Mark 16

Mossi Moore (KÃAB-PAALGÃ KOE-NOOGO)

← Chapter 15 Jump to:

1Vʋʋsg daarã sẽn looge, a Maari sẽn yit Magdala ne a Zak ma a Maari la a Salome daa tɩdar sẽn ya yũ-noogo n na n tɩ yug a Zezi kũumã.

2Dimaasã daar yibeoog pĩnda, bãmb taa yaoogẽ wã sõ-pukr wakate.

3Bãmb goma ne taab n yeel tɩ ãnna n na n lak kugrã n bas yaoogã noor n kõ-ba.

4La bãmb sẽn zẽk b nens n gese, b yãame tɩ b bilga kugrã sẽn ya bedr wʋsgã n bas yaoogã noore.

5Bãmb sẽn kẽ yaoogẽ wã, b yãa bi-bɩɩg t'a zĩ rɩtgo n yer fu-pɛɛlga, la b yɛɛsame.

6Yẽ yeela bãmba: Da yɛɛs-y ye. Yãmb baooda Nazarɛt dao a Zezi b sẽn ka da-pɩkã zugã. Bãmb vʋʋgame. Bãmb ka be ka ye. Ad zĩig ning b sẽn dag n gãneg bãmbã.

7La y kẽng n tɩ yeel b karen-biisã ne a Pɩyɛɛr t'a Zezi na n denga yãmb taoor n kẽng Galile. Yaa beene la yãmb na n yã bãmba wa b sẽn da yeel yãmbã.

8Pagbã yii yaoogẽ wã n zoe ne yɛɛsg la rigbu. La yɛɛsgã yĩnga, bãmb ka togs ned tɩ bũmb ye.

9A Zezi sẽn vʋʋg dimaas daar yibeoogã, b reng n puka b meng ne a Maari sẽn yit Magdala, soab ninga bãmb sẽn dig zĩn-dãmb a yopoe tɩ yi n basã.

10La yẽ kẽngame n tɩ togs neb nins sẽn dag n be ne a Zezi wã la sẽn zĩ ne sũ-sãams la nintãmã.

11Bãmb sẽn wʋm t'a Zezi vɩɩme, la tɩ pagã yã-b lame, bãmb ka tẽ-a ye.

12Dẽ poore, a Zezi puka b meng ne bãmb neb a yiib sẽn dag n be sorẽ n kẽnd weoogẽ, la yɩɩ ne wẽneg a to.

13Bãmb me lebg n waa n togsa b taabã, la b kell n ka tẽ bãmb me ye.

14A Zezi yaool n puka b meng ne karen-biis piig la a yembrã, dẽ tɩ b zĩ n dɩtame. La a Zezi zab-b lame, b ka-tẽebã la b sũ-riglmã yĩnga. Bala, b ka tẽ neb nins sẽn yã bãmb b vʋʋgrã zugẽ wã ye.

15La a Zezi yeela bãmb yaa: Saag-y dũni tɛk fãa n moon neba fãa koe-noogã.

16Ned ning fãa sẽn na tẽ, tɩ b lis-a, a na paam fãagre. La ned ning fãa sẽn kõn tẽ na kong bʋʋm.

17Ad bãn nins sẽn na n tũ neb nins sẽn na n tẽ wã: ne mam yʋʋre, bãmb na n diga zĩn-dãmba la b gom gom-zẽnse.

18Bãmb na n yõga wiisi, la b sã n yũ bũmb sẽn ya zẽnem, a kõn zab-b ye. Bãmb na n tika bãad-rãmb ne b nusi, la b na n paama maagre.

19Zu-soab a Zezi sẽn gom woto n sɛ, dẽ Wẽnnaam zẽka bãmb n kẽng arzãna, la bãmb zĩnda Wẽnnaam nug rɩtgo.

20La bãmb karen-biisã kẽngame n moon koɛɛgã zĩig fãa. Zu-soabã tʋma ne bãmba, n maan bãn n tũnug koɛɛgã n wilg t'a yaa sɩda.

← Chapter 15 Jump to: