ຍ ກຸ໊ນ ຢຽດ ກວັ້ນ ຢຽດ ກວັ້ນ ແປງ.

10ເມີ່ຍ ບົວ ມີ່ງ ເຖົາ ຟັດ ເຕີ໋ຍ ຕົ້ງ ເມີ່ຍ ບົວ ອ໋ອຍ ເບ໊າະ ວົ້ວ ນອມ ຕສີ້ງ, ອ໋ອຍ ຕສຸ ປຸນ ນິ່ນ ບົວ ມ່າຍ ຖຈັງ ຫຍ່ຽມ ເມົາ.

11ເຊ ກ໊ອງ ນິ່ນ ບົວ ຫຍ່ຽມ ເມົາ, ນິ່ນ ບົວ ຢ່າ ຄອຍ ຕສີ້ງ ແກ້ງ, ຢຽມ ວົ້ວ ນອມ ຕສີ້ງ ເຍີຍ ຕສວັ໋ງ ມ່ຽນ ອ໋ອຍ ຕສຸ ເຖງ ເມີ່ຍ ບົວ ໂຕສ໋ວ ໂນ່ວ, ບົວະ ເມີ່ຍ ບົວ ກຸ໊ນ.

12ມປ່າ ເຊ ກ໊ອງ ວົ້ວ ນອມ ຕສີ້ງ ເຍີຍ ມ່ຽນ ໄມ້ ຫຍ່ຽມ ເມົາ, ແຫງ່ງ ຈ໊ຽນ ເມີ່ຍ ບົວ ຕສ່ຽວ ເຖສົາ ເມີ່ຍ ບົວ ເບ໊າະ ຈ໋າ, ເມີ່ຍ ບົວ ອ໋ອຍ ຕສຸ ເວີ່ຍ ຈ໊ຽນ ເບ໊າະ ວົ້ວ ນອມ ຕສີ້ງ.

13ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຕສ໊າະ ວົ້ວ ນອມ ຕສີ້ງ ຈິວ ປຸນ ຢຽມ ເມີ່ຍ ບົວ ເຍີຍ ປົ໌ວ-ເດ໊ຍ ວົ້ວ ຕສັ່ນ, ອ໋ອຍ ຕສຸ ຫລົ່ງ ດສຸ ດ໊າວ ໄຕ໋ ເດສ່ງ ນ້າຍ ນອມ ຕສີ້ງ ເຍີຍ ມຈັ່ງ ຕອນ.

14ມປ່າ ມເຊັຍ ຕອນ ເຖສົາ ຝຸຈ໊ວຍ, ແຊງ-ຄູ້ ເຖສົາ ຢຽມ ຕສີ້ງ ກະຍົ໌ວ ເຍີຍ ຢຽດ ຕສູ໊ງ ກະນ້າຍ ໄຮ່ ຫລົ່ງ ເປ໋ນ ເມີ່ຍ ບົວ ກັ້ນ ລູ້ ຕ້າຍ ເຍີຍ ກະນ້າຍ. ເມີ່ຍ ບົວ ລູ້ ວິນ-ວັ້ງ ເຍີຍ ຢຽດ ຕສູ໊ງ ກະນ້າຍ ເມີ່ຍ ບົວ ຫລົ່ງ ຕຸ໊ ເຍີຍ. ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຕສ໊າະ ນ້າຍ ເຕີ໋ຍ ກະນ້າຍ ຈິວ ປຸນ ເມີ່ຍ ບົວ ຫລົ່ງ.

15ອ໋ອຍ ຕສຸ ຮນັ້ງ ນ້າຍ ໂຕສ໋ວ ປຸນ ເລີ່ຍ ເມີ່ຍ ບົວ ໂກ ວົ້ວ ເຕີ໋ຍ ນອມໆ ຕສີ້ງ, ຕະຟ່ານ ໄມ້ ເຕສີ໌ຍ ນິດ ຟັດ ນ້າຍ ເຕີ໋ຍ ຝີງໆ ມ່ຽນ ເຍີຍ ຕສີ້ງ.

16ມປ່າ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ປຸນ ເມີ່ຍ ບົວ ດສິບ ວົ້ວ ເຕີ໋ຍ ຝີງໆ ມ່ຽນ ເຍີຍ ຕສີ້ງ, ຕະຟ່ານ ໄຮ່ ເທົ້າ ເຖຈຍ ເຍີຍ ກະນ້າຍ ອ໋ອຍ ຕສຸ ໄຕ໋ ເດສ່ງ, ໄມ້ ຕູ໋ງ ລ່ຽວ ຢຽດ ເຕົ້າ.

17ອ໋ອຍ ຕສຸ ໝຽດ ເດສ່ງ ນ້າຍ ເຕີ໋ຍ ມ່ຽນ, ເຊ ຮິດໄທ ມ່ຽນ, ອາໂມໄລ ມ່ຽນ, ຄານາອັນ ມ່ຽນ, ເປລິດຊີ ມ່ຽນ, ຮີໄວ ມ່ຽນ ເຖສົາ ເຢບຸດ ມ່ຽນ, ຕສິ໋ວ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຫັດ ເຍີຍ ຫວ່າ.

18ໄມ້ ເຕສີຍ ແອ໊ະ, ນິ່ນ ບົວ ອຈ໋າວ ເມີ່ຍ ບົວ ກັນ ຈ໊ຽນ ນິ່ນ ບົວ ຕສັ່ງ ນິ່ນ ບົວ ເຍີຍ ຕສ້ຽນ, ໂຕສ໋ວ ວົ້ວ ເຕີ໋ຍ ໂຢ໋ວ ໄຫ່, ກ້ຳ ເດສ໊ຍ ໄຫ່ ເຍີຍ ສີ່. ເມີ່ຍ ບົວ ຕສ່ຽວ ປ໌າມ ຕສຸ໌ຍ ຕ່ອງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ.

19ເມີ່ຍ ບົວ ອ໋ອຍ ເບ໊າະ ຫາຍ ນອມ ຕສີ້ງ ຕສ່ຽວ ເວີ່ຍ ຈ໊ຽນ ເລົ່າ ເຍີຍ, ໄມ້ ຕູ໋ງ ຫລົ່ງ ໂປ໊ວ ຮງະ ຫວ່າຍ ດຢັ໋ງ, ເຫວີ່ຍ ຕສຸ ເມີ່ຍ ບົວ ໄຮ່ ຫຍັ່ນ ນ້າຍ ເຕີ໋ຍ ດຢັ໋ງ ເຍີຍ ປ໊ຽວ. ໄມ້ ຕູ໋ງ ກ໋ອຍ. ເດີ່ຍ ເຍີຍ ດຢັ໋ງ ໄມ້ ເຕສີ໌ຍ ເມີ່ຍ ບົວ ເຍີຍ ວິນ-ວັ້ງ.

20ຕະຟ່ານ ຮິ້ວ ຕຸ໊ ໄມ້ ເຕສີ໌ຍ ຕສຢັ້ງ ປ໊ຽວ ເຍີຍ ດຢັ໋ງ ກ໋ອຍ ຕຸ໊ ເຍີຍ, ເຫວີ່ຍ ຫລົ່ງ ໂຕສ໋ວ ຈາ-ສີ່ ເບ໊າະ ເມີ່ຍ ບົວ ເວີ່ຍ ກ໋ອມ ວົ້ວ ນອມ ຕສີ້ງ ເຖົາ ຕສີ້ງ ບາງ.

← Chapter 19 Jump to: Chapter 21 →