Proverbs 14

Madurese Bible 1994 (ALKETAB E DHALEM BASA MADURA)

← Chapter 13 Jump to: Chapter 15 →

1Roma tangga epaddek bi' kabicaksana'anna babine', tape epagujur bi' kabudhuwanna.

2Oreng se jujur tako' ban hormat ka Guste ALLAH, oreng se odhi'na ta' loros ya-nyeya Salerana,

3Dhari angga'na, oreng budhu matenggi aba', oreng bicaksana bakal eaobana bi' cacana dibi'.

4Mon tadha' sape teggal ta' kera badha hasella; kalaban kakowadanna sape, hasella tana ce' bannya'na.

5Sakse se jujur acaca sabendherra, sakse se ta' ekenneng parcaja ros-terrosan lecegan.

6Oreng sombong ta' kera daddi bicaksana, oreng penter mon ajar gampang.

7Ja' akanca'an oreng budhu; tadha' se bisa eajarragi oreng jareya ka ba'na.

8Oreng bicaksana tao apa se kodu elakone, oreng budhu ekenneng co-koco kabudhuwanna dibi'.

9Oreng budhu ta' parduli dusana esapora otaba ta' esapora; oreng becce' terro esapora'a dusana.

10Senneng otaba sossa esempen e dhalem dhadha; oreng laen ta' kera noro' ngarassa'agi.

11Bengkona oreng becce' paggun koko; bengkona oreng jahat bakal gujura.

12Badha jalan se katonna loros, tape nyatana jareya jalan ka maot.

13Samarena agella'an olle daddi oreng pas nanges; samarena perak olle daddi pas dhateng kasossa'an.

14Oreng juba' bakal molonga hasella kajuba'anna, oreng becce' bakal metthega buwana kabecce'anna.

15Oreng budhu parcaja ka caca apa'a bai, oreng bicaksana te-ngate tengka gulina.

16Oreng se bagus buddina te-ngate ban ajauwi kajahadan, oreng budhu norodi napsona pas arassa aman.

17Oreng se lekkas peggel reya budhu nyamana; oreng bicaksana sabbar salanjangnga.

18Oreng se ta' andhi' pangalaman tanto daddi budhu; oreng bicaksana tanto atamba pangataowanna.

19Oreng juba' noro' parentana oreng se loros atena, polana terro ekaneserrana.

20Oreng mesken ta' ekaleburi oreng maske bi' ca-kancana sakale; tape oreng sogi bannya' kancana.

21Sapa ya-nyeya oreng laen jareya dusa; sapa se becce' ka oreng mesken tanto senneng odhi'na.

22Sapa se ngehteyarragi barang se becce' tanto eparcaja ban ehormadi oreng; sapa se andhi' sajja jahat badha e jalan se sala.

23E dhalem saneyap ehteyar badha kaontonganna; oreng se asebbal malolo ngoba oreng daddi mesken.

24Oreng bicaksana ealem polana kabicaksana'anna; oreng budhu kalonta polana kabudhuwanna.

25Mon sakse acaca sabendherra, tanto masalamet nyabana oreng; mon sakse lecek, macalaka' sasamana.

26Oreng se tako'ban ta'at ka PANGERAN taremtem atena, kalowargana bakal salmedda odhi'na.

27Tako'ban ta'at ka PANGERAN reya somberra kasennengngan, ban jalan kaangguy ajauwi pate.

28Kajaja'anna rato targantong ka bannya'na ra'yadda; mon tadha' ra'yadda ta' bisa kobasa.

29Oreng bicaksana ta' gampang peggel; oreng budhu peggella ta' ekenneng ampet.

30Se taremtem atena baras badanna; ere ate padha ban panyaket se madhateng pate.

31Se alako becce' ka oreng mesken ahormadi Allahna; se nendhes oreng kene' ya-nyeya Panceptana.

32Oreng jahat mate polana kajahadanna, oreng becce' salamet polana kaberseyanna atena.

33Hekmat terros badha e dhalem pekkeranna oreng se bagus buddina; tape ta' tombu e dhalem oreng se budhu pekkerra.

34Kaadilan ban kabecce'an matenggi martabadda bangsa, tape dusa majuba' nyamana bangsa jareya.

35Rato lebur ka ponggaba se cakep, tape peggel ka ponggaba se ta' bisa ajalannagi kawajibanna.

← Chapter 13 Jump to: Chapter 15 →