2 Kings 7

Mossi MPBU (WẼNNAAM SEBRE 2014)

← Chapter 6 Jump to: Chapter 8 →

1A Eliize yeelame yaa: «Kelg-y Sẽn-Ka-Saab koɛɛga! Sẽn-Ka-Saab yetame: ‹Beoog woto wẽnde, Samaari tẽngã noore, b na n daa zom kɩlo piig la a yiib wanzuri wakɩ-koɛɛng a yembre, tɩ Oorz kɩlo pisi la a naas raad wanzuri wakɩ-koɛɛng a yembre.› »

2Dẽ, wed-kɩɩm-naab ning sẽn tũud-a rĩmã yeela Wẽnnaam dao a Eliize yaa: «Gese, baa Sẽn-Ka-Saab sã n wurg sa-gãongã, bũmb a woto ka tõe n zĩnd ye.» La a Eliize yeel-a lame yaa: «Beneere, fo nin na n yãnda bõn-kãnga, la f kõn dɩ-a ye.»

3Neb a naas wãood sẽn tar n dag n be Samaari tẽngã noore. Bãmb goma ne taab n yeel yaa: «Bõe yĩng tɩ tõnd zĩ ka n gũud kũum?

4Tõnd sã n yet tɩ d na n leba tẽngã pʋga, komã sẽn be beenẽ wã yĩnga, d na n kiime. Tõnd sã n leb n pa ka me, d na n kiime. Rẽ wã, d yik n kẽng Siiri nebã tãb-sikẽ wã. Bãmb sã n bas-d n ka kʋ, rẽ la woto. B sã n kʋ-do, rẽ me la bala.»

5Dẽ, zĩigã sẽn dat n sobge, neb a naasã wãood sẽn tarã yikame n na n kẽng Siiri tãb-biisã tãb-sikẽ. Bãmb sẽn kolg Siiri rãmbã tãb-sikã, b mikame tɩ ned ba a yembr ka leb n be beenẽ ye.

6Bala, Sẽn-Ka-Saab rag n kɩtame tɩ Siiri nebã zĩnd b tãb-sikẽ wã n wʋm saar-dãmb ne wiidi, la tãb-bi-kʋʋng rãamde. Dẽ, Siiri tãb-biisã goma ne taab n yeel yaa: «Israyɛll dĩmã kẽng n tɩ zemsa ne Hɛt-rãmbã rĩm-dãmbã, la ne Ezɩpt rĩm-dãmbã n kõ-b ligdi, n yeel-b tɩ b wa zab ne tõndo.»

7Woto, Siiri rãmbã yika ne zĩ-sobd n bas b fu-rotã ne b wiidã, la b bõensã ne b tãb-sikã ne a teedã fãa n na n zoe n paam n põse.

8Neb a naasã sẽn ta tãb-sikã noore, b kẽe fu-roog a yembr pʋga, n mik rɩɩbo, n dɩ la b yũ. Dẽ, bãmb wʋka wanzuri, ne sãnem la fut n tɩ bao zĩig n solge. Bãmb lebg n wa kẽe fu-roog a to pʋga, n wʋk teed a taab n tɩ solge.

9Dẽ, bãmb goma ne taab n yeel yaa: «Tõnd sẽn maandã ka zems ye! Rũndã daarã yaa kiba-noog daare! Tõnd sã n bas tɩ beoogã vẽege, n ka togs neda, tõnd na n paama sɩbgre. Dẽ wã, wa-y tɩ d kẽng na-yirã n tɩ togse.»

10Bãmb kẽng n tɩ boola gũud a yembr sẽn dag n be tẽngã noor n yeel-a yaa: «Tõnd kẽnga Siiri rãmbã tãb-sikẽ, la tõnd mikame tɩ ned ba a yembr ka be beenẽ ye, la tõnd ka wʋm ned rãamd me ye. Dag n yaa wiidã ne bõensã b sẽn loe be wã, n paas fu-rotã ne b teedã fãa bal n be beenẽ.»

11Dẽ, tẽngã noor gũudbã tool n boola ned n togs-a t'a tɩ togs koɛɛgã na-yirã.

12Israyɛll dĩmã yika ne yʋng n yeel a tʋmtʋmdbã yaa: «M kot-y lame tɩ y bas tɩ m bilg-y Siiri nebã sẽn maand a woto wã võore. B miime tɩ kom n tar tõndo. Yaa rẽ yĩng la b sẽn yi n bas b tãb-sikã n kẽ weoogã n soondã, n gũudẽ tɩ tõnd sã n yi d tẽngã pʋga, bɩ b yõg tõndo, la b paam n deeg d tẽngã.»

13Rĩmã tʋmtʋmd a yembr yeelame yaa: «N-na! Sã n yaa woto, m kotame tɩ y bas tɩ d yãk wiid a nu wiid nins sẽn ketã sʋka, n tʋm neb tɩ b kẽng n tɩ gese. Bala, baa sẽn yaa-a soab me, bãmb me na n kii wa Israyɛll neb kʋʋngã sẽn na n ki wã.»

14Dẽ, rĩmã yãka saar-dãmb a yiibu, ne wiidã n tʋm neb tɩ b pʋgl Siiri-rãmbã tãb-biisã. La rĩmã yeel-b lame tɩ b kẽng n tɩ ges la b wa.

15Bãmb pʋgla Siiri nebã n ta Zʋrdẽ kʋɩlgã. La bãmb yãame tɩ sorã zug pida ne futu, la teed wʋsg Siiri nebã sẽn dag n basd tɩ lʋɩt b zoeesã wakate. Woto, b sẽn tʋm neb ninsã lebg n wa togsa rĩmã bũmb nins bãmb sẽn yã wã.

16Wakat-kãng bala, Israyɛll nebã yiime n kẽng Siiri nebã tãb-sikẽ, n tɩ zɛ b teedã. Dẽ, badaare, b rag n daada zom kɩlo piig la a yiib wanzuri wakɩ-koɛɛng a yembre, tɩ Oorz kɩlo pisi la a naas raad wanzuri wakɩ-koɛɛng a yembre, wa Sẽn-Ka-Saab sẽn dag n yeelã.

17Rĩmã rag n kɩtame t'a wed-kɩɩm-naab ning sẽn tũud yẽndã wã kẽng n tɩ ges tẽngã rignoor yelle. La neb kʋʋngã taba yẽnda beenẽ n kʋ. Kell n yɩɩ wa Wẽnnaam daoã sẽn dag n yeel wakat ning rĩmã sẽn wa yẽnda nengẽ wã.

18Wẽnnaam daoã dag n yeela rĩmã yaa: «Beoog woto wẽnde, b na n daa zom kɩlo piig la a yiib wanzuri wakɩ-koɛɛng a yembre, tɩ Oorz kɩlo pisi la a naas raad wanzuri wakɩ-koɛɛng a yembr Samaari tẽngã noore.»

19La wed-kɩɩm-naabã yaool n dag n yeela Wẽnnaam daoã tɩ baa Sẽn-Ka-Saab sã n wurg sa-gãongã, bũmb a woto ka tõe n zĩnd ye. La a Eliize rag n leok-a lame t'a na n yãnda bõn-kãng ne a nini, la a ka na n dɩ-a ye.

20Dẽ, yaa bũmb ning Wẽnnaam daoã sẽn yeelã n kell n paam wed-kɩɩm-naabã. Neb kʋʋngã sɩd tab-a-la tẽngã noor t'a ki.

← Chapter 6 Jump to: Chapter 8 →