2 Kings 12

Mossi MPBU (WẼNNAAM SEBRE 2014)

← Chapter 11 Jump to: Chapter 13 →

1A Zoaas sẽn wa n na n deeg naamã t'a tara yʋʋm a yopoe.

2Yaa a Zehu sẽn deeg naam tɩ yʋʋm yopoɛɛlẽ, la a Zoaas lebg rĩmã. A Zoaas rɩ a naamã Zeruzalɛm yʋʋm pis-naase. A ma yʋʋr dag n boondame t'a Sibiya n yaa a Bɛɛr-Seba biiga.

3A Zoaas vɩɩmã tɛka, a maana sẽn yaa tɩrg Sẽn-Ka-Saab nifẽ, bala, maan-kʋʋr kãsem a Zehozada dag n zãms-a-la sõama.

4Baoosg zãnga, b kell n ka menes maoong kʋʋb zĩisã ye. Nebã rag n ket n kẽnd n maanda maand la b yõogd wisd maoong kʋʋb zĩisẽ wã.

5A Zoaas yeela maan-kʋʋdbã yaa: «Ligd ning fãa b sẽn welg toor Sẽn-Ka-Saab yĩng tɩ b talld n wat Sẽn-Ka-Saab roogẽ wã, ne ligd ning ned kam fãa sẽn tog n yao wã, la ligd ning fãa nebã sẽn wat n kɩt Sẽn-Ka-Saab roogẽ wã ne yamleoogã,

6bɩ yãmb a maan-kʋʋdbã ned kam fãa rees ligd-kãens a mitb nengẽ, n tall n maneg Wẽnnaam doogã zĩis nins sẽn pusã.»

7La rĩm a Zoaas sẽn deeg a naamã taa yʋʋm pisi la a tãabo, tɩ maan-kʋʋdbã rag n ket n nan ka maneg Sẽn-Ka-Saab roogã zĩis nins sẽn pusã ye.

8Woto, rĩm a Zoaas boola maan-kʋʋd a Zehozada ne maan-kʋʋdb a taabã n yeel-b yaa: «Bõe yĩng tɩ yãmb ket n nan ka maneg Sẽn-Ka-Saab roogã zĩis nins sẽn pusã? Ade, moasã, yãmb ka leb n tar noor tɩ reeg ligd y mitbã nengẽ ye. Bɩ y bas ligd-kãng tɩ b kɩs tɩ b maneg Sẽn-Ka-Saab roogã.»

9Maan-kʋʋdbã sakame n bas n ka na n leb n deeg ligd nebã nengẽ, la b ka na n leb n lʋɩ taoor n soog Sẽn-Ka-Saab roogã manegr yell ye.

10Woto, maan-kʋʋd a Zehozada maana koglg n kɩbg võor a limdã zugu, n dɩk-a n dɩgl tẽn-kugrã rɩtgo, zĩig ning nebã sẽn loogd n kẽed Sẽn-Ka-Saab roogẽ wã. Maan-kʋʋdb nins sẽn dag n gũud rignoorã rag n dɩkda ligd ning fãa nebã sẽn talld n watẽ wã n ningd koglgẽ wã.

11B sã n wa n mik tɩ ligdã lebga wʋsg koglgã pʋga, rĩmã seb-gʋndã ne maan-kʋʋr kãsmã kẽngdame n tɩ vaag ligdã sẽn be Sẽn-Ka-Saab roogẽ wã n sui yond pʋse, n tɩ sõde.

12Bãmb sã n sõd ligdã n sɛ, b rɩkd-a lame n kɩs neb nins sẽn get Sẽn-Ka-Saab roogã tʋʋm yellã. B tara ligd-kãng n yaood ra-wãadbã ne neb nins sẽn tʋmd Sẽn-Ka-Saab roogã tʋʋmã.

13Leb n yaa ligd-kãng la b tar n yaood tãn-metbã ne kug-pɛɛsdbã, la b raad raadã ne kug nins b sẽn na n pees Sẽn-Ka-Saab roogã manegr yĩnga, la b maand tʋʋm nins fãa sẽn kẽed ne Sẽn-Ka-Saab roogã manegr wɛɛngẽ wã.

14La b ka tol n yãk ligdã nebã sẽn tar n wat Sẽn-Ka-Saab roogẽ wã n maan wanzuri laase, wall sʋʋse, bɩ zɩɩm mesb laase, wall bardo, bɩ sãnem wall wanzuri teed ye.

15B rag n dɩkda ligd-kãens fãa n kɩt neb nins sẽn get Sẽn-Ka-Saab roogã tʋʋm yellã.

16Bãmb sã n dag n sõd ligdã n kɩs tɩ b yao tʋmtʋmdbã, b ka leb n sokd bãmb b sẽn tall ligdã n maan bũmb ning ye. Bala, bãmb dag n tʋmda tʋʋmdã ne pʋ-peelem.

17Beegr maoongã ligdi, ne yel-wẽnã maoongã ligd rag n ka wat Sẽn-Ka-Saab roogẽ wã ye. Ligd-kãng yaa maan-kʋʋdbã n so.

18Wakat-kãnga, Siiri rĩm a Azayɛll kẽng n tɩ zaba ne Gat tẽngã n tõog n deeg-a. La a Azayɛll dag n dat n kẽng n tɩ zaba ne Zeruzalɛm.

19Zʋʋda rĩm a Zoaas wʋka teed nins fãa sẽn welg toor Sẽn-Ka-Saab roogã yĩngã. Yaa teed nins fãa yẽnda yaab-rãmb a Zozafat ne a Zehoram la a Akaazɩya, sẽn dag n yɩ Zʋʋda rĩm-dãmbã, sẽn welg toor Sẽn-Ka-Saab yĩngã, ne teed nins yẽnda mengã sẽn dag n welg toor Sẽn-Ka-Saab yĩngã, n paas sãnem ning fãa sẽn dag n be Sẽn-Ka-Saab roogã laog bĩngr zĩigẽ wã ne na-yirã. Yẽnda rɩka te-bãmb fãa n tʋm tɩ b tɩ kɩs Siiri rĩm a Azayɛlle, la a Azayɛll ka leb n zab ne Zeruzalɛm ye.

20A Zoaas tʋʋm a taabã ne a sẽn maan bũmb ninsã fãa gʋlsa Zʋʋda rĩm-dãmbã kibay sebr pʋga.

21A Zoaas tʋmtʋmdbã zemsa taab n na n zãmb-a. Bãmb zemsa taab n kʋ a Zoaas Bɛt-Milo, sor ning sẽn sigd n dabd Silla wã zugu.

22A Simeyat biig a Yozabaad ne a Someer biig a Yehozabaad sẽn yaa a Zoaas tʋmtʋmdbã n kɛ a Zoaas n kʋ. La b mum-a-la a saam-dãmbã yaadẽ, a Davɩɩd tẽngã pʋga. Dẽ, yẽnda biig a Amatsɩya n led yẽnda zĩigẽ n dɩ naamã.

← Chapter 11 Jump to: Chapter 13 →