Mark 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1A Zezi leb n kẽe karen-doogã pʋgẽ, la rao a yen n da be be t'a nug ki.

2La Fariisẽ-dãmbã gũusa a Zezi n dat n bãng b sã n na n maaga yẽnda Zuif-rãmbã vʋʋsgã daare, sẽn na yɩlẽ n paam n dõd bãmba.

3A Zezi yeela rao ninga nug sẽn ki wã yaa: Yik n yaas sʋk ka!

4La b soka Fariisẽ-dãmba yaa: Dẽ yĩnga, noor beeme tɩ maan neer vʋʋsgã daar bii, bɩ tɩ maan wẽnga? Tɩ fãag ned bii, bɩ tɩ kʋ-a? La b sĩndame.

5A Zezi wẽneg n gesa b fãa ne sũ-yikri la ne sũ-sãoongo, b sũyã sẽn diglmã yĩngã. La b yeela rao wã t'a tẽeg a nugã. Rao wã tẽegame la a nugã vʋʋgame.

6Fariisẽ-dãmbã yiime n yẽs ne Herood poorẽ dãmba tao-tao n bao b sẽn na n maan to-to n menes a Zezi.

7A Zezi ne b karen-biisã kẽnga mogrã sẽne. La neb wʋsg yii Galile la Zude la Zeruzalɛm la Yidume la Zʋrdẽ rʋʋnde la Tɩɩr ne Sɩdõ tẽmse n tũ bãmba.

8Neb kʋʋng kʋʋng sẽn wʋm bũmb nins fãa bãmb sẽn maanã waa bãmb nengẽ.

9A Zezi yeela b karen-biisã tɩ b pẽneg kogl-bil yam-yam wakat fãa bãmb yĩnga, tɩ kʋʋngã ra wa n dɩdg bãmb ye.

10Bãmb sẽn maagd neb wʋsgã yĩng kɩtame tɩ bãad-dãmb wʋsg da maoodẽ n dɩdgd taab n dat n sɩɩs bãmba.

11Zĩn-dãmb nins sẽn ya rẽgdã sã n yã bãmba, b wõgemdeda bãmb taoor n kelem n yeele: Yãmb yaa Wẽnnaam Bi-ribla.

12La a Zezi keooga bãmb neere, n yeel-b tɩ b ra kaas b yʋʋrã ye.

13Rẽ zugẽ, bãmb dʋʋ tãngã n bool b sẽn dat b rãmbã tɩ b wa bãmb nengẽ.

14Bãmb yãka raop piig la a yiib tɩ b pa ne bãmba,

15tɩ b tõe n tʋm-b tɩ b tɩ moon koe-noogã, ne pãn-tõog tɩ rig zĩn-dãmba.

16Ad raop piig la a yiibã bãmb sẽn yãkã: a Sɩmo b sẽn pʋd a yʋʋr t'a Pɩyɛɛr,

17a Zak sẽn ya a Zebde biiga, ne a ba-biig a Zã, a Zezi sẽn pʋd b yʋy tɩ Boanergɛs, sẽn dat n yeel tɩ raop sẽn wẽnd wa sa-kɛlenga,

18a Ãndre, a Filip, a Bartelemi, a Matye, a Toma, a Alfe biig a Zak, a Tade,

19a Sɩmo sẽn boond tɩ zelot la a Zudas Iskaryo, ned ning sẽn zãmb-a a Zezi wã.

20A Zezi kuila yir ne b karen-biisã. La neb kʋʋng wʋsg tigma taab yɛs hal tɩ bãmb ka tar sẽk n na n dɩ ye.

21A Zezi roagdbã sẽn wʋm bõn-kãnga, b waame n na n peeg-ba, bala, b ra tagsdame t'a Zezi ra zʋbsdame.

22La tõog karen-saam-dãmbã sẽn yi Zeruzalɛmã yeelame: Belzebul n so bãmba. Bãmb rigda zĩn-dãmbã ne zĩn-dãmbã naab pãnga.

23A Zezi boola bãmba, n gom ne bãmb ne yel-bũnd n yeele: Sʋtãanã na n yɩɩ a wãn n dig sʋtãana?

24Soolem neb sã n welg taab n gõdg n zabd ne taaba, soolem kãng na wã.

25La yir a yen neb sã n welg taab n gõdg n zabd ne taaba, yi-kãng na wã.

26Woto, Sʋtãanã sã n zabd ne a menga, a welgame la a ka tõe n yals ye, a yell sãamame.

27Ned ka tõe n kẽ pãng soab roogẽ n wʋk a teedo, a sã n ka reng n sẽb-a ye. La a sã n sẽb-a, a tõe n yaool n wʋka a roogã teedo.

28Mam yeta yãmb sɩd tɩ ninsaalbã yel-wẽna fãa b sẽn maandã, la paoogr nins fãa b sẽn paoogdã tõe n paama sugri.

29La ned sã n paoog Sɩɩg-sõngo, a ka tõe n paam sugr abada. Yel-wẽn kãng paada ne-a wakat sẽn kõn sa.

30A Zezi goma a woto b sẽn yeel tɩ zĩn-dẽgd n tar bãmbã yĩnga.

31A Zezi ma ne b ma-biis waa n yalsa yɩng n tʋm tɩ b bool-b tɩ b wa.

32Kʋʋngã ra zĩndame n gũbg bãmba, la b yeela a Zezi yaa: Ad y ma ne y ma-biisã bee yɩng n baood yãmba.

33La b leokame: Mam ma yaa ãnna, la m ma-biis yaa ãnna rãmba?

34La b wẽnemdame n ges neb nins sẽn zĩ n gũbg bãmbã n yeele: Ad m ma ne m ma-biisi.

35Bala, ned ninga fãa sẽn maand-a Wẽnnaam daabo, ada soab n ya mam ma-bi-raoogo, la m ma-bi-poaka, la m ma.

← Chapter 2 Jump to: Chapter 4 →