2 Kings 22

Mossi MPBU (WẼNNAAM SEBRE 2014)

← Chapter 21 Jump to: Chapter 23 →

1Rĩm a Zoziyaas sẽn wa n na n deeg naamã t'a tara yʋʋm a nii, la a rɩɩ naam Zeruzalɛm yʋʋm pis-tã la a ye. Yẽnda ma yʋʋr dag n boondame t'a Yedida, n yaa Botskat tẽng rao a Adaya bi-pugla.

2A Zoziyaas maana sẽn yaa tɩrg Sẽn-Ka-Saab nifẽ, n tũ a yaab a Davɩɩd naoor n ka bʋdg n leb goabg bɩ rɩtg ye.

3Rĩm a Zoziyaas sẽn deeg a naamã tɩ yʋʋm piig la a niinẽ, a tʋma a Mesulam biig a Atsaliya biig a Safãn sẽn yaa seb-gʋndã, n yeel-a yaa:

4«Kẽng maan-kʋʋd kãsem a Hilkiiza nengẽ n tɩ yeel-a t'a sõd ligd ning nebã sẽn talld n wat n kɩt Sẽn-Ka-Saab roogã noor gũudbã.

5Yeel-a t'a rɩk ligd-kãng n kɩs neb nins sẽn get Sẽn-Ka-Saab roogã tʋʋmd yellã. Dẽ, bãmb n na n yao neb nins sẽn manegd Sẽn-Ka-Saab roogã zĩis nins sẽn pusã.

6Yaa ra-wãadbã, tãn-metbã ne tʋmtʋmdbã, la b ra raadã ne kugã sẽn peesã, roogã manegr yĩnga.

7La y ra sok-b b sẽn tall ligdã n maan bũmb ning ye. Bala, b tʋmda ne pʋ-peelem.»

8Dẽ, maan-kʋʋd kãsem a Hilkiiza yeela seb-gʋnd a Safãn yaa: «Gese, mam yãnda tõodã sebr Sẽn-Ka-Saab roogã pʋg n dɩke.» Maan-kʋʋd a Hilkiiza rɩka tõodã sebr n kɩs seb-gʋnd a Safãn t'a zẽk a koɛɛg n karm-a.

9Dẽ, seb-gʋnd a Safãn kẽnga rĩm a Zoziyaas nengẽ n tɩ yeel-a yaa: «Yãmb tʋmtʋmdbã tigsa ligd ning sẽn be Wẽnd doogẽ wã n kɩs neb nins sẽn get Sẽn-Ka-Saab roogã tʋʋm yellã taoor-dãmba.»

10Seb-gʋnd a Safãn leb n yeela rĩmã yaa: «Maan-kʋʋd a Hilkiiza kɩsa maam sebre.» La yẽnda zẽka a koɛɛg n karem sebrã rĩmã taoore.

11B sẽn karem tõodã sebr tɩ rĩm a Zoziyaas wʋm goam nins sẽn gʋls a pʋgẽ wã, a pãrsa a futu.

12Rĩmã yeela maan-kʋʋd a Hilkiiza ne a Safãn biig a Ayikam, la a Miise biig a Akboore, ne seb-gʋnd a Safãn la rĩmã tʋmtʋmd a Aazaya yaa:

13«Kẽng-y n tɩ sok-y Sẽn-Ka-Saab n ges sebr ning b sẽn yã wã goamã yell sẽn yaa to-to n wa togs maam ne Zʋʋda nebã fãa. Bala, Sẽn-Ka-Saab sũur puuga wʋsg ne tõndo. Tõnd yaab-rãmbã sẽn ka sak seb-kãngã goamã fãa n maan wa b sẽn gʋls be n wilg tõndã kɩtame, tɩ Sẽn-Ka-Saab sũur yik ne tõndo.»

14Maan-kʋʋd a Hilkiiza ne a Ayikam la a Akboor ne a Safãn n paas a Aaza kẽnga Wẽnnaam no-rɛɛs-poak a Ulda nengẽ. A Ulda rag n yaa a Haraas biig a Tikva biig a Salum sẽn yaa fut bĩngdã paga. Pʋg-kãng rag n bee Zeruzalɛm tẽngã sag-paallã pʋga. La bãmb dɩka koɛɛgã n togs a Ulda.

15Pagã yeela bãmb yaa: «Ade, kẽng-y n tɩ yeel-y ned ning sẽn tʋm-a yãmb mam nengẽ wã, tɩ Sẽn-Ka-Saab sẽn yaa Israyɛll Wẽnnaamã yetame:

16Maam a Sẽn-Ka-Saab yetame: Mam na n kɩtame tɩ toog paam tẽn-kãngã ne a nebã, wa sẽn zems goam nins fãa sẽn gʋls sebrã pʋgẽ tɩ Zʋʋda rĩmã karem n yãndã wã.

17Bãmb sẽn wẽnemd n bas maam n yõog wisd n kõ wẽn-naandse, la b tʋm tʋʋm-wẽns buud fãa wã yĩnga, mam sũurã yika ne tẽn-kãngã n ka na n sig ye.

18La y yeel Zʋʋda rĩmã sẽn tʋm yãmb tɩ y wa sok Sẽn-Ka-Saab n gesã yaa: Ad Sẽn-Ka-Saab sẽn yaa Israyɛll Wẽnnaamã sẽn yeel bũmb ninga, goam nins yãmb sẽn wʋmã wɛɛngẽ:

19Mam sẽn wilg m sẽn na n maan Zeruzalɛm ne a nebã bũmb ningã, la m sẽn yeel tɩ m na n sãam-a lame n kɩt t'a yɩ tẽng sẽn ka barkã yĩnga, fo sũurã sãamame, tɩ f sik f meng maam a Sẽn-Ka-Saab taoore. Fo pãrsa f futu, n yãb mam taoore. Woto, mam me wʋmame. Yaa Sẽn-Ka-Saab meng n gome.

20Yaa woto yĩnga, tɩ mam na n kɩt tɩ f ki ne bãane, n sak f saam-dãmba, n gãand f yaoogẽ wã n ka tol n yãnd tood nins mam sẽn na n kɩt tɩ tẽn-kãngã paamã ye. Dẽ, bãmb lebg n kẽnga rĩmã nengẽ n tɩ taas-a no-rɛɛs-poakã leokrã.»

← Chapter 21 Jump to: Chapter 23 →