Mark 9

Mossi Moore (KÃAB-PAALGÃ KOE-NOOGO)

← Chapter 8 Jump to: Chapter 10 →

1A Zezi leb n yeela nebã yaa: Mam yeta yãmb sɩda, tɩ neb n be ka n ka na n ki hal tɩ b yãnd Wẽnnaam soolemã sẽn wat ne pãnga.

2Yɩ tɩ rab-yoaablẽ, a Zezi peega a Pɩyɛɛr ne a Zak la a Zã n tall bãmb bal n dʋ tãn-luglug zugu, zĩig neb sẽn ka be. La a Zezi nengã tedga bãmb taoore.

3Bãmb futã pɩndame, n ya peels n yɩɩd dũni neb sẽn tõe n kɩt tɩ yɩ.

4A Eli ne a Moyiis puka bãmb taoore, n gom ne a Zezi.

5A Pɩyɛɛr yeela a Zezi yaa: Karen-saamba, yaa neer tɩ d pa ka, tɩ d tilg fu-rot a tãabo: yãmb a yembre, a Moyiis a yembre, a Eli a yembre.

6A ra ka mi a sẽn yet ye, bala, rabeem kãseng n da kẽ-ba.

7Sawadg waa n luda bãmba, la koɛɛg yii sawadgẽ wã n yeele: Ada yaa mam Bi-ribl-nongre. Kelg-y-yã-a.

8Tao-tao bala, karen-biisã wẽnesame n ges zĩiga fãa, la b ka yã neda, sã n ka a Zezi bal sẽn yɛs ne bãmbã.

9Bãmb sẽn sigd tãngã, a Zezi yeela b karen-biisã tɩ b ra saag n togs ned bũmb nins b sẽn yã wã, hal tɩ Ninsaal Bi-riblã vʋʋg n bas kũum.

10Bãmb talla koe-kãng bãmb sʋka, la b soka taab tɩ "vʋʋg n bas kũumã" võor yaa bõe.

11Karen-biisã soka bãmb woto: Yaa bõe tɩ tõog karen-saam-dãmbã yetẽ tɩ yaa tɩlɛ t'a Eli reng n wa?

12Bãmb leok-b lame yaa: Sɩda, a Eli n na n deng n wa n lebs n maneg bũmba fãa. La yaa bõe tɩ b gʋls tɩ yaa tɩlɛ tɩ Ninsaal Bi-riblã nams wʋsgo la b paam paoogre?

13La mam yeta yãmb t'a Eli waame, la nebã maana yẽ wa b sẽn data, wa b sẽn pĩnd n gʋls n gom a yellã.

14La bãmb sẽn kolg b karen-biis a taabã nengẽ, bãmb yãa neb kʋʋng wʋsg sẽn gũbg bãmba, la tõog karen-saam-dãmb sẽn wẽed nokoɛɛm ne bãmba.

15La nebã sẽn yã a Zezi wã, a ling-b la wʋsgo, la b zoeeme n tɩ pʋʋs-ba.

16A Zezi soka nebã: Yaa bõe yell la yãmb gomd ne bãmba?

17La rao a yen n zĩnd kʋʋngã sʋk n leok bãmba: Karen-saamba, mam waa ne m biig yãmb nengẽ. Zĩn sẽn kɩtd tɩ ned lebg mukã n tar-a.

18A sẽn yõk-a zĩig ning fãa, a lubd-a-la tẽnga tɩ tãntãn-puud yit a noorẽ, tɩ biigã wãb a yẽn n tɩre. La mam kosa yãmb karen-biisã tɩ b rig zĩnã la b ka tõog ye.

19A Zezi leoka bãmba: Yãmba, zamaan kãngã neb sẽn ka tẽebo, mam na n zĩnda ne yãmb hal tɩ ta wakat bʋgo? Mam na n maana sũ-mar ne yãmb hal tɩ ta wakat bʋgo? Tall-y biigã n wa ka.

20La b tall-a lame n wa bãmb nengẽ. Tao-tao bala, zĩnã sẽn yã a Zezi, a rĩmsa biigã ne pãnga, hal t'a lʋɩ tẽng n bilimdẽ t'a tãntãn-puud yita.

21A Zezi soka a ba wã: Wakat bʋg la a sɩng n maand biigã a woto? Yẽ leokame: Hal a sẽn ket n ya bilf wakate.

22La naoor wʋsgo, a lub-a-la bugmẽ bɩ koomẽ n dat n kʋ-a. La yãmb sã n tõe n maana bũmb bɩ y zoe d nimbãaneg n sõng-do.

23A Zezi yeela yẽ yaa: Yãmb sã n tõe? Ned ning fãa sẽn tẽed tõee bũmb fãa.

24Tao-tao bala, biigã ba zẽka a koɛɛg n yeele: Mam tẽedame. Paas-y m tẽebã t'a paoodame.

25A Zezi sẽn yã kʋʋngã sẽn zoet n watẽ wã, bãmb lenga zĩn-dẽgdã n yeel-a: Zĩn sẽn maand ned t'a lebg muk la wʋngã, mam yeta foom, yi n bas biigã la f ra leb n kẽ-a yɛs ye.

26La zĩnã kelmame, n zugs biigã ne pãng t'a lebg wa kũum, la a yi bas-a. Neb kẽer yeelame t'a kiime.

27La a Zezi gãda a nug n zẽk-a, la a yik n yalsa yĩngri.

28Wakat ning a Zezi sẽn kẽ roogẽ tɩ neb a taab ka be be, bãmb karen-biisã soka bãmb yaa: Bõe tɩ tõnd ka tõog n dig zĩn-kãngã?

29A Zezi yeela bãmb yaa: Bõn-kãngã ka yita, tɩ sã n ka ne pʋʋsg ye.

30Bãmb yii be n pɩʋʋg Galile. La a Zezi ka rat tɩ ned bãng bãmb sẽn beẽ ye.

31Bala, bãmb zãmsa b karen-biisã n yeele: B na n ninga Ninsaal Bi-riblã neb nusẽ. B na n kʋ-b lame, la b kʋ-b tɩ rab tãtẽ, b na n vʋʋgame.

32La bãmb karen-biisã ka wʋm gom kãng võor ye, la b zoee rabeem n ka sok bãmb ye.

33Bãmb taa Kapɛrnawom, la a Zezi sẽn kẽ roogẽ, b soka b karen-biisã: Yaa bõe poorẽ la yãmb da wẽed nokoeemd ne taab sorã zugã?

34La b sĩndame, bala, bãmb sẽn dag n be sorã zugã, b ra wẽeda nokoeemd ne taaba n dat n bãng sẽn ya-a kãseng n yɩɩd bãmb sʋka.

35Dẽ, a Zezi zĩndame n bool b karen-biis piig la a yiibã n yeel-b yaa: Ned sã n dat n yɩ taoor soaba, bɩ a yɩ neba fãa poorẽ soaba, la neba fãa tʋmtʋmda.

36Bãmb peega bi-bilfu n yals-a bãmb sʋka, n kogl-a n yeel b karen-biisã:

37Ned sã n deeg bi-bilf a woto mam yĩnga, yaa maam la a reeg-yã. La ned sã n deeg maam, ka maam la a reegɩ ye, yaa sẽn tʋm-a maamã la a reeg-yã.

38A Zã yeela bãmb yaa: Karen-saamba, tõnd yãa rao a yembr t'a rigd zĩn-dãmb ne yãmb yʋʋre, n yaool n ka tõnd tũud-n-taag ye. La tõnd gɩdg-a lame a sẽn ka tũud tõndã yĩnga.

39A Zezi leokame n yeele: Da gɩdg-y-yã-a ye, bala, ned ka be sẽn na n maan bõn-bãnd ne mam yʋʋre, n wẽneg n sãbs maam ye.

40Ned sã n ka kɩɩsd tõndo, a bee ne tõndo.

41Mam yeta yãmb sɩda, tɩ ned sã n kõ yãmb koom mam yĩng tɩ y yũ, yãmb sẽn ya Kirist nebã yĩnga, a soab kõn kong a keoor ye.

42La ned sã n maan kom-bõoneg kãens sẽn tẽed maamã ned a yembr t'a lʋɩ, sẽn ya neer n yɩɩd a soab yĩnga, yaa b sẽn na n loe a yubl ne neer kugr n lob-a ko-kãsengã pʋgẽ. Neer kuga (9.42)

43Fo nug sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nug-yend n paam vɩɩm sẽn kõn sa, n yɩɩd tɩ fo tall f nus a yiibã n tɩ kẽ bug-tẽnga, bugum sẽn ka kiid pʋgẽ,

44zĩig ning bãmb zũnzũy sẽn ka kiida la bugum sẽn ka kiida.

45Fo naoor sã n dat n maan foom tɩ f lʋɩ, bɩ f fiuug-a. Yaa neer tɩ fo yɩ nao-yende, n paam vɩɩm sẽn kõn sa, n yɩɩd tɩ f tall f nao a yiibã n tɩ kẽ bug-tẽnga,

46zĩig ning bãmb zũnzũy sẽn ka kiida, la bugum sẽn ka kiida.

47Fo nif sã n dat n maan foom tɩ f lʋɩ, bɩ f feoog-a. Yaa neer tɩ f yɩ nin-feoog n kẽ Wẽnnaam soolmẽ, n yɩɩd tɩ tall f nin a yiibã n tɩ kẽ bug-tẽnga,

48"zĩig ning bãmb zũnzũy sẽn ka kiida la bugum sẽn ka kiida."

49Tɩ bõe, ned fãa na n paama yuglg ne bugum wa yamsem.

50Yamsem yaa bõn-sõngo. La yamsem noosem sã n yi, yãmb na n maana bõe t'a leb n yɩ noogo? Tall-y yamsem noosem n zĩnd ne taab ne laafɩ.

← Chapter 8 Jump to: Chapter 10 →