Mark 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Rasem bilf rẽ loogr poore, a Zezi lebg n waa Kapɛrnawom, la nebã wʋmame tɩ b bee roogẽ.

2Nebã tigma taab hal wʋsgo, tɩ weer ka be baa rig-noorẽ wã ye. La a Zezi moona bãmb Wẽnnaam koɛɛga.

3B talla ned a yen sẽn ki bogr n wa bãmb nengẽ, la yaa neb a naas n tʋk-a.

4La bãmb sẽn ka tõe n tall-a n ta a Zezi nengẽ neba waooglem yĩngã, b laka roogã zugu, zĩig ning a Zezi sẽn yɛsã n tũnug võ-kãnga n sik ki-bogrã ne a gãagã.

5A Zezi sẽn yã b tẽebã, b yeela sẽn ki-a bogrã yaa: M biiga, fo paama f yel-wẽna sugri.

6Tõog karen-saam-dãmb kẽer sẽn da zĩ be ra tagsda b sũurẽ woto:

7Yaa a wãn tɩ ra-kãnga gomd a woto? Bãmb paoogda Wẽnnaam. Ãnna n tõe n kõ yel-wẽn sugr tɩ ka Wẽnnaam b yen tãa?

8A Zezi bãnga bũmb nins b sẽn tagsd b sũurẽ wã n sok-b yaa: Yaa bõe tɩ yãmb tagsd woto y sũyã pʋse?

9Bʋg n ya naana n yɩɩd tɩ yeel ki-bogr soabã: Fo paama f yel-wẽna sugri, bɩ yik n dɩk f gãagã n kẽne?

10La yaa tɩ yãmb na bãng tɩ Ninsaal Bi-riblã tara pãng dũni zug tɩ kõ yel-wẽn sugri.

11La a Zezi yeela ki-bogr soabã yaa: Mam yeta foom tɩ f yik n dɩk f gãagã n kuili.

12Tao-tao bala, a yikame n dɩk a gãagã n loog nebã fãa nifẽ, tɩ b fãa yɛɛs n pẽg Wẽnnaam n yeele: Tõnd nan ka yã bũmb a woto nand ye.

13A Zezi leb n kẽnga mogrã noore, la kʋʋngã fãa waa bãmb nengẽ. La bãmb zãms-b lame.

14A Zezi sẽn loogda, b yãa a Alfe biig a Levi t'a zĩ yaood-deegr zĩigẽ. Bãmb yeela yẽnda yaa: Tũ maam. La a Levi yikame n tũ bãmba.

15A Zezi sẽn zĩ a Levi roogẽ n dɩtẽ, yaood-dɛɛgdbã ne yel-wẽn maandb wʋsg me lagmame n dɩt ne bãmba, ne b karen-biisã. Bala, b yɩɩ wʋsg n tũ bãmba.

16Tõog karen-saam-dãmbã sẽn ya Fariisẽ-dãmb sẽn yã t'a Zezi rɩt ne yaood-dɛɛgdbã la ne yel-wẽn maandbã, b soka b karen-biisã yaa: Bõe yĩng tɩ bãmb dɩt la b yũud ne yaood-dɛɛgdbã la ne yel-wẽn maandbã?

17A Zezi sẽn wʋm woto, b yeela bãmba: Nin-kegems ka baood tɩp ye, yaa bãad-dãmb n baooda. Mam ka wa n na n bool nin-tɩrs ye, la yaa yel-wẽn maandbã.

18A Zã karen-biisã ne Fariisẽ-dãmbã da loeta noore. Nebã wa n soka a Zezi: Yaa bõe t'a Zã karen-biisã ne Fariisẽ-dãmbã karen-biisã loet noor tɩ yãmb karen-biisã ka loetẽ?

19A Zezi leok-b lame n yeele: Ned sã n maan kãadem n bool neba, nin-kõens tõee n loee noor wakat ning b sẽn ket n be ne-a wã sɩda? Bãmb sã n ket n be ne pʋg-paalã sɩda, b ka tõe n loe noor ye.

20Daar n wat tɩ b na n yiis pʋg-paalã sɩdã b sʋka. Dẽ, wakat kãnga, b na yaool n loe noore.

21Ned ka rɩkd peen-paalg n lisg fu-kʋdg ye, tɩ bõe, peen-paalgã na n kɩtame tɩ fu-kʋdgã kẽeg n yɩɩg pĩnda.

22Ned ka suiid divẽ paalg ko-wao-kʋdẽ ye, tɩ bõe, divẽ wã na n kɩtame tɩ b pusi: Divẽ wã na raage, ko-waoosã na sãame. Divẽ paalg tog n suii ko-wao-paals pʋse.

23Zuif-rãmbã vʋʋsg daar a yen, a Zezi ne b karen-biisã da pɩʋʋgda pʋto, la b karen-biisã sẽn kẽndã, b sɩngame n yãgs koodo.

24Fariisẽ-dãmbã yeela bãmb yaa: Gese, yaa bõe tɩ bãmb maand bũmb ning sẽn ka zems tɩ maan vʋʋsg daare?

25A Zezi leok-b lame n yeele: Yãmb zɩ n karem bũmb ning a Daviid sẽn maan b yel-pakr wakate, la kom sẽn tar bãmb ne neb nins sẽn dag n be ne bãmbã laa?

26La tɩ bãmb kẽe Wẽnnaam roogẽ, maan-kʋʋd a Abiyataar zamaanẽ, n dɩ kaset bur-paadem sẽn ka zems tɩ neba rɩ, kal maan-kʋʋdbã bala, la tɩ bãmb kõo neb nins sẽn da be ne bãmbã me laa?

27B yeel-b lame yɛs yaa: Vʋʋsg raarã maana ninsaal yĩnga, la b ka maan ninsaal vʋʋsg daarã yĩng ye.

28Woto yĩnga, Ninsaal Bi-riblã soo bũmba fãa, baa ne vʋʋsg daarã me.

← Chapter 1 Jump to: Chapter 3 →