Numbers 31 — Macedonian (Свето Писмо: Стандардна Библија 2006 (66 книги))

6И ги испрати Мојсеј во војна, по илјада од секое колено, а со нив и Финес, синот на свештеникот Елеазар, со светите утвари и со труби за тревога в рака.

7И отидоа во војна против Мидјаните, како што му заповеда Господ на Мојсеј, и ги убија сите од машки пол;

8а заедно со убиените од нив ги убија и мидјанските цареви: Евиј, Рекем, Цур, Ор и Рева — пет мидјански цареви; го убија со меч и Валаам, Беоровиот син.

9Мидјанските, пак, жени и децата нивни синовите израелски ги зедоа во плен; и сиот нивни добиток, и сите стада нивни, и целиот имот нивни го заграбија;

10сите градови нивни во нивно владение и сите села нивни со оган ги изгореа.

11И го зедоа сето заграбено, од човек до добиток.

12И заробените, и пленот, и заграбеното го донесоа пред Мојсеј, пред свештеникот Елеазар и пред општеството на синовите израелски, во логорот на рамнините моавски, кај Јордан, спроти Ерихон.

13Тогаш Мојсеј и свештеникот Елеазар и сите кнезови на општеството излегоа надвор од населбата за да ги пречекаат.

14И се разгневи Мојсеј на воените началници, илјадниците и стотниците што се беа вратиле од војната,

15па им рече: „Ги оставивте живи сите жени?

16Ете тие, по советот на Валаам, беа станале причина синовите израелски да отстапат и да ги презрат наредбите од Господ, заради Фегор, затоа и дојде оној пораз врз народот Господов.

17А сега, убијте ги сите деца од машки пол, убијте ги и сите жени што познале маж на машко легло;

18а сите деца од женски пол, кои не познале машко легло, оставете ги живи за себе.

19И останете надвор од населбата седум дена; сите што убиле човек и што се допреле до убиен, да се очистат на третиот и на седмиот ден, вие и вашите заробеници;

20очистете ја и сета облека, сите кожни предмети, сѐ што е направено од козина, и сите дрвени садови.“

21Потоа им рече свештеникот Елеазар на борците што беа отишле во војна: „Еве ги наредбите на законот, кои Господ му ги заповеда на Мојсеј:

22злато, сребро, бакар, железо, калај и олово,

23и сѐ што минува низ оган, поминете го низ оган, за да се очисти, а освен тоа, тоа треба да се очисти и со очистителна вода; а сѐ што не минува низ оган, поминете го низ вода;

24и облеката исперете ја на седмиот ден, и очистете се, и потоа влезете во населбата.“

25И му рече Господ на Мојсеј, велејќи:

26„Преброј го заграбеното, од човек до добиток, ти и свештеникот Елеазар и началниците од племињата на општеството;

27и раздели го ограбеното по половина, меѓу оние што војуваа што одеа во борба, и целото општество.

28А од борците што беа во војна, земи данок за Господ, по една душа на петстотини, од луѓето и од говедата, и од магарињата, и од ситниот добиток;

29земи го тоа од нивната половина и дај му го на свештеникот Елеазар за вознесување пред Господ.

30А од половината, определена за синовите израелски, земи по едно на педесет: од луѓето, од крупниот добиток, од магарињата, и од ситниот добиток, и дај им го тоа на левитите што служат при скинијата Господова.“

31И направија Мојсеј и свештеникот Елеазар, како што му заповеда Господ на Мојсеј.

32И пленот што остана од грабежот што го заграбија оние, кои беа отишле во војна, беше: ситен добиток — шестотини седумдесет и пет илјади,

33крупен добиток — седумдесет и две илјади,

34магариња — шеесет и една илјада,

35луѓе — жени, кои не познале машко легло, сите беа триесет и две илјади души.

36Половината, делот на оние што беа отишле да се борат, според пребројувањето, беше: ситен добиток — триста триесет и седум илјади и петстотини глави.

37На Господ од ситниот добиток Му се дадоа шестотини седумдесет и пет глави;

38крупен добиток — триесет и шест илјади, и од тоа дар за Господ — седумдесет и две глави;

39магариња — триесет илјади и петстотини, а дел од нив за Господ — шеесет и една глава;

40луѓе — шеснаесет илјади, и данок од нив за Господ беше триесет и две души.

41И му го даде Мојсеј дарот за вознесување пред Господ, на свештеникот Елеазар, како што му заповеда Господ на Мојсеј.

42И од половината, определена за синовите израелски што ја оддели Мојсеј од оние кои беа отишле во војната,

43а половината како дел на општеството беше: ситен добиток — триста триесет и седум илјади и петстотини,

44крупен добиток — триесет и шест илјади глави;

45магариња — триесет и пет илјади и петстотини глави;

46луѓе — шеснаесет илјади души.

47Од таа половина, определена за синовите израелски, Мојсеј зеде педесетти дел од луѓето и од добитокот и им го даде тоа на левитите што служеа при скинијата Господова, како што му заповеда Господ.

48И дојдоа кај Мојсеј началниците над илјадите од војската — илјадниците и стотниците,

49и му рекоа на Мојсеј: „Твоите слуги ги преброија борците што ни се доверени, и ниеден од нив не загинал.

50Еве, Му донесовме принос на Господ кој што нашол — златни предмети, алки, гривни, прстења, обетки и веришки, за да ги очистиме своите души пред Господ.“

51И го зедоа од нив Мојсеј и свештеникот Елеазар златото на сите тие изработки.

52И сето злато, донесено од илјадниците и стотниците за вознесување пред Господ, беше шеснаесет илјади седумстотини и педесет шекели.

53Воините беа грабале секој за себеси.

54И го зедоа Мојсеј и свештеникот Елеазар златото од илјадниците и стотниците и го внесоа во скинијата на собранието за спомен на синовите израелски пред Господ.