Mark 10

Mossi Moore (KÃAB-PAALGÃ KOE-NOOGO)

← Chapter 9 Jump to: Chapter 11 →

1A Zezi yii be n kẽng Zude soolem pʋgẽ tẽnsẽ, la Zʋrdẽ rʋʋnd a to wã. La neb kʋʋng leb n tigma bãmb nengẽ, la bãmb leb n zãms-b lame wa b sẽn mi n maandẽ wã.

2Fariisẽ-dãmbã waa a Zezi nengẽ. B soka a Zezi sok-bẽdgo, n yeel tɩ rẽ yĩnga tõogã kõta rao noor t'a lebs a paga?

3A Zezi leoka bãmba: A Moyiis tõogã yeela yãmb tɩ bõe?

4Bãmb yeelame: A sakame tɩ b gʋls baosg sebr n kɩs-a la b rig-a.

5A Zezi yeela bãmba: Yaa yãmb sũyã sẽn diglmã yĩng la a Moyiis kõ yãmb tõ-kãnga.

6La hal dũni sɩngrẽ, "Wẽnnaam naana rao la paga.

7Yaa woto yĩnga, rao na n yii n basa a ba la a ma, n zĩnd ne a paga.

8La bãmb b yiibã fãa na n lebga yĩng a yembre." Woto, bãmb ka leb n ya a yiib yɛs ye, bãmb yaa yĩng a yembre.

9Dẽ, bɩ ninsaal da welg bũmb nins Wẽnnaam sẽn lagem ne taab ye.

10Bãmb sẽn kẽ roogẽ, b karen-biisã le soka bãmb koe-kãng yelle.

11A Zezi yeela bãmb yaa: Ned sã n dig a pag n dɩk pag a to, a yaa yoaad a pipi pagã nifẽ.

12La pag sã n bas a sɩd n dɩk a to, a maanda yoobo.

13Neb talla kom-bõoneg n wa a Zezi nengẽ tɩ b sɩɩs-ba, la b karen-biisã lenga neb nins sẽn wa-b ne-bã.

14A Zezi sẽn yã bõn-kãnga, a ka yɩ b sũurã noog baa bilf ye. La bãmb yeela b karen-biisã yaa: Bas-y kom-bõonegã tɩ b wa mam nengẽ la y ra gɩdg-b ye, tɩ Wẽnnaam soolmã yaa neb nins sẽn wẽnd-b bãmbã yĩnga.

15Mam yeta yãmb sɩda tɩ ned ning fãa sẽn kõn deeg Wẽnnaam soolmã koɛɛg wa bi-bilfu, a kõn kẽ be ye.

16Dẽ, bãmb deega kambã n tik-b ne b nusi, n ning-b barka.

17A Zezi sẽn yik n dɩk sore, dao a yen n zoe n wa n yĩgimd bãmb taoor n sok bãmb yaa: Karen-saamb sõngo, bõe la mam na n maan n paam vɩɩm sẽn kõn sa?

18A Zezi yeela yẽnda: Bõe tɩ fo boond maam tɩ sõngo? Nin-sõng ka be tɩ sã n ka Wẽnnaam b yen bala.

19Fo mii tõodã: "Da kʋ ye. Da yo ye. Da zu ye. Da kɩs kaset-zĩrĩ ye. Da zãmb ned ye. Waoog f ba la f ma."

20Yẽ leoka bãmb yaa: Karen-saamba, mam saka rẽnda fãa hal m yãadem wakat tɩ ta moasã.

21A Zezi ges-a lame n noang-a. La bãmb yeela yẽnda: Bũmb a yen n paoog foom. Kẽng n koos bũmb nins fãa fo sẽn tarã n kõ naong rãmba, la fo na paam paoong arzãna, la wa n tũ maam.

22La koe-kãng kɩtame tɩ rao wã neng gãnem t'a loog ne sũ-sãoongo, bala, a rag n tara paoong wʋsgo.

23A Zezi wẽnegame n ges n yeel b karen-biisã: A na n yɩɩ toog ne neb nins sẽn tar-b arzegsã tɩ kẽ Wẽnnaam soolmẽ.

24A Zezi gom-kãng yɛɛsa b karen-biisã, la a Zezi kẽnga taoor n yeel-ba: M kamba, ad na n yɩɩ toog ne neb nins sẽn teegd arzegsã tɩ b kẽ Wẽnnaam soolmẽ.

25A yaa naana tɩ yʋgemd tũ fu-pĩim yõorẽ n looge, n yɩɩd tɩ arzɛk soab kẽ Wẽnnaam soolmẽ.

26Bãmb karen-biisã yɛɛsg paasame tɩ b sok taab yaa: Dẽ, ãnna n tõe n paam fãagre?

27A Zezi gesa bãmb n yeele: Ninsaal ka tõe bõn-kãng ye, la ka a woto ne Wẽnnaam ye. Bala, Wẽnnaam tõee bũmb fãa.

28A Pɩyɛɛr sɩngame n yeel bãmba: Gese, tõnd basa bũmba fãa n tũud yãmba.

29A Zezi leokame: Mam yeta yãmb sɩda, tɩ ned ka be sẽn na n bas a yiri, bɩ a ba-bi-raopa, bɩ a ba-bi-pogse, bɩ a ma, bɩ a ba, bɩ a kamba, bɩ a pʋt mam yĩnga la koe-noogã yĩnga,

30n ka paam yiyã, la ba-bi-raopa la ba-bi-pogse, la ma-rãmba, la kamba, la pʋt naoor koabga, la namsg ye. La wakat sẽn wata, a na paam vɩɩm sẽn kõn sa.

31Taoor rãmb wʋsg na n lebga poorẽ dãmba, tɩ poorẽ dãmb wʋsg lebg taoor dãmba.

32Bãmb bee sorẽ n dabd Zeruzalɛm, la a Zezi lʋɩɩ bãmb taoore. Bãmb karen-biisã yɛɛsame, la neb nins sẽn dag n pʋgd bãmbã da maanda yɩɩre. A Zezi leb n peega b karen-biis piig la a yiibã n sɩng n togs-b bũmb nins sẽn na n paam bãmbã.

33Gese, tõnd dabda Zeruzalɛm, la b na n yõka Ninsaal Bi-riblã n kõ maan-kʋʋdbã kãsem-dãmbã ne tõog karen-saam-dãmbã. La b na n kaoo bãmb bʋʋd n yeel tɩ b kʋ-ba. B na n ninga bãmb bu-zẽms nusẽ,

34b na n yaala bãmba, n tʋbs bãmb kolkoodo, n pãb bãmb ne kalwaase, n kʋ bãmba. La b ki tɩ rab tãtẽ, b na vʋʋge.

35A Zebde kom-dibli a Zak ne a Zã kolga a Zezi n yeel bãmb yaa: Karen-saamba, tõnd datame tɩ yãmb maan bũmb ning tõnd sẽn na n kos yãmbã n kõ-do.

36A Zezi soka bãmba: Bõe la yãmb dat tɩ mam maan n kõ yãmba?

37Bãmb yeelame: Yãmb sã n wa n be y naama sẽn tar ziirã pʋgẽ, sak-y tɩ tõnd ned a yembr zĩnd yãmb dɩtgo, t'a to wã zĩnd yãmb goabga.

38A Zezi leoka bãmb yaa: Yãmb ka mi bũmb ning yãmb sẽn kotã ye. Dẽ yĩnga, yãmb tõee n yũu bõn-yũudl ning mam sẽn na n yũ wã, la y reeg toog ning mam sẽn na n deegã?

39Bãmb yeelame tɩ b tõeeme! La a Zezi leoka bãmba: Yaa sɩda, yãmb na n yũu bõn-yũudl ning mam sẽn na n yũ wã, la y reeg toog ning mam sẽn na n deegã.

40La a ka be ne maam tɩ sak tɩ yãmb zĩnd mam dɩtgo wall mam goabg ye. La neb nins Wẽnnaam sẽn segl zĩ-kãng b yĩngã na paam-a.

41Karen-biis piigã sẽn wʋm gom-kãngã, b sũur sãama ne a Zak la a Zã.

42A Zezi boola bãmb n yeel-b yaa: Yãmb mi tɩ neb nins nebã sẽn get wa soolem nanamsã maanda b nebã pãnga, la tɩ nin-kãsemsã soo bãmb ne pãnga.

43La a kõn yɩ a woto yãmb sʋk ye. Ned sã n dat n yɩ kãseng yãmb sʋka, bɩ a yɩ yãmb tʋmtʋmda.

44La ned sã n dat n yɩ taoor soab yãmb sʋka, bɩ a yɩ yãmb fãa yamba.

45Tɩ bõe, Ninsaal Bi-riblã sẽn wa wã, ka tɩ nebã na tʋm bãmb yĩng ye, la yaa tɩ tʋm nebã yĩnga, la tɩ kõ b vɩɩm tɩ yɩ yaoodo, tɩ neb kʋʋng wʋsg tõe n paam yolsgo.

46Bãmb taa Zeriko. La bãmb sẽn yit Zeriko ne b karen-biisã la neb kʋʋng wʋsgã, a Time biig a Bartime ra zĩi sorã kɩreng n bõosdẽ.

47Yẽ sẽn wʋm tɩ yaa Nazarɛt Zezi n watã, a sɩngame n kelem n yeele: Zezi! A Daviid Bi-ribla! Zoe-y mam nimbãanega.

48Neb wʋsg lenga yẽnda n yeel-a t'a sĩndi, la a zẽka a koɛɛg n yɩɩd pĩnd n yeele: A Daviid Bi-ribla, zoe-y mam nimbãanega!

49A Zezi yalsame n yeel tɩ b bool-a. La b boola zoangã n yeel-a: Keng f sũuri. Yik tɩ b boonda foom.

50Zoangã loba a fuug tẽng n yik wʋgʋp, n wa a Zezi nengẽ.

51A Zezi sok-a lame yaa: Bõe la fo rat tɩ mam maan n kõ foom? Zoangã leoka bãmb n yeele: M karen-saamba, m data m ninã pukri.

52La a Zezi yeel-a lame: Kẽnge! Fo tẽeb n maag foom. Tao-tao bala, a paama a nini, la a sɩngame n tũ a Zezi sorã zugu.

← Chapter 9 Jump to: Chapter 11 →