Proverbs 23

Madurese Bible 1994 (ALKETAB E DHALEM BASA MADURA)

← Chapter 22 Jump to: Chapter 24 →

1Mon ba'na toju' ngakan ban pangraja, kaenga'e sapa oreng jareya.

2Mon napsona ba'na se ngakana talebat rajana, ampet pangaterro jareya.

3Ja' padhakka ka kakanan se nyaman se eangka'agi, sapa tao pola oreng jareya me' ajebbaga ba'na.

4Ta' osa abanteng tolang polana terro sogiya. Paburung neyadda jareya.

5Sabab e dhalem saparngedep arta bisa mosna, akantha se akalembang pas ngabber ka langnge' akantha mano' rajabali.

6Ja' ngakan ban oreng se cerre'. Bariya keya ja' terro ka kakananna se nyaman.

7Sabab oreng jareya tanto ngoca' kantha reya, “Ngereng dha'ar; ngereng aorok,” mangkana sanyatana e atena ta' kantha jareya. Bibirra manes, tape atena laen.

8Dhaggi' apa se la ekalodhu' bi' ba'na pas eota'agi pole, ban sakabbinna cacana ba'na se manes ka oreng jareya tadha' gunana.

9Ja' la-malae oreng budhu; babala'anna ba'na ta' kera eargai.

10Ja' sampe' ba'na ngerset batessa tana sangkolan otabana ngala' tana andhi'na kana' jatim.

11Sabab PANGERAN reya kowat, ban Salerana se abilla'ana reng-oreng jareya ngadhebbi ba'na.

12Edhingngagi pangajaranna guruna, sarta ajar sanya'-bannya'na.

13Ja' ka-sengka ngajar ana'na. Mon ba'na mokol ana'na ban tongket manjalin, kana' jareya ta' kera mate,

14la'-mala' salamet.

15Na', sengko' ce' sennengnga mon ba'na bicaksana.

16Sengko' gumbira mon ngedhing ba'na nyebbuttagi ca'-oca' se teppa'.

17Ja' ere ka oreng se dusa. Papaggun ta'at ka ALLAH,

18sopaja ba'na salamedda odhi'na e budhi are, ban pangarebbanna ba'na ta' sampe'a elang.

19Edhingngagi, na'! Ba'na pabicaksana. Tetene pagu-onggu cara odhi'na ba'na.

20Ja' apolongan ban oreng se dujan mabu' otaba oreng se dhakka,

21sabab reng-oreng jareya bakal meskena. Mon lakona ba'na pera' tedhung malolo, tanto ba'na ta' abit pole bakal akalambiya bing-carbing.

22Toro' dhabuna eppa'na; sabab mon tadha' eppa'na, ta' kera badha ba'na. Mon ebuna ba'na la towa, duduwagi ja' ba'na ngargai ebuna jareya.

23Pangajaran se bendher, hekmat ban pandhidhigan sarta pangarteyan, jareya kabbi patot ebelli, tape talebat aji kaangguy ejuwal.

24Mon ana' bagus buddina, eppa'na tanto perak; atena tanto gumbira mon andhi' ana' se bicaksana.

25Mandar rama ebuna ba'na bunga'a atena polana ba'na; mandar sennengnga babine' se alahirragi ba'na.

26Abassagi pateppa', pas conto odhi'na sengko' reya, na'.

27Babine' nakal se nyondel reya daddi jebbak se babaja.

28Ngaddhang akantha bigal ban daddi lantaranna bannya' lalake' azina.

29Ba' taowa ba'na baramma daddina oreng se tabannya' gallu ngenom anggur, ban seggut nyepcep nom-enoman kerras? Oreng jareya nyangsara ban nanggung sossa. Atokar ban aserro terros. Matana mera ban badanna ka-loka, mangkana jareya kabbi bisa esenglae.

31Ja' sampe' ba'na tagudha bi' anggur maske barnana ngapencot ate, katon agalirap e dhalem gellas ban agili maso' ka gerrungan ce' kobassana.

32Kalagguwanna ba'na arassa akantha se ecangnga' olar se mandi opassa.

33Matana ba'na anang-konang, pekkeranna salbut ban colo'na ngacepek terros.

34Ba'na apangrasa akantha se badha e konco'na canggana kapal e tengnga tase' raja; ba'na pettengngen ban dhing-tabarindhing.

35Ba'na tanto pas ngoca' kantha reya, “Ropa-ropana sengko' reya epokol ban etamper oreng, tape sengko' ta' enga' kadaddiyana. Adhu, sengko' ce' ngantogga! Sengko' parlo ngenom pole!”

← Chapter 22 Jump to: Chapter 24 →