Deuteronomy 21

Lao Bible (ฉบับอักษรลาว)

← Chapter 20 Jump to: Chapter 22 →

1ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ເຫວີ່ຍ ເປ໋ນ ເມີ່ຍ ບົວ ເຍີຍ ປ່ວນ ເຕີ່ຍ-ປູງ, ເຊ ກ໊ອງ ເມີ່ຍ ບົວ ປວັດ ເຕົ້າ ມ່ຽນ ຕສຸ ໄຕ໋ ໄຕ່ ຢຽມ ວົ້ວ ຫລົ່ມ-ຮວາງ, ຢ່າ ໄມ້ ຮິ້ວ ຕຸ໊ ຫາຍ ເຕົ້າ ໄຕ໋,

2ອ໋ອຍ ຕສຸ ເຫ່ວ ເມີ່ຍ ບົວ ເຍີຍ ມ່ຽນ ໂກ໋ ເຖສົາ ຊ້ຽມ ຕສຸ໌ຍ ຈຽນ ທສວດ ມີ່ງ ເດາະ ໝັ່ງ ກ໋າ, ນ້າຍ ເຕົ້າ ຕສຸ ໄຕ໋ ເຍີຍ ມ່ຽນ ຢຽມ ນິ່ນ ໄຕ່ ເຍີຍ ຕ໋ອງ ນິດ ເວີ່ຍ ກ໋ອມ ເຍີຍ ຕສີ້ງ ຫາຍ ນອມ ເກົ້າ ຟັດ ເຈ໋ຍ.

3ຢຽມ ນິດ ຈັ໋ນ-ໄຕ່ ເກົ້າ ຟັດ ວົ້ວ ນອມ ຕສີ້ງ ເຍີຍ ມ່ຽນ ໂກ໋ ອ໋ອຍ ຕສຸ ຕໍ້ ເຕົ້າ ໄມ້ ແກ້ງ ໂຕສ໋ວ ເຈ໋ຍ ກົງ ຢ່າ ໄມ້ ກ໌າ ເຈ໋ຍ ດຢັ໋ງ-ກ໌າ ເຍີຍ ງົ່ງ ເຕສີ່ຍ,

4ມີ່ງ ເຖົາ ນອມ ຮ໌ອງ. ວົ້ວ ນອມ ຮ໌ອງ ມ່ຽນ ໄມ້ ໄລ່ ເຈ໋ຍ ເດົາ ໄຟ ຕສວັ໋ງ ເຈ໋ຍ ກະນ້າຍ ຢ່າ ມ່າຍ ໂດ໊ະ, ມ່າຍ ວວມ-ຕ້າຍ ເຍີຍ. ຢຽມ ວົ້ວ ອ໋ອຍ ຕສຸ ເບ໊າະ ງົ່ງ ເຍີຍ ຈາງ ເນົ້າ.

5ເລວີ ເຍີຍ ເຕສີ໊ຍ-ຟຸນ ວົ້ວ ເຕີ໋ຍ ໄຊ ມ່ຽນ ອ໋ອຍ ຕສຸ ທສວດ ມີ່ງ ເຖົາ ວົ້ວ ນອມ ຕ໋ອງ. ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ກິ໊ນ ນິ່ນ ບົວ ຕ້າຍ ຟູ-ສູ ນິ່ນ, ເຕ໊ງ ຕສ໊ຽວ ເຍີຍ ບົ໋ວ ປວັງ ຫວ່າ ຢ່າ ຕຸ໋ນ ຢຽດ ຕສູ໊ງ ແດສງ ຈ໋າ ເຖສົາ ໂຕສ໋ວ ປຸນ ມ່ຽນ ຕສຸ ມຸນ ເຍີຍ ສີ່.

6ຢຽມ ນິດ ຈັ໋ນ-ໄຕ່ ເກົ້າ ຟັດ ວົ້ວ ນອມ ຕສີ້ງ ເຍີຍ ມ່ຽນ ໂກ໋ ຕສ່ຽວ ຢຽມ ວົ້ວ ນອມ ຮ໌ອງ, ດສ໋າວ ນິ່ນ ບົວ ເຍີຍ ປົ໌ວ ຢຽມ ເບ໊າະ ຈາງ ເນົ້າ ວົ້ວ ເຕົ້າ ງົ່ງ ເຕສີ່ຍ ກູ້ ຫງວ່າຍ.

7ນິ່ນ ບົວ ຕສ່ຽວ ໂຕສ໋ວ ຕສອງ-ເຕສ໋ງ ກ໊ອງ, “ໄມ້ ເຕສີ໌ຍ ເຢຍ ບົວ ເຍີຍ ປົ໌ວ ໄຕ໋ ນ້າຍ ເຕົ້າ ມ່ຽນ. ເຢຍ ບົວ ກັ້ນ ເຍີຍ ມຕສີງ ຢ່າ ໄມ້ ປວັດ ນິ່ນ ຕສຸ ໄຕ໋ ໄຕ່.

8ໂອ ຕສ໊ຽວ ອ່າ, ໂທ້ ເມີ່ຍ ກວັ່ງ ອກອຍ ເມີ່ຍ ເຍີຍ ແປະ ຝີງ, ອິສະລາເອນ ມ່ຽນ, ເຍີຍ ຕສຸ໌ຍ, ເຊ ເມີ່ຍ ຕສົວະ ຕ້າຍ ເຍີຍ ແປະ ຝີງ. ໂທ້ ໄມ້ ຕູ໋ງ ປຸນ ເມີ່ຍ ເຍີຍ ມ່ຽນ ເຫວີ່ຍ ນ້າຍ ເຕົ້າ ໄມ້ ໂຕສ໋ວ ຕ່ອງ ເຍີຍ ມ່ຽນ ຕສຸ ໄຕ໋ ໄຕ່ ເຍີຍ ຕສຸ໌ຍ ດາມ-ຕອງ.”

9ຮນັ້ງ ນ້າຍ ຕສິ໋ວ ຕສ໊ຽວ ປວັດ, ເມີ່ຍ ບົວ ໂຕສ໋ວ ຕຸ໊ ຫອບ ຕສ່ຽວ ໄມ້ ຕສຸ ເຫວີ່ຍ ໄມ້ ໂຕສ໋ວ ຕ່ອງ ເຍີຍ ມ່ຽນ ຕສຸ ໄຕ໋ ໄຕ່ ດາມ-ຕອງ.

10ເມີ່ຍ ບົວ ທສວດ ມີ່ງ ເບ໊າະ ຈ໋າ ວົ້ວ ຕສັ່ນ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ນິ່ນ ບົວ ຕສຸ ຢຽມ ເມີ່ຍ ບົວ ເຍີຍ ປົ໌ວ-ເດ໊ຍ, ເມີ່ຍ ບົວ ຕສ່ຽວ ທສ້າງ ຕຸ໊ ນິ່ນ ບົວ.

11ຢຽມ ທສ້າງ ຕ້າຍ ເຍີຍ ມ່ຽນ ກະຍົ໌ວ ປວັດ ມ່າຍ ເຊັຍ ເດສວີ່ຍ, ຢ່າ ໄຮ໌ ອ໋ອຍ ຫລົ່ງ ໂຕສ໋ວ ເອົ໊າ,

12ກຸ໊ນ ຕໍ້ ນິ່ນ ມີ່ງ ເມີ່ຍ ເຍີຍ ເປຢົ໊າ. ປຸນ ນິ່ນ ເຖີຍ ເດສ່ງ ບະເປຢີຍ ແອ໋ງ ຈັ໊ບ ປົ໌ວ-ໂດ໊ະ-ໄອກວ໌,

13ຢ່ຽນ ອກອຍ ຕສຸ ທສ້າງ ຕ້າຍ ວົ້ວ ຕສັ່ນ ຕສຸ໊ ຈ໊ຽນ ເຍີຍ ລຸຍ-ໂຫວ, ຢ່າ ປຸນ ນິ່ນ ຢຽມ ເມີ່ຍ ເຍີຍ ເປຢົ໊າ ເດສົ້າ ຍ້ຽມ ນິ່ນ ເຍີຍ ເຕ໋ຍ ໝ່າ ປວັ໊ງ ຢຽດ ຫຮລາ ເຫຍັຍ. ອກະຮ້າ ຫລົ່ງ ນິ່ນ ໂຕສ໋ວ ເອົ໊າ ຕຸ໊ ອ໊ະ. ເມີ່ຍ ຢ່າ ເປ໋ນ ນິ່ນ ເຍີຍ ໂອກ໋.

14ໂຮ໌ ຕ້າຍ ເຊ ກ໊ອງ ໄມ້ ປວັ໊ງ ໂຮຍ້ວ ນິ່ນ, ປຸນ ນິ່ນ ທສວດ ຢ່າ ເຊວີ່ຍ ນິ່ນ ມີ່ງ ຫາຍ ຢ່າ ຕຸ໊. ໄມ້ ຕູ໋ງ ປຸນ ນິ່ນ ຕ໋ອງ ໂນ່ວ ໝ່າຍ ຍ່ານ, ເຫວີ່ຍ ຕສຸ ເມີ່ຍ ປ່າຍ ຕສຸ ນິ່ນ ໝີ່ ອ໊ະ.

15ເຊ ກ໊ອງ ມ່ຽນ ມ່າຍ ອີ ເຕົ້າ ເອົ໊າ, ມ່າຍ ເຕົ້າ ນິ່ນ ຮນ້ຳ, ມ່າຍ ເຕົ້າ ນິ່ນ ໄມ້ ຮນ້ຳ. ອີ ເຕົ້າ ຕສູ໊ງ ຢູ໌ງ ຕຸ໊ ຕອນ ມປ່າ ນິ່ນ ເຍີຍ ຕອນ-ຫລະເກົ໊າ ເຊ ນິ່ນ ໄມ້ ຮນ້ຳ ວົ້ວ ເຕົ້າ ເອົ໊າ ເຍີຍ ຕອນ.

16ເຖົາ ປຸນ ອກອຍ ຈາ-ຕີ້ງ ນິ່ນ ເຍີຍ ຕອນ ດສິບ ເຍີຍ ຕສຢັ້ງ ໂຫ່, ໄມ້ ຕູ໋ງ ເຕສ໊າະ ໂຕສ໋ວ ຕອນ-ຫລະເກົ໊າ ຕຸ໊ ຊູງ-ໂກ໊ວ ກະນ້າຍ ປຸນ ນິ່ນ ຮນ້ຳ ວົ້ວ ເຕົ້າ ເອົ໊າ ເຍີຍ ຕອນ, ເຄວີຍ ຕສຸ ຕສະເກ້ງ ໂຕສ໋ວ ຕອນ-ຫລະເກົ໊າ ວົ້ວ ເຕົ້າ, ຕົ້ງ ນິ່ນ ໄມ້ ຮນ້ຳ ວົ້ວ ເຕົ້າ ເອົ໊າ ເຍີຍ ຕອນ.

17ນິ່ນ ອ໋ອຍ ຕສຸ ປຸນ ຊູງ-ໂກ໊ວ ກະນ້າຍ ຕົ້ງ ນິ່ນ ໄມ້ ຮນ້ຳ ວົ້ວ ເຕົ້າ ເອົ໊າ ເຍີຍ ຕອນ ເຫວີ່ຍ ຫຍ່ຽມ ນິ່ນ ໂຕສ໋ວ ຕອນ-ຫລະເກົ໊າ. ນ້າຍ ເຕົ້າ ໂຕສ໋ວ ນິ່ນ ເຍີຍ ຕ້າວ ເຕົ້າ ຕອນ. ໂຕສ໋ວ ຕອນ-ຫລະເກົ໊າ ຕຸ໊ ຊູງ-ໂກ໊ວ ເຍີຍ ເລີ໌ຍ ເປ໋ນ ນິ່ນ ເຍີຍ.

18ຫາຍ ເຕົ້າ ມ່າຍ ຕອນ, ວົ້ວ ເຕົ້າ ຕອນ ໄມ້ ຕສຢັ້ງ ຮ່ອງ, ໂຮຍ້ວ ແຫງ່ງ ໄຫ່, ເຕ໋ຍ ໝ່າ ເບ໊າະ ອຈ໋າວ ຢ່າ ໄມ້ ໝວັງ,

19ນິ່ນ ເຍີຍ ເຕ໋ຍ ໝ່າ ອ໋ອຍ ຕສຸ ເຕສ໊າະ ນິ່ນ ຕໍ້ ມີ່ງ ເຖົາ ກັ້ນ ເຍີຍ ປ໊ວນ-ຕສີ້ງ ແກ້ງ ດ່າງ, ມ່ຽນ ໂກ໋ ວົ້ວ.

20ນິ່ນ ບົວ ອ໋ອຍ ຕສຸ ກ໊ອງ ບົ໋ວ ວົ້ວ ເຕີ໋ຍ ມ່ຽນ ໂກ໋, “ເຢຍ ບົວ ເຍີຍ ນ້າຍ ເຕົ້າ ຕອນ ໂຮຍ້ວ ແຫງ່ງ ໄຫ່, ໄມ້ ໝວັງ ເຢຍ ບົວ ເຍີຍ ຫວ່າ. ຂູງ ໂຕສ໋ວ ພະລີ ພະຫລາຍ ເຍີຍ ສີ່ ເມົ້າ ຫຍັ່ນ ຮົບ ອກວິນ ຮນັ້ງ.”

21ວົ້ວ ນອມ ຕສີ້ງ ເຍີຍ ຕສວັ໋ງ ມຈັ່ງ ຕອນ ຕສ່ຽວ ຫລົ່ງ ຫລະເປຢີ໊ຍ ຕສົງ ໄຕ່ ນິ່ນ. ຮນັ້ງ ໜ່າຍ ເມີ່ຍ ບົວ ຕສ່ຽວ ປຸນ ຢຽມ ເມີ່ຍ ບົວ ບຸດົ໋ງ ໄມ້ ມ່າຍ ນ້າຍ ຫຍູ່ງ ເອ໊າະ ສີ່. ອິສະລາເອນ ເຍີຍ ຕສວັ໋ງ ມ່ຽນ ໄຮ໌ ນ້າຍ ເຕີ໋ຍ ສີ່ ຕສ່ຽວ ກ້ຳ ເດສ໋ຍ ໄຫ່.

22ເຊ ກ໊ອງ ມ່າຍ ເຕົ້າ ມ່ຽນ ປ໌າມ ຕສີ່ ຕຸ໊ ໄຕ໋ ເຍີຍ ຕສຸ໌ຍ, ນິ່ນ ຕສຸ ໄຕ໋ ໄຕ່ ແອ໋ງ ເຕສ໊າະ ເຊີຍ ດິ໋ວ ຈ໊ຽນ ດຢັ໋ງ ກູ້ ຫງວ່າຍ,

23ໄມ້ ຕູ໋ງ ລ່ຽວ ນິ່ນ ເຍີຍ ເຊີຍ ຢຽມ ວົ້ວ ດຢັ໋ງ ເຈ໋ຍ ມ໌ວນ. ຕົ້ງ ວົ້ວ ຮນອຍ ຕສູ໊ງ ອ໋ອຍ ຕສຸ ປຢົ໊ບ, ເຫວີ່ຍ ຕສຸ ຫາຍ ເຕົ້າ ຕສຸ ດິ໋ວ ຈ໊ຽນ ດຢັ໋ງ ກູ້ ຫງວ່າຍ, ວົ້ວ ເຕົ້າ ຕສຸ ທິນ-ຮູ່ງ ຕສ໋ຽວ. ໄມ້ ຕູ໋ງ ໂຕສ໋ວ ປຸນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ດສິບ ເຍີຍ ເຕີ່ຍ-ປູງ ມ່າຍ ຫວຸຍ.

← Chapter 20 Jump to: Chapter 22 →