Mark 5

Mossi Moore (KÃAB-PAALGÃ KOE-NOOGO)

← Chapter 4 Jump to: Chapter 6 →

1A Zezi ne b karen-biisã taa ko-kãsengã rʋʋnde, tẽng sẽn boond tɩ Gadara.

2A Zezi sẽn yi koom-koglgã pʋgẽ bala, rao a yen zĩn-dẽgd sẽn tar yii yaad zĩigẽ n wa bãmb nengẽ.

3Rao-kãng da gãee yaadẽ wã, la neb da ka le tõe n sẽb-a ye, baa ne kutu.

4Bala, naoor wʋsgo, b ra balga a naowã ne kutu la b sẽb-a ne bãense, la a kaoo bãensã n sãam kutã, la ned baa a yen ka tar pãng sẽn sek tɩ tõog-a ye.

5Daar fãa, yʋng ne wĩndga, a bee yaadẽ wã la tãensã zut n kelemdẽ la a pogend a meng ne kuga.

6A sẽn yã a Zezi sẽn ket n be yɩɩga, a wudgame n ta n wõgemd bãmb taoore, n zẽk a koɛɛg n gom ne pãng n yeele:

7Zezi! Saasẽ-saasẽ Wẽnnaam bi-ribla, yãmb data maam ne bõe? Mam kota yãmb ne Wẽnnaam yʋʋr tɩ y ra nams maam ye.

8Bala, a Zezi yeela yẽnda yaa: Zĩn-dẽgdã! Yi n bas rao wã.

9La bãmb sok-a lame yaa: Fo yʋʋr la a bõe? T'a leok-ba: Mam yʋʋr la a Tusa wã, bala, tõnd yaa wʋsgo.

10La yẽ kosa a Zezi ne a sũur fãa n yeel tɩ b ra rig zĩn-dãmbã tɩ b yi tẽn-kãng ye.

11Kurkuy kʋʋng wʋsg n da be tãngã sẽne n wãbdẽ.

12La zĩn-dãmbã bõosa a Zezi n yeele: Tʋm-y tõnd kurkuyẽ wã tɩ d tɩ kẽ-ba.

13La b kõ-b la noore. La zĩn-dãmba yiime n kẽ kurkuyã tɩ b yi tãngã sigdg n wudg n lʋɩ ko-kãsengã pʋgẽ. La b sõorã kolga tus a yi, la koomã rɩ-b lame.

14La neb nins sẽn dag n gũud bãmbã zoeeme n tɩ togs koɛɛgã tẽngã pʋgẽ la a kɩremsã, la neba yiime n tɩ ges bũmb ninga sẽn maanã.

15Bãmb waa a Zezi nengẽ, la b yãa ned ning zĩn sẽn boond tɩ Tusa wã sẽn dag n tarã, t'a yer fut n zĩẽ, n mi a nenga.

16Neb nins sẽn yãnd bũmb ning sẽn maanã togsa neb a taabã sẽn yɩ to-to ne rao ning zĩna sẽn da tarã, la ne kurkuyã.

17Dẽ, bãmb sɩngame n kos a Zezi ne b sũur fãa tɩ b yi n bas b tẽngã.

18Bãmb sẽn wa n kẽed koom-koglgẽ wã, rao ning zĩna sẽn dag n tarã kosa bãmb noor n na n pa ne bãmba.

19La a Zezi ka sak ye, n yeel-a t'a kuil a nebẽ n tɩ wilg bũmb nins fãa Zu-soabã sẽn maan yẽnda wã, la b sẽn zoe yẽ nimbãaneg to-to.

20Yẽ kẽnga Dekapol soolem n tɩ moon bũmb nins fãa a Zezi sẽn maan n kõ yẽ wã. La neba fãa yɛɛsame.

21A Zezi kẽe koom-koglgã n leb ko-kãsengã rʋʋnde. La neb kʋʋng wʋsg le tigma taab bãmb nengẽ, la a Zezi da bee koomã noore.

22La karen-doog kãsem a yembr n wa be t'a yʋʋr boondẽ t'a Zayirus. Yẽ sẽn yã a Zezi, a wõgemda bãmb taoore,

23n kos bãmb ne a sũur fãa n yeele: Mam bi-pugl n kolg kũum. Wa-y n sɩɩs-y-yã-a ne y nus t'a sãoog n tɩlge.

24A Zezi yãaga yẽnda, la neb kʋʋng wʋsg tũu bãmba, n dɩdgd bãmba.

25Mik tɩ pag a yen n da be be t'a zɩɩm yit hal yʋʋm piig la a yiibu.

26Yẽ namsa wʋsg tɩpdb wʋsg nusẽ, n kɩs bũmb nins fãa a sẽn da tarã, la a ka sãoog baa bilfu, bãagã pʋs n yãngdame.

27A wʋma a Zezi kibare, la a wẽdga nebã n wa a Zezi poorẽ n sɩɩs bãmb fuugu.

28Bala, a ra yeela a sũurẽ woto: Mam sã n tõog n sɩɩs b futã bala, mam na n paama maagre.

29La wakat kãng bala, zɩɩma sẽn dag n yitã yõkame, la a bãnga a yĩngã pʋgẽ tɩ bãagã bas-a lame.

30Wakat kãng bal me, a Zezi bãnga b mengã pʋgẽ tɩ pãng n yi bãmb nengẽ. La b wẽnemda kʋʋngã sʋk n soke: Ãnna n sɩɩs mam futã?

31Bãmb karen-biisã yeela bãmb yaa: Yãmb yãame tɩ neb wʋsg rɩdga yãmba, tɩ yãmb le sokdẽ tɩ ãnna n sɩɩs yãmba.

32La bãmb da wẽnemdame n na n ges n bãng sẽn maan-a bõn-kãngã.

33La rabeem yõka pagã t'a rigda, la a sẽn mi bũmb ning sẽn maan yẽ yĩngẽ wã yĩnga, a waa n yĩgimda a Zezi taoore, n pelg a pʋgã fãa n togs bãmba.

34La a Zezi yeela yẽnda: M biiga, fo tẽeb n maag-fo. Kẽng ne laafɩ n paam f meng ne bãag ning sẽn tar foomã.

35Bãmb sẽn ket n gomda, neb yii karen-doog kãsmã zakẽ n wa n yeele: Yãmb bi-puglã kiime, bõe tɩ y na n kell n nams karen-saamba?

36La a Zezi ka kelg gom-kãens ye, la b yeela karen-doog kãsmã yaa: Da maan dabeem ye, tẽ bala.

37La b ka sak tɩ ned yãag bãmb ye, sã n ka a Pɩyɛɛr la a Zak ne a ba-biig a Zã.

38B sẽn ta karen-doog kãsmã zakẽ, a Zezi yãa neb wʋsg sẽn be be n yãbda, n wiisdẽ, n maand bʋʋr wʋsgo.

39Bãmb kẽeme n sok neba yaa: Yaa bõe tɩ yãmb maand bʋʋr a woto la y yãbda? Biigã ka ki ye, a gõeeme.

40La neba yaala bãmba. Dẽ, a Zezi kɩtame tɩ neba fãa yi, la b tall biigã ba ne a ma, ne b karen-biis a tãabã sẽn yãag bãmbã n kẽ biigã sẽn be zĩig ningã.

41Bãmb gãda biigã nug n yeel-a: "Talita kumi" sẽn dat n yeel tɩ: Mam bi-pugla, mam yeta foom tɩ f yiki.

42Tao-tao bala, bi-puglã yikame n sɩng n kẽnda, bala, a ra tara yʋʋm piig la a yiibu. La nebã yɛɛsa wʋsgo.

43A Zezi sagla bãmb neere n yeel-b tɩ b gũus tɩ ned da bãng ye, n yaool n yeel-b tɩ b bao rɩɩb n kõ biigã t'a rɩ.

← Chapter 4 Jump to: Chapter 6 →