Proverbs 16

Madurese Bible 1994 (ALKETAB E DHALEM BASA MADURA)

← Chapter 15 Jump to: Chapter 17 →

1Manossa olle andhi' sajja ban neyat, tape Allah se apareng kapotosan.

2Saneyap lalakonna oreng olle daddi bagus e dhalem panganggebba dibi', tape PANGERAN se nantowagi juba' becce'na maksod e dhalem atena.

3Passra'agi ka PANGERAN apa se daddi sajjana ba'na, tanto ba'na ahasel e dhalem ajalannagi maksod jareya.

4Sabarang se ebadhi PANGERAN badha tojjuwanna; tojjuwanna oreng jahat maancor odhi'na

5Oreng sombong kabbi ekabaji'i PANGERAN; ban ta' kera epalopot dhari okoman.

6Oreng se esto ka Allah bakal esapora'a; oreng se tako' ban abakte ka PANGERAN bakal lopoda dhari kajahadan.

7Mon ba'na masenneng panggaliyanna PANGERAN, so-mosona ba'na tanto epaoba daddi kanca.

8Lebbi becce' pangaselan sakone' se ekaolle dhari jalan jujur, katembang pangaselan raja ollena jalan ta' adil.

9Manossa olle andhi' sajja, tape Allah se nantowagi jalanna odhi'na.

10Rato narema kobasa dhari Allah, daddi potosanna ta' sala.

11Kasokanna PANGERAN oreng kodu jujur mon adagang, bariya keya mon ngokor sarta nembang.

12Monggu ka pangobasa, mon alako jahat reya kejjem, sabab pamarenta'anna koko lantaran kaadilan.

13Mon narema katerrangan se bendher pangobasa senneng atena, taresna ka oreng se jujur cacana.

14Dadukanna rato padha ban kabar okoman mate; oreng bicaksana tanto aehteyar masabbara rato jareya.

15Kabecce'anna rato madhateng odhi' se rajja, akantha ondhem se e mosem nemor madhateng ojan.

16Olle hekmat abecce'an parana katembang olle emmas; olle pangataowan aajiyan dhari se olle salaka.

17Oreng becce' ajauwi se jahat; oreng se ajaga cara odhi'na bakal salamedda.

18Oreng sombong bakal ancora, oreng angko bakal ngalotora.

19Lebbi becce' andhap asor ban ta' andhi' pa-apa, etembang noro' oreng sombong ban noro' melo barang rampasanna.

20Tetene apa se eajarragi ka ba'na, tanto ba'na olle sabarang se becce'. Paparcaja ka PANGERAN, tanto ba'na senneng odhi'na.

21Oreng bicaksana etemmo dhari pekkeranna se tajem; cacana lebur, daddi ca'-oca'na sajan mayakin oreng laenna.

22Kabicaksana'an reya somberra kasennengnganna odhi'na oreng se tenggi buddina; oreng budhu eseksa bi' kabudhuwanna dibi'.

23Oreng se bagus buddina cacana bicaksana, ban babala'anna sajan mayakin atena oreng laenna.

24Caca se manes akantha maddu; manes rassana ban masegger badan.

25Badha jalan se katonna loros, tape aherra nojju ka maot.

26Oreng se terro ngakana tanto pas aehteyar; oreng tapaksa alako polana tabu'na.

27Oreng jahat aehteyar macalaka'a sasamana; cacana jahat akantha mardha.

28Oreng se ta' jujur daddi lantaranna tokar; tokang petenna mapegga' oreng se sakanca'an.

29Oreng kejjem nepo ca-kancana, ngeba ca-kancana ka dhalem babaja.

30Te-ngate ngadhebbi oreng se mesem ban amaen mata, oreng jareya andhi' sajja jahat e dhalem atena.

31Oreng jujur bakal eparengngana lanjang omor; obanna marabut jamang se agalirap e cethagga rato.

32Ta' lekkas peggel abecce'an dhari andhi' kakobasa'an; ngobasane ate lebbi becce' dhari ngobasane kottha.

33Oreng ngocco' ellot polana terro taowa papasthenna aba'na, tape pera' PANGERAN se nantowagi jawabanna.

← Chapter 15 Jump to: Chapter 17 →