2 Kings 16

Mossi MPBU (WẼNNAAM SEBRE 2014)

← Chapter 15 Jump to: Chapter 17 →

1A Remaliya biig a Peka sẽn deeg naam tɩ yʋʋm piig la a yopoɛɛlẽ, la a Zotam biig a Akaaz lebg Zʋʋda rĩmã.

2A Akaaz sẽn wa n na n deeg naamã t'a tara yʋʋm pisi. La a rɩɩ naam Zeruzalɛm yʋʋm piig la a yoobe. Yẽnda ka maan sẽn yaa tɩrg Sẽn-Ka-Saab sẽn yaa yẽnda Wẽnnaamã nifẽ, wa yẽnda yaab a Davɩɩd sẽn maanã ye.

3A Akaaz me maana wa Israyɛll dĩm-dãmb a taabã, hal n tol n dɩk a meng biig n kõ tɩ b maan maoong n yõog bugum, wa buud a taabã sẽn dag n maand tʋʋm-beed nins tɩ Sẽn-Ka-Saab kɩt tɩ Israyɛll nebã rig-bã.

4Yẽnda rag n kẽnd n maanda maand la a yõogd wisd maoong kʋʋb zĩisẽ wã ne kunkubã zutu, la ne tɩɩs nins fãa sẽn tar-b maasmã tẽngre.

5Woto, Siiri rĩm a Retsĩn ne a Remaliya biig a Peka sẽn dag n yaa Israyɛll dĩmã kẽng n na n tɩ zaba ne Zeruzalɛm. Bãmb gũbga a Akaaz n na n zab ne-a, la b ka tõog n zab ne-a ye.

6Wakat-kãnga, Siiri rĩm a Retsĩn tõog n deega Elat tẽngã n lebs Siiri nebã nugẽ. A Retsĩn riga Zʋɩf-rãmbã n yiis Elat tẽnga, la Edom nebã wa n kẽe Elat tẽngã n ti, n ket n be beenẽ hal tɩ ta rũndã.

7A Akaaz tʋma neb tɩ b kẽng Tɩlgat-Pilezɛɛr n tɩ yeel Asiiri rĩmã yaa: «Mam yaa yãmb tʋmtʋmda, la y biiga. Wa-y n fãag-y maam Siiri rĩmã ne Israyɛll dĩmã nugẽ, bala, b yik n dat n zaba ne maam.»

8A Akaaz wʋka wanzuri wã ne sãnemã sẽn be Sẽn-Ka-Saab roogẽ wã n tʋm tɩ b tɩ kõ Asiiri rĩmã.

9Asiiri rĩmã kelga a Akaaz goamã, n yik n tɩ zab ne Damaas sẽn yaa Siiri na-tẽngã n tõog n deeg-a, la a yõg tẽngã neb n tall-b n tɩ kẽes yembd Kɩɩr tẽnga, la a kʋ Siiri rĩm a Retsĩn.

10Rĩm a Akaaz kẽnga Damaas n na n tɩ seg Asiiri rĩm a Tɩlgat-Pilezɛɛre. Rĩm a Akaaz sẽn tɩ yã tẽn-kugr ning sẽn be Damaasã, a rɩka tẽn-kugrã mamsgã fãa ne a meebã sẽn tog n yɩ to-to wã n tʋm tɩ b tɩ kɩs maan-kʋʋd a Uuri.

11Maan-kʋʋd a Uuri mee tẽn-kugrã t'a kell n zems wa mamsg ning rĩm a Akaaz sẽn zĩnd Damaas n tʋm tɩ b wa kõ yẽnda wã. Maan-kʋʋd a Uuri mee tẽn-kugrã n sɛ tɩ rĩm a Akaaz nan ka yi Damaas n wa ye.

12Rĩmã sẽn yi Damaas n lebg n wa yã tẽn-kugrã, a kolgame n dʋ a zugu,

13n kɩt tɩ b maan maoong sẽn yõogd bugum, ne bõn-koaadl kũunã a zugu, la a rɩk bõn-yũudlã n daag beenẽ, la a rɩk zems-n-taar maandã zɩɩm n mes tẽn-kugrã zugu.

14La yẽnda yiisa zũud tẽn-kugrã sẽn dag n be Sẽn-Ka-Saab taoor Wẽnd doogã noorã, n dɩk-a n tɩ vigl tẽn-kug-paalgã rɩtgo.

15Rĩm a Akaaz yeela maan-kʋʋd a Uuri yaa: «Rɩk yibeoog maoong sẽn yõogd bugmã, ne zaabr kũunã, la rĩmã maoong ning sẽn yõogd bugmã ne a bõn-koaadl kũunã, la tẽngã nebã fãa maoong sẽn yõogd bugmã ne b bõn-koaadl kũunã, n yõog tẽn-kug-paalgã zugu. La f rɩk b bõn-yũudl kũunã n walg a zugu, la f rɩk maoong sẽn yõogd bugmã fãa zɩɩm ne maandã fãa zɩɩmã, n mes tẽn-kugrã zugu. La sã n yaa ne zũud tẽn-kugrã, mam meng n na n ges yẽnda yelle.»

16Woto, maan-kʋʋd a Uuri kell n maana wa rĩm a Akaaz sẽn yeelã.

17Rĩm a Akaaz pãba zũud sĩn-bedrã rogendsã n wã, la a sik sĩn-bedrã sẽn dag n zao niigã b sẽn maan ne zũudã zutã. La a rɩka sĩn-bedrã n dogl kug zutu.

18A Akaaz sẽn dat n maan sẽn noom Asiiri rĩmã yĩnga, yẽnda toeema zãong ning sẽn dag n be Sẽn-Ka-Saab roogã pʋg tɩ b boondẽ tɩ vʋʋsg daar zãongã. B me-a lame t'a tond yɩng tɩ rĩmã tũud be n kẽedẽ.

19Rĩm a Akaaz tʋʋm a taabã ne bũmb nins fãa a sẽn maanã gʋlsa Zʋʋda rĩm-dãmbã kibay sebr pʋga.

20A Akaaz saka a saam-dãmba, la b mum-a lame n naag a ba-rãmbã a Davɩɩd tẽngã pʋga. Yẽnda biig a Ezekɩyaas n led yẽnda zĩigẽ n dɩ naamã.

← Chapter 15 Jump to: Chapter 17 →