Mark 6

Mossi Moore (KÃAB-PAALGÃ KOE-NOOGO)

← Chapter 5 Jump to: Chapter 7 →

1A Zezi basa zĩ-kãnga n leb b meng tẽngẽ, la b karen-biisã tũu bãmba.

2La Zuif-rãmbã vʋʋsg daar sẽn ta, bãmb zãmsa nebã karen-doogẽ wã. Neba wʋsg sẽn wʋm bãmb zãmsgã, b yɛɛsame n soke: Bãmb bãng-kãng yita yɛ? Ad yaa yam meng-meng la b kõ-ba, hal tɩ b tõe n maan bõn-bãn ne b nusi!

3Ka bãmb la ra-wãadã, a Maari biigã, a Zak la a Zoze la a Zuud la a Sɩmo ma-biigã? Bãmb ma-bi-pogs ka be tõnd sʋk ka sɩda? La yõwã kɩtame tɩ Nazarɛt nebã ka tẽ a Zezi ye.

4La a Zezi yeela bãmb yaa: Wẽnnaam no-rɛɛs ka kongd waoogre, sã n ka a meng tẽngẽ la a roagdb sʋka la a meng zakẽ ye.

5Bãmb ka tõog n maan bõn-bãnd baa a yen beene, sã n ka b sẽn tik bãad-dãmb kẽer ne b nus n maag-bã bala.

6La nebã ka-tẽebã yɛɛsa a Zezi. A Zezi saaga tẽn-kɩremsã n zãms nebã.

7Dẽ, bãmb boola b karen-biisã piig la a yiibã, n sɩng n tʋm bãmb b yiib-yiibu, n kõ-b pãn-tõog tɩ b rig zĩn-dãmb nins sẽn ya rẽgdã.

8A Zezi yeel-b lame tɩ b ra zã baa fʋɩ b kẽndã yĩnga, sã n ka rasaar bal ye. Tɩ b ra zã buri, wall korg bɩ ligd b sẽbds pʋs me ye.

9B yeel-b lame tɩ b wid neooda la b ra yeelg fu-yord a yiib ye.

10La a Zezi yeela bãmb yaa: Yãmb sã n tɩ sig ned zakẽ, pa-y be hal tɩ ta y loogre.

11La yãmb sã n kẽng tẽngẽ tɩ b ka reeg yãmba, la b ka kelg yãmba, bɩ y yi be la y pĩms y naowã tom tɩ bõn-kãng yɩ kaset b yĩnga.

12Bãmb loogame n moon n yeel nebã tɩ b tog n teka yam n kos sugri.

13Bãmb diga zĩn-dãmb wʋsgo, la b tigsa bãad-dãmb wʋsg ne kaam n maag-ba.

14Naab a Herood wʋma a Zezi kibare, bala, b yʋʋrã saaga zĩigã fãa. Neba yeelame: A Zãmbatiis vʋʋgame n yi kũum sʋka. Yaa woto n kɩt t'a tar pãng n maand bõn-bãna.

15Neb a taab yeelame: Yaa a Eli! La neb kẽer yeelame: Bãmb yaa Wẽnnaam no-rɛɛs wa Wẽnnaam no-rɛɛsdb a taabã.

16La Herood sẽn wʋm woto, yẽ yeelame: Yaa Zã ning mam sẽn da fiuug a zugã. Yaa yẽnda n vʋʋge.

17Tɩ bõe, Herood meng da kɩtame tɩ b yõk a Zã n sẽb n kẽes bi-bees roogẽ, yẽ ba-biig a Filip pag a Herodyaad a sẽn peegã poorẽ.

18Bala, a Zã ra yeel-a lame tɩ ka zems ne tõog tɩ yẽ dɩk a ba-biigã pag ye.

19A Herodyaad sũur yika ne a Zã t'a rat n kɩt tɩ b kʋ-a.

20La yẽ ka tõe ye, bala, Herood zoeta a Zã, a sẽn mi t'a yaa nin-tɩrg la nin-sõngã yĩnga. Herood gũ-a lame, la a sẽn wʋm a Zã goamã, lebga tagsg wʋsg ne-a. Baoosgo, a kelg-a la ne sũ-noogo.

21Herood sẽn tẽeg a dogem daar n maan kibs a nin-kãsemsã ne a sodaas nanamsã ne Galile soolem nanamsã yĩnga, a Herodyaad paama weer n na n maan a sẽn dag n datã.

22A Herodyaad bi-pugl kẽe roogẽ wã n sao, la biigã saoog yɩɩ Herood ne neb nins sẽn dag n zĩ ne yẽ n dɩtẽ wã noogo.

23Herood wẽena ne yẽnda n yeele: Fo sẽn kos maam bũmb ning fãa, mam na kõ foom, baa sã n ya mam soolemã pʋɩ-sʋka.

24La bi-puglã yiime n tɩ sok a ma: M kos bõe? La a ma wã leokame: Kos a Zãmbatiis zugã.

25La yẽ leba rĩma nengẽ tao-tao n tɩ kos yẽnda a woto: Mam datame tɩ y kõ maam a Zãmbatiis zug ne lengr moasã bala.

26Rĩma sũur sãamame. La a wẽenegã ne neba sẽn zĩ ne yẽnda wã yĩnga, a ka rat n tõdg ye.

27Tao-tao bala, rĩmã yeela dapoe-bil t'a kẽng n tɩ wa ne a Zãmbatiis zugã.

28Dapoe-bilã kẽngame n tɩ fiuug a Zã zugã bi-beesã roogẽ n sagl lengrẽ n tall n wa n kõ bi-puglã, la bi-puglã tallame n tɩ kõ a ma.

29La a Zã karen-biisã sẽn wʋme, b waa n dɩka kũuma n tɩ ning yaoogẽ.

30A Zezi tẽn-tʋmdbã tigma taab bãmb nengẽ n wilg bãmb bũmb nins fãa bãmb sẽn maane, la b zãms nebã.

31Neb wʋsg ra watame la b loogdẽ hal tɩ bãmb ka tol n tar weer n na n dɩ ye. Dẽ, a Zezi yeel-b lame yaa: Wa-y tɩ d yi we-kɛɛnga, neb sẽn ka beẽ tɩ y tɩ vʋʋs bilfu.

32Bãmb kẽe koom-koglgã n na n yi kɛɛnga, zĩig neb sẽn ka beẽ.

33La neb wʋsg yãa bãmb loogrã n bãng bãmba. La neb yii tẽns fãa n zoe ne nao n deng bãmb n ta zĩig ning bãmb sẽn dabdã.

34A Zezi sẽn yi koom-koglgẽ wã, b yãa neb kʋʋng wʋsgã, la b nimbãaneg yõka bãmba, tɩ bõe, bãmb wẽnda wa piis sẽn ka tar pe-kɩɩm ye. La bãmb sɩngame n zãms-b bũmb wʋsgo.

35Wakatã sẽn loogdã yĩnga, a Zezi karen-biisã kolga bãmb n yeele: Zĩ-kãngã yaa weoogo, la wakatã loogdame.

36Kɩt-y tɩ nebã loog n kẽng tẽn-bõonego la tẽn-kɩrems sẽn pẽ n tɩ ra dɩɩb n dɩ.

37A Zezi leok-b lame tɩ bãmb mensã kõ nebã rɩɩb tɩ b rɩ. La b yeela a Zezi: Tõnd na n kẽngame n tɩ ra bur deniye kobsi n wa n kõ-b tɩ b rɩ?

38La a Zezi leok-b lame n yeele: Yãmb tara bur a wãna? Kẽng n ges-y yã. Karen-biisã kẽngame n tɩ gese, la b wa n togs a Zezi tɩ yaa bur a nu ne zĩm a yiibu.

39Dẽ, bãmb yeelame tɩ b zĩnig nebã fãa sull-sull mo-maasã zugu.

40La bãmb zĩnda rulg-rulga, koabg-koabga la pis-nunu.

41A Zezi dɩka bur a nu wã ne zĩm a yiibã n nak n ges yĩngri, n ning barka, n yaool n kao burã n kõ b karen-biisã tɩ b pʋɩ kʋʋngã. Bãmb pʋɩɩ zĩm a yiibã me tɩ ta neba fãa.

42Bãmb fãa rɩɩme n tɩge.

43La b wʋka bur-gɩrsã ne zĩm-kɛlã peoog piig la a yiibu.

44Neb nins sẽn dɩ burã yaa raop tus a nu.

45Tao-tao bal yõwã zugẽ, a Zezi kɩtame tɩ b karen-biisã kẽ koom-koglgã n deng bãmb taoor ko-kãsengã rʋʋnde, Betsayida sẽne, tɩ bãmb mengã yõdg n kuils nebã.

46Bãmb sẽn kuils nebã n sa, b kẽnga tãngã zug n tɩ pʋʋse.

47Zĩ-sobd sẽn ta, koom-koglgã bee ko-kãsengã sʋka, t'a Zezi be tẽng b yembre.

48Bãmb yãame tɩ b karen-biisã namsda wʋsgo, n dugsd koom-koglgã, bala, sobg n segd-ba. Sẽn kolg tõd-beoogo, a Zezi kẽna ko-kãsengã zug n dabd b karen-biisã sẽne, n dat n loog-ba.

49Bãmb sẽn yã a Zezi tɩ b kẽnd koomã zugã, b tẽeme tɩ yaa kɩɩma,

50la b kelmame, bala, bãmb fãa yã-b lame, la rabeem yõka bãmba. Tao-tao bala, a Zezi goma ne bãmb n yeele: Keng-y y sũyã, yaa maam. Da zoe-y rabeem ye.

51Bãmb kẽe koom-koglgã pʋgẽ n paas b karen-biisã, la sobgã yõkame. Karen-biisã yɛɛsame n sẽege,

52tɩ bõe, bãmb dag n ka wʋm burã bõn-bãndã võore, b sũyã sẽn diglmã yĩnga.

53La bãmb sẽn pɩʋʋg mog-kãsengã, bãmb taa Genezarɛt soolmẽ, la b yalsa koomã noore.

54La bãmb sẽn yi koom-koglgẽ wã, nebã bãnga a Zezi tao-tao.

55La b zoeeme n kẽ soolemã fãa n tɩ rɩgs bãad-dãmbã ne pãnday n wa zĩig ning fãa b sẽn wʋm t'a Zezi be.

56A Zezi sẽn taẽ fãa, tɩ yaa tẽn-bõonegẽ, tɩ yaa tẽn-bɛdẽ, tɩ yaa pʋt rotẽ, nebã gãnegda bãad-dãmb raas pʋse, la b kosa a Zezi tɩ b sak tɩ b sɩɩs b fuugã noor bala. La neb nins fãa sẽn sɩɩsã paama laafɩ.

← Chapter 5 Jump to: Chapter 7 →